Hruaitu – Dr. Hrang Cung Nung

 

 

 

clip_image002

(HT = Hruaitu palai, HCN = Hrang Cung Nung)

 

HT                   : Hruaitu thuthangca in LCF hmin in na kut kan lo kai.

HCN               : LCF hmin ih ca in kuat ruangah ka lungawi. Pathian kan thangthat.

 

HT                   : Malaysia na ra thlennak ding ah ziangvek harnak na tawng?

HCN               : Ka passport hi a ni kim loih ka suah ruangah paisa ka kuan tamzet. Indonesia ah meeting feh phah in ka ra na’n, a ngahlo ruangah Yangon ihsin a thar ih ka tuahsalnak ah Ks. 700,000 ka kuanbet. Ka thla ahriingzet. Thlacamnak thawn ka ra a si.

HT                   : Na hmin, na suahnak khua le tui’ na umnak in sim thei maw?

HCN               : Ka hmin cu Hrang Cung Nung a si ih, ka suahnak khua cu Falam peng Tlangzawl khua a si. A tui’ ka umnak cu Bethel Theological Seminary, Taungphila, Kalaymyo a si.

 

HT                   : Unau paziat nan si, na nu le pa an dam lai maw?

HCN               : Unau mipa 4, nunau 2 kan si. Ka nu le ka pa cu an thi zo.

 

HT                   : Nupi ziangtik kum ah na nei ih, fate paziat na nei?

HCN               : March 22, 1975 ah nupi ka nei. Fate mipa 2 Lal Hming Lian le Lal Ram San, nunau 1 Tial Ciang kan nei. Fala tlangval an si lai.

 

HT                   : Ziangtik kum ah na piangthar ih ziangtin Pathian hna na tuan thawk?

HCN               : Pianthar ka theih awk suah cu May 16, 1991 ah Korea ih tlawng ka kai lai ah a si. Pathian hna ka tuan daan hi programme nei ih tuan ka si loih, a tul daan zel in ka tuan sawn. Korea ihsin ka tlun tik ah BTS ah tlawng saya ka tuan ih, ka umnak poh ah a remcan daan ih zir in thuthangtha ka phuang.

 

HT                   : Na pianthar hlan ah ziangmi hna na tuan dah?

HCN               : Ka pianthar hlan ih ka thusim tambik cu Philosophy-lam an si bik. Thlaraulam thu cu a tel lo. Thlaraulam cu, ‘Khati’n a rau te’n rak um men seh’ ti’n ka rak ti dah. Pastor sinak in minunglam ih an tusammi ka tuansak hai theu.

 

HT                   : Fimthiamnaklam teh ziang tiang na zir ih, khuitawk ah na zir?

HCN               : 1968 ah Tedim ah phun 10 ka zir ih, ka on vete’n Insein Bible tlawng ah zirnak ka peh. B.Th, B.Div le M.Div ka theh hnu ah 1990 ah M.Th ka zir. Cule, Jackson Ville (Florida state, USA) ih Trinity Bible College and Seminary ah correspondence in Doctor of Missiology ka zir ih Doctorage degree in pek.

 

HT                   : Bible zirnak tlawng hi ziang tik ihsin na rak hoha thawk?

HCN               : ZTC, Falam ah 1976 – 1977 kum ah tlawng saya ka tuan. 1993 – 1994, 2004 – 2006 ah BTS (Bethel Theological Seminary) ah saya ka tuan ih, 2008 ihsin BTS ah Principal ka tuan. Kumdang ahcun part time in ka tuan. Hmun`tha Baptist kawhhran ah pastor ka `tuan.

 

HT : Hla phuahmi teh na si maw? Ziangzat lai na phuah zo?

HCN                : Hla phuahmi ka nei lo na’n hlaphuahtu pawl in an hlaphuahmi ih a tongkam le a feh daan theology in zohfelter `theu.

 

HT                   : Canganmi cabu ziangzat lai na tuahsuak zo? Cabu hmin teh ziangvek an si in sim thei pei maw?

HCN : Ca cu ka ngan hnuaihni. Uk 15 – 20 hrawng cu a kim ding ka zum. Ca-uk ti ih kawhtlak ngaingai cu ka ngan lo. Marka cabu simfiangnak ka ngan ih, a tu hi Johan ih cakuat Pakhatnak ihsin Pathumnak tiang le Juda cakuat simfiangnak ngan ding in ka timtuah rero lai a si.

 

HT                   : Pathian hna`tuannak ah ziangso harsa na ti bik?

HCN               : Piangthar lo pawl hnen ih piantharnak thusim hi a har ka ti bik.

 

HT                   : Ziangvek thlemnak so na ton theu?

HCN               : Thlemnak hi a phunphun a um na’n a thupibik ahcun halhsik awknak hi a sibik. Laimi lak ah Falam pawl kan bese cuang in ka hmu.

 

HT                   : Bible zirnak tlawng ihsin zirtu hrang ah ziangmi so na tumtahbik?

HCN               : Bible tlawng kaitu hrang ahcun ‘piangthar phawt hai sehla’ ti hi ka saduhthahmi a si.

 

HT : Nan Bible tlawng thuhla tawite in sim thei pei maw?

HCN               : BTS Bible tlawng hi 1989 ihsin dinsuahmi a si. Kum 20 a kim zo. L.Th le B.Th kan rak pe na’n, atu ahcun L.Th a um nawn lo. M.T.S (Master in Theology Study) ti’n kan ong ih, zaanlam tlawngkainak a si. Kum 3 zirnak a si. Asinan, Pathian ih remruat a si ding. Shaan ram ihsin fala le tlangval kan tlawng ah an ra ih, phun 10 an ong fawn lo, L.Th pek an tul fawn. Curuangah phun 10 ong lo pawl khal hi kan tlawng ah an um tinak a si. Cucu ramthar Mission hna`tuan `tulnak hmun hrang lawng ah a si ding. BTS tlawng ah hin full time saya 6 le part time saya 10 kan `tuan. 2010 ahcun M.Div (Master of Divinity) zirnak tiang on thei ding programme kan nei.

 

HT                   : Malaysia ih laimi pawl hi ziangtin na hmu?

HCN : (1) Thlarau lam in – Malaysia laimi pawl hi harnak lakih um nan si vek in a tamsawn cu Pathian nan thei a bang. Hilak ih Pathian a thei lotu pawl cu an cem lawlaw a si. Ti ngaihnak a um nawn lo ding in ka hmu. Harsatnak hi Pathian theihnak ding sawn a si. (2) Miphun le hnam in –  Laimi phun hi fate te-in kan `tthen aw thluh ih, kan `tong khal a dang thluh. Mai’ `tong cio cu kan ngaina fawn. Mai’ `tong ih Pathian thusim le thang`that tlang cu nuam kan ti fawn. Asinan, `tong phun tam kan neih hi kan vansiatnak pakhat a si. (3) Felloship cangvaihnak ah –  Fellowship cangvaihnak hi cu a thazet ko. Kristian pawl umtu daan ding a si. Pakhat le pakhat theih thiam awknak neih hi a tha.

 

HT                   : LCF hrang thucah duh na nei maw?

HCN               : LCF hi kaihhruaiawkdaan ahcun atha in ka hmu. Thlaraulam cangvaihnak lawng ah Crusade nan tul lai deuh a bang. Thlaraulam cangvaihnak le tuansuahnak a um lo ahcun thlarau thazaang a mal theu.

%d bloggers like this: