Mi Cuangce – Dr Hrin Nei Thiam

Dr. Hrin Nei Thiam

(Director, Meteorology)

Picture5

“Chin mi pawl ih leitlun” ( www.chinworld.info ) cun tuizarh sungah Chin mipi hnenih a phuansuah duh mi cu Burma ralkap cozah uknak sungih director dinhmun tiang thleng ban tu Chin numi kan neihsun Dr. Hrin Nei Thiam hi a si. Chin numi zohthim tlak le theih tlak interview kan rak tuah nak cu a tanglam vekin a si.

Chin World:   :Na suahnak khua, na nu le pa, u le nau hmin pawl in sim thei pei maw…?

Dr.Thiamte:   :Ka suahnak khua cu Falam, Chin State asi ih ka pa – Pu Ral sai Lo, ka nu – Pi Cia Cuai an si. Ka u le cu Pu Biak Hlei Thang le Pi Biak Nei Man, ka nau le pawl cu Pu Van Lal Sak, Pu Tha nei Sum, Pi Tha Men Thluai, Pu Van Tuah Piang le Pi Sui Nawn Par an si ih duhdawtmi ka nu, ka pa le ka u pa cun mual in liam san zo.

Chin World:    :Nauhak lai ihsi tlawngca thiam thei zet tiah kan lo thei ih, cathiam lam laksawng ziangvek pawl na rak ngah dah?

Dr.Thiamte:    :Pathian in cinken theinak thluak in thluasuah ruangah ka phunhrek ihsin phun hra tiang Falam ih tlawng ka kai lai ah top three sung ahcun ka tel ringring nan Luyichun tivek cu ka rak ngah ban deuh lo. Cathiam lam laksawng lakih simtlak deuh cu Falam tlawngin phun hra ka on lai ah Physics distinction ka ngah ruangih laksawng ka ngahmi le Mandalay University ih M.Sc. Final Part I (Physics) camibuai ah pakhatnak ka ngah ruangih laksawng ka ngahmi an si hmang ding.

Chin World:    :Na fimthiam rak zir nak hmun le na thehsuah mi pawl tla theih kan duh i…

Dr.Thiamte:   :Fimthiam ka rak zirnak hmun pawl cu Falam Phunsang tlawng (1962-73), Mandalay University (1973-80), Roorkee University , India (1998-99) le Yangon University (2004-2008) an si ih Pathian zaarih ka thehsuak theimi pawl cu M.Sc.(Physics), M.E.(Hydrology) le Ph.D.(Physics) tla an si.

Chin World:     :Ph.D tiang tlawng na rak kai nakah harsat nak na ton mi a um maw..?

Dr.Thiamte:    :Pathian zangfahnak in sim le rel tlak harsatnak ka ton ka thei lo. Ph.D khal kan zung (Department of Meteorology and Hydrology) ih upa pawlih in duhsaknak le tawlrel sak nak ruangih ka kai suak theinak le ka theh suak theinak asi. Cumi laiah kan zungin Ph.D kaitu pathum kan si ih ka kai pi pawl cu cuih lai ih kan Director General U Tun Lwin le Deputy Director General U Thein Tun tla an si. Cuih hlan ahcun hitivek zung lam ihsin Yangon University ih Ph.D kai theinak program a rak um dah lo.

Chin World:    :Na hna rak tuan dah nak le, tui na hnatuan kaih mi dinhmun tiang na thlen so vivo dan pawl in ruah thei kem..?

Dr.Thiamte:   :M.Sc kai phahin 1980 ah hnatuan ka rak lutih Mandalay University ah Assignment Tutor in ka rak  tuan thok. Thlaruk ka tuan hnu ah Monywa College ah in thawn ih Monywa ah kum 8 sung ka tuanih 1983 ihsin Demonstrator ka ngah. 1989 September ah Yangon University ah ka thawn ih 1992 ah Assistant Lecturer ah in than. 1993 October ah tui ka zung- Department of Meteorology and Hydrology ah ka thawn. Ka thawnnak san cu University ahcun transfer a tam ih zunglam ahcun transfer a um lo ruang bikah asi. Thlahlawh cu a bang aw ih zung ahcun Staff officer ti ih kawh asi. Staff Officer in kum 7 ka tuan hnu 2000 kum May thla ah Assistant Director ah in than. Cuih hnu kum 8, 2008 kum August ah Deputy Director, tu 2010 April ihsin Director ti in ka hnatuan cu in than vivo, Pathian zaarin.

Chin World:   :Tlawng Lecturer na tuan dah tiah kan lo thei ih, na tuan lai le a tu fang Chin tlawngta pawl ih dinhmun ziangtin na hmu?

Dr.Thiamte:   :Monywa College ih ka tuan lai ah Tahan, Kale le Laitlang lam ih tlawngta  pawl an rak kai tam. Culai ahcun cangvaihnak a rak tam ih leh zuamawknak (Volleyball, Track and field)  ah siseh, Fresher welcome le Farewell tivek ih hlasaknak lam ah siseh Lai tlawngta pawl hi rinsanmi le theihtammi an rak si. An major ciar ah cathiam deuh khal an um phahphah ih biaknak lamah khal rinsantlak hohatu tha an si. Tulai ahcun an tlawngkainak a thekdarh aw ih cangvaihnak khal hlan vekin a tam nawn lo hlei ah keimah le university lamah ka tuan nawn lo ih Lai tlawngta pawl thuhla ka thei ban nawn lemlo ih an dinhmun sim ding a har deuh.

Chin World:    :Kawlram acozah hnatuan ih har na ti bik nak le nuam na ti nak pawl in ruah thei awla kan duh zet…?

Dr.Thiamte:    :Kan thlahlawh hin hai in daih lo hi a harnak bik asi ih kan hnatuannak ih rinsanmi kan si hi a nuam in man a nei tin ka thei.

Chin World:    :A tui na hnatuan kaih mi thawn pehpar in nitin ziangmi bik ziangti vekin nan tuan theu.?

Dr.Thiamte:   :Tu Director dinhmun in cun technical (Meteorology-Nikhua thuhla, Hydrology- Tivapi pawl thuhla & Seismoly-linghnin thuhla) lam ah siseh, administration (Kawlram sungih kan zunglam thuhla pawl) lam ah siseh, thuhla suahpimi pawl parah thu kan rel sak ih guideline kan pek hi a tambik ding a bang. Cuih hlei ih a khung deuh ka tuanmi cu ramdang mi pawl thawn meeting/ workshop tivek kan tuah tikah kan Minister/ kan Director General ih sim dingmi speech ti pawl mirang tong ih ngansak hi tuihlan kum 6-7 lai ihsin ka tuanvo asi. Ramdang thawn pehpar ih cakuat pawl khal keimah ih nganmi an tam in ka thei.

Chin World:    :Na hnatuannak thawn pehpar in ramdang ah tla na feh phah theu tiah kan rak thei ih, ramdang ih na va hmuhton nak (an hnatuan dan/an tuah dan) le kawlram ih nan hnatuan danah ziangvek in a thlau aw, a danglam nak, ziangmi pawl na va zir ngah…?

Dr.Thiamte:    :Ramdang ih training kai ti ahcun India ah kumkhat le hrek lai M.E. course ka va kaimi lawng asi ih a dang pawl cu Workshop, Seminar, Meeting & Forum ti pawl an si. Pathian zaarih ka thlennak ram pawl cu Philippine, Thailand, India, Nepal, Lao PDR, Cambodia, Vietnam, China, Japan le Germany ti pawl an si.

Training ka kainak India ram New Delhi ih India Meteorology Department-IMD ih an hnatuandaan le an cet thilri hmanmi pawl cu kan zungih hnatuandaan le cet thilri hmanmi pawl thawn cun tahthim ding rual asi lo. Asinan, kan facility neihzat in ti thei tawk kan tuan ih kan duai ve lo. Kan dung 2008 May thla ih NARGIS thlipihuuk kan ton lai ih kan zungih warning suahmi le hnatuanmi pawl parah World Meteorological Organization – WMO (Geneva) in in ra hlaihlat tikah an ti thei tawkin a tha bikin an tuan tin ca an suah ti hi lo simthan ka duh.

Ramdang hmuhtonmi sungin simreltlak in ka ruahmi cu 2009 April ah Relief and Resettlement Department ih an Hotu pa thawn Kobe, Japan ih Seminar kan va kai lai ih in hmuhmi pawl: 1994 ih Kobe linghnin ih siatsuahdan le siatsuahmi pawl, harsatnak sungin ziangvekin tan laakin an tungding saal, linghnin ton sal hmanah siatsuah tam lo dingin innsakdaan ding research an tuahdaan, linghnin silole a dang siatsuah harsatnak (disaster) ton tikah beunak ding hmun, ti rawl le hman tulmi pawl an timtuah cia thepthep mi pawl hmuh tikah minung nunnak humhim ding an thupit ter zia hi zohthim tlak le cawn tlak ngaingai asi.

Chin World:   :Kan lairam nikhua umtudan (ruahti tlak dan) hman te nei thei dingah le thlairah thlaihnah pawl tha tei cing thei dingah ziang mi tuah ih, ziangtin kan kilkhawi a tul …?

Dr.Thiamte:    :Tulaifang leilungpumpi huapih tonmi le aupi mi cu leilungpumpi a hlumnak a than (Global Warming) ruangih nikhua umtudaan a thleng aw mi (Climate Change) asi ih kan Kawlram, kan Laitlang khal a luat ve lo. Tuikum thal – April, May hi a sa luarih Kawlram pumpi sungih nikhuatahnak umnak khawpi hmun 20 ah tuihlan kum 30-40 lakah a sa bik kum asi tin record thar an ngah vekin hmun tawkfang ahcun tikhur le tiva a kaang zikzik ti thu tla kan thei hnuaihni. A tlaangpi thu in sim ahcun nikhua umtudaan keel a awhsal theinak ding ahcun thli lakih a herkual rero mi, minung ih cet thilri hman tam ruangih a suak tam vutvo mi carbondioxide bik hi tu hnakin mal ter sawt nasa a tul ti asi. Nikhua keel awh thei dingah kan Lairam khalih tuah theimi cu thingkung tampi ciin ding, ram meikang um lo dingih fingkhawi ding, loram thar hrangih thinghau meinawh hmang nawn lo ding, dawhhna pawl tha ten fingkhawi ding ti pawl hi an si hmang ding.

Chin World:    :Biaknak lamah tla pumpe aw zet tu a si tiah kan lo thei ih, biaknak lam hnatuan kaih mi tivek teh na nei maw..?

Dr.Thiamte:    :Biaknak lam ahhin Pathian lamhruainak in Yangon, Myanmar Institute of Theology – MIT ah BRE – Bachalor of Religious Education (1990-91) ka rak kaisuak ih biaknak lamih cangvaihnak ah tawkfang cu in bawm in ka thei. Tu hi Kawlram khawpithar Nay Pyi Taw ah 2009 May thla ihsin ka ra thawnih ka thlen hlan te 2009 April ah Chin Baptist Christian Fellowship kha Mandalay ih Lai Baptist Church ih bawmnak in an rak din ih 2009 November ah Chin Baptist Church tin Local Church in kan ding thei thlang. Tu kan Church ih ka hnatuan kaihmi cu Hotu sang (Vice President) asi ih Pi Ngun Can thawn mi pahnih in kan tuan. Nay Pyi Taw ka thawn hlan Yangon –  Falam Baptish Church (FBCY) ih ka um lai ahcun Calai Hotu, Nubu Hotu / Hotu sang / Sungtuan Bawmtu ti pawl ka rak tuan. Asinan ka tuan fuh tin ka diriam mi cu a um lemlo, Meeting ih hoha lawng hi ka tuan bik ih keimah hnakin midang pawlin an tuan tha sawn.

Chin World:    :Kan calai duhdawt zet tu pakhat  na si tiah khal kan lo thei ih, article ngan mi tivek teh na nei dah maw..?

Dr.Thiamte:    :Article ka ngan sun pawl ahhin a tam bik cu biography ka letmi (Mirang/ Kawl ca ihsin Lai ca, Mirang ca ihsin Kawl ca) hi an si. Ka letmi pawl cu ka hero pawlih  thuanthutawi an si ih cupawl cu: Brayton Clarke Case (Bo Gate), George Washington Carver (Peanut man), U Pe Maung Tin, Madame Curie tla an si ih FBCY (Yangon) ih suahmi Vankau Arsi Magazine hrangih nganmi an si bik. Cun keimah ih ka hmuhton mi tete sungin thuhlawm tlak deuh ka ti mi article 4-5 lai tla ka ngan. Duh ai in ka ngan mal nasa. Cabu suahmi cu ka nei thei hrih lo.

Chin World:    :Bum awk nak thawn a khat mi leitlun ah duhdawtnak timi hi ziangtin na sim duh?

Dr.Thiamte:    :Minung ih duhdawtnak lakah a saang bikmi cu hringtu nu le pa ih duhdawtnak asi ih kei khal tu ni ka dinhmun ih ka thlen theinak hi nu le pa ih duhdawtnak famkim thawn thanlen pitlin theinak Pathian ih thluasuah ka co ruangah asi. Rualpi, nupa le midang pakhat le pakhat kar lak ahcun kan Bawipa Jesuh Khrih ih tongkam, ” Mi in kan parah tuah hai seh ti nan duh vekin midang parah tuah ve uh” ti mi a thlun theitu pawl cun duhdawtu an nei tam ding ka zum.

Chin World:     :Chinworld ihsin Chin mino pawl hnenah ziangtin cah na duh?

Dr.Thiamte:     :Chin mino pawl hnenih ka cah duhmi cu;

  1. Laimi lakah siseh, a hleice in mi phundang pawl lakah siseh, kan umtlan tikah kan Bawipa Jesuh Khrih hmin le Laimi hmin a siat tertu siloin upat hmaihngalnak petu si zuam ding;
  2. kan thansonak dingah Mirangca hi an mah vekih tong le ngan thiam zuam ding le computer hman thiam zuam ding;
  3. khuitawk ram ih kan um khal le a cang thei tawk in International ih pom (recognize) mi phunsang tlawng ihsin degree ngah thei tum ding;

ti pawl hi mino pawl hrangah a thupi ngaingai tin ka hmu ih himi hi kan tumtah cio hram pei tin lo cah ka duh.

Chin World:    :A lo contact duhtu pawl hrangah na address….

Dr.Thiamte:    :Ka zunglam address cu:

Dr. Hrin Nei Thiam, Director, Department of Meteorology and Hydrology,

Ministry of Transport, Building No. 5, Nay Pyi Taw, Myanmar

Phone: 0095 67 411446, 0095 94960 7248

Inn address cu:

Building No. 2111, Room No. 22, Balatheikdi Ward, Nay Pyi Taw, Myanmar.

Phone: 0095 67 421383, email: hnthiam@gmail.com

 

Chin World:     :Man lo zet cing ten hizat tikcucan in pek ruangah kan lungawi zet a si.

Dr.Thiamte:     :Kei tla ka lungawi ngaingai.

 

By – Sen Hngilh Piang

 

%d bloggers like this: