Nimthlakau Interview – Salai DL Sen Ling

CT Lengtu,

CCYI Secretary DL Senling cu CT Team in Nimthlakau Interview a tuah. Nimthlakau Interview  cu (Caan reilote sung biakawknak le thusuhnak cu…Nimthlakau interveiew) tiah CT Team pawlin hmin an pe. Salai DL Senling hi ahmai sabik Nimthlakau Interview kan tuahnak ding a si.

CT: CCYI ram kauter sinsin dingah Kawlram tiang na thleng ih khuitawk khuapawl na pal….Cun, khuitawk hmunpawl ah CCYI branch nan din bet thei?

Salai DL Senling: Ka khualtlawnnak cu March 21 ihsin kekar ka thawk. Ahleicein tui’ kum ih ka khualtlawnnak cu India le Myanmar ihum Chin minopawl tong vivo dingah a si. CCYI hmin in Chin minopawl tonkhawmnak ka neihnak khuapawl cu Bangalore, New Delhi, Aizawl, Champhai, Thipcang, Haka, Falam, Tahan, Hantawadi, le Letpanchaung pawl an si.

CCYI branch kawmit’i hnget zet ih a hram kan phun zonak khuapawl cu Bangalore, Aizawl, Thipcang, le Tahan khuapawl ah an si. CCYI mipum umzonak khua le rampawl cu New Delhi, Haka, Falam, T’achilik, Pin Oo Lwin, Malaysia, Philippine, USA, Norway, le Denmark pawl ah mipum an karh vivo.

CT: Do kalhtu teh a tong pang maw?

Salai DL Senling: CCYI in tutiang ahcun dokalhtu a nei hrihlo a bang. Chin mipi thuruat theitu zate cun CCYI hi an dokalh ding tiah ka zum lo. Ziangahtile CCYI ih tumtahmipawl hi Chin mipi hamt’hatnak ding hrangih dinmi a si ruangah tutiang ahcun mipi ih duh le thazaang pek a dong zet.

CT: CCYI hi Chinmi lakah a mikhual nawnlo nasa ih ziangtlukin mipi pawlin an thei…alar tawkzet na ti maw?

Salai DL Senling: Chin mipi in CCYI hi an thei zet thlang ngai kan tithei. Ziangahtile CCYI in a tithei tawp suahin Chin mipi hrang le Pathian hrang ih hna a t’uan ruangah a si bik in ka ruat. Leitlun killi ih um (Myanmar ramsung ramleng) Chin mipipawl in CCYI thu hi anmah le umnak innsang, khua, kawhhran, le Sungbu (Internet) pawlah titinak le nganmi capawl zohin mipi ih thinlungah a lar tawkzet kan ti asile tam kan sual ka zum lo.

CT: CCYI ih a sunmang pawl in sim nawn sal hen…?

Salai DL Senling: CCYI hi kum khat lenglo thlacamnak thawn timlamnak neih hnu ih dinmi Pawlkom a si ruangah t’uansuak dingmi sunmang tampi pawlkom in a nei. Ahleicein Chin ram sunglam thupi zetah retin hnat’uan a si ding. Leitlun killi ih thleng Chin mino zate’n CCYI pawlkom hmang in thei aw vivo thluh ding le cumi kan theihawknak cun nelawknak in thlen pei ih cui’ nelawknak cun hnat’uan tlangnak ih lungrualnak in thlentu ah cang sehla cui’ hnat’uannak ih kan lungrualnak cun Khrih le kan Chin miphun hrang t’hathnemnak a thlen thei ding hi pawlkom ih duhthusam a si. T’ong dang deuh cun kan Chin miphun ih t’ulmi taksa le thlarau lam ih hnat’uan le t’hansonak thlen ding hi pawlkom ih hnat’uan tumtah le sunmang a si bik. Pathian thu le hla thawn a siat rero mi kan Chin ram le mipi hi Tho In Dinsaltu ding pawlkom kan si.

CT: CCYI ruangih na harsa tonmi le na nuamnak?
Salai DL Senling: CCYI ah umin Khrih le kan Chin miphun hrang tithei tawk suah ih t’an ka lak thei ve hi mi thlawsuak ah ka ruataw. Mai’ paihzawng hnat’uannak ih telve ticu har ti ding ka theilo, keimah sawn hi kan Chin miphun (midang) lole pawlkom t’hangso theilo dingin harsatnak petu ah ka cang sawn pang maw tihi ka cekaw t’heu sawn.

Chin mino le nulepa hnen ah CCYI theiternak ka tuah tikcaan ah mipipawl in, “Himi vek pawlkom rori hi si tui’sun kan Chin miphun ih kan t’ulmi pawlkom cu! CCYI hi na umlai rori ah kan khua ah kan din ding,” tiih an auaw vun theih hicun thazaang a hung thar hlunhlo. A t’hangharmi Chin mipipawl ih auaw theih hi ka khawp theilo, ngai nuam ka ti tuk.

CT: CCYI ah Chin mino tamsawn um dingah ziangmi a thupibik?
Salai DL Senling: Atlun ih sim zovekin CCYI cu kan biak Pathian le Chin miphun hrang ih hnat’uan tumtu a si vekin Chin minopawl in kan miphun taksa le thlarau lam ih t’hanso duhnak thinlung neih dinghi thil thupi bik a si. Kan Chin minopawl zatei’ theih dingih ka duhmi cu CCYI ah kan Chin minopawl ih talen (talent) le thlarau laksawng ngahmi zatei’ hman theinak ding hmun a si ruangah Chin mino zate’n kan fimthiamnak le neihmi ciau hmangin Pathian le Khrih hrangah kutkai awin kekar theinak ding hmun a si. Curuangah Chin mino zate’n himi pawlkom ah kan tlem thluh thei tihi kan theih dingah ka duh.

CT: Nangmah teh thainu….caimi fala teh na nei maw?
Salai DL Senling: Athlum le akha ei tlangin asa le adai tuar tlang dingih rak zuat deuhmi ka rak nei dah nain ka thinlung hnintertu caimi lengdawh cu Myanmar ramleng ah pasal nei dingin kuat a si ruangah thazaang thar lasal in, “Zoso ka tit le vun ih tlin tawkin ka damsung ka duat ding? Zoso ka falepawl in ‘Nunu’ tiih an kawh leh pei?” ti’n Chin fala ka mitmei deuh rero cu a si. Haaa… haa.. :-)

CT: Na umnak hmun bik le na hnatuan teh…?
Salai DL Senling: Ka nulepa cu Chinrawn khawlipi Tahan ah an um ih kei cu Bangalore khawlipi, Karnataka State, India ah ka um. Pumpi khapkhat hrangih ka kutkaih micu Youth for God Theological College ah Lecturer pakhat dinhmun in ka um.

CT: Chin mino in ziangmi kan tlasam?
Salai DL Senling: Chin mino ziangmawzat ih tlaksammi ih ka ruahmi cu mai’ hrang lawngah nung loin Khrih le Miphun hrang ziangtizawng in t’hathnemnak ka nei ve ding ti sunmang thar le t’ha (Creative mind) tampi neih ding hi a si. Cui’ sunmang neihmipawl cu mi va sim le ngan suak in a tak ih t’uansuaktu Chin mino si ding hi kan Chin miphun ih t’ulmi a si in ka ruat.

CT: Calai lamih na sunmang?
Salai DL Senling: Chin mipi in calai zung pakhat lawng nei in kan Chin Calai thazaang dazen (dozen) khat lai ih a feh rero mihi tiva bangin hmunkhat ih kan luantlang thei dinghi a si bik. Cuti’n kan Chin cabu tla tampi kan suah thei pei ih cangan thiamnak talen (talent) neitupawl khalin cangannak hmang in an pum an cawm aw thei ve ding.

CT: Thufim cabu lawrkhawm na tuah rero an lo ti?

Salai DL Senling: Leitlun Thufim, mi ropipawl ih t’ongkam le Chin t’ong ralkahpawl tla khawlkhawm in “NI TIN PAR” timi cabu hminih suah a si theinak ding hrang timtuahnak neih rero lai a si.

CT: Lengtu pawl hrang thucah?
Salai DL Senling: Chin Christian Youth International hi Chin mipi hrang ih dinmi pawlkom a sivekin Chin mipi zatei’ ta a si. Curuangah CCYI hi ka ta a si vekin na ta a si ve. Leitlun killi ih thleng Chin mino le Chin nulepa kan zate’n kan biak Pathian le kan Chin miphun hrang kutkai awin hmailam ah kekar vivo uhsi. Pathian ih thlawsuah pek ding tlakin hnat’uan uhsi. Mipi rian loin Pathian kan rian theilo.

%d bloggers like this: