Awnmawi – Salai Bawite

Salai Bawite

Interviewtu     : Salai Mazawn

New Delhi ih Chin Nonawn Calai Pawlkom ih suahmi “Kuakuai Anka” hmin ih komnak cu CT lengtu pawl hrangah in hlawm ve a si.

++++++++++++++++++++++++++++++++++++++++++++++++++++++++++++

Salai Bawite hi kan Laimi  Music thiam le  pumcawm aw a si. Kawlram Music thiam pawl lak khalih hmin lang ban a si. Music lam ihsin kan Chin miphun tthansonak ding ih cangvai rero tu khal a si. Laimi Music lam ah kan feh ve na sa,  nan pumcawmnak taktak ih hnattuan thei kan um lemlo. Salai Bawite hi Studio khalih sunzan hnattuan le a hna ih a theih tambik mi cu Music a si. A hnattuan dan hi Guitar lawng si lo in Music lam ih a ttulmi Mixing, Music Enginneering khal a tham thei thluh. Chin mino Music lam ih kan tthansonak ding ih lam in hruaitu pakhat a si.

CT– Zangfahten na hminngai le na nu le pa hmin in sim thei pei maw?

Bawite-Ka hmin cu Ezekiel Bawi Lian Uk a si. Bawite ti’n in ko. Ka pa Pu Van Ro Eng, Ka nu Pi Ngun Em Par an si.

CT– Unau paziat na nei?

Bawite– Unau 5 lakah a lai ka si.

CT– Na suahnak khua le tu na umnak in sim thei pei mawi?

Bawite– Ka suahnak cu Sekan khua a si ih tu hi Insein, Ywamah ( West ), Yangon ah ka um. Nauhak lai deuh ihsin Yangon ah kan vai.

CT– Ca zirnak lamah ziangtiang na thleng?

Bawite– Psychology Final yrs(ka zawm nawn lo ), B.Th.

CT– Innsang na nei zo maw?

Bawite– Nei deuh te hrih lo.

CT– Tuih na hnattuannak Studio in sim thei pei maw?

Bawite-Punchy Studio.

CT– Ziangtik kum in Music lamah na lut thawk. Ziangtivek in na thawk?

Bawite– Ka thei ciah nawn lo ee.. 1998 hrawng a si ko. Ka rualpipawl thawn zantin Guitar kan tum ttheu ih cumi ihsin ka thawk bik cu a si ko.

CT– Music ah zingvek lam na duh bik, tum nuam na timi?

Bawite-Slow Rock, Modern Rock,Alternative, Metal pawl hi tum nuam ka ti bik ko.

 

CT– Ram sung ram lengah Music tumtu ( Player ) na uar bikmi?

Bawite-. Ramsung ah cun Chit San Maung a si ih, Ram leng ah cun an tam nawn. Joe Satriani, Steve Vai, Paul Gilbert, John Patrucci, Vinnie Moore ti pawl hi ka uar bik ko.An hnen ihsin tampi zir ding a um.

CT– Ram sung ram lengah hla sakthiam zo na uar bikmi?

Bawite-Ram sung ah Ahngae’ ,Myo Gyi, Ram leng ah Scorpion ih an Vocal pa pawl an si.

CT– Mixing lamah teh zo na uar?

Bawite– Mixing ahcun Chit San Maung leh Myint Zaw an si bik ko.

CT– Ram sung ram leng, Lai hla khalah na duh ( uar ) bikmi, Elbam  le asaktu in sim thei pei maw?

Bawite– Uar bikmi ti ding cun rel ding ka thei lo. Ziangah ti len anmah an Band pakhat ciarah Creation an nei ttheh hai ih rel a theih tuk lo.

CT– Lai hla, kawl hla tivekah zing hla na tum tam bik?

Bawite– Kawl hla hi ka tum tam deuh. Falam hla ahcun Israel VSL ih khui hi ka tum hmai sat bik si.Cumi hlanah Hakha hla khui 2 cu ka rak tum dah. Tu ahcun Lai hla khal ka tum phahphah. Kan unau Chimi hnam dang hla pawl ka tum hnuaihni thlang.

CT– Ziangtik kum in Studio ah na tum, zo Elbam na tum hmaisa bik?

Bawite-Ka thei ciah nawn lo 2003 hrawng a si ding ka zum. Kan rualpa Salai ( kan vocalist ) ih Album si.

CT– Na tum zomi Album ah ziangmi Album na diriam bik?

Bawite-Diriam bik ngaingai cu a um hrih lo. Asinan a hrek khat ka lungkimmi cu an um ko.
CT– Concert (Show ) Zopawl thawn nan tuah tam bik,Hlasaktu pawl teh?

Bawite– An tam hnuaihni ih ka thei cian nawn lo.. Punchy ih ka rualpipawl le Reviver timi Band thawn ka tum tam.A dang Underground Band ( Album suah hrih lo mi Band ) pawl thawn tla ka tum ttheu.

CT– Concert ( Show ) ziangtik kum ah na tum hmaisa bik, khuitawk hmun ah, zopawl thawn?

Bawite-Ni leh tla pawl ka thei hai tuk nawn lo ee..2004 kum Takaettah veng ih kan tummi a si men thei. Bawhlung kun ( Bualrawn ) sungah asiih mipi cu an tlem lo ih zinpar ihsin rakzoh tla an um. Ka veikhat tumnak a si ih a nuam nasa. Thin tla a phu dukdo na sa. Tluangten in cu kan ttheh suak thei sapbie.. He,he

CT– Nan Band hmin in sim thei pei maw? zozo nan si?

Bawite-Kan Band hmin cu Seraphim a si. Kan rualpi hrekkhat ram dang in feh san hai ih tufang ahcun, Lead leh Bass Bawite, Keyboard Win thwe, Drums Ko yae’ pawl kan si. Hmin dang in RedFactory leh Authority ti’n kawl hla pawl kan tum rero thotho ko. Seraphim Band cu keimahte bulbak ih ka dinmi si. Studio thawn ka tuahcih ih hmailamah Laihla thar ngainuam taktak pawl diriam takten suah ding in cu ka tumtah mi a si.

CT– Nupi  dingah zovek pawl na duh? He,,,,,,He,,,,Hlasak thiam kherkher na ti maw?

Bawite-Nupi ding ahcun insungsang lamih felmi hi a si bik ko. Minunnem leh insungsang duhdawt theitu sisehla a duh um sinsin. Ahmel cu a tthat lemlo khal asile a aw amawi phawt cun poi ka ti miah lo. He,,,,,,,,,he,,,,,,he.,

CT– Music lam ih na cangveih pekte ah dawnkhamtu, hnaihnawktu na nei dah maw? Duhsaktu teh na nei maw?

Bawite- Dawnkhamtu ngaingai cu an um lo nan a pek ahcun tha cu in pe

lem lo cu a bang. Asinnan duhsaktu tete an rak um ih tampi thazang ka rak ngah. Ka lung tla a awizet an parah.

CT– Studio ih Guitar na tum pekte ah na lung a phang maw?

Bawite– Amak mawle…ka tthia ve nasa…Cuhman cu kan rualpa (Punchy Studio) hnenah a si ih ..ha,,,ha,,,. Khami ngelcel cu ka cinglai nasa..Pop hla a si ih Accoustic Guitar line khat lawngah sunvu can a rakcem ve mei..he he….

CT– Mi in rampi theih bancin sive si laimi lakah a va lar lo ve an lo ti ih, Laimi lakah lar na tum lo maw si?

Bawite– Si…Lar cu ka duh ve ee…Lar duhlo cu an um ding ka zum lem lo, si lo maw? He,,he,,he …Asinan lar dingin ka man deuh hrih lo..Aparlam ih ka lo sim zo vekin diriam ngaingai ten tuahmi ka nei hrih lo. Ziangah tilen sumpailam ,theihnak thiamnaklam, can pek theinak tivek lamah tampi sammi kan nei lai in ka hmuhawk ruangah si. Cun kan thiam dan ( Quality ) le kan lar dan hi a milaw maw? Ti khal hi ruah ding tampi a um. Zianghman thiam lem lo tive menmen ih lar cu thil pawi si in ka ruat.

CT– Rampi theih ban na si le veten ziangvek in ruahnak na nei?

Bawite –Tampi ka zuam nasat a ttul lai ti’n ka hmuaw.

CT– Music ih pumcawm aw na si ih nu le pa in Music ih pumcawmnak a tlak lo an timi hi ziangtin na ruat?

Bawite– Si..in sutmi a dik na sa.

Pakhatnak ah kan Laihla hi cu marketing abituk ih a tuahtheitupawl ih an tuah sun tete hi theitawkten rakbawm aw cio sehla ..Asuahtupawl khalin Quality lamah a hlan hnakih  tha sinsin ding in zuambet cio sehla bangman tal cu a um deuh ding.Cu len riahsia umbik cu an rak COPY leh sawng mi hi si ..Thingkung a cing tuhih rah a rah suaknak dingah dawm leh tidai tivekthawn a tuamhlawm ih a rah suahmi kha midangin awlsamten an rak ttawt men tikah a tuantu hrangah ziangtin hlawhtlingnak an hmuhtheinawnding. Hi tivek ding in cun pumcawmnak a tlak lo ding ti’n kahmu.

Pahnihnakah…..Music ih pumcawm dingahcun mahin pumcawmaw thei ding in sumpai,thinlung,taksa leh theihkauhnak pawlthawn pumpekawk a ttul ti’n ka hmu. Awlte cun ngah at heih lo. A kum telin a rei tla a si thei.Asilolen thla 1,thla 2 lawngtla a si thei.Athu pibikcu Pathian rinsan leh thinsau ten  beidawng lote’n a zuam ahcun hlawhtlingnak a hmu tengteng ding ti’n ka zum. Pathumnak ah…rampi ih theih ban mi pawl hrangahcun pumcawmnak a tlak rori ko.

CT– Music lam ih na cangveihnak ah teh sirawknak na nei maw?

Bawite-Tuini tiangah cun ka siraw hrih lo.he…he…he…

CT– Music lam ih na phur pekte ah ziangvek in hmuitinmi, tumahmi na rak nei?

Bawite– Mah Band te thawn Show tum dinghi ka rakcak nasa…

 

CT– Music lam ih fehpawl cu rittheih thil tham lo an um lo an timi hi ziangtin na ruat?

Bawite-Khami cu 100 ah 100 cu a dikzik lo. Keimai ih ka hmuhmi rori mithiam sang pawl rittheih thil tham lo lawlaw pawl an tampi ko. Mi hrekkhatpawl ruangah an hmusual pang a si men ding.

CT– Chin minopawl in Music lam ih kan feh vivo a si le a sualnak a um in na thei maw?

Bawite– Thungaithlak in tumtaknak thawn an feh ahcun a sual ding ka zumlo. Ziangah tilen Music hmangin kan ram leh kan miphun theihlarnakah tampi a tthathnempi ding ti’n tla ka zum.  Music hi Bible sung khal ah a ummi a si. A ttha zawng in fehpi sehla a ttha.

CT– Guitar lawng si lo in Mixing le Music Enginneering lam khalah na cangvei na sa an lo ti ih, zingtivek in na cang vai?

Bawite– Ahlan ahcun a tum lawng kar ak tum sawhsawh men ttheu. Arei vivo ih Player pakhat si ding ahcun mahkhal in Audio lamkhal theih a ttul rori tin ka hmu .Curuangah Audio Enginnering hi kum 5 sung lai ka ttuan. Cuhnuah Software ih hnattuan thei danpawl ka hmusuak vivo lala ih Mixing khal mahte in ka tuah cih lawlaw. Hla pakhat Recording kan tuah thawk ihsin Mixing ah ziangtin ka tuah ding tin Arrangements ka tuah cia ttheh.

CT– Salai Israel VSL ih hla ka ziangkim kha kawlpawl in an ngai veih a san an thei lo nan an uar ( duh ) an ti ih, san thei lomi hla hi uar ( duh ) a thei maw si? Ziangruang bikah a uar ( duh ) a si ding?

Bawite– Asithei ko.. Hla pakhat ciarah ah mah hla ih flow (a hla feh dan ) a nei.Cumi a hla thluk kha angai tuih thinlungkhawih zawng a si ahcun a san theih lo hmanah uar a theih ko.  Keikhal asan ka thei lo nan a uarmi hla an tampi ko.

CT–  Lai hla na tum tikah ziangmi harsatnak na nei bik?

Bawite– Si…Lai hla cu Arrangement ka tuah tik ah harsatnak a um phahphah ttheu. Kan Laimi cu kan hla phuahmi Flow khi a bangawmi a tam. Khui pakhat sungah Key, Tempo, Style, Bar ti pawl a bangawk tam can ahcun a tum lamah kan harsat ttheu.( a awl lemlo nasa he..he..he..) Culen Timing ah khal kan thinlung sungih a suak dandan in hla an phuah ttheu tik ah bar kim lo mi a um hnuaihni ttheu. (Bar tivek cu a thupi lem lo tin an pom deuh maw cu thei hlah.). Kan Laimi cu a caang (Verse), leh thunawn (Chorus) a um cun kan duhtawk mei ttheu. Afamkim lo ka tiduhnak si lo in a hrekkhat santhar hla pawl ah cun Bridge tivek, Key change (modulate) tivek bet thei sehla hla a ti mawi sinsin ding ti’n ka hmu. Cu le Albam kan tuah tikah sumpai nei tuk lem lo in kan tuah tikah duhthusam in Player pawl in kan tumsak thei lo. Hla, zuknung CD, DVD tvk kan tuah tikah Quality nei zet in tuah thei sehla duhthu a sam. Music Player pawl hrang khalah a phur um zet ding.

 

CT – Chin mipi in Music kan duh zawng hi san kan man na ti maw?

Bawite – San hi a thleng aw rang tukih sanman ding ngaingai dingcun kan  zuam bet hrih a ttul lai ding ti’n ka hmu.

CT– Music lamah ziangtivek in kan feh le hlawktlunnak a um in na thei?

Bawite – Cuti zawng in cu rel ding ka thei lo ee.. Asinan pakhatte cu sim duhmi ka nei..Tuisan cu IT san a si tikah tthatnak tampi a um vekin tthat lonak khal tam pi a um ve..Guitar ka rak tumpek hrawngah Lesson cabu pakhat ngah ding a awl lem lo.Poisa 200/300 hrawng kan neih len hmang siang lo in khawsungah kan tlin tawktawk ten copy kan va tuah ttheu. Cuhman ah kan duhmi kim ten kan ngah thei lo. A sinan tuisan ahcun na duhmi Band, na duhmi hla pawl duhtawkin awlsamten ngah a theih. Curuangah apar lamih ka simcia vekin ahlan ih kan ti dan kel ring ring si loin rem a ttulmi tete pawl remthar sal sehla..a tam lam hnakin a tha lamah kan zuamcio a si ahcun hlahtlinnak a um ding tin ka hmu.

CT– Hla phuahmi teh na nei maw?

Bawite-Aw nei ko nan a maltuk lai. A thluk ka tuahmi kawlpawl in in lei theu.

CT– Music ih thawtnak le a manhlatnak in sim thei pei maw?

Bawite– Kaa in cu rel a har deuh ding. Music cu hmuhtheih lo, thinlung muril sungih kan lungawinak,kan riahsiatnak, kan duhdawtnak, thazang kan pekduhnak ti pawl kha aw thawn tarlangmi a si tikah thinglung a tidam ter. Cumi cu manhla ka ti bik ko.

CT– Music ( Awnmawi ) kan ngai tikah zingtivek in kan ngai le Music lamah  thangsonnak kan hmu thei ding. Ziangtivek in Music  Player le hlasak thiam le thiam lo kan theithei ding?

Bawite– Minung cu kan duh dan a bang aw hai loih a rel dan a  har na sa. ..Mah ih talen zawng leh mah ih tlintawkmi kha theihawk hmaisa a ttul. Tahthimnak ah mi pakhat in Rock na uar ding nan a saktu in tlin zawng cu Pop tivek tla a si thei .Curuangah  duhmi hnak in  ti theimi zin kha zawh a ttha sawn ding. Cule Music ziang tin creation an tuah timi kha a sung tiangin ngai ding ah ka duhsakaw. A rel dan a har deuh ding …A tawi zawngin rel mei sehla ..Player asile Doctor beat (timing), Teching, Smooting ,Technique, Creation, Styles timipawl zoh in a theihtheih mei ko.Vocalist asile Pitch, Tone, Timing, Mode pawl zohin a tlangpithu in theihtheih ko ding. CD , Tepe  Hla kan ngai tikah ziangtivekin Music Backroung an tuah, Music a full maw? A  pa tuk maw? A famkim maw? Harmony khuitawkah a tul, ziangtin an tuah, Arrangement le Mixing  ziangtin an tuah? Tivektiang in ngai thei sehla cu thansonak tampi kan nei ding.

 

CT– Ziangtivek in Music thawn pehpar in Studio ah Caan na hmang.

Bawite– 9; 00 Am – 5;00 Pm tiang hi 1 time tin kan ti ih  9;00 Pm – 5;00 Am tiang 1 time a si. Ni khatah 2 Time kan nei.  Nitin zantin Studio ih hnatuan rero a si ko. Nazi pahnih khat te hi cawlh caan kan nei ih cumi khalah a hmangduhtu an um ringring ruangah nazi time in kan hmangter. Pathian zarah kan Studio ih kan hnatuan hi kan tluang zetih a hmangduhtu an co aw ttheu lo ih a buai thlak thei na sa. Kan Studio a hmang duhtu pawl cun kar khat a si lo le karhnih duh tla in in ham cia ttheu a si.

CT– Music lam thawn pehpar in nu le pa, Mino pawl hnenah thucah duh na nei maw?

Bawite– Aw…Aralai ding mi santhar mino pawl khal theitawk suahin pakhat leh pakhat cawisangaw in kan miphun leh kan hnam cawisangtu karhzai vivo ding ah zuam cio uh si timi lo cah ka duh…

CT– Hman lo cingih can in pek ruangah ka lungawi.

Bawite– Kei khal nan parah tampi ka lung awi.

An faknak pawl

%d bloggers like this: