Biaknak Lam – James Ngun Zal Mang

Aizawl, Bethany Kohhran ih an Pastor tuan rero lai, Saya James cun a can sunglawi cu kan Chinland Family palai rak pek siangin, can sunglawi an hmangih, cumi Saya James kan Palai ih a interview-nak pawl cu a hnuai lam vek hi an si:

CT: Saya pa, thudang lo suh hlanah, chinlandtoday hi na rak siar dah maw? Website ahhin na lut dah maw?

James: Khai a (hni phah in) siar ve zet sokhaw. Internet ka vun on can ahcun ka lut ve tlangpi cun ka theiawk.

CT: Saya, na can sunglawi in pek ceng cu, na hmin, na suahnak, na nu le pa pawl in sim thei kemmaw?

James : Si, kei hi Pu Con Thluai le Nu Cal LIan Thluai tei fapa James Ngun Zal Mang ka si ih, kum 1975 March 24 ahkhan, Khuangli ah ka suak.

CT: Unau paziat so nan siih, nang hi a ziangzatnak so na si?

James: Suahpi unau hi 7 kan siih, ,mipa 5 le nunau 2 kan si. Kei hi falai ka si.

CT: Na innsang nu thawn nan kutsihawk kum le na fa le pawl?

James: Ka nupi hi Con Kip Thluai a siih, May 10 2007 ahkhan Tili (Falam Peng) ah, Rev. Suah Thang ih kutsihnakin kan neiaw ih, tuhi Pathian thlawsuah fanau 1 kan neiih, kum 1 le thla 3 a si.

CT: Ziangtih kum ah Pathian ah Piantharnak na neiih, Ziangtih kum in rawngbawlnak na nei thawk?

James: Kum 1993 ahkhan Pathian zaangfahnak co in rundamnak ka ngah ih, himi rundamnak ka ngah hi, Pathian thuthangtha simtu hnen ihsin si loin, Saikhama Kawn ih, Presbyterian pawl thangthatnak hlasak hmangin a si. Kum 2003 ah ka zirnak ka theh ih, 2004 ihsin Free Evangelist in Pathian thuthangtha simnak ka nei thawk.

CT: Tui na rawngbawlnak hmun ahhin, ziangtik in lakluh na si?

James: 2007 ahkhan a si.

CT: Tu hi nan kohhran ah member paziat hrawng nan um ih, ziangtin ha member nan hawlawk dan tlangpi?

James: Tu kum ahhin member 150 hrawng kan siih, a inn zawngin 41 tha kan si. Member tiih hawlawk le sawmawk ciamco cu a um lemlo. Kohhran member ahcun, in khawmpi ih in phurpi tu pawl hi kan member ih um dingah kan sawm theu ih, kohhran dang kan um rualrual in, saklam Baptist kan tam deuh bik.

CT: Na zirnak lam in sim thei kemmaw?

James: Aw, leitlun tlawng (Secular) lam cu ka kai lo ti sehla a tha ding. Bible tlawng ka kai dan pawl cu: B. Min le B.Th hi Bangalore ih Asia Evangelical College and Seminary ihsin 2003 ahkhan ka theh.

CT: Tui nan kohhran ih tulsam deuhbik ih na theih mi?

James: Kan tulsam le tlaksam mi hun ti ahhin, thlirdan dang dang a um thei dingih, kan mikhual sinak hi a sibik in ka thei. Kan mikhual sinak hin tam zet tlaksamnak in neih ter deuhbik in ka thei.

CT: Mizoram Batist nan peh ih, harsatnak le remcanlonak deuh um in na thei maw?

James: Mizoram Baptist kan peh hi, an lungawi zet. An tong le hla hmang ding khalin in fial lo ih, kan tong le hla kan hmang hi in lungawi pi zet sawn. Khawmpi-nak khalah kan mawhphurhnak tawk ahcun danglamnak zianghman in neither siang dah lo. In ngai pawimawh in in hlam ve thei zet ih, Assemlbly tiang khin kan feh ve theu.

CT: Asile, na theih vekin, ram remcanlonak ruangah, ram kiangkap a olsamnak nak ah tiin kan Laimi kan um ih, mi ram a siih, dawi khal ka tuar theu, himi thuhla ahhin, tu hi Mizoram Baptist rori nan peh si khaw, dawi suah thuhla vek thleng pang sehla, lo bawm theinak an lo nei dingah na zummaw?

James: Dawi lam ahcun, in hum in kan thlavang in ham zet ding nan, Biaknak a si ruangah Cozah lengih hna an tuan duh ka zum lo. Asan cu, Biaknak le Politics timi hi kan then thiam a pawi ve zet.

CT: Kawlram sungih Baptist thawn teh pehtlaihnak nan nei thei maw?

James: Kawlram thawn pehtlaihnak kan nei lo.

CT: Nan Kohhran sum hmuhnak tlangpi in sim thei kemmaw?

James: Thenhran then le thawhhlawm hi a si deuhbik ih,. Nu le Mino pawl cun an mahten Fund an hawl theu.

CT: Tui na laksawng dawn mi hi ziangtin na hmu? Ram leng ih pastor pakhat tuan na sinak ah, na khawpkham tawk in na hmu maw?

James: Laksawng ah ka lungkim. Minung ih kim e ti um lo khal seha, Pathian parah khal ka lung a kim zet.

CT: Nan kohhran ih nan caknak bik ih na hmuh mi?

James: Tumtahnak le khawkhannak tampi um khalsehla, theihthiamawknak thawn lungrual ih ke kar hi kan cahbiknak siin ka thei.

CT: Nan kohhran ah cak hleice nubu si maw, mino maw Kohhran pi maw a um in na thei maw?

James: Kan Balance zet. Kan cak khawm zet. Kohhranpi hmin, Nubu le Mino hmin Missionary cawmmi khal kan nei.

CT: Na rawngbawlnak hmuh ih na thanau bik can le thazaang na ngah bik can ih na theih mi?

James: Kohhran sungih kan um sungah, Kohhran remaw lo le theihthiamawknak neilo ih ka um tluk ih ka thanau can a um lo. Kan lungrualnak pawl, thazang kan pekaw dan, man lo zet cingih Pathian le kohhran kan ngaihsaknak ka hmuh in thazaang ka ngah zet.

CT: Nan kohhran ahhin, Falam tong hmang hlir maw nan si?

James: Falam tong hmang hlir ciah kan si lo ding nan, Falam trong hmang cu ka ti aw tlangpi ko.

CT: Tong phun ziat in Pathian thuthangtha simnak na nei thei?

James: Tong phun 3. Hakha, Mizo, Falam (Mirang an hai tawp khawk ah). Kawl zir tullai.

CT: Kan Laimi pawl lungrual zet in na hmu maw?

James: Hmu lem lo. Lungrual khal a har ding. Tong dan, zia dang, duhdan le hmuh dan dang kan tam deuh tuk in ka thei.

CT: Leitlun hmun kip ih um Laimi pawl na cah duh mi?

James: Kan umnak kip ah, Pathian hi tihzah hmaisabik ih kan neih hi a thupi bik ti cingkeng ringring dingin ka cah duh.

CT: Chinlandtoday na hmuh dan?

James: Mi dangdang, mite le tum, theiaw dahlo le hmuaw dahlo khal in hmuh terawk in in thei terawk tu siin ka hmu ih, khua le ram dinhmun tiangin fimvarnak in pe in ka theiih, ka lungawi zet.

CT: Can sunglawi in pek ih, kan lungawi zet.

James: Kei khal ka lungawi.

(Visited 137 times, 1 visits today)
%d bloggers like this: