Nimthlakau Interview- Ma Kim

Profile:
Hmin                           : Lal Rin Kim (Ma Kim)
Suah ni                       : May 6, 1986
Suahnak khua          : Shia Taw, Kalaymyo
Nu le pa                     : Pu Sang Hlei Ling & Pi Lian Hlei Sung
Unau                           : Unau pali ah nautabik sangtu
Tlawngphun              : B.Sc (Maths)
Tui umnak                  : Yangon

CT: Laimi artists lakah hlasak cu an um hnuaihni ko nan dancer cu an um tuk hrih loih ziangtin lehlam dancer pakhat na rung si thei?

MK: Kei cu ka nauhak lai ihsin laam hi ka rak paih ve hrimhrim. Yangon ka thlen hnuah training ah laam ka va zir ih cuisin a umzia felfai deuhin ka run thei vivo. Cule video zoh phahin tla keimah ten ka zir theu. Ka laam le stress pawl tla an hlo thluh ih ka fresh sal theu. Curuangah laam hi nuam ka ti; ka laam le cu ka hlim a si ko.

CT: A hmaisabikih na rak telnak hla album hi ziang a si?

MK: ‘Rinum Ten’ ti mi CD album hi ka rak tel hmaisabiknak album a si. Producer cu Canada ih ‘Tikhing Awnmawi’ pawl an si.

CT: Tiger Girls producer le nan Tigers ziangruangah nan rak thenaw?

MK: Hitin si, kannihpawl cun original (own tune) hla lawng tuah kan duh ih a hlan kan producer nih cun copy hlapawl tuah in fial tikah, in duhsak ruangah cu a si ding nan, kan hmuhdan le kan pomdan a bangawklonak tete a um ruangah kan trainer Nikki ih ho in kanmah ten ding dingin kan lungkimtlangih cutin contract tuah bet nawn loin kan thenaw a sibik.  Cule ‘Tiger Girls’ hmin kha hmang nawn loin ‘Me N Ma Girls’ tiah hminthar kan tuah.

CT: ‘Me N Ma Girls’ hmin a rung suahdan tla theih kan duh hrih.

MK: Kan band hmin dingah ‘Me N Ma Girls’ kan hrilnak san pahnih a um: ‘Myanmar Girls’ tin le, ‘Keimah le ka rualpi pawl’ tiah. Myanmar ramsungmi kan si bangin traditional thil khal hloh loin le tulai tho si in feh vivo kan tum. Kan band hmin hi siar tikah a awsuah cu ‘Myanmar Girls’ tin a suak ih a ngan cun slung deuh nawnin ‘Me N Ma Girls’ tin a si. A hlan kan hmin (Baby, Chilli, Missy, Electro le Tricky) pawl kha (Ah Moon, Kimmy, Cha Cha, Htike Htike le Wai Hnin) tin kan hminngai sawn  kan hmang sal. Kan character cu a hlan vek thotho khan a si ding. Kan hminpawl lawng a thlengaw ih kanmah panga thotho kan si, kan talent le kan quality khal a tumsuk cuang lo. A hlan Tiger Girls tha nan rak pek bangin tui ‘Me N Ma Girls’ khal hi tha in rak pe vivo dingah hitawk ihsin ka lo sawm cih duh.

CT: Tiger Girls le Me N Ma Girls karlak a danglamnak teh ziang a si?

MK: A hlan Tiger Girls laiah cun a lengah single in hlasak a ngah loih tu cu contract thawn a si lo ruangah single khalin sak a ngah thlang. A free lawlaw kan ti pei cu.

CT: Me N Ma Girls hi zobikin tuanvo a la ih a hoha?

MK: Kan hohatu (Trainer) cu Nicole May a si ih Nikki tin kan ko. Amah hi Australian a si ih an ram ah Band a nei ih professional singer pakhat khal a si. Nikki hi cathiammi pakhat a si ih an ram khalah hnatuan ti cawk lo a nei ko nan Kawlram hi a duhdawt; missionary vekin Kawlram ah um in talent a nei mipawl kha zirh le kaihruai in international level thleng thei koi tuah sak a duh. Curuangah Kawlram ah umhmun khuar rori’h kannihpawl in buaipinak san a si. Kan vanthatnak cu amah hi ramdangmi pakhat a si ko nan a idea le concept pawl hi kanmahpawl thawn a milaw thei ngaingai. Kan nuamaw tlang hai zet. A tumtahnak tla hi international tiang hit ban dingin ti a si tikah in zuampi ngaingai.

CT: Nikki in a lo train dan hi in hlawm thei pei maw?

MK: Zarh khat ah ni 3-4 hi hlasak phahin kan laam ih high-heel (4” sang) hrukin training kan tuah ringring. A cancanah cun paih lo can le zangzel can kan nei ve theuih cuvek can le cu kawk kan tuar a si ko. Amah hrimhrim hi mi active tuk le zuam tuk mi a si tikah a duh vekin a dung kan thlun thei theu lo. Cutik le in hawmthawhnak le duhsaknak thawn in kawk ciamco theu. Asinan ni a liam hlanah ngaidam in dil salih in phurter sal theu. Mi kaihhruai le mi zirh lamah cun perfect rori a si.

CT: Nikki hi nanmahpawl in nan hire maw, asilole ziangvekin nan tuantlang?

MK: Nikki hi kan trainer dingah paisa phalh ih kan san mi a si lo. Cuvek ding cun tlin khal kan tlin lamlam lo ding. Ka rel zo bangin anih hi Kawlram music hin international a kai ban theinak dingah ti duhsaknak lungput thawn hinah a ra um mi a si ih kannmahpawl ih tulsam mi hman amah sawnin in a zal sung paisa hmangin in phuhru sak theu lam. Kannih in train ruangah sumpai fang khat hman a hlawh dah lo. Tu tla hi an ram ah a vung tlungih kanmah hrangah ni khatah nazi 20 rori hnatuan in sumpawl in hawl sak. Pumpeknak pumhlum thawn in cawmdawl mi a si. Kan group ih NUBIK rori a si. Hlawhtlinnak pakhat khat kan co tin ten amah tlukin rak lungawitu hi an um lo ding.

CT: Me N Ma Girls ih custume design pawl hi nanmah te tawlrel mi maw, tawlrelsaktu nan nei?

MK: A cancanah cun designer hnenah ka ap theu nan a tlangpithu cun kan Manager KoThet Paing in in ngaihtuah sak theu.

CT: Me N Ma Girls lungrual tei ke nan kartlang theinak thuthup hi ziangbik a si  pei?

MK: Performance kan neih hlan tin ten kutkaiaw in mah le biaknak ciarin thla kan cam theuih, Nikki ih in zirh vekin:

Number one       : Have fun!
Number two       : I’m talking to you!
Number three     : Energy!
Number four       : Don’t look at the floor!
Number five        : Sing through the mic!
We are ‘Me N Ma’ girls! tin phur takin kan au hluarhlo ta theu.

CT: Me N Ma Girls in ziangtiangin sunmang nan nei?

MK: Ramsung lawng si loin ramleng tiang nor vivo thei ding.

CT: Tufangih Me N Ma Girls in nan neih mi cangvaihnak pawl in sim thei pei maw?

MK: Sim thei tuk e. Kan dung water festival hlante ah khan VCD pakhat kan rak suah zo. Tu hi album thar hrangah hla kan khawl rero lai. Cule puai tivekah tla performance kan nei theu.

CT: Me N Ma Girls si loin nangmah ‘Ma Kim’ lawngin teh cangvaihnak na nei maw?

MK: Aw, nei phah e. Tu hi, tui hlan Laimi lakih rak lar zet band pakhat a si mi ‘Salai M’ kha tharthawh sal an tum ih, new version thawn sak  sal ding kan si. Cumi hrangah hla hnih sak ding ka  nei. A tumtu ding cu Mosquito Band an si. Cule tu hi keimah ten single album tuah thei ka tum ih hla ka khawl rero lai; VCD/DVD in tuah cih thei ka beisei ih Pathian rinsan in tuahsuak thei ka tum.

CT: Ziangvek hla style sawn na hril? Hlaphuahtu teh zopawl an si ding?

MK: Music style cu Pop, R & B, Modern Rock le Slow pawl an si tlangpi. Hla in phuahsaktu pawl cu Zante (Bless Me), Salai Lal Siang Aung, Jesse (Klirlungz), S. Kei Uk (Klirlungz) le Mai Sokhlei Par pawl an si. Keimah khalin ka phuah phah ko.

CT: Lai music hrangih na sunmang teh ziang a si?

MK: Kan Lai music ah hin dance music hi kan neih tuk hrih lo ruangah, dance music sersuah thei ka beisei. Cule dancer group thawn DVD suah thei khal ka sunmang. Tha in rak pek cio khal ka beisei tuk.

CT: Chin music khawvel ah musician tam sin an rung suah theinak dingah ziang a tul tin na ruat?


MK: Ka ruah ve dan ah cun:

1)      Love song ngai siang lo tivek hi um nawn lo sehla

2)      Tumtahnak hngetkhoh neih

3)      Mah thawn a milaw mi lamzin hril thiam ding

4)      Talent kan neih mi kha tathriam ringring ding

5)      Kan tuah ding mi hna hi hlawknak a um lo/a mal  a si khalle tha sup lo ten a tha theibikin tuahsuak tento ding

6)      Fashion khal ngaihsak a tul. Hnipuan kan thuamawk dan ih zirin mipi kan hip, kan hip lo thei. Asinan sexy tuk tivek hi cu hrial thei sehla.

7)      Confidence neih hi a thupi tuk. Confidence nei loih kan tuah mi ziangkhal hlawhtlin ngaingai a theih lo.

8)      Communication skill neih a tul. Artist ti mi cu mipi thawi hnamhnoihawk lo a theih lo ruangah mi zovek khal a biak thiam a tul.

9)      Kan co mi hlawhtlinnak a fatebik ihsin a tumbik tiang Bawipa Pathian sunlawinak hrang siter ringring ding.

10)  Mah le mah tawk tukih ruataw loin zuam bet ringring ding kan si ti mi lungput neih.

CT: Music khawvel na rak luh ihsin tui ni tiangih na hngilh thei lo mi pakhat khat in sim aw.

MK: Haaa.. a tampi, ziangbik ha ka lo sim ding aw! OK, paisa hlawhnak hrangih hla ka rak sak hmaisabik tumih ka ton mi ka lo ruah ding maw.

Tlawng ka theh kum, kum 19 mi ka rak si laiah Yangon ah mah tei todelhaw ih um dingin thu ka rak ruatcat. Cunah paisa ngahnak dingah tiah hnatuan hawl dingin ka rualnu thawn Hotel pakhat hnu pakhat ah lut in ‘Singer nan tul maw?’ tin kan va sut vivo. A netnakah singer a rak hawl rero mi Hotel pakhat kan va tong ngah. Managerpa in test nakah hla in sakter ih keimah ten guitar tum in ka rak sak. Vanthat ah manager pa in ni tin in ra sak sak thei kem tiah in sut cih. Cumi  laiah hla fing hnih lawng hi byheart ih sak thei mi ka rak nei. Taktakah cun hotel vekih hla sak ding cun a malbikah hla fing zakhat tal cu byheart tengteng a tul. Cutikah Managerpai’ hnenah hla fing hnih lawng ka ngah ih notes khal pakhat hman ka nei lo tiah frank zetin ka sim lawlaw. Asinan Managerpa cun a ngah tuk, na ngah vivo ding si si, internet ihsin tla ka rak lo hawl sak ding hokhaw tiah in ti. Amah riangri sawnin a hnenih hnatuan dingin zangfah in dil sawn lam. Ka ralthat dan ka ruahkir tikah ka tuk a sum tuk!

CT: Music lamzin na zawhnak ah ziangvek harsatnak pawl na rak tong?

MK: Harsatnak cu tampi ka tong ko; rel cawk hman a si lo ding. Music hi ka pumcawmnak a si tikah zir ringring a tul: hla byheart a tul (byheart ih ka ngah mi hla hi tu cun fing 300 hrawng a si zo), music style khal Jazz ihsin thokin rap tiang sak thei dingih zir a tul, dance khalah si seh MTV le ramdang girl band pawl zoh ih zir ringring a tul, music instrument a malbik pakhat tal tum thiam a tul; zangzel le  daithlan a  ngah lo lawlaw.

Hi hlanah hin VCD player se berbite pakhat lawng hi ka rak nei ih ziangtlukin a sia ti le cu ‘close’ hmeh a ngah loih kut thawi tullut lawngah a lut thei. Cule a parah kut thawi nam lawngah a aw a suak thei! Cumi te thawn kum khat zikte hla ka rak zir. Hnih tla a suak lamlam. Tu tiangin cumi cet cuka kol hlenhli lai.. hngilhlonak ah tiah.

Ni khat cu ka hnatuannak Hotel ihsin ka suak ih hna dang ka hawl lala. Asinan ka hlasak duhnak hmun cu unplugged thawi sak theinak dawr a si tikah hna ka hmu lohli thei lo. Ka beidong tuk thlangih paisa le ka tlasam thlang tuk tikah beer dawr pakhat ah hna ka van tuan. Cumi dawr cu hlasak thiam ngaingai lo hmanin paisa tampi an ngah thei; ziangah ti le cui dawr cu pangparthi orhter theinak dawr a si tikah mipa duhzawngih performance a pe thiamthiam kha an hlawhtling a si mai. Cumi dawr ah zan khat hla ka va sak; asinan kei cu ka zei lo deuh a si ding… parthi orhtertu pakhat hman ka ton loih hleiah paisa khal fang khat hman ka ngah ve lo! Asinan beidong duh lo ten a thaizan khal ka va sak lala; zianghman ka ngah cuang lo thotho. Cucun ka bei a dong thla lawlaw si ko. Customer pawl hin singer pawl ih hlasak mi hi thupi ah an neih loih, luxury fangfangah an zoh men ti ka hmuh tikah ka ning a na hluahhlo. Hi dawr ih hlasak hi ka ngaih a rem thei nawn lo; keimah le keimah hi niam tukin ka hmuaw thlangih ka thin a nat tuk ruangah ka tap rori. Curuangah a ni thumnak cu ka feh duh nawn lo. Hitawk kherkherih ka tuan lo hmanah Pathian in rilrawng in in ret cuang lo ding ti zumnak thawn dawr dangah hnatuan ka hawl sal.

Pathian zarah Hotel pakhat ah ka duhzawng vek ciah in unplugged thawi hlasak dingin hnatuan ka run ngah. Hnatuannak cu a remcang tuk ko nan inn ka tlun tikah ferry in kan inn tiang in thlah loin zinpi ah in thum theuih, tlun can le 11PM hrawng a si theu tikah zinpi ihsin kan inn karlak zintluan hi keimah tei feh a tul theu. Hi zin karlakah hin uico ti cawk lo a rualrualin an um ih in rak bo ciamco theu. Uico hi ka tih tuk mi a rak si hrimhrim thawn inn ka tlun tin ten ka tap ringring si mai. Neta ah cun idea thar ka ngah ih hotel ih rawl hleifuanpawl kha ka fun ih khai uicorual kha ka hei seh; uipawl in rawl an rak cuhawk buai sungah ka rak feh hlohhloih cutin ka remcang sal. Cutin zan tin ten uirual hrangah rawl ka tlun sak  ringringih lehhnuah tla cun cui uipawl in in byheart thlangih rualpi ah kan rung cang!

Harsatnak hi zo khalin mah le zawn cioin kan tong theh ko. Hatsatnak ka ton mipawl hi hlawhtlinnak hrangah an si tiah thazang ah ka hmang. Harsatnak ka ton le Pathian ka naih sinsinih curuangah harsatnak cu ka thlarau hrang hrimhrimah thil tha a si tin ka pom. Ka nunsung hmuahhmuah ah harsatnak dangdang khal ka run tong vivo lai ko ding; asinan kei cun ka tuah ding mi kha a tha theibikin ka tuah vivo tum. Ka hmuitin mi ka ngah theinak dingah tuarfeinak in pe dingin thla ka cam sawm theu.

CT: Mitu ah khan nangmah khalin hlah na phuah phah ti kan thei zoih, ziangvekin na rak phuah? Ziangvek lam an si? Laihla maw Kawlhla ha?

MK: Laihla khal Kawlhla khal ka phuah nan Laihla hi ka phuah tam deuh. A tamsawn cu gospel song an si. A zaten hla 20 hrawng ka rak phuah zo. Album ih suah zo mi khal a um hnuaihni. A music style cu Slow le Modern Rock hi ka ti thei deuhbikih cuvek lam an tam.

CT: Na thinlung bu luahtu teh an um zo maw lo ti bang sehla?

MK: Haa..haa.. tui ni tiang cu luahtu ding hngakin a um hrih lai ko.

CT: Zovek tlangval in na kutzung ah zunghruk lo hrukter sehla na duh?

MK: Aih.. cukel! Ka thin a rung khur ciamcoih ziang ka rel ding ti hman ka ruah thei nawn ual lo..haa..haa..

CT: Sim duh mi na neih lai le..

MK: A hmaisabikah tui ni tiang damnak le cahnak in petu, music artist pakhat si dingih talent in petu le lam in hruai ringringtu ka Bawipa Pathian hnenah lungawinak ka hlan. Cule ka hobby in theihthiampi ih thla in cam sak ringringtu ka nu le ka pai’ hnen khalah lungawi thu ka sim.

Cun, hiti vekin duhsaknak thawn thu in sut ih mipi thawi theihawknak in tuahsaktu CT Team parah ka lung a awi tuk. CT hi tui hlan ihsin ka rak leng ve ringring theuih Chin website lakah cun ka duhbik mi website pakhat a si. CT Team pawl tla hi Laimi hrangah pumpe roriih hnatuan an si tikah ka upat in ka uar tuk. Kan Laimi hin media kan nei kau hrih lo tukih CT hi, a hleicein keimah vek artist pakhat hrangah, kan rinsan mi media pakhat a si. An parah ka lungawi tuk.

Cule Tiger Girls si seh, keimah khal si seh, tha in rak pe ringringtu audience pawl parah lungawi thu ka sim duh. Tui kan din thar mi ‘Me N Ma Girls’ khal hi tlaitluanih tha in rak pe vivo dingah khal ka lo sawm sal duh. Kannih khalin tha in petu audience pawlih zabeng awnpawl hi a lak siter kan duh lo ruangah kan zuam vivo ding a si tiah ka sim duh fawn.

Cun, tui ni dinhmun thleng thei ding tiangih in rak bawmtu, tha in petu le in rak somdawltu zate par khalah lungawi thu ka sim bet duh.

CT: Personal ih lo contact duhtupawl hrangah lamzin na khihhmuh thei kem?

MK: Ngah tuk e: mailalrinkim@gmail.com hmangin in pehtlaih thei ko.

(Visited 228 times, 1 visits today)
%d bloggers like this: