Mi Cuangce – Mai Tluang Than Mawi

Tluang Than Mawi Thuhla Tawi

  • Hmin                : Tluang Than Mawi
  • Kawh duat      : Duatte
  • Suah ni             : October 24, 1994
  • Nu le Pa           : Rev. Richard Khum & Pi Thawng Lian Par (Mai Sokhlei Par)
  • Umnak              : Anisakhan, Pin Oo Lwin (Maymyo)
  • Tlawngkainak  : B.E.H.S (1), Pyin Oo Lwin
  • Distinctions      : Maths, Chemistry, Physic & Myanmar
  • Hobby              : Casiar, bezai ngan, music ngai, mi pawlkom, khualtlawn, Pathian hna tuan.
  • Favourite          : Colour ah a sendaang (pink); ei-in ah arti kio le aa-luukio ro; hlasak thiam ah cun Miley Cyrus, Taylor Swift, West Life, B.J le
  • Klirlungz; actor/actress ah Korean actor le actress; film ah cun Tom & Jerryle Disney cartoon zaten, cule Hanah Montana, The Last Song le AnotherCindrella Story.
  • Goal                  : Pathian hna tuan (nauhak le mino thuzirhtu, lecturer)

CT    : A hmaisabikah tlawng na rak kainak le na rak ti thatdan tete pawl in sim thei kem?

TTM    : Aw, sim thei ko. Phun hrek hi  No. 14, Middle School, Tahan, Kalaymyo ah ka rak kai. Cule phun 1 hi No. 11, High School, Mandalay ah ka kai. Phun 2 ihsin phun 4 tiang hi No. 4, Primary School, Mandalay  ah; phun 5 ihsin phun 7 tiang cu No. 16, High School, Mandalay ah; cule phun 8  ihsin phun 10 cu No. 1, High School, Pin Oo Lwin ah ka kai. Mucu (nursery school) ihsin phun 10 ka kai tiangah laksawng ka rak ngah deuh ringring. Cule kan class ah Monitor le tlawng aiawh Announcer tivek tla ka tuan theu. Aw.. ka phun kua laiah kan tlawng aiawh in English Competition ka rak tel dah; round table phun ah kanmai group in pathumnak kan ngah.

CT    : Phun hra na kai laiah tuition (or) boarding school vekah na rak um maw?

TTM    : Aw, a tirah cun tlawng kai phahin tuition ka rak la. Cule December thla ihsin Snow Queen Boarding  School ah ka lut.

CT    : Ca na rak zohdan le zuamdan  pawl tla in hlawm aw.

TTM    : Zan tin nazi 7 ihsin 11 tiang ca kan zoh. Kei cu ca ka zir le ka zoh zik tin ten thla ka cam ta theu. A malbik ni khat ah vei 3 thla ka cam ringring. Cule Bible tla ni tin ka siar. Kan ca zohdan cu Maths le Bio cu a thupi mi chapter kha neh dingin kan zoh hmaisa. Question hlunpawl tu le tu in phiter. Ong mark ngah ding zat kan thiam hnu lawngah D hrangah a dang chapter ta kha in zohter. Chemistry le Physic cu definitions kha thiam ciang dingin kan byheart thluh; ni tin ten byheart in in siarter theu. Revision tla tu le tu kan tuah. English cu grammar neh ding kha in zirh tambik. Myanmarsar cu kutngan mawi le spelling dik a thupi.

CT    : Phun hra na kai laiah ziangvek harsatnak na rak tong dah?

TTM    : Ka bei a dong, ka tha a nau theu. Kan hostel ah hin thla hnih ah vei khat camibuai in phiter theu ih a tirah cun D in tla ka rak ong dah lo. A lehhnu lam lawngah ka mark kha a rawn tam leh cauh. Confidence ka tlaksam can khi har ka tibik. A tirah cun Pyin Oo Lwin ih Boarding School thabik ah kai dingin sunmang ka rak man ringring. Asinan phun hra ka vun thlen ngaingai tikah cun cutawk hmunah ka kai theisal lo. December thla tiang inn ihsin tuition lawng ka rak kai.

Ka bei a dong tuk si ko. Asinan ka  nu in hitin tha in rak pe: Boarding School thabikah kai in D tampi thawn ka ong a si le ka kainak a that ruangah tin na ruat pang dingih Pathian a sunglawi lo ding. Cathiamnak lo pe theitu cu Pathian sawn a si ih, mi vekin Boarding School thatha ah kai lo hman sehla D tampi thawn na on ahcun Bawipai ruangah ti kha mi in an thei dingih cutin Pathian a sunglawi ding. Curuangah khami na harsatnak kha Pathian hnenah hlan aw, tin in rak ti. Cuisicun ka tha a tho lehsal. December ni 17 lawngah Snow Queen Boarding School ah ka rak lut. Ka pa in harsa cing ten in rak ret tento mi hi ka hngilh thei dah lo ding! Khatlukih in rak duhsaktu ka pai parah ka lungawi tuk. Cule thazang in rak pe ringringtu ka nui par khalah ka lungawi ngaingai.

CT    : Har na tibik mi subject teh ziangha?

TTM    : Biology hi ka neh lo. Ka thiam cia mi tla ka rawisal thluh cingcing theu.

CT    : Myanmarsa ah D ngah ding hi a ol lo an ti cio mi a si ih ziangtin na rak ngah thei?

TTM    : Kut ngan mawi, felfai ten ngan, cule spelling dik tivek hi a thupi. Cule sasisakung (essay) ngan thiam ding tla a thupi. Cabu sung ta copy tawp tivek cu mark tampi ngah a har deuh; creative idea neih a tul. Kei cu ka nauhak lai ihsin cabu siar ka paih ruangah sasisakung ah cun harsatnak ka nei tuk lo.

CT    : D tampi thawi phun hra ong thei dingin ziang mi a tul?

TTM    : 1) Ni khat zir mi ni khat ah thiam thluh tum ding. Saya/mah pawl in ca in zirh laiah tha ten concentrates ding. Culawngah ca kan fiang thei ding.

  • 2) Thiam cia mi ca kha Revision tuah leuhleuh.
  • 3) Question hlunpawl kha phi thei thluh tum ding.
  • 4) Ihhmuh khop tei it le rawl tha tei ei tla a thupi.
  • 5) Rualpi tha, mah thawi tumtah mi bangaw, lawng kawm ding.
  • 6) Thinlung hnget nei ding hi a thupi tuk. Kei tla a tirah cun D tampi thawn rak ongpawl khi special thluak an nei ce si ding tin ka rak ruat theu.
  • Asinan a taktakah cun mah zuamnak hi a rak thupibik ti ka rawn theifiangsal. Curuangah beidong loin a thok in a cem tiang punghman ten zuam ding.
  • 7) A tir te ihsin tumtah mi ret cia ding. Cule kan tumtah mi kha pial lo dingin ralrin ding.

CT    : D pali thawn rori na ong thei hi na nu le pa pawl ih thapeknak teh a tel maw?

TTM    : Aw, tel tuk e. Ka pa in punghman in ra veh theu. Ka tul mi ziangkim in ra pe. Cule ka nu tla hmun dangah a um nan paisa in kuat, in phone ih tha in pe ringring. Cule phone ihsin thla tla in camsak theu. Ka pi tepawl in tla in ra veh ih rawlhmeh tivek tla in phurh theu. Hivekih in ngaihsak ruangah ka thanaunak tla a rehsal theu. Cule kan hostel ih saya U Win Kyaing in tla tampi tha in rak pe.

CT    : Hivekin D tampi thawn phun hra na on thei hi ziangruangahbik a si na zum?

TTM    : Pathian ruangah a si. Ziangahtile phun kua ka kai pekah ka pa in birthday in rak tuahsak ih cumi ah pastorpawl tla an ra ih phun hra ka kai tikah D tampi thawn ka on theinak dingah prayer request ka rak tuah. Cumi cu sibawi zir ka duh ruangah a si loih Bawipa kha a thabik pek ka duh ruangah tin ka sim. Cule ka dil vekin thla in rak camsak. A pahnihnak cu punghman in ca ka zoh ih zuam tla ka zuam. Ka rak sim zo vek kha a si ko.

CT    : Tu teh ziang mi si zir bet vivo na tum?

TTM    : Ka duhdan ah cun secular degree pakhat khat ngah ta sehla, cumi theh le M.Div kai sehla, cule peh vivo sehla ka duh. Pathian hnatuan hi ka tumtah mi a si nan Bible tlawng lawng si loin secular lam khal hi zir cem thotho sehla a that ka zum.

CT       :Ziangruangah Pathian hna tuan na duh kan lo ti le…?

TTM    : Kei cu mi bawm, nauhak fingkhawi, pitar putar tuamhlawm, cule minopawl thu zirh tivek hi ka paih tuk. Curuangah a si ding ka zum. Tu tla Church ah Praise & Worship ka lead theu.

CT       : Sungtepawl in teh thil dang tuah an lo fial maw?

TTM    : Fial lo hokhaw. Ka nauhak laiah cun Papu Tluang (Steven Ral Kap Tluang) in na upat tik le Politician na tuan ding tin in rak ti dah. Asinan papi le papu pawlin an rak kawk ciamco.. nangmah na tuan tum hman ziangtitha an ti.

CT    : Ca na siar theu tin na sim ih ziangtik ihsin lenglam ca tivek hi na rak siar thok?

TTM    : Phun khat ka kai laiah ka nu in cartoon le thuanthu cabu tivek in rak leih ih cumi ihsin casiar ka suai cih. Tlawng colh ni tin ten cabu dawr ta ka duhduh zat ka va sang theu. Cule keimai moh-phu (pocket money) in tla cabu ka lei.

CT    : Ziangvek cabu si na uar?

TTM    : A tirah cun cartoon le thuanthu cabu pawl hi siar nuam ka ti. Cule ka  nui’ cabupawl tla ka rawn siar vivo. Ka siar tam mi cabu cu Ttut Pi, Bo Bo, Mih Mann Lay, Shwe Yamin.. himipawl cu cartoon. Cabu dang cu let mipawl hi ka siar tam: Mya Than Tint, Maung Htun Thu, Phay Myint, Erich Segal ih Love Story le The  Class, Margaret Mitchell ih Gone with the Wind, Geoffrey Archer ih Cain and Able, Charles Dicken ih David Copperfield, Shakespeare ih Dramapawl, Leo Tolstoy ih capawl tla ka duh theh. Cule Godfather, Papillon le Banco, Exodus, ai.. ka thei cawk nawn lo. Kawltong ih let mi hi ka siar tambik. Cule Mirang retold tetepawl tla ka siar phah thotho.

CT    : Laica teh na siar lo maw?

TTM    : Aw, tu phun hra ka on hnuah mekazin hlunpawl ka siar ciamco. Laica rori thawn bezai phuah thei le ca ngan thei ka tum.

CT    : Na cabu siar zo mi lakah ziang mi cabu in a lo nehbik?

TTM    : Phay Myint ih let mi “Chicken Soup for Soul” ti mi cabu. Ka kum 12 birthday ah ka nu in a series in in rak present.

CT    : Tlawngta pakhat in lenglam cabu siar ciamco hi tlawng ca a buaiter lo maw?

TTM    : Kei cu in buaiter dah lo. Tlawng ca zoh can pelh tiangtiangin cu kei tla ka rak siar dah lo. Tlawng colh ni tivek lawngah si ka siar theu. Tlawng ca lawnglawng siar hi ka nu le ka pa in tla tul an rak ti loih ka vantha.

CT    : Tlawngta pakhat ca a thiam theinak dingah nulepa in an turhhnawh hi tidan dik a si kem?

TTM    : Kei cu ka nulepa’n by force in zianghman in rak fial dah lo. Tlawng ah number one tengteng si ding tivek khal in ti dah lo. Ka rualpinu cu a nulepa in pakhatnak na ngah lo le kan lo vaw ding tivekin an ti ih kan sayama in monthly exam result in sim zik cun a tap cia simai. Ka zangfak thei lutuk. Ca tla a thiam phah cuang lo.

CT    : Asile nulepa in ziangtin ti sehla tha na ti?

TTM    : An fate kha ca thiam a thupitdanpawl theithiam dingin simfiang hai sehla, cule ca thiam duhnak thinlung nei dingin tla sim theu sehla. Fial copih ca zoh hnak cun thiam taktak duhnak thinlung thawn zoh le a thiam ol cuang. Pressure pekawk hi kei cu tha ka ti lo!

CT    : Bezai tla na ngan theu ih fing ziat na rak ngan zo?

TTM    : Si ee, kei cu bezai ngan ka paih tuk. A zaten fing 50-70 hrawng cu ka ngan zo ding.

CT    : Ziangruangah bezai na ngan?

TTM    : Ka thinhar can tivek, ka umhar can tivek le bezai ka ngan theu. Cule ka thin a rawng nuamdeuh in ka thei. Ka lungawi can tivekah cu ka ngan dah lo.. hii..hii..

CT    : Phun hra tla na ong zo fawnih boyfriend tivek teh na ret thlang lo ding maw?

TTM    : Aw, ka ruat rero lai..hii..hii. Ka nutelepawl.. Ta (Tavi) le Te (Juny Run Rem Men) pawlin phunsang tlawng na kai laiih boyfriend na neih lo le na siraw leh ding tin in cah nasa. Anmah tla an rak siraw tuk vek a bangih … hii…hii..

CT    : ‘The man of your dreams’ hi zovek a si pei tin kan lo sut le teh?

TTM    : Pathian theitu le keimah le ka sungkhat tla in theithiamsaktu si sehla ka duh.

CT    : Na duhbik mi Bible caang in sim thei pei maw?

TTM    : Filipi 4:13: In caktertu Bawi Krih zarah ziangkim ka ti thei.

CT    : Na motto tla theih kan duh hrih.

TTM    : No mountain too high for you to climb; no river too wide for you to cross. (Celine Dion ih Angel ti mi hla lyric ta).

CT    : Na ‘Ideal Person’ hi zo a si pei?

TTM    : Phun hra ka rak kai sung hmuahhmuah ah ka rualpipawl thawn Lal Pek Tluanga zohthim in kan rak zuam ciamco. Amah hi 2010 kum ah ka kainak hostel ihsin All D in phun hra a rak ong.

CT    : Phun hra a kai rero lai ding mipawl hnenah ziang mi na cah duh?

TTM    : Pathian rinsan ding. Ni tin Bible siar in thla tla cam ding. Cule tlawng kai veten tumtah mi goal ret ding. Cumi goal kha hngilh loin theih ringring ding. Ziangtikhmanah beidong lo ding. Kan zuam ah cun a cang thei lo mi a um lo ti kha theih ding.

CT    : Na personal thuhla teh lo suh a ngah pei maw?

TTM    : Aw, a ngah tuk lawlaw. Nan duhduh in sut uh. Hlawmawknak chance Bawipa’n in pe tin ka ruat ding.

CT    : Kan lungawi tuk. Broken family sung ihsin rung pitling mi na si tiah kan rak thei. Nangmai experience sungin thu cah duh mi (or) hlawm duh mi na nei maw?

TTM    : Si ko, 2006 May thla ah ka nu le ka pa an rak thenaw. Cutawklaiah kei cu phun ruk (kum 12) ka si ih ka nau cu phun li (kum 10) a si. Ka pai’ hnenah kum nga sung ka um hnuah 2011 March thla ihsin ka nui’ hnenah ka umsal. Ka nulepai’ thenawk thu ah zohman ka mawhthluk lo. Ka duhdawtnak khal a danglam cuang lo. Annih khal in duhdawtnak a danglam cuang lo.

Asinan ka nulepa an thenawk ihsin kan unau hrangah ‘inn’ ti mi hi a san a um nawn lo vekin a um. Ka rualpipawl an nulepapawl thawn an um ka hmuh le ka daw thei tuk. Cule tlawng ah laksawng la dingih ka feh ni tivekah hin ka nu ka ngai cuang. Hnipuan hruh ding le ceiawkdan ding tivek ka thei loih ka tap ciamco theu. Ka nu hi a fel tukih mi cei tla a paih cuh. Cule shopping feh can tivek le hnipuan lei ding ka hrilthiam loih ka nu ka hlam theu. Cule hlawhtlinak tivek ka ngah canah ka nu ka ngai thei tuk.. ziangahtile nu vek cun pa in mi lawm an thiam lo. Hlawhtlinnak ka co tla hi ka nu thawi kan umkhat lai vekin a manhla thei nawn lo. Ka nu cu mi thazang pek le mi lawm tivek hi a thiam thei tuk. Cule mi ngaihsak tla a thiam.

Ka hmuhdan ah innsungsangah hin nu hi an thupibikin ka thei. Nu cu pa vek an si thei thotho nan, pa cu nu vek an si thei ve lo. Ka pai’ hnenih ka um laiah ka nu a um ve lo ruangah ka nun hi a famkim thei lo; tu ka nui’ hnenah ka umsal zo nan ka pa a um ve lo ruangah a famkim cuang lo thotho. Curuangah nupa zohman hi thenaw lo hai sehla tiah ka cah duh.

Cule ka nau Joseph tla hi inn ah ka nu a um nawn lo hnu cun inn ah a ngam thei nawn lo. Cunah anih hi kum 10 mi lawng a rak si lai. Ka nu hi fale lehpi a paih thei tuk; computer/TV game tivek lehdan in zirh ih kan lek khawm theu. Cule inn sungah ral do tivek, lentecelh tivek, cahnah thlep (Origami) tivek, a phunphunin kan rak lek ciamco theu. Cutin ka nu a um nawn lo vukvi tikah kan unau cu umdan kan hloh thluh; kan vavai a sibik ko. Ka nau umdan ka zoh hin ka zangfah tukih ka thin a na thei tuk.. hnemdan le ka thiam si lo.. a thup ten ka tap theu. Nu a um lo cun innsang cu a bu a hlum thei nawn
lo rori. Ka pa in tla a tha theibik in in kilkhawi ko nan sam mi kan nei thotho.

Ka hmuhdan ah innsungsangah hin nu hi an thupibikin ka thei. Nu cu pa
vek an si thei thotho nan, pa cu nu vek an si thei ve lo. Nulepa thenawk cun.. ka pai’ hnenih ka um laiah ka nu a um ve lo ruangah ka nun hi a famkim thei lo; tu ka nui’ hnenah ka umsal zo nan ka pa a um ve lo ruangah a famkim cuang lo thotho. Curuangah nupa zohman hi thenaw lo hai sehla tiah ka cah duh.

CT    : Nupa thenaw nulepapawl hnenah ziang mi na sim duh?

TTM    : Falepawl kha duhdawtnak langter ringring thotho ding; a cang theibikin ngaihsak ringring ding. Cule falepawl hnenah zohman in nui’ mawhnak, pai’ mawhnak tivek hi fale hnenah sim rero lo ding; mi thin a nauter men. Fate hrangah cun nulepa hi an sunglawi tuk; special an si ringring ti kha theihsak ding. Cule nu ton siang lo, pa ton siang lo tivek hi ti lo sehla tiah ka cah duh bet. Cuvek cu fate hrem rero thawn a bangaw!

CT       : Nulepa thenaw falepawl hnenah teh ziangtin thazang na pe duh?

TTM    : Nulepa an thenawk tikah fale in tampi kan tuar. Asinan cumi cu thinnaunak le thinnatnak ah hman ding a si lo. Nulepa thawn hmun khatte ih umtlang lo ruangah kan hmaikhua siat phah koin tuar ding a si lo; leitlun nulepa hnakih in duhdawttu le in ngaihsaktu Pathian kan nei ti kha cing ringringin mipitling pakhat si thei dingin zuam ding. Nulepa neih lo ruangah sunnak a si cuang lo, mi bang lonak khal a si lo. Nulepa thawn umtlang nain hlawhtling lo tampi an um bangin, nulepa thawn umkhat lo hman sehla hlawhtlinnak a co thothotu khal tampi an um thotho ti kha theih ringring ding. Kan tuar mi hi a lak a si lo; Pathian in a sunlawinak hrangah kan tuarnak hi a hmang thei.

CT    : Na rak tuar mi harsatnak lak ihsin tuvekin ziangtin na hlawhtling thei?

TTM    : Pathian ruangah a si ko. 2008 March thla ah khan ka rak piangthar ih cuisicun ni tin te Bible ka siar, thla ka cam theu. Cule ka nu le ka pa le sungkhat pawlih thlacamnak ruang khalah a si. Pathian bomnak thawn ziangkim ka tuarsuak thei ti hi ka zum ringring. Pathian rinsan hi a hlawk tuk.

CT    : Na tonteh zo mipawl thawn pehparawin ziang mi na sim duh?

TTM    : Ka ton mipawl parah vei tampi cu ka thin a na theu. Asinan tu ah cun cumipawl cu lung mankhung vekah ka ruat thei thlang. Ka experience pawl hi midang bomnak hrangah a rak thahnem tukih curuangah poi ka ti nawn lo. Minung kan dam sung hi tawite lawng a si ih cumi sungah mi tampi bawmtu le bawmnak tampi pe theitu si hi ka duhbik.Tu cun kei tla ka nui’ hnen ka thlengsal zoih ka hna a ngam tuk. Ka nu in ka nundan ding le ka umdan ding tampi in zirh, in kaihruai. Cule ka pa khalin in ngaihsak ringring thotho. Curuangah ka future hrangah ka thla a phang nawn lo.

CT : Na bezai phuah mi lakih na duhbik mi fing khat ten in hlawm siang pei maw?

TTM: Aw, hlawm siang tuk ee. Himi biazai hi Kawltong ih ka nganmi asi ih ka nu in kan Laitong ih in lehsakmi a si.

Bu Hlum

Hngirhngir awnpawl in
Ka nunnak an thangharh
Huatawknak thawi ngiarawknak
A ralsanaw mi hmuitinnakpawl thawn
Nun an rak remtlang tikah
A can a hung kimih
An karlak a khing thlang cun
Thenaw in a laiah a phel phukphi.
Kan hlimnak bu le
A hlum nuam mi meifar
A kuai darhsarh thluhdan cu
A bu a siat, fano khal ti phengphengin
Beunak bu a hrek a  hek hnu cun
A hrek lawng tang mi cui bu cu
Thli sia khalin a nuai duh ce maw ti pangnak!
Tui hlanih ka rak theih dah lo mi thlatang
Tu ah cun a daihdan a luar cuang!
Aw.. a bu a siat thluh hnu cun
Vate fanopawl khal
Beunak hmun nei lo’n an vavai.
Kan beunak bu hlum  nuamte kha
Ziangruangah henha
A rak siattheh ke aw???

CT    : Duhsaknak tampi thawn na sung thu in hlawm sian ruangah kan lungawi tuk. Kan lo sut ngah lo mi a um pang le in sim aw.

TTM    : A um lo a bang. Asinain CT parah lungawithu cu ka sim ta duh. Kei lamlam tla in rawn interview ih ka lungawi lutuk.

CT    : Ziangtin kan lo pehtlaih thei ding?

TTM    : Email in kan pehtlaihaw thei ding: lengdawh.lasi@gmail.com. Facebook ah tla ‘Mai Tluang Than Mawi’ tin ka um ko.

CT    : Famkim ten kan thusuhnak in sansaknak parah kan lungawi zet.

TTM    : Kei tla in interview ruangah ka lungawi lutuk. God bless you all!

%d bloggers like this: