Hlasak Thiam – Salai Kurbungbel

Malaysia ih pangpar dum…hmuan nuam zet pakhat ah Salai Kurbungbel cu umhar lileng ih a rak to cuahco laifang CT Palai Chin Hero cun a hmuh ih….

Malaysia: Salai Chin Hero in Salai Kurbungbel hnarpawn ah thusuhnak nei

CT: Chinmi  lakih hlasak thiam Salai Kurbungbel a hmaisabik ah CT hmin in na kut ka lo kai.

KBB:  Kalung awi, kei tla na kut ka lo kai.

CT: Mi tamsawn in na hmin hi Kurbungbel tiin anlo thei ih na hmin ngai in sim thei pei maw?

KBB: Simthei ko e!..ka hmintak cu Salai Ram Lian Cung(Cungpi) si.

CT: Na suahkehnak hmun, khua le atu na umnak hmun in sim thei pei maw?

KBB: Flam peng K.Hai Mual khua si..tulai fang hi Malaysia ah ka um.

CT: Unau suahpi, Nu le Pa hmin pawl teh in sim thei pei maw?

KBB: Suahpi Unau 6 kan si ih:

1.Salai Lian Hleih Thang FL
2.Salai Ram Lian Cung (kurbungbel)Malaysia.
3.Salai San Uk Hnin     FL
4.Salai Salom Bawi Cin Thang  Malaysia
5.Salai Mang Tin Piang FL
6.Salai Benjamin Sui Din Piang FL kan si. Kapa U Nawl Piang le Kanu Daw Bawn Hoi an si.

CT:  Na Series sung ihsin mipi ih an lo thei larbik mi Series hmin le suahkum in sim thei pei maw?

KBB: Ka Hngak Ko series(2003/2004) sung ta “Zindang a umlo” ti mi hla hi a si bik ko in ka thei.

CT: Chin Mino tamzet in na hla an ngai ih an sak tikah ziangtin na um, na diriam maw?

KBB: Sim theih lo  le rel theih loin ka diariam zet sokhaw.

CT:  Na hla duhbik ?

KBB: Anung mi hla…….Thaw nei mi ka ti duh san nak cu si lem lo.

CT: Live Show, Concert tivekin veiziangzat mipi na awi zo? Studio ih hlasak le Concert Stage par ih hlasak a dang aw in na thei maw?

KBB: Ah!!!  ka siar ciamco loih,,,..A tam thlang in ka thei..Studio le concert cu tam zetin a bang aw lo sokhaw…ziangah ti le cu, mah lawngih Arsa hang hrawp le  sungkua kim tlangih asa thawn ahang thawn hrawp tlang le ei tlang vualvo vek kha si mai….thaw ding ti uh law…hee..hee

CT: Chin hlasak thiam ciocio ah zo na ngainaa ih na ngaisang bik?

KBB:  Um ciam lemlo…an za ten an mah le dinhmun cio ah tluktu an nei lo an tha theh hai ko ka ti..

CT: Asilen, leitlun pumhuap ih hlasak thiam lakah zo na ngaisang, na duh, na uarbik? Ziang ruangah na uar?

Salai Chin Hero & Salai Kurbungbel cahlap zoh tlangin…

KBB: Heu…cu kel mak male AEROSMITH Band ih an vocal Steven Tyler hi..ka nauhak te lai in ka thih pi mi si. A hlasak mi pawl ka ngai tikah ka lung aa theu…ziang ka cang ti ka thei aw lo …ziangah ti le cu amah sungah ka rak lut ngah tuk kha arak si sawn theu hmang.

CT: Hmai lamah ziangvekin hmalak na tum ih ramthumnak lam ah teh feh tlang vivo na tum maw?

KBB: Lai awnmawi ka tuah tum vivo so khaw…Ram thumnak lam tla  feh tlang bet ka tum ko.

CT:  Ziang ruangah kawlram ah na khawsa (um) lo?

KBB: Remcan lo nak aphunphun ruangah si ….hehe..a tekuai ruangah cu si lem lo.

CT:  Hla fingziat na phuah?

KBB: Atam thlang ve sokhaw…cu zat ti ding  in ka rel fel loin ngai thiam aw CT.

CT:  Ziangtik in hla na rak sak thawk? Hlasak thiam si dingin ziangtluk zuamnak na nei?

KBB: Ka nauhak te lai in si…..aphunphun si ko e..nauhak deuh laiah cu hramlak le tlangpar kai in ka au …i sut mi thawn pehpar awin ka rak tong dah mi thu lo ruah ta ka duh ve mal lai. Yangon ka um laiah himi hla sak thu thawn veng upa pawl thawn kan rak el aw ta dah …mi dangkawl pawl a rualrual zantin an au an kio ko ..kei ka au ve le ka sak ve le in dodal ringring….zan khat zan cu upa pawl an ra ih sak nawnlo ding in Sen in thu ter ih …naa ka rak ti dan cu amak..cu mi zanah Kurbungbel a mitthli a rak tla ta dah……..

CT: Tu hi ziangtin na um…innsangnu na nei zo maw? Hla sah vivo ih Album thar dang tuah bet ding tumtahnak na nei maw?

KBB:  E! heu law, tuk sum in a….he..he..Uico a vak a vak ih saruh atong ti bangih..khua hlan lai ah cu ka rak nei/tong dah zo …..nan…..ka dam sung hla sak ka tum….Album thartla suah ka tum bek vivo lai.

CT: Kurbungbel timi hi nangmahte phuah awk mi maw, zo ih phuah mi a si..ziangha a san in sim thei pei maw..?

KBB:  Aw si kei mah te phuah mi si..a mah ka bang ih si ko..he..adang cu nan thei cia ko ding ka zum……..

CT:  Na ngainat bik mi le na ngainat lo bik mi hi ziang mi an si?

KBB: Ngainat bik le ngainat lo bik ti hi ka nei hran lo e…..nan  miphun dang va uar/duh hniaihniai pawl khi si ko.

CT: Chinlandtoday.info hi na rak siar/leng theu maw, ziangtin na ruat..?

KBB: Leng tuk ee,  Tha ka ti zet.

CT: Mi tampiin Pathian hlasak lo cu an ti, nangteh ziangtin na ruat?

KBB:  A tha e Pathian hlasak cu…a sak thei tu in sak mai ding…Pathian hlasak lo cu!..ti kherkher lo leh phunzai ciamco hlah seh la atha bik dingtin ka ruat. Kannih Laimi cun anih i Pathian hlasak cu pamhmai tuk kan ti aw theu.. ..cu mi hnakin Pathian ih thlawsuah/talent a hman dan thiam tum ding kan si sawn tin ka ruat.

CT:  Salurop timi Pu Thang Tin Sum ih phuah mi kha a mahih a thluk a tuahmi thawn an bangaw lo tiin mi tampi in an rel, a mah Pu Thang Tin Sum hnenah siannak (permit) na rak dil maw?

KBB:  Salurop dil ah pu Thang Tin Sum thawn tongaw thei loin vei 3 lai ka kirsal dah…Pu Thang Thang Sum ih rak suah dah mi  keimah khawte fa ti mi cauk sungah Salurop hi ka rak siar ngah ka duh zet…cuticun a mah tong ding le a hla dil dingin ka rak timlam aw ih remcang in kan ton aw thei fawn lo,,,ka hla pawl le studio ah ka lut rero zo si….adang hla pawl cu keimah phuah  mi si theh ih poi lo…hi mi hla hi Salurop telh tengteng le ka duh zet…neta bikah tai mak suah in a zung ah ka vung tong ih sakdan ding rem dan ding a phunphun kan ruah aw ih….e!!!a ngah tuk e na duh dandan in na rem thei na sak thei nan mah mino tu lai sanah e…nan a cafang cu na rem lo pei…in ti …ka lungawi tuk lawmlam ih ka lungawi thu tla sim ta man lo”n ka tlung ta in ka thei…a hla melody kha inn ka tlung lai Bus par ih a suak mi aw si..ka thlen ve ten a cafang thawn ka sak ih rem cang zet..a thai sunah studio ah kan thun lut cih ta dah..Phui ti mi thuah mitam zetin an rel nasa ti ka thei ih…….nuam cu ka ti lem lo ..mawi lo zet cu a rak si hmang nan..hla hi a aw thei ih sak menmen ding a si lo ti cu lo theih ter ka duh……..ziang kan tuahmi poh ah thu a um hmai ringring ..na tuah suak tak tak ding a sile cui a thu sungah na luh hnawh ta lo le na tuah mi kha a nung mi a si tin mi nih an pom thei cuang lo ding..himi Salurop hla tla a hla cafang sungah lut tahratin siar aw la na thei fiang ko ding. Kan Lai dan ih salurop  kan rak hman dan thu lawng ruat lohli men in cu a har zet ding..Studio ih karak sak lai ah ka rak feling tuk…ka mode a lut tuk…Salurop hla sungah i ciah tuk ih a cem nakah  PHUI ka rak ti ta….Khuahlan lai, kan lai danah cun Sakap thei le salurop tam neih hi kan tluang khawnnak tha bik ih kan rak hman mi a rak  si dah ta hmang nan..himi salurop hla siang zetih i rak pe tu Pu Thang Tin Sum parah sim cawk loin ka lungawi…leh thin sau zetih i rak ngai sak tu Lai awnmawi thangthar nonawn pawl parah sim cawk lo”n ka lung awi.

CT: Kan Chinram hi ngai in le ruatin na lung a leng dah maw?

KBB:   Amak in a mak.

CT: Kan Chinmi hi ziangtin na hmu, zaihla le awnmawi lamah?

KBB: Thangso nasa…tampi ke kar bet hi ka beisei .

CT: Mipi in ziangtin an lo pehtlai (contact) thei ding?

KBB: In peh tlai paih tak ah cu ngah tuk e..salaikbbel@gmail.com ah aw.

CT: Man lo zet cingin lo tawn theinak can in peknak parah tampi kan lungawi.

KBB: Kei khal ka lungawi zet.

Siartu Anka

%d bloggers like this: