Hruaitu – CNF Founder Pu Tial Khal

Pu Tial Khal cu CT in hmaitawn thusuhnak a nei. Pu Tial Khal hi kan Chinmi lakih hruaitu rinum pakhat a si ih hlei ah a ruahnak le tuansuahnak in kan Chinmi tampi lungrualnak a hlen. Hruaitu danglam hleice kan titheinak cu Chin National Front (CNF) timi 1988 ah a rak dinsuak a si. Pu Tial Khal, amah hi thuanthubu (history) rori a si. CT cun Pu Tial Khal vek hruaitu thinlung ruahnak kau kan Chinmi in kan nei hi hlu a ti.

CT=Chinlandtoday.info

TK=Tial Khal

CT : Na hmin na suahkehnak, nu la pa in sim thei ke maw?

TK : Ka hminpum cu Tial Khal, ka pa- Van Hnuai Ling, Ka nu – Bual Pum. Bualzual khua, Falam peng ih suak ka si.

CT : Fimthiam zirnak lam teh  ziangtluk na zir?

TK : Tlawng hi Class IV (1942) a si.

CT : Ziangtik ihsin Ram hrang hna tuan na thok?

TK : 1947 December thla ah Falam ah Grant Police ka tuan. Mandalay ah Armoured training ka kaiih, Pre-Sergeant rank in tuanvo ka nei. 1958 ah Police Service in ka cawl ih Politics ah ka lut. Phahsah-Pahlah (Stable) Party Falam myone unit ah Secretary ka tuan.

1964 ah Gen. Ne Win tei ralkap uknak duhlo ruangah, M.P. (Member of Parliament) U Ro Thang, U Hrang Nawl le U Son Chin Lian te thawn Champhai ah meeting kan tuah. Dampi Camp ah “Chin National Defence”(CND) President U Dam Kho Hau te thawn kan join aw ih Financial Secretary tuanvo in pe.

1964 April Ni (12) ah Burma Police troop in Zampi khua ah in kaiih Manywa Jail ah thawng in thlak. 1967 ah in suah sal ih 1968 June ah Mizo NationalFront (MNF) thawn zawm aw in Falam, Tidim, Rih Camp le Lungding Camp pawl ah operation kan tuah ih kan la thei thluh. Mizoram ah MNF pawl thlun in kan feh. 1969 ah MNF pawl thawn East Pakistan (Bangladesh) ah kan lut.

MNF unau pawl ih fial nakin “Zomi Liberation Front” (ZLF) timi kan dinih President tuanvo ka la (MNF unau pawlin “CHIN” timi hnakin “ZOMI” timi an duh deuh tinak asi).

1969 kum cem zawngah Arakan ah kan feh ih “Arakan Communist Party” hnenah bawmak kan dil. Cutawkah “Taxnab” Seaport cu Chin hminin ka dil ih in pek. Lungkimnak kan ngan.

1970 ah East Pakistan cu Bangladesh ah a cangih, India dotu MNF hrangah a zalen nawn lo, Cuhrangah Mizoram ah kan ra kir sal ih, cu tawk ihsin “Kachin Independent Organization” (KIO) ah ka Army Chief Sui Ling thawn kan feh. Army Training zirh dingah kan ralkap pawl in bawm dingah KIO hnenah kan dil.

CT : Ziang tikah C.N.F. na rak din? Zo in C.N.F. timi hmin a rak bun? Ziangah himi hmin nan rak bun?

TK : 1988 March ni (20) ah Chin National Front (C.N.F.) timi Party hmin kan phuah ih kan din. C.N.F. hmin phuah nak san: – KIO headquarter ih kan volunteer (ralkap) training in pek sak dingih, ka va biak tum , 1973 June thla laiah an financial Minister Mr. Brang Seng in “Ziang ruangah ZOMI timi hmin nan hmang? CHIN nan si sii tiah i rak ti dah.

Cutikah Chin timi cu Kawl pawlin in nautat ruangih in kawhnak hmin asiih “Bawm Phur Pawl” tihnak a si” ka ti, Cutikah Mr.Brang Seng cun “KACHIN timi khal hi kawl tawngin “Lam uar pawl” tinak a si e, an ti, asinan cumi asilo, Chin le Kachin cu unau kan si, Kan hmin hi kawlram kan rung thlen hnuah phuah mi asi lo, China ram an rak um lai ihsin an rak kawhnak hmin asi.

China Lal “Great Wall” timi tuahtu “Shi Huang Ti” hmin cawi ih rak sakmi asi. Amah hi Chin miphun a rak si, cuhrangah “Chin Shi Huang Ti”tiah a rak ti aw  asi tiin i sim fiang ciamco. Cumi hnuah “Kan u Chin Pa hi a hlo asi hi “ a tiih Library sungih cauk “THE SOUTH EAST ASIAN DYNASTY” timi a run la ih i siar ter. Himi ihsin Chin timi kan rak hmannak asi.

CT    : CNF nan rak din laiah zo vek an tel?

TK : 1988 kum Aizawl Chanmari Veng Pu. Lian No Thang inn luah mi ah C.N.F. hi kan rak din, Member pawl cu: – Keimah (Tial Khal), U Lian No Thang le U Ro Eng tla kan rak si. A hnuah Thailand ram U Nu hnenih a feh dahmi ka nau Mang Kham le midang tla an ra tel.

Cu hnu sinah Kawlram ihsin a ra tlan mi Yangoon Tlawngta pawlin in rung fin. KIO ka rak biaknak kha kum 10 lenglo a rei zo ruangah va thang phawk sal dingin kan nau No Than Kap cu U.S.A. ih Bible zir tumin passport a rak nei, cumi cu remcang ah hmangin Thailand ah ka feh ter ih, K.I.O. upa pawl ka va tong ter.  Veihnih veithum lai ka feh ter hnuah kan hnatuan mi a phur ve ih a neta bikah C.N.F. President Post sinak i kian aw tiah i ti. Cutikah cathiam a sinak le tlangval cakvak asi ruangah kan rualpi dang pawl thin nuam lo cingin ka kian.

CT : CNF nan rak din thawk laiah ziang vek harsatnak nan tawng?

TK : Kan rak din thawk laiah harsatnak tampi kan nei theu

1. Policy a bang rep lo mi.

2. Hnam duhdawtnak ngai ngai nei lem lo ih mai hrang ruat tu pawl an um theu hrangah harsatnak a tam.

CTC.N.F. hi ziangah Falam pawlin ziangah an suahsan?

TK : (1) Laimi unau kan si timi fiangten an thei ngah lo

(2) Ram hrang tuan hnakin bulpak erawknak kha an rak la na pang.

CT : Tulai C.N.F. dinhmun in sim thei pei maw?

TK : Ka lo sim thei lo, an mah thawn contact kan nei lo, an thuhla ka thei ban lo.

CT : C.N.F. thawn tuah nan kar nan hla aw vekin kan lo thei? Ziangruang bik a si?

TK : Contact kan nei lo, thuhla kan rel tlang dah lo cuhrang karlak hla vekin a lang menmen a si, hmuhsual awknak tla a um lo.

CT : C.N.F. hruaitu na si lai ah ziang si poi na ti bikmi le na sir awk bikmi?

TK : C.N.F. hruaitu (President Post) midang ka kian ruangah a thupte’i i bawmtu pawl an lung kim lo. “Na thi asi lo ahcun na seat ah midang na ret lo ding” in ti, hivek hi underground politics ah ram tumpi pawl khalin an rak hmang dah theu.    Tthm, Burma Prime Minister U Nu khal kha Gen. Ne Win – ih ralkap Acozah do dingih underground politics a rak tuah lai 1971 kumah a mai aiah Bo Letya (Gen. Letya) in hruaitu dinhmun a thleng ih U Nu cu daiten a cawl. Cutikah U Nu bawmtu pawlin “U Nu lawng kan thei, midang kan lo thei lo so khaw, bawmnak dang kan lo pek belh lo ding” tiah fiang ten an sim. Cuvekin C.N.F. hruaitu ka tuan lo tikah a thuptei in bawmtu pawl an dung tawlh sal thluh ih C.N.F. hnatuan nak cu a rung hlawhsam ta. Hruaitu sinak midang ka kian mi kha a poi ka ti bik.

CT : Tu ah teh ziang mi tumtahnak na nei?

TK : Kan ram le kan hnam humhalh duhnak ka nei ringring.

CT : Chin mi pawlih kan tlaksammi pawl tih na ruah mi pawl in sim thei pei maw?

TK : (1) Ram le miphun duhdawtu ngaingai kan mal

(2) Lungrualnak kan nei thei hrih lo.

(3) Mai pumpak hrang kan ruat tuk deuh.

(4) Kan tong a hmunkhat lo ruangah unau kan sinan duhdawtnak a mal.

CT : Chin mi lakah zopawl na uar bik? Ziang hrangah?

TK : (1) Capt. Mang Tung Nung (Chin National Organization (C.N.O). party a din miah laimi hmuahhmuah khai khawmtu hmin “Chin” timi a hmang hi ka uar nak asi).

(2) Wuamtu Maung (Mirang sanlai kawlram independent diltu lakah Chin Miphun a rak tel ve mi asi ih, thawng tla a tla rero, Laimi duhdawtu a si tiah ka ruat).

(3) U Mang Tling, U Mang Kham le U Sa Lian Zam. (1970 kumah U Nu hnenah Kawlram ralkap Acozah do dingih a rak feh hmaisa pawl an si).

(4) Pu Za Hre Lian :- (Kawl fala hmeltha zet pakhat in a inah a pan ih a hnen rori ah a va riak. Pu Za Hre Lian cun malte hman dai lo ten khua a van pi. A thaizingah “Ziang hman ka lo ti bawrhhlawh lo ti aw” tiah a ti, fala nu in “Na va pacang lo ve” tiah a tiih thaten a tin sal. Laimi Vuanzi le ralbawi hrekkhat pawl sup aw thei lo ih an um laiah Pu Za Hre Lian cu hi tluk a sup aw thei mi hi upat tlak zet asi tiin ka hmu. Hi vek hi kawl pawl in kan hnam cim ral nak dingah an hman mi hmanrua pakhat a si theu ti cu a fiang zet.)

 

CT : Asile “Chin” le “Laimi” timi ah ziang na duh sawn?

TK : Chin timi ka duh sawn ziangah tile Chin timi in Laimi phun hmuahhmuah a khaikhawm bik. eg  1)The Chin Hills Regulation timi ca sung khalah mirang pawlin laimi hnam hmuahhmuah huaptu ah an rak hman mi hmin asi. (2) Kan kiangkap hnam dang pawlin in theihnak cu Chin timi hmin hi a si.

CT : Kum 20 hrawng mi si aw la Chin mi hrangah ziang na tuah ding?

TK : Ram le miphun hrangah hna ka tuan ding.

CTKan lungrual theinak dingin ziang kan tul tin na hmu?

TK : (1) Ram duhdawtnak ngaingai thinlung neih ding.

(2) Pathian tihzah nak ngaingai neih ding.

(3) Laimi pawl lakah tong a bangaw lo mi pawl hi hmunkhat ah um khawmin nupi pasal ah neih pawlh awk theh ding.  Cutikah duhdawtawk nak le laicin awknak kan nei ding ih kan lung a rual ding. Cutikah kan tong tla kan thei aw thluh ding.

CT :  Chin Hruaitu le mipi pawl ziangtin kekar ding ti na duh thusam teh?

TK : Hruaitu pawlin mipi parah duhdawtnak thawn kai hruai ding, cutikah mipi in an zah dingih a thu an ngai ding. Mai bulpak hlawknak ngaihtuah hrimhrim lo ding.

CT : Na tlangval laiah micak zet na si ti kan rak thei ih ziang tivek ciah ha na si?

TK : Buan ah nehtu ka nei lo, culole keimah hnakih cak ka tong ngah lo ruangah a si thei. Mi cu ka sual dah lo, Ka nupi tla kut ka thlak dah lo.

CT : Na thil tuahmi pawl lakah ah ziangmi ah hlawhtling bik in na thei aw?

TK : CHIN timi Laimi zapi khaikhawmtu hminah ka hmangmi hi ka hlawhtling tiah ka ruat, tu-ah kan kiangkap ramleng um tiangin in run zawm rero thlang.

Tthm:(1) 2008 ah khan Mizoram, Aizawl, Chaltlang Tourist Lodge ah Chin International Seminar tla an rak nei dah. (2) USA ih um miphun hmin pawl ngannak list ah Burmese timi lawnglawng a rak um theu nan a tuah Chin ti mi hmin an telh ve thlang an ti.  (3) UNO ih Indigenous People list ah Chin timi an register an ti.

CT : Ziang tin Delhi lamah na thleng thei?

TK : Lungnat ka neiih Delhi Sizung G.B.PANT Hospital ah Check up tuah dingin Delhi ka thleng.

CT : Tu ah inn sang nu bik na nei lo in kan thei ih ziangruangah na nei nawn lo?

TK : Ram le Hnam hrang lawnglawng ruatih hna ka rak tuannakah keimai pumpak le ka nupi-fate hrang, ei le in ding ka ngaihtuah thei lo. Scientist pawl in thildang ngaihtuah ding theihnghilh ko an hnatuan an atcilh vek ka si tiah ka ruat. Mah le nu-fa nunnak hman ka ngaihtuah thei lo tikah ka nupi pawl khal thinharin ka kiangah in umpi thei cawk loih in suahsan theu, cutikah nupi dang khal ka nei ngam nawn lo.

CT : Chin mi hmun zakip um pawl hrangah ziang thu cah na duh?

TK : Chin mi hmuahhmuah unau kan si, kan hmin ah Chin timi pawm tlang dingah ka duh.

CT : Na caan sunglawi zet pe ih kan thusuhnak in san theh ruangah kan lungawi.

TK : Kei khal ka lungawi.

 

(Visited 940 times, 1 visits today)
%d bloggers like this: