HLasak Thiam – Salai Israel VSL

Israel Van Sui Lian Thutawi

Hminpum                             : Israel Vansuilian
Duat kawh                          : Liante
Suah ni                                  : Sep. 10. 1990
Suahnak hmun                  : Sunthla
Nu le Pa                               : Pi Thaneicang le Rev. Oral Siangzakhup
Unau zat                              : Pa 6/ Nu 3 – Pa 3 (kei, nautabik ka si)
Umnak                                   : Yangon, Insein
Qualification                        : Phun10 awng, Bible tlawng kum2 kai
Rawlhmeh duhbik           : Alu (patato)
Hobby                                    : Bawhlungsit le Hlasak
Leitlun ih damsan              : Mi pakhat hnen ihsin a dikmi Duhdawtnak co ngah
theitu si! Mi pakhat hrangih Duhdawtnak dik pe theitu si!
Cabu duhbik                       : Bible si ko, nan ka nunpi thei loih ka zuam rero lai.
Harsatbik can le nuambik can : Mai’ duhbik mi thawi’ tthenawk le
duhbik mi thawi’ umtlang.
Favorite song                     : Mirang ahcun – “You wanna make a memory” (Bonjovi),
“Tomorrow” (Avril) Chin ahcun –  ”Zilthlinem” (Cungaung),
“Thaisun” (Kurbungbel) Kawl ahcun –  ” A zin Lu babe ( Lay Phuy ) Khoh
Zu Cu (  Lin Lin ) pawl hi an si.
Thuken                                 : Ziangtik hmanah ka bei a dawng lo ding! (never give up!)
Hnatuan                               : Hla(series) tuahnak ah hnatuan ka nei thei hrih lo.

CT: Awnmawi lamih ke na rak kar thawk dan?
Israel: Cozah tlawngkai ka thawk hlan ihsin ka pai’ rawngbawlnak ah ka rak thlun ih hlasak (action song) in ka rak bawm ttheu. Cozah tlawng phun2 kum in Ttingttang ka rak tham thawk, ka paih nasa. Thiam
cak tak in .. phun 4 ka kai ahcun mahte’n ttingttang thawn hlasak ka rak ttan thei. Stage par ngaingai ahcun “2008, Chin Kumthar Fanger, Yangon, Lion City Hall” ah ka rak kai/ sak thawk!

CT: Awnmawi lamih na cangvaihnak ah dawnkhamtu na nei maw?
Israel : Nei tuk ko, tampi si. Cahnah parah cipciar ih ngan zik sehla cahnah in a daih ding ka zum lo.

CT: Chin Elbum “Ka Ziangkim” timi rak tuahsak dingin ziangvekin na rak zuam, Bawmtu teh na nei mw? Na diriam ko mw? Kimcang deuh in in ruah aw.
Israel: Ok. Kimcang deuh in ti aw. Kum ’17? ka ti ah “2008, June” ah ka pai’ hnenah ka pate (Rev. Richard Zahleihlal) ih “Mupi bang in le Setan a duai” timi Elbum kha tuah sal ding in zangfah bawmnak ka dil. Nan, a lunglut zawng ih dil dan ka rak thiam lo ruangah si ding.. ka duhthusam cu a kimcang thei lo. Cutin thlakhat rei hnu “July” ah “Ka ziangkim” timi duhdawtnak hla hi Ks.60000 te’n ka rak zuam thawk!
Sponser khal ka nei lo. Awkam thazang lamin bawmtu rualtha cu an um. Ka duhdawtbik mi in thlacamnak thawn taimak suah in in zuampi na sa. Hla lam khalah ka U Lalcungluai in duhsaknak thawn a mai’ phuah mi fing 8 rori I tthen ih Harmony khal i sak sak bet! P.T ngilneihnak zarah harsatnak phunzakip tuar phahin ‘Elbum’ pakhat ka ttheh suak thei ih ka di a riam nasa. Ziangmi bikah.. ziangtivek in.. ziangtluk in a har ticu a rapthlak tuk lawmmam ih a rel dan ding bik khal ka thiam thei hrimrhim lo.

Ka tongkam in a daih lo si bik ko.  Ka hngilh thei lo mi pakhat te cu .. hivek dinhmun tiang thlen thei dingih “Lian, zuam aw/ tuah aw/ na hlawhtling ding/ a cangthei lo mi thil a um lo/ ka theitawk in ka lo ttanpi ding” tiih bawmnak, thazang i  petu hmaisabik ka rualduh ‘Salai Mazawn’ ih duhsaknak awkam thlum tehi tuini tiang ka hnathlam te ah a um ringring….! Ka lungawi em. Cutin  ke ka kar vivo ih .. tutiang hi ka thleng thei a  si bik ko. Ka zuam sinsin ko ding.

CT: Na Birthday Concert “One Man Show” na tuah mi hikum ziangzat na kim nak saw a si? Hla ziangzat na sak? Awnmawi tumtu pawl teh? Kimcang in in ruah aw. Na hlawhtling in na thei aw mw .. etc..?
Israel : Tuittum Birthday Concert “One Man Show” hi kum 21 ka kimnak a si. Hla fing23 ka sak. Himi ding in kan dung August thlathawk ah Tahan ah ka ra tawlrel. August 22 ah Yangon ka kir sal, cun Sep ni 1 zaan ah Yangon in Music players pawl thawn kan pawk khawm hai.

Sep 3 zing ah tluangte’n Kalay kan thleng. Sep 4 sun in “reharsal” kan thawk hngalh! Show ih in tumsak tu pawl hi Guiters & Arrange ah Salai Bawite (Ygn), Bass hi Phyoway (Kalay), Drum Salai Pipi (Ygn) le KB ah Salai Bawicinthang ( Kalay) pawl an si. Harmony lam in Salai Thlapi (Ygn) le Salai Laltumsang (Aizawl) nih in bawm. Ramsung Ramleng timi Duet hla ah EstherVan (Kalay) in in sak bawm ve. Programme a hrek kan thleng ih Hla fing10 ka sak ttheh ciah ah Lalhumthang “mama” (falam) in “Michael Jackson” lam thawn in ra lawm pi ve. Hlawhtling ko..! Pathian zangfahnak le rualpi tetei’ thlacamsaknak ih zarah tluangte’n ka ttheh suak thei si. Ka lungkim nasa.

CT: Himi na Birthday Concert “One Man Show” na tuah laiah ziangvek in feeling na nei?
Israel : Aa.. feeling cu …a mak nasa. Ka lungkim zet, voikhatnak ticu ka di a riam lo nak khal a um hnuaihni ko. Umm.. a phunphun in si ko. Lung khal a awi … riah khal a sia. Ka hni (smile) rero ko nan ka
ttah a suak thei nasa, keimah te lawng ka um caan ah tla cun…….!

CT: Awnmawi ih a thawknak in sim thei pei mw?
Israel : Sim thei ee. Kei ka ngaidan (feeling) in cun.. Riahsiatnak le harsatnak a tam asilen Awnmawi cu a thlum sinsin si ko. Thinnaa zet le ninghang zetih Music ngai/ hlasak hi Awnmawi ih a thawtnak bik cu a
si. Ziangah tilen…   ‘Hla’ hi ‘Thu’ ihsin ra mi a si vek in, ‘Thu’ a um ruangah ‘Hla’ a umih .. ‘Hla’ a um lawngah ‘Thu’ khal hi a famkim thei ve. Himi thawn pehpar aw in… Leitlun mifim (scientists) pakhat
cun .. “Hlasak tu pa cun a riahsiatnak pawl a hloh ter” ,”Siangpahrang pa’n Awnmawi a duh asilen A Ram a ttunghmun ding” ti’n Awnmawi ih thawt dan le thlum dan zia hi  ca in a rak ngan dah ih tu ahcun “Awnmawi thufim” ah a hung cang lanta.

CT: Awnmawi thu thawn pehpar aw in kan Chin Miphun hrangah ziangtivek in sunmang na nei?
Israel : Umm..! Kan Chin Mino pawl Leitlung  Level in Awnmawi lam ih mit vang sinsin ding. Awnmawi lam ih fehtu pawl nun ziktluk tak in ih an feh vivo thei ding ih kaihhruai. Kan Chin Awnmawi hi CD/ VCD/ Zuk nung Quality sang sinsin ding in. Awnmawi rawngbawlnak tumzet khal din suah thei ka beisei.

CT: Elbum na tuah bet tum mw?
Israel: Aw, thla ka cam rero ko. Tuah thei bet ka beisei nasa.

CT: Kan Chin Awnmawi ih na lungkimnak le lungkim lonak?
Israel: Chinmi awnmawi lam feh kan tam vivo thlang ih a lungawi um. Chinmi kan thangso na sa in ka ruat ih ka lungkim na sa. Kan pu le san vun ruah cun lei le van in kan thlau aw thlang. Tha pek awk khal kan thiam zet ih a phur um deuhdeuh. Minopawl kan zuam sinsin kei uh, Kan Chin Awnmawi lamaih ka lungki deuh lo mi cu “Thangthatnak Hla” lam in siseh “Duhdawtnak Hla” lam khal in siseh “series” suah thei an tam vivo, lungawi um nasa. Nan..Kan hla pawl hi a thluk a bang aw tuk rori, ‘one colour, one beat’ deuh thaw hi a si hluh ih tutiang ah.

Khui kan hun suah ih a hla fing zate tluk in “Country, ginggit..ginggit” ti a si lai mi te hicu …. rei nawn hram hlahseh! Cu le Hla CD/ VCD /Zuk nung kan tuah tik ah kan uluk lo deuh. Ka tuah thluh cun a tawk kan ti deuh khi a bang. Quality a hniam tuk deuh. A cang thei le pawisa  ( bawmtu ) tha zet nei in tuah thei seh la a tha. A tumtu lam khalah uluk zet in an tuah thei ding. Cun Hla kan ngai tuk ah Rock a sak a si le Rock feh dan in ngai thei sehla, Hla pakht in feh dan a nei, cui hla pakhat in aw feh dan, aw rem dan, aw pek dan ding a hla le a san in zir in a um.Country a si le Country aw le Music in ngai thei sehla a tha. Cu lawngah hlasak thiam le awnmawi tum thiam
kan theithei ding.

CT: Ziangruangah hlasak thiam le Tingtang tum thiam pawl in rittheihnak siivai an tham ttheu?
Israel : Aa.. Hrekkhat cu mipi ih sak ngam lo/ tum ngam lo ruangah sii an tham ttheu. Tthenkhat sawn le malte tal rii caci deuh locun “mode” a tha thei lo ee ti tu khal an um. Kei ka ruahdan ahcun… ka theihdan ahcun… Music le Rittheihnak sii hi zianghman pehtlaihawknak an nei lo. Music timi cu …kan rit khalle music a si ko ih rit lo khallen music a si thotho ko. An tum le an sak can ih “mode” timi cu ‘rit’ lawng ih ra suak thei mi a si hrimhrim lo. ‘Rit’ ruangih ra suak mi cu “mode” diktak si sawn loin “ngamhuai/ ralthatnak sawn men khi a si. “Mode” timi cu ir-awm lungsung ih mahte hung puaksuak mi khi a si
sawn.

CT: Na hla phuah mi le sak mi lakih na duhbik mi hla?

Israel: Ka phuah mi ahcun “sunthim” ka duhbik ih  ka sak mi ahcun “A Hnin lo” Salai Mazawn ih phuahmi ka duhbik!

CT: Hlasak thiam si dingah ziangmi pawl a thupi?
Israel : Ei le in lam hi ralrin thiam zet a thupi, a riim/ a thak/ a al/ a thlum tuk mi/ kuak le kunzar tivek tla hrial thei sehla! Hrial thei lo hmanah supaw deuh in a ei-in dan thiam sehla a duh um bik. Cun, ringring(regular) in sak paih a ttul tuk! Exercise tuah khal hi a tha zet!

CT: Ziangruangah hla na sak ti lo sut sehla?
Israel: P.T ih i pekmi laksawg ti’n ka ruat. Ka duhtuk mi, ka paihbik mi, ka tumtah mi a si ruangah si bik ko.

CT: Zunghruk bun dingin Lengdawh vek na hual zo mw?
Israel : Umm.. kan hual aw tawn. Asinan, P.T samhrisih si thei hram ding in thlacam natsat a thupi in a ttul tuk ko.

CT: Lungkuai ih hlasak le hlaphuah hi hmual a nei deuh cuang ngaingai mw?

Israel : Nei deuh ti men lawng si loin, a nei tuk cuang rori. A phuahtu le a saktu hrang khalah, a rak ngaitu hrang khalah hmual a nei cuang tuk si. Mai’ tawnmi le mai’ tuarmi a takih vun sak/phuah/ngai cu a puak tha lawlaw. A takih tuar lo le tawng lo hrang ahcun.. a mawi zet hmanah ruh le thlik muril tiang a kheng ban thei ngaingai lo.

CT: Na hmin Israel timi te na ngah dan?
Israel : Ka pate (Rev. Richard Zahleihlal) a dam laiah, ka pa hnenah fapa te malsawm ka dawn thei bet a si le a hmin ah “Israel” tihi ka sak tengteng ding a ti ih rei hlanah mual in liamsan. A thih hnu kumkhat a kim hlanah kei ka suak ih ka pate hngilh lo nak ah “Israel” ti’n in ko ih, cucu ka co ngah dan a si.

CT: Thaisun ihsin hla na sak ngah nawnlo ding ti’n Acozah in lo kham sehla ziangti’n..?
Israel : Mai’ duhdawtbik mi Co ngah lo cun “Nun man nei lo” ka si ding ih ..ka tumtah mi Hlasak ngah nawnlo ding in ti cun “Nung cing ih Thi” ka si tengteng.

CT: Ttingtang lo tumtu lakih na duhbik mi zo a si ti lo sut sehla, ziangtin na sang pei?

Israel: Salai Bawite hi keimah i tumsak hlan pi khal in ka duhbik mi Players pakhat a si ih “Ka Ziangkim” timi Elbum ah i tumsak ngah ih ka lungkimtuk! Ka duhbik khal a si ko.

CT: Kan kirsal ding.. na suahni Concert kha sumpai ziangzat hrawng na cem? Bawmtu teh na nei mw?
Israel : Haha..ha.. hnih lamlam a suak!  Ting11 hrawng a suak. Sponser um lo.  Pathian zarah Leiba Ting7 lenglo ka nei thei a si cu, a thawk in cem tiang “cawicawp” si thluh ko. Rualpi tete nih thlacam saknak le thazang peknak thawn in bawm. In ttanpi hai nasa. Ka lungawi em.

CT: Nangmah vekin Hlasak ttheu pawl hrangah ziangmi cah na duh?

Israel : Mai’ tumtah mi ah “beidawng lo” te’n kekar sinsin uh!

CT : CT Lenglu pawl hrangih na thucah?

Israel : CT Lengtu nan zate’n…thiam cuang/ thei cuang/ fim cuang ka si lo nan “zianghman a si hnai lo” ti siang lo te’n tuittum “Birthday One Man Show” khalah tha in pe/ in ttanpi/ in sunlawih pi cio ih simcawklo lungawinak tampi ka nei. Hmailam can khalah nanmah(upatmi) pawl ih duhsaknak le zangfah bawmnak zarah Cungnungbik Pathian in hlawhtlinnak thawn lam in hruai vivo hramseh! Duhdawtawknak in ziangkim a neh ih… ttanrual tlangnak in ziangkim a ti thei” ti hi kan thuken si thei cio ding in …..! Ruahnak ka pek duhmi cu…….. CT thuthang hi a cak na sa ih, CT West sungih thuthang pawl hi Lai Khawte khalah cahnah par rori ah siar ding um thei sehla, kan Chin Miphun  kan fimfar thei deuh ding.

CT: Nangmah lo pehtlaih duhtu pawl hrangah ziangtin an lo pehtlaih thei ding?
Israel : Awle, ngah tuk ee.. keimah ka lungawi sawn lam ding si. “israelselawn@gmail.com” le “kaziangkim@gmail.com” ahhin paih tiktik/ duh tiktik ah pehtlaih theih a si ko. Lungawinak tampi ka nei..!

Leave a comment