Hlasak Thiam – Mai Far Men Par

Mai Far Men Par

CT: MaiFar Men Par thusuhnak kan lo neithei pei maw?

FMP: Aw sut thei tuk ee.

CT: Na nu le pa, na unau, na inn sungsang in sim thei pei maw?

FMP: Ka pai hmin cu Upa Run Hlei Khar a si ih ka nu cu Nu Bil Nei Thluai a si. U nau 12 kan siih kei hi a 6 nak ka si. Cun Fa te pahnih Salai Samuel Sui Zalan Bik (Za Za) le Mai Lydia Van Lian Par ( Boih Boih) ka nei.

CT: Tui na umnak hmun le na tuah mi in sim thei pei maw?

FMP: Kuatit, Kalaymyo Saya Lal Nei Thang inn ah ka um. Pathian rawngbawl in ka um.

CT: Na piantharnak tawiten in sim thei maw?

FMP: 1988 Sunthla Revival Khawmpi ih Rev. Lal Lian Thang ih thusimnakin ka piangthar.

CT: Ziang tikin hla na rak sak, na hlasak hmaisabiknak in sim thei maw?

FMP: Kum (8) ka siin hla ka rak sak thawk. Sim Dihai Presbyterian Sunday zaan ah in tansan zotu ka u Dar Nei Sum ih fialnak in hla ka rak sak hmaisabik. Ka hlasak hmaisabiknak a si ruangah ka ning a zak tukih biakinn hman ah to ngam nawn loin inn ah ka tlung cih.

CT: Na nauhak lai ah hlasak thiam si dingin na rak ruat aw dah maw, tumtahnak teh na rak nei maw?

FMP: Hlasak thiam si ding cun ka rak ruat aw dah lo. Asinan ka nu le pa in sung khawm nakah Pathian thu in rak sim theu ih Bible tlawngkai ih Pathian rawngbawl ka rak tum. Ka pa cun kan sungkhawmnak ah “Kei le ka inn sang cu Bawipa hna lawng kan tuan ding” timi in rak sim theu ih tui ni tiang ka thinlungah a cam.

CT: Hla fingziat na sak?

FMP: Hla hi fing 213 ka sak fel in ka thei aw, cu hnak ih tam tla ka sak men thei. Ka mang ciah nawnlo.

CT: Na hla duhbik mi le na nun nak ih a lo neh bik tu hla ziangvek pawl an si?

FMP: Hla duhbik mi ti cun ka nei tam tuk. Asinan thazang ka ngah nak hla pawl cu “Lungte cu au hlah seh”,Ka aw zaihla hmangin”, “Kan tuar khal Pathian in, in siang”, “To men a rem thiamlo”, “Phuangding ih fial mi”Bawipa  atha“, “Bawipa loram” ti pawl hi an si.

CT: Hla na sak hlan ah ziangvekin so timlamnak na neih theu?

FMP: Mi nun ram ih Pathian a sunlawi thei nak dingah thlacamnak nasazet ka nei.

CT: Hla na phuah ve maw?

FMP: Phuah mi cu ka neilo nan ka nau Van Nei Thiam ih in tan san ah khan Saya Ren Hlei Thang in “Van timi umlo sehla” timi in phuahsak. Cun ka testimony ruangah Evan Tha Nei Fai in “Ka aw zai hla hmang in” timi in phuahsak lala. Cun August 17, 2005 kum ih Aragan Yakhain ram ih missionary a tuan tu ka nau Ramte hngihlonak dingah “Thenlonak khawpi” timi Dorcus Eng in in phuahsak.

CT: Khui Zianzat na tuah zo?

FMP: Keimah lawngin khui (11) ka tuah. Mi kawp in (4) ka tuah. Culo khui dang tivek ah vei hnihkhat ka sak.

CT: Pathian hna na tuannak ah ziang mi harsa nati bik?

FMP: Lungrual lo ih rawngbawl hi har ka ti bik. Caan tampi cu iksikawknak a um theu ih cunah cuvek umlo ih lungrual te um hi ka duhbik. Lungruallo hi a har ka tibik ko.

CT: Na aw hi na tuah dah maw, ei in na sup aw maw?

FMP: Ka aw ka tuah dahlo. Cun ka aw siat phan ruangah veikhat te hman ei in ka sup aw lo. Ka aw cu Pathian ih laksawng in pek mi rori a si.

CT: Hnam danghla na thun maw?

FMP: Hnam dang hla khui (2) keimah te in ka thun ih khui (2) leh cu mi dang pawl thawn kan thun.

CT: Hlasak thiam ah zo na uar bik?

FMP: Lalrutmawi hi ka duh in ka uar bik.

CT: Kan Laimi Gospel hlasak pawl hrangah ziang na cah duh?

FMP: Pathian tihzah ih um. Thlacam nun nei le Bible siar thlahthlamlo. Mithenkhat cu hla vial sak dingih ruat aw Crusade thu zir can ih zir duhlo, thlacam lemlo hlasak menmen tla an um theu ih cuvek siloin an nunnak zaten Pathian hrangah pe aw theh dingin ka duh. 

CT: Kumziat na titiang hlasak na tum?

FMP: Bawipai kutnem ka kaih hlan sung cu ka sak ding.

CT: Nuam na tibik can le harsa na tibik can in sim thei maw?

FMP: Lungrualte kan um can khi nuam ka tibik ih halhsikaw le lungrual lo, thinlung hmu aw lo ih kan um can cu harsa ka tibik can a si.

CT: Love song na sak dah maw?

FMP: Ka pianthar ihsi cun Love song leitlun hla pawl ka sak lo law law.

CT: Love song saksehla ziangtluk na lar ding in na zum aw?

FMP: Ha..ha..ha..ka ruat dahlo.

CT: Rawl hmeh thaw na ti bik teh ziangvek ha a si?

FMP: Voksa a si.

CT: Delhi laimi pawl ziangtin na hmu? Thucah duh na nei maw?

FMP: Lungrualnak lamah cun an lungrual zet in ka hmu. Pathian thu ahcun ka zum hnak hman in an rak haal. Nuntu khawsak daan ahcun an harsa rori a si.  Ram dang feh ding hngak hlir an siih ram dang feh an duhvek rori in Pathian thu khal duh haisehla tin ka duhsak. Pathian hi a thupi bikah ret ding in ka duhsak in ka cah a si.

CT: Na fa pahnih pawl ziangtuah dingin na beisei?

FMP: Pathian riantu si dingin ka duhsak hai. Cun hlasak thiam an si ve ding khal ka duhsak.

CT: Khawi tawk hmun le tlangah na um duh?

FMP: Pathian ih i retnak hmunhmun ah ka um duh ko. Lairam khawte ih rawngbawl dingih in ti khal le um ka duh. Amah Pathian in fial tui’ thu a si.

CT: Mai Far Men Par tin mi tampi in an lo thei ih, na fehsukso nak ah lo hmu cak tuk tu pawl na tong dah maw?

FMP: Aw tong tuk law law. Vei tampi cu ka thinlungten kei vek men, Pathian ruangah a si hivek ih in hmuh duh tin lungawi sopar ten an kut ka kai hai.

CT: Na fehnak ih kip ah mipi in ziang thu an lo sut tam bik?

FMP: Ziangah tutiang hla na sak thei? Ti a si.

CT: Na u pa vivo ih na aw a cuai vivo in na thei aw maw?

FMP: Upat vivo cun a sang lam hi ka ban lo deuh vivo in ka thei aw, asinan mi tampi cun na aw a kel in ti tu khal an um ih cun na falat lai hnak in a mawi sinsin si lo sawm in ti tu khal cu an bo lo.

CT: Ziangruangah Pathian hla lawng lawng na sak?

FMP: Ka nun diriam tertu umsun a si.

CT: Na hmailam hrangih na tumtah ziangbik a si?

FMP: Tumtah tampi ka nei nan a tuah hlawhthlin tertu cu Bawipa a si. Nauhak lakih thuthangtha sim vivo. Kan inn kiangkap Pathian thu theilo pawl hnen ih thuthangtha sim. Hngaktah pawl cawm. Hlasak vivo le VCD tuah thei vivo, peknak lam khal ah cak sinsin thei sehla ti cu ka sa duh thah le ka tumtah pawl an si.

CT: Pathian hna tuannak ah ziangha ralrin tul na ti bik?

FMP: Daithlang lo ih hna tuan. Nunnak zaten Bawipa rian a tul. Nu nau le mipa karlak ah ralrin ding a tul. Tongkam supawk khal a tul zet.

CT: Kum ziat Pathian hna na tuan zo?

FMP: 1992 ihsin tu 2008 tiang a si.

CT: Na aw thun hmaisabik ih na um daan in sim thei maw?

FMP: Sim Dihai ihsin Busul le kawhhawl ei theh ah ka nu le pa thlacamsak in neihsak hnu ah ka pok. Tahan in van zam in Yangon ah ka suk. Pu Hming Lian, Thang Boih le nu Tuan Nei Thluai pawlin in thlun. Khui ka thun ih harsatnak pakhat ka ton mi cu music lam a si. Khawte ih um kan sivekin mino khawmzan vial ah electric tingtang kan tumih, aw ka thun ahcun music kimten an tum tikah ka sak theilo, asinan cui a hmun lala ah napin Pathian hnen ah zangfah ka dil tikah mangbang thlak zetin  zinglam kau ah khui khat “Lungte cu au hlah seh” timi khui kan thun theh. Zinglam nazi 7 ihsin kan thun thawk ih 11am ah ka theh verver. In theitu Daw Win Shein (Drum tum le hlasak thiam) pawl le mi dang pawlin kawl hla sak dingin in sawm cih. Ka sim duhsawn tak cu Pathian in ka hrangah mangbangza a tuah mi sawn a si.

CT: Delhi ah rawlbawng ding in na ra ih na nau Awite in a lo thlun ih nan thuhla malte in sim thei pei maw?

FMP: Ahmaisa in Delhi kan rat tikah lamzin ah thlemnak aphun phun kan tong Setan pa in Delhi thlengthei lo dingin hna a tuan nasa nan Pathian in tluangten Delhi in thlen thei hi kan lungawi. Ka nau Mai Khuah Pek Awi (Awite) hi Nauhak pawl thu le hla ih in zirh bawmtu dingah tin in thlun. Awite hi kawlram Revival Baptist Church ah fulltime in nauhak zirh in Evan a tuan. Hlasak lam ah a pum a pe aw ve ih Gospel hla khui hnih “Cung sang run nuam” timi ah le “Thuthangtha meifar” timi ah hla a sak ve. A rei hlan ah Australia ih um Jemy Biak Nei Mawi (Mawite) ih bawm nakin khui thar a tuahsuah ding. Cumi hrangah thla in cam sak uh.

CT: A neitabik ah na Bible cangthlan in sim thei maw?

FMP: (Col 3:12-14) a si.

CT: Sayamah Far Men Par na caan sunglawi in pek ih thu tampi kan lo suhmi in sang ruangah kan lungawi.

FMP: Kei khal ka lungawi tuk ve. (Hni phah ten).

Mai Far Men Par in khui thar “Cross pu in” timi CD a suah sal zo.

Get Widget