Nimthlakau Interview- Salai Cung Nung

Na profile
Hmin :  Salai Cung Nung@Salai Kyaw Min Tun
Suahnak khua : Falam, Matubuk veng
Nulepa hmin le u le nau pawl: Pu Tun Oo le Pi Naw Par an si, ka nau Mite thawn suahpi unau pahnih lawng kan si.
Fimthiamnak: B.Sc(Phy)
Tufang umnak: Zenkung (Rengngun)
Hnatuan: Immigration
Innsang: Single
Hobby: Bawlung sit, Zuknung zoh, tivek tivek pawl
Ambition: Mi pakhat si tengteng ding

CT: “Cung Nung” tiih kawh maw “Cung Ngai” tiih kawh na duh deuh?
Cung Ngai: Cung Nung ti’n in ko khalah Cung Ngai ti’n in ko khalah ka lo awih tuk hai ko ding.

CT: Ziangruangah “Cung Ngai” timi hmin duhnung zet na nei thei?
Cung Ngai: Ka nauhak laiah ka rual Van Nei Sum nu (Van Sumtei’ sung hi vengkhat, innhnen sungkhatvek um kan si) nih Cung Ngai ti’n in rak ko ringring. Amah lawng si cutin in ko theu. Cumi hmin te kha ka hnathlam ah a rak tang ringring ih a duh tla ka duh zet ruangah ka cafung
hmin ah ka rak hmannak cu a si.

CT: Na nunthuleng siar a nuam tuk an lo ti tikah ziangtin na sang let theu?
Cung Ngai: Hni siamsi ten ka lungawi tuk ka ti hai theu lo ziang!

CT: Nunthuleng na ngan hmaisabik na mang lai maw…ziangmi a si?
Cung Ngai: Aw, ka phunhra kum ah ka rak ngan hmaisabik ih kawlca in a si. Fala pakhat heihchat ti’n ka rak uartuk mithu si hmang.

CT: Nunthuleng maw biazai na duh deuh?
Cung Ngai: A thawt daan dang nan, ka duh kuahko veve ko.

CT:  Nunthuleng le biazai ih danglamnak?
Cung Ngai: Hmaisabik ah nunthuleng timi le biazai timi anhmin in an dangaw zo si ti-aw (capoh). Nunthuleng cu thu pakhat parah fiang deuh dingih ngan suakmi a siih, Biazai cu tawite’n ruat ding a tam sawnmi a si ti hi an dangawknak pakhat cu a si men ding.

CT: Ziangruangah Nunthuleng na ngan?
Cung Ngai: Ca ka ngan pek hrawngah kawlca in biazai hi ka rak ngan tam deuh sawn. Laica in ka ngan thokah tla biazai lawng si ka rak ngan. Zunphir, Nhgepi, Awipi (Salai Zing Mang) te nganmi biazai pawl  ka siar ngah tikah anmah pawl vekin biazai le ka rak ngan thiam lo. Kum 2004 Zilthli
makazin ah nunthuleng ka ngan san ding ka tiih Lungkuai Cung Nung timi nunthuleng teka ra ngan thok. Cuti’n rualpi pawlih forhfialnak thawn nunthuleng ngan hi ka paih  deuhdeuh. Biazai ngan hnakin tla a olsam sawn ti’n ka ruat. Cule kan Falam mi sungah cu nunthuleng ngan tla an mal zetin ka thei. Siar ding tla a mal. Ka nunthuleng nganmi minungpakhat nih a siar le laica a siar ti’n ka lungawi. Ka hnaangam hlunhlo in ka thei-aw. Ka nunthuleng hi Chinram le Chinmi hrangah tidai forkhat te vek talin a tangkai thei pangah ti’n nunthuleng ka ngan peh vivonak cu a si.

CT: Falam bazaar tong rori hmangtu na siih na nunthuleng tla siar nuam kan ti zet. Kan Falam bazaar tong kan ti pei cu Falam tong mawizet te hi website le nunthuleng bu dang ah kan hmang thiamlo deuh in na hmu maw?
Cung Ngai: Falam bazaar tong ti hnakin Falam khawsung mino tong ti sehla a hman deuh pei maw ti-aw? Hivek tong ka hmannakcu falam khawsung tong pakhat bak lawng ka thiam ruangah a siko. Hmanghrim ciamco cu ka silo. Na tivek in hmang thiam lo tivek cu ka hmu lo. Kei vekin falam ih thanglianpa pakhat le Tahan le mandalaylamih thanglianmidang pakhat cu kan tong a bangaw hmanah kan awthluk cu a rak dang deuh ko ding.

Keimah hi falam ih thanglian lo’n Tahan maw Mandalay ah maw rak thanglian sehla tu ka cangan mi tongfang pawl tla a dang deuh men ding ka zum. Ziangtin a va sipoh ah kanmah thiam dan cio in ngan hluahhlo mai sehla, zuam sinsin cio sehla, a nih ngan mi cu a zahau tong tuk, a nih a ngan mi cu a laizotong tuk ti’n tiaw lote’n kan siar sakawk ding hi a thupi sawn ti’n ka hmu. Cumi lak ihsin a tha kan timi cu cawngaw vivo in zuam vivo le a tha sawn ding ti’n ka ruat fawn.

CT: “A ttapmi Mitthli” ah lungkuai thu tampi kan hmu…ziangruangah broken heart lam deuh na ngan tam…thinkuainak na tawng pang maw?
Cung Ngai: Ka nauhak deuh laiih nunthuleng ka siarmi pawl nih in ciah neh deuh siko ding. Nauhak lai ca ka rak siarmi ah tla lungkuai lam pang hi ka siar tam deuh rengreng. Nauhak lai ah ka rualpi hrekkhat hnenah ca ka ngan le lungkuai thu lawng ka ngan ding ti’n ka rak sim dah. Cumi kha ka thinlung theihlokar ah a rak tangta ringring a si men ding. Cule lungkuai thu ka ngan le ka ka thaw deuh cuang. “Mi aa tong khua  to” an ti bangin ka cangan mi hi khua a to ve si pei maw thei hlah Lungkuai Cung Nung ka ngan hnu ah Lung tla a kuai ve rero ko. ( Zohman sim san lo maw).

CT: Tingriset kha zo a si….? Ziangruangah tingriset a ti aw?
Cung Ngai: Keimah thotho ka si ko. Ca ka rak ngan pekah cafung hmin ka pekaw ve ding ti’n ka ruat, ka hawl, ka pol ciammam ih Tingriset timi hmin te ka rak  hmusuak! Cutin ca ka rak ngan thok hrawngah Tingriset hmin in ka ngan hmaisa. Cung Ngai timi cu cabu ka suahzik ih ka thleng salmi hmin a si.

CT: “Lung Kuai Cung Nung” le “Khuahlan lai ah” timi kha true story a si maw?
Cung Ngai: Pheh thu um lo, a si lo lawlaw-:)

CT: Na nunthuleng nganmi pawl hi true story an si maw?
Cung Ngai: True story an si lo. Amahlawngte, ka hmuhtonmi thu le ka rak thei dahmi parih ka ruahnak ka bet betmi tla an um hnuaihi . Suangtuahnak (sik-kuu-yin) ih ka nganmi a tam deuh ke!

CT: Na hmeltheih pakhat Salai Zunphir khi zo a si tiah lo sut sehla ziangtin in sang ding?
Cung Ngai: Biazai sam, hlaphuah le zuksuai ding rori ah Cung Pathian ih hriakculhmi, Lai Tlangval, Nu dang Pa bangawlo ka unau a si ka lo ti ding.

CT: Salai Zunphir ih biazai pawl khi amah ih a tuar taktak ruangih a nganmi a si pei maw?
Cung Ngai: Amah in a tuar taktak lo hman ah amah tuar vek rori in leh a siartu pawl tuar taktak dingin Biazai ngan thiamtu a si sawn.

CT: Salai Zunphir khin Nunthuleng a ngan ve maw?
Cung Ngai: In rak sim dahmi thuanthu pawl cu a tam nasa. Pumna le pumdawm ko hniha suak zetmi thuanthu, a ngaitu mitthli for ding khop ih zangfahza thuanthu, thuanthu phunphun in rak sim dah. A rak phuahmi Pak Lawng Cuai thuanthu tla cu zenkung ah Pak Lawng Cuai a um ngaingai ti tiangin ruahnak in rak neiter thei. Cutluk ih thuanthu sim thiam sokhaw a rak si. Ka nunthuleng ahtla a thaw, a rim mal tete ka telh phah theu. A ngan leh tengteng mentheinan ngan tengteng dingin za ah za thapek ka duh.

CT: A tapmi Mithli na ngan thu in ruah aw?
Cung Ngai: Umm…himi thuhi ka ngan ding, ka ngan ding ka tiih kumkhat lai ka rak rei. Ziangahtile ka hnatuannak  transfer in Mawngtaw(Rakhine) lam ah ka thleng. Cu tawk feh phah lamzin ah ka rak ruat ngah mi a si. Mawngtaw ah cun kumkhat um ding ka siih ka man caan ah ka ngan ding ti’n ka timtuah lawk. Cule kumkhat sungah cu cabu in (Lone-chin in) ka suah thei ko ding ti’n lone-chin in ngan ka rak tum.

Asinan, zetnaknih in neh ih belo ah ka rak cang. A ngan lamlam simhlah, ka ruat ciami hman ka hngilh theh. Kumkhat a rei hnu inn ka tlung phah lamzin ah ka ruat sal.Yangon ka thleng leveten ka ngan ding ti’n tumtahnak ka nei lala. Ka ngan suak thei cuang lo. Cutin voikhat cu ka rualpa Thawmte (Tha Thawm Luai, Salai Zunphir ih naupa neihsun, tu cu US a thleng zo an nu thawn!A Tapmi Mitthli cabu suah thei dingin sumpai lam tuanvo lak tukhal asi.) nih korea a um laiah cabu kan suah pei cu in tiih cumi lawngah ka ngan thoksal thei. A thulu “A Tapmi Mitthli” timi cu ka ngan theh hnu ah ka pekmi a si..

CT: Cabu dang suah na tum bet maw?
Cung Ngai: Zuam rero siko.

CT: Judah Iscariot vek silo a dang fala mawizet na tawng zo maw?
Cung Ngai: Ha ha!..kan tongaw veve hrih lo si men ding.

CT: Na hrang ah teh “Ka lo duh” timi hi tong suak a har maw?
Cung Ngai: Ka duh taktak hnu cu a har lonasa in ka thei. Cule ‘Ka lo duh’timi tongfang cu kumkhua mai’ duhmi parah tong ringring dingmi a si ruangah a har tuk lo le a tha ding ka zum.

CT: Falam lam ah seherhmi  lengdawh na nei pang maw?
Cung Ngai: Lengdawh hmin hi “Mai Falam”sisehla ka seherh zet ding.

CT: Millionaire si awla Falam khua khi ziangtin na tuah ding?
Cung Ngai: Millionaire ka si lo khal le a cang thei tawkin  lungawi sopar te’n in hmuak ringring tu, “ Ka Falam” cu kilkhawi thei ka tum tento ko.

CT: Falam khua a rop an ti celcel ih ziangtin Falam khua na hmu?
Cung Ngai: ‘A Rop’ timi tongfang hi ka hua zet nan. Cutin ticeng cun kanFalam lawng siloin Leilungpi hman a rop zo si lo sawm? Falam khua cu a thangso lo lawlaw. Kan nauhak lai ih Falam khua cu tutiang khalah a mah kel a bang. Innthar tla cu kutzung khiak in siar thei. Falam minung nangmah le keimah ih kan thinlung, kan pumpi hrang lawnglawng ruat in kan duhham tuk ruangah dunglet hoi in mitsir te’n zohsal paih lotu hman an tampi thlang ding ka ti. Cutin a um vivo le ‘a rop’ an timi hi tufangah a si lo hmanah neta ahcu a ra cang ngaingai leh ko ding. “Falam”ih kan Covo cu khopkham ten kan rak hmang zo. Pek sal ding mi kan Tuanvo lawng si ko a tang thlang.Falam cun lungawi sopar te’n in hmuak ringringtu a si ti’n ka hmu.

CT: Nunthuleng cabu paziat na siar theh zo?
Cung Ngai: Kherkher ah ka siar zat cu ka cing ngelcel lo sokhaw. :)

CT: Midang khal nunthuleng ngan dingah na duhsak maw?
Cung Ngai: Nunthuleng hi calai ih hram, a tek pakhat a si ve, Calai ih nunnak thawpi pakhat ti’n ka ruat ih tampin ngan ding a si ka ti. Nunthunleng khal hin ram le miphun tampi a tuah tha thei. Kawl calai tla khalah khivek cu tampi a um ding. Thangthar nonawn  pawl tla laica tampi siar le Nunthuleng tampi ngan cu ka duh sak lawlaw. Ka duh ngaingai, ka lo bum lo.

CT: Thinkuai ih nunthuleng ngan tikah a tha deuh cuang maw?
Cung Ngai: A tha deuh ti’n ka ti ngam ciah lonan a taktak ih tuar le ruahnak  men ih tuar cu ngan tikah a mood  danglam deuh ko ding ka zum.

CT: A hrimhrim in na fala duhzawng line (7) in in sim aw?
1. Lai fala(Sak le thlang Chinram a pahnih in)
2. Fim tuk hla seh (Ka bum thei lo pang ding)
3. Aa tuk hla seh (Capoh tla a thei lo pang ding)
4. Kedil kak hlah seh (Nan mitthlam ah nan fala kedil kak ti’n ruat san hman uh!)
5. Lukawng hlah seh(Minih “lukawng lukawng bo rawh” ti’n in sawisak pang ding)
6. Zakhmul zuat mi si hlah seh ( Zakhmul thawn fala cu ka mit ah a rem in a
rem thei lo)
7. A karim sia hlahseh( Naih-aw a har pang ding)..

CT: A thupten lo cantact kan duh len…
cungngai@gmail.com timi cu ziangah ka lo sim rero hai ding ih..:)

%d bloggers like this: