Hlasak Thiam – Mai Susan

Chinmi beunak hawltu pawl ih khawpi Malaysia ah Chinland Today (CT) palai David Nun Tho in kan Chin hlasak thiam langsar Mai Susan cu lakphak in phah in hmaitawn thusuhnak a nei. Susan hi tulai Falam love song hlasak thiam zet larzet pakhat asivekin ramsung ramleng ih a fans pawl hrangah siar theih in a interviewnak kan tarlang a si.

CT: Na Bio-Data pawl famkim te’n sim thei pei maw?

Susan:- Pu Hrang Tin Khuai, Pi Van Hno tei fanu ka si ih unau (4) kan um. Kei hi fahniang nautabik ka si.

CT: Kumziat na si ah zaihla na sak thok?

Susan: Ka kum (4) lai ihsin Convention Civui pi tivek ah zaihla ka rak sak zo.

CT: Ziangmi zaihla lole series in si mipi in a lo thei larbik?

Susan: Aw! sim thei tuk male… Kunrirak thawn kan sak tlang mi “Nang Le Kei Duhnak” timi series a si bik in ka thei aw.

CT: Ei le in lam ah teh ziangvek rawl hmeh na ngai na bik?

Susan: Kheh!!!Kheh!!! Ziangtin si ka lo sang ding aw!! Hmm.. Rawl ka duh bik.

CT: Tanghamtu vek teh na nei zo maw?

Susan: Ala! ! ka ning a zak deuh! hehehehe…… Ka hawl rero lai fang a si.

CT: Tusun nitiang ah series paziat na suah zo ih hmailam ah teh ziangvek tumtahnak na nei?

Susan: Tuisun nitiang ah Single album cu pakhat lawng a si hrih ko nan, mibur thawn sak tlang mi tivek cu a um tam hnuaihni.

CT: Na weak point tiih na theiaw mi teh a um pang maw?

Susan: Hmm…. Mitih hrut ka si mi hi poi ka ti aw bik mi cu a si.

CT: Kan Chin mi lak ih singer pakhat dinhmun in Chin music industry tlun ih na hmuh daan in hlawm thei pei maw?

Susan: Himi thusuhnak ahcun mah le hmuh daan cio hi a bangaw lo ding ih kei ka hmuh ve daan rel sehla, Chin singers pawl ih kan ttulbik mi cu timtuahawnak (preparation) caan kan nei theu lo mile kan nuncan ziaza umtudaan tete ah kan remaw attul nasa tin ka hmu.

CT: Chin mi pawl in Gospel hlasak maw lole love song sak khui mi a tha deuh tin na ruat?

Susan: Himi hmunah kei ka pom ve daan cu hitin a si; love song sak ruangah an sual ciamco nak a si cuang lo. Cutivek thotho in Gospel hla kan sak ruang khalah a thlarau mi an si thluh cuangce lo. Curuangah kei ka hrangah zaihla cu zaihla a si ta mai.

CT: Na hla pawl hi ram hla le love song a tam deuh ruangah Chin mi pawl in love song tlun ih kan hmuh daan le pom daan hi ziangtin na ruat?

Susan: Ram thangsozo nitlaknak lam ram pawl ahcu love song saktu le Pathian thangthatnak hla saktu tiih ti dang lam aw cuangcenak cu ka thei si lo …………….

CT: Hla thar le khumcia mi CD,VCD lole DVD release cing ding mi na nei maw?

Susan: Aw! A um ngai, Salai M zaihla pawl thun ding a um ih arei hlanah Kawlhla (Burmese) song khal cu DVD in a suak cing ding ka beisei.

CT: Chin mi ramleng ah kan suak tam nasa zo ih ziangtinsi na ruah ve daan?

Susan: Pathian ih khawkhaang mi tin ka hmu.

CT:  Live Show concert vei ziangmaw zat na sak zo ih na diriam bik mi show in sim thei pei maw?

Susan: Sawmtu um sung cu sak vivo ka tum. Tutiang cu diriambik ti cu um hran lo in ka thei, ka nuamaw thluh ko.

CT: Ramleng um Chin mi pawl hrang saduhthah na nei maw?

Susan: Kan Chin ram ah kan zonzaih tuk ruangah ramleng ah nuntu khawsak daan remcang hawl in le tumtahnak a phunphun nei in tawivak kan si ih a tha ka ti ko. Thil cu athatnak a um vek in khatlam a thahlonak a um phah thei men. Ka cahduh bik mi cu Pathian kan hngilh hrimhrim lo pei. Cule kan suahkehnak le sulphumnak Chinram le Chin nunphung le ttong hi hngilh men siang loin kan kilkhawi vivo ding hi a si.

CT: Nangmah an lo pehtlaih theinak phone number, E-mail address vek na fans pawl na pek thei pei maw?

Susan: Hawl rero lai ka si vek in ngahtuk, siangtuk male, hitin in pehtlaih thei spymoonster@gmail.com, susan12359 (facebook),+95955025757 ahle +959773195574 ah contact thei ringring ka si. Copoh!! niphah ten..hehehehe….nazi 24 sung cu si lemlo aw!

CT: Hitivek in na caan sunglawizet in pe ruangah CT hmin in mipi hmin in lungawi thu kan lo sim a si.

Susan: Keikhal CT parah ka lungawizet ih ramsung ramleng um tha in petu nan zaten hnenah duhsaknak ka hlan a si.

Siartu Anka

%d bloggers like this: