Biaknak Lam – Mike Zung Ceu

Profile                  :
Hmin                           : Mike Zung Ceu
Suah ni                       : 27 Aug 1967
Suahnak khua          : Falam, Chin State
Nu le pa                     : Pu Al Khuai & Pi No Cin
Unau                           : 7 (Pa 3 Nu 4)
Nupi le fate               : Pi Hniang Hniang , Nathan Van Thawng Bik Ceu (kum 6)
Zirnak                          : BTh; MDiv
Hnatuan                     : Church Pastor, Falam baptist Church Yangon; Youth President, MBC Youth Dept; Joint Secy,MIT AA
Umnak                       : 125, Bargaya St, Sanchaung, Yangon

CT:  Pathian hna tuan dingih kawhnak na rak codan le na thokdan pawl a sangsang ten in sim hmaisa awla kan duh.

Phunhra ka thlen hlan cu Kawngsi Uk-ka-thah si lawng ka tum. Asinan phun10 tuah zikte ni 5 duh ah operation ka rak tuar. Cunah ihsin Pathian ih kawhnak ka co ih rundamnak ka co. Cumi ihsin thildang ah ka thinlung a um nawn lo ih damsung Pathian hnatuan dingin Pathian hnen ah hlanawknak thawn Bible tlawng ka pan.

CT:  Na tlawngkai laiih har na tibik mi le nuam na tibik mi pawl in ruah thei pei maw?

Phun 10 tiangah har hleice ih ka theih mi a um lem lo. Rualpi pawl thawn suncaw zawh phah ah cowboy( Canbary) ziin ih kan dawi awk  le tlawngtlai tih ih kan tlan rero lai nuam ka ti. Baibal tlawng ka kai cun sumsaw lam ah ka har zet ko. Yangon ah MDiv ka kai tla cu ka har sinsin. Tuni tiang ah harsa tuk ih tlawngkai saal ding hi ka tih tata.

CT:  Pastor na tuan sung hmuahhmuah ih na hngilh thei lo mi hmuhtonnak na neih mipawl tla theih a cakumzet ding.

Baibal tlawng ka theh pekte Falam ihsin peng 45 hrawng hlatnak Falam peng, Singai khua ah pastor ka tuan. Ka nuam aw tuk. Ka kawhhran in in duhdawt tuk. A hmaikum ah Falam Church ah  youth director tuan ding in ka pok tum tik ah ka kawhhran ih nu le pa le mino pawl in in tah… cumi ka hngilh thei lo. Kei tla ka mithli a tlak ve..

CT:  Pastor dinhmun ih har na ti mi le nuam na tinak tetepawl tla in hlawm aw.

Har timi ahcun midang pastor pawl ih ton cio mi a si ko. Nuam ka timi cu…Pathian thu ka simmi pawl in an nun an thleng aw timi  ka  hmuh tik ah….ka thlacamsak mi pawl in hlawhtlinnak an hmuh tikah….

CT:  Pastor pakhat dinhmun ihsin memberpawl in thei dingih na duh mipawl ziang an si pei?

” Ka lo duhdawt hai zet” … timi thei hai sehla…

CT:   Kawhhran upa ah minu (Deaconness) lak hi ziangtin na ruat? Bible thawn teh a milaw ko maw?

Himi hi Laimi khrihfabu in kan tulbik mi lak ah pakhat a si. Baibal sungah Lydia hi deaconess a si. Church thuanthu khal ah a um ko. Karen, Kachin, Lahu, Shan…tipawl tla cun deaconess an neihnak kum 50-100 lai a si zo.

CT:  Tu, thudangah kat lala sehla: Art ih hmualneihzia na simfiangdan? Milai hrangah ziangtlukin a thupi?

Minung zate in art kan duh thluh. Kan thin in nomtertu kan timi pawl hi art thawn pehpar awmi lawngte an si.

CT:     Art ah khuimi hi na atcilhbik?

Music… le  zuksuai.

CT:   Series paziat na rak suah zo? Cupawl thuhla famkimdeuh in theih kan duh.

Keimah lawng sakmi series ka nei lo. Midang thawn sakmi cu series 9 lai a um ding.

CT:  Christian pakhat hrangah lovesong sak, ngai le phuah hi sual a si maw? Lovesong hla sak, ngai le phuah ih a thatnak le thatlonak tla in sim bet hrih aw.

Khrihfa khal Love thawn a dangte ah um a theih lo pi. Lunglen le lungturnak(feeling) mah le tawk cio ih nei mi kan si ko. Amah lawngte Khrihfa ih phuah lo dingmi, ngailo dingmi le sak lo dingmi lovesong pawl an um. Eg.. Eminem ih hla hekkhat ..tivek

CT:  Na uar mi artist pawl tla theih kan duh.

Htoo Ein Thin, Maysar(catoon), Erick Clapton

CT:  Tulai suak Chin music hi ziangtin na hmu? Quality an nei ko maw? Ziang zawnah an tlasam in an cuanghmuar tin na ruat?

Lai music hi then 2 in then ka duh. Lailam hla le santhar hla tisehla. Khuate hla khal  mallai tal cu thlengawknak um thei thlang sehla a tha ding(Modern Country style). Santhar hla tla hi mi ih hla cawng tuk lo in mahte hawlsuak mi hla aw le cafang pawl tuah thei sehla ka duh. Cun, kan hlaphuah pawl Music skill ah hi hnakin sang deuh sehla…

CT:  Hla tampi na phuah zo ti lawng kan theiih ziangzat cekci na rak phuah zo? Ziangvek hla style an si?

Hla hi 1985 hrawngin ka tuah thok zo. Fingzat ti hi ka siar lem lo (ka finkhawm thei hrih lo tikhal a si thei). Pope style a tambik ko. Rock tla malte lai a um. Choir tla ziangzat lai maw a um ve.

CT:  Na hlaphuah mi lakah khuimi hla si na duhbik? Ziangruangah?

Lairam Thar, Bawipa sunglawi seh, Khaisan mi Nu… tipawl an si.

Laimi pawl ih kan nun in thleng/ in rem sehla tiih ruahsannak tumpi thawn ka tuahmi pawl an si ruangah a si pei maw… ?

CT:  Ziangvek can ah hlaphuah a nuam na tibik theu? Hla pakhat na phuah ding tikah ziangvekin timlamnak na rak nei theu?

Mahlawng um huahhi caan ah hla a suak duh theu…Hla hi timlam ciamco khal ah a suak duh cuang theu lo… Guitar/ keyboard um sehla, cafung le cahnah um sehla…cun, Thlarau Thianghlim in in pawlkom sehla…

CT:  Hla phuah dingih lo turhhnawhtu (motivation) hi ziang an si pei?

Tuarnak (Feeling) le ttulnak..le Thiang Thlarau…

CT:  Hlaphuahthiam pakhat si dingin ziangvek quality neih a tul?

Music instrument pakhatkhat tal thaten tumthiam le Note pakhatkhat tal ngan thiam (Staffnotation?Tonic solfa?Eastern note?). Hla tampi ngai le ca tampi siar…

CT:  Hla phuah paih (mithar) pawl hnenah ziang mi ruahnak hlawm na duh?

A tlun ih No 17 nak hi a si ko. Thlacam le Pathian ih thawkkhum tla a tul nasa… Music zirnak thaten  neih tla cu a tul zet.

CT: Thudang lo sut lala sehla: Laimipawl ramdang an thleng ciamco mi hi ziangtin na ruat? Thansonak maw tumsumnak a si thei?

Tuhnu kum 20 hrawngah a fiang ko ding.

CT:  Ramdangih um Laimipawl hnenah ziang thu na cah duh?

Jesuh ih simmi “Minung cu Rawl lawngin nun a si lo” . Chin World Info.. ah thucah 10 ka simmi a um zo.. cumi zoh a theih ding

CT:  Ramdang um Laimipawl in an umnak ihsin ram le miphun hrangah ziangpawl an tuahsak thei ding?

Sumsaw, Fimnak, ruahnak tha, le Thazaang peknak…

CT: Lainu in miphun dang pasal a neih tikah a tong a somso ding maw a pasal tong kha a ttawm sawn ding?

Lainu in miphun dang pasal a nei ih a pasal in lai tong a tongter thei  ih laimi vek ngaingai a can tikah Laimi pawl in laimi taktak ah kan cohlang/ kan pompi sak  thei ngaingai maw timi kan miphun in kan ruahta a tul.

CT:  Miphun pakhat a hlohrallonak dingah ziangpawl  a tul? Ziangvekin humhim theih a si ding?

Pathian thu,Tong, calai… mai innsang ah hmang le neih fetfet le laimi hnen ah tlanlen ringring.

CT: Na duhbik mi cabu pathum in in sim thei pei maw?

Baibal, Twe-sun-taw-nih-yet-mia( Aungsan, Abradam Lincoln, Gandhi thu ngan mi),  Dale Canegie ih cabu .

CT:  Nauhak pakhat tha tei a hung pitlin theinak dingah gene maw thupi kiangkap (environment)? Ziangruangah?

A pahnih a thupi asinan kiangkap(kilkhawi daan) tla a thupi zet.

CT:  Nauhak fingkhawinak ih ralrin ding thupibik pathum in in sim aw.

Ziaza mawilo, Nautatnak, an freedom khamsak.

CT:  Thlahtu (pi le pu, nu le pa) ih sualnak le thatnak ruangah tesinfa in thlawsuah/camsiat a tuar phah thei maw? A tuar phah thei a si le, a tuar mi hi camsiatnak a si ah teh cumi ihsin luat theinak lamzin a um kem?

Tuar theih/ covo ngah theih a si ko. Asinan Pathian tihzah upatnak ihsin luat a theih.

CT:  Gender lam lo sut lala sehla, hlan san le tui san khaikhin in Laimi lakah gender thleidannak hi ziangtlukin a taanaw? Kan bangaw vivo thlang tin na ruat maw? Minupawl mipa thawi dinhmun bangrep peknak in a suahpi thei mi rah sia/rah tha teh ziang a si pei?

Laimi cu gender thleidannak neimi miphun kan siko. Kan san thuanthu le lungput ah hmuh theih an si ko. Kan tongthim pawl tla cu a mawi lo tampi an um…Eg: Nunau thu in kotsuak hlah…

Laimi pawl kan nunau pawl kan khaisan zamrang a tul tuk zo. Ziangah tile miphun dang an fim thluh zo ih an nunau pawl van ah an hlir / an thlengter thluh zo. Laimi nunau pawl tla miphun dang pawl hawiruan thei dingin sangka kan on zaang a tul. Kan leilungpi hi nunau/ mipa gender thleidannak a bi vivo mi leilung a si zo.

CT:  Tlukbahnak lak ihsin khamawkdan thabik hi ziang a si pei?

Pathian thu ruat…nitin nuncih..thlacam…

CT:  Nangmah thawi contact duhtupawl hrangah sangka na ong thei pei maw?

A ngah ringring: mikezceu@gmail.com; Tel : 095-01-518077; 097366370 (cell).

CT:  Sim duh mi na neih lai le..

Ka lungawi zet; Nan hnatuannak Pathian in kan miphun thansonak le A ram kauhnak hrangah thluasuah pe hram seh!

%d bloggers like this: