Nimthlakau Interview- Salai Zunphir

alai Zunphir thuhla tawi

Hmin                          : Sui Za Lian Thang
Suah ni                      : March 15,1982
Nu le pa                     : Pu Ngun Zal le Pi Ngun Tang
U le nau                     : Unau paruk lakah nautabik sang
Suahnak khua         : Falam
Hnatuan                    : JBS Cactus Beef Company
Innsungsang            : Nei hrih deuh lo.

CT: Tufangte khuitawk ah na um?
Zunphir:        Amarillo, Texas, USA ah ka um.

CT: Ziangmi na tuah..na tuan mi?

Zunphir:        JBS Cactus Beef Company ah hna ka tuan.

CT: Ziangtin Zunphir timi hmin na ngah thei?

Zunphir:        Falam kan rak um lai ah ka rualpa Francis Cung Bik thawn Hla Album suah thei dingin tumtahnak kan rak nei dah. Kan Band hmin dingah tiin thuhla phunphun kan pawlkhawm ciamco ih Francis Cung Bik in “Zunphir” ti sehla a tha kem tiin thu a rak bur, cucu tha kan ti tlang zet. Asinan, Band cu kan rak din khua suak thei lo. Cutin Zunphir timi hmin hi keimah in ka hmin ah ka rung hmang lan ta.

CT: Na biazai nganmi kan duhzet ih biazai paziat na ngan zo?

Zunphir:        Ka lungawi. Ka cing ciah lo nan Biazai hi 40 hrawng ka ngan zo ding.

CT: Biazai cabu na suah tum lo maw..na suah asile CT Team pawlin kan lo lei cih ding?

Zunphir: Si, “Nemnem Khohkhoh” ti’n Zunphir hmin in biazai cabu ukkhat ka rak suah zo.

Cun, rualpi pawl thawn kan suahmi tla a um hnuaihni: “Remzu” ti’n Nhge Pi le Awi Pi(Zing Mang) thawn ukkhat kan rak suah dah ih cule “Valentine Ni” ti le “Tlangzim Meikhu” timi pawl hi rualpi pawl thawn kan rak suahkhawmmi biazai cabu pawl an si.

Kan biak Cung Pathian in mithiang a lawr hrih lo asilen, hmaikum 2015 ah suah thei leh ka tum, a bak cu ka lo zawrh lo ding maw!:)

CT: Biazai hi thuthang bangin nitin ngan tum sehla a tha kem?
Zunphir:        A tum ih tum hi cu a sualnak a um lo ding:) Amahlawngte, ir-awm ih rung suak, biazai thlarau lung muril ih fialmi thaisuah ding cun a ol lo nasa ding.

CT: Ziangvek can tivek ah biazai ngan ding a suak tlangpi theu?
Zunphir:        Amah biazai thlarau ih cangvaih dandan in ka ngan theu . Cankhiah ka nei lem lo.

CT: Biazai ngan daan formal deuh a um an ti…formal timi na thlun ve maw?

Zunphir:        Biazai timi hi calai phunkhat a siih hla vekin awthluk (Rhythm) nei ih ngan le siar a rak si theu nan tui kan san ahcun a phunphun in, thlengaw dualdo in an ngan hluahhlo mai in ka thei. Cun miphun pakhat le pakhat karlakih biazai fehdan le awthluk hmandan tla hi a bangaw thei lo men ding. Formal thlun ciamco loin awm sung irhsuah biazai thlarau fialnak vekin, ka thawt dandan in siarnuam le ngainuam dingin ka ngan theu ti mai sehla.

CT: Biazai na ngan tikah na ruat nguarngo tuk maw?
Zunphir:        Ruat nguarngo dah! si, ka ruat nguarngo can a um theu ngai, biazai thlarau thazang a cah lo can ih ka ngan le.

CT: Biazai ih thupitzia in sim hen?

Zunphir:        Lakphakdawr ah sisehla kathaw tak in ka lo sim thei men ding nan:)

CT: Kan Falam sung ih biazai thiam na timi pawl khi zo pawl?

Zunphir:        Kan Falam biazai pi le pu pawl an thiam ka ti thluh.

CT: Article teh na ngan maw?
Zunphir:        Aih! Ngan lo.

CT: Cung Ngai ih Nunthuleng nganmi siar a nuam thei em; ziangruangah siar a nuam ti kan thei lo in sim thei pei maw?

Zunphir:        Tui na kum hi 24 asilole 30 hrawng na si ding:) kei khal ka rual Cung Ngai ih nunthuleng nganmi pawl hi siar nuam ka ti thei zet.

CT: Cung Ngai ih cangan khin Falam bazaar tong a hmang ih a thiam zet…hmang uar sinsin sehla na duh ve maw?
Zunphir:        Falam khawsung mino tong rori hmangin cangantu kan neihsun a si ruangah a cangandan ka duh zet. Ziangahtile, kan calai thawttertu le famkimtertu si vein ka hmuh ruangah a si.

CT: Cung Ngai ih thuhla malten in ruah bet thei kem…hnakruh a nei zo maw etc.?

Zunphir:        Lo ruah ding cu a tam nasa ding! Cung Ngai hi Falam Tlanglo (Matubuk)veng ah a suak ih phun 10 a on hnu Kawlrawn (Tahan) ah kum 3/4 hrawng a rak um. Cuisin Zenkung(Yangon) ah in vaihsan. Cuti ih rak thanglian a si ruangah khawlak tong tampi a thiam ih “A Tapmi Mitthli” timi a nunthuleng cabu kha uk 300 rak suah a siih thla 4 sungah a zuar thluh thei an ti.  Fala thu ah cun ” Lungphur khengtlang vel ” an ti maw cu vek deuh si ko 🙂

CT: Mai Sokhlei Par hi Nunthuleng Lalnu tiah CT Team pawl in an ko ih Nunthuleng lalnu tiih kawh a hlawhnaksan in sim thei pei maw?
Zunphir:        Kei khalin Nunthuleng lalnu a si ti’n ka lungkim ve zet. Tairial suah in a zuam ruangah Pathian in laksawng pe in a hman ruangah a si ding.

CT: Biazai lawng siloin hla na phuah tam nawn…paziat na phuah, zo pawlin an sak? Nangmah in teh na sak ve lo maw?

Zunphir:        Fing 20 hrawng ka nei ding. Ka hla phuahmi in saksaktu pawl cu: Solomon Menrihei in fing 3, Hute + Bawibik in fing 1, Cung Aung in fing 2, Su San in fing 1, Salai Ma Ruat in fing 1, BJ in fing 1, Bawikuk in fing 1, pawl an si. Sak ka duh ve zet nan, Solomon Menrihai le Ma Kim ih kawk ding ka phang :)

CT: Na hlaphuah mi an danglam theizet ih ziangmi tumtahnak ruangah hla na phuah?
Zunphir:        A hran ten rel ding ka thei lem lo (sorry!)

CT: Na biazai pawl na duh theh ding nan, na duhbikmi pakhat ten in share aw?
Zunphir:        A hnuai ih “Chinram Ka Nu” timi biazai hi ka duhbik.

“Chinram Ka Nu”
Ka ke i khih na khingte
Khui ram
Khui khua
Khui tual khalah
Awn kerko

CT: Biazai nganthiam kan duh ve ih lamzin in sim thei kem?
Zunphir:        Kei khal zir lai hawl rero lai ka si.

CT: E! Thudang deuh ah zunghruk bun ding lengdawh na hmu zo maw?
Zunphur:      Hmu zo nan, zunghruk ka nei hrih lo 🙂

CT: Na fala duhzawng in ruah ta?
Zunphir:        Elaw, lo ruah kung. “Kannih nunphung cu cuvek, kannih biaknak cu hivek” tiih ruah rero le sim rero tul lomi fala mawi 🙂

CT: Falam khua khi na tlawngkainak a siih hnianghno leh dingah tuah na tum maw?
Zunphir:        Thei tawk suah rori male, Falam pa ka sisi.

CT: Leitlun ih na nunsan bik ziang?
Zunphir:        Tufangte ahcun hlaphuah, biazai ngan le zuksuainak thawn ka thei tawkten Pathian in i run hmang ve sehla ka ti!

CT: Biazai nawnte’n Romantic Love na hmuh daan in simfiang aw?

Zunphir:        Eheu law! simfiang ka duh zet nan ….in ngaithiam ttul ding si hi.

CT: Na biazai siar theutu pawl hrangah cah duh na nei maw?
Zunphir:        “Ka lungawi ” a siartu nan zaten ka thazang nan si.

CT: Hla le biazai pawl ih mi thinlung neh dingih an hnatuan daan..in sim aw?

Zunphir:        Tawi famkim in milai thinlung sungah hnai an khuar thei.

CT: A thupten ca kan lo kuat duh len na ID?
Zunphir: zunphir@gmail.com

CT: Zaan sim hnu ih kan lo call duh len…no.?
Zunphir: 0180 6930 7408 (Sim tuk san lo!)

(Visited 228 times, 1 visits today)
%d bloggers like this: