Biaknak Lam – Thomas Tha Nei Thuam

Lai Christian Fellowship (LCF) Malaysia rak dinsuaktu pawl lakih an hotubik Pa Tha Nei Thuam (Pathuam) cu tuih ttum (December 24, 2010: LCF Malaysia kum 8 kimnak) ih suahmi Hruaitu Magazine ah Chief editor in Interview a tuah ih an thuruah awknak pawl cu a tanglam bangin a si.

Editor… Na Hmin (Duh kawh le Christian name) tel in in sim thei pei maw?

PathuamKa nu ih nu (ka pi) in Tha Nei Thuam ti’n hmin in rak sak.

Malaysia ih ka hnattuan rualpi pawl in Thuama tiin in ko ttheu ih ka boss pa in kawh har a ti deuh si ding, Thomas tin in rak ko ih Thomas Pathuam ah ka cang lanta. Duhkawhnak ahcun “Pathuam” ti a si ko.

Editor… Na sul phumnak le na tthanlennak khua?

Pathuam… Thlan Cing khua, Falam peng ah ka piang. 1989 January ah Haikhawl, Kalaymyone ah ka nu le pa in in vaihpi, atu ahcun ka nu le pa hi Tahan ah an um.

Editor… Na suahkehnak nu le pa le cii le kuang?

Pathuam… Pa Tai Sum le Nu Mang Nei Kai an si ih, Hauhulh cithlah, Simram ih um kan si. Tusan ahcun Simhrin ti khal in mi tampi in an ko.

Editor…Na suahpi u le nau pawl?

Pathuam… Suahpi unau 10 kan si ih,  1) Nu Cal Lian Mawi (Tahan) 2) Nu Hlawn Nei Sung (Australia) 3) Nu Tha Siam Nei (USA)  4) Pa Thomas Tha Nei Thuam (USA) 5) Pa Lal Than Lian (Haikhawl) 6) Pa Lal Tan Ngai (New Delhi, India) 7) Pa Ram Hma Ngaih (Denmark) 8) Nu Khaw Nei Zing (Tahan) Salai Uk Lian (New Delhi, India) Salai Kross Lian (Tahan, nu le pa hnen um)

Editor… Fimzirnak na hramthawhtir ihsin ziang tiang tivek pawl?

Pathuam1990 kum ah Falam High School No.1 ihsin phun hra ka ong. 1995 kum ah Mandalay Arts & Science University ihsin B.A (English Q) in ka ong.

Editor…Na nauhaklai ihsin na vuatana le na paih zawng?

Pathuam… Bawhlung sit ka paihbik ih ka upat hnu khal ah Volleyball ka lek,  University ka kai tiang volleyball ka rak lek  ve.

Editor… Na tehnalung le Pathian thluasuah rilrah tete?

Pathuam… Malaysia ka umlai ah Pathian in nupi ttha Mai Lal Fak Zual in pe ih fanu Christina Sui Mawi le fapa Andrew Ram Lian kan nei.

Editor…Pumpi khapkhat cawmnak hrangih hmaisabik na kekar?

PathuamMalaysia ah meisalam (Electrical) hnattuannak ah ka ttuan/hlawh aw.

Editor…Malaysia ah ziang tik kum, thla le ni ah ziang tumtah in na thleng?

Pathuam.. Malaysia ah August 31, 1996 ah hnattuan dingah ka rak thleng.

Editor…Malaysia na thlen peklai ih kan Falammi dinhmun na hmuh daan?

Pathuam… Kuala Lumpur Baptist Church ah Myanmar Christian Fellowship ti’n khawm awknak a um, cutawk ah ka rak khawm ve. Kan Falam mi khawmtu hmuh ding an um cuca lo, a umsun mi pa 4-5 te kan rak tokhawm ih thunuam kan rel ttheu.

Editor…LCF seemkeuhnak ding hrangih a hmaisabik na sunmang theih kan duhzet?

Pathuam… Milai pakhat le pakhat kan bawm awknak, kan zohkhen awknak hrangah kan miphun ka duhdawt tinak cun rei ngaingai a daih ttheu lo. Curuangah Bawipa Pathian hmin sawn in bawm awk sehla, minung lam unau, rualpi hnen in si lo, Bawipa hnen sawn ih ruahsannak sawn in reipi a kumkhua in a daih timi ka rak ruat, cumi cu Pathian ih in hmuhtermi vision a si in kan thei.

Editor… Ziangvek in LCF hram nan rak thok timi le nan tonmi harsatnak tete?

Pathuam… Malaysia Falam Pawlkom (MFP) tiah May 9, 1999 ah kan rak ding. Cuti’n Malaysia ih mi harsa le bawm a ttulmi kan rak bawm aw. MFP cu minung kan tam deuhdeuh tikah kan zoh awk theituk nawn lo. Cutikah Pathian hmin in pawlkon awknak nei sehla cuticun bulpak in kan zoh awk khal asile kan harsatnak Bawipa in a thei ih Bawipa hmin in bawm awkton sawn sehla kan miphun in himnak le hnangamnak kan hmu thei ding tiah mi tampi in ruah cio a rak si. Harsatnak kan ti ding maw, LCF cu ramhnuai Buuk ih rak khawm awk kan si tikah “tu zaan cu oparasi an ra ding an ti,” ramhnuai buuk ihsin ramhnuai sin hramlak kawmker lakah va tlan ih relh a rak ttul ttheu. Cuvek caan a thlen tikah “zohman tlan hrih loin khawmnak,Pathian thangtthatnak kan nei hmaisa ta ding” kan rak ti ih, thangtthatnak hla ringpi, thangpi in kan sak ih, thangzet in thla kan cam. Cuvek caan ah Bawipa hnen ihsin hnangamnak kan hnenah a thleng ih zohman tlan le relh nawn loin kan um caan a tampi. Bawipa cu kan beunak lungpi a si. Khalai ih kan harsatnak cu tuni ih LCF parih a thlengmi Bawipai’ thluasuah lungawinak thawn kan tahtthim ahcun reltlak hman a rak si lo. Bawipa a tthatuk aw!

Editor…Tuukhal nei lo dinhmun ihsin Pastor nei thei dingih nan zuam daan?

PathuamSi, 2002 hrawngah Pastor nei thei dingin tawlrel hi thil ol-ai cu a rak si lo. Permit in Kawlram mi kawhter a rak si ih, kan pu te in calling visa thawn in rak ko sak.

Editor…LCF Biakinn pakhat hnu pakhat nan tthawn awk daan pawl in ruah hnik.

Pathuam…. October 2003 ah ramhnuai buuk ihsin Kuala Lumpur Pastor Quarters ah khawm awknak kan rak nei thok. Cumi hnu ah Pathian hnenah rawl-ul thlacamnak in Biakinn kan rak dil ih innkhaan a floor in January 2004 (Jalan Alor) ah kan rak saang thei. Pathian thluasuahnak ruangah minung kan tam vingvo ih 2008 cun khawmtu kan tamtuk tikah tuni ih Biakinn (No. 48, 2nd Floor, Jalan Sungai Besi) kan saan theinak a si. Tuni ih kan khawm awknak LCF Biakinn hi vei (5) nga kan tthawn awknak a si.

Editor…Pastor pakhat hnu pakhat nan neih thei daan pawl teh?

PathuamPathian in LCF hrangah a tthabik Pastor in pek. LCF in by-law kan neih vekin a caan te ah Pastor hrangah a ttulmi tawlrel ringring a si ih,

1. Rev. Za Thelh Lo          March 16, 2003 – September, 2005 (Kum 2 le thla 6)

2. Rev. S. Ni Luai              September 11, 2005 – Dec 31, 2007 (Kum 2 le thla 4)

3. Rev. Run Cung Mang        January 18, 2008 – Tuni tiang.

EditorLCF Pastor pawl par ih na hmuh daan?

PathuamPathian in Amah zumtu khaaltu nei lo tuurual pawl khaal dingah kan ram si lo Malaysia ah Pastor rin-um zetzet in pek hi a sunglawi ka ti. An zate in an ruahnak zate, an thinlung zate in Pathian ttihzahnak thawn mipi duhdawtzet in in zoh tiah ka ruat.

Editor… LCF ihsin FCC a suahnak thu hi a phun2 in an rel celcel. Nangmai’ pumpak pom daan le hmuh daan mallai in sim thei pei maw?

Pathuam… Bawipa kawhhran a si tikah hruaitu upa kan tlamtling cio lo ruangah a si ko ding. Pathian in a thei ih, minunglam kan mawhthluk awknak in san a tlai lo. Thil ziangkim Bawipa sunlawinak ah cang vingvo sawn sehla ti cu ka saduhthahmi a si.

Editor… LCF le Falam Pawlkom, cuihsin Agape (ACR) le atu ih FPM/FRO pehtlaih

awknak le thil umtu daan tete in sim siang tawk?

Pathuam… Tuni kan dinhmun vekin Leitlun lam a ttulmi UNHCR thuhla tawlreltu an rak um lo tikah Agape cu Pu Solomon Lal Ci Luai le hohanak in dinh a rak si. Kan milesa hrangah hna tampi an rak ttuan mi a um. Cumi pawlkom Agape cu tuni ih ACR ding thei dingah hmai rak nortu a si. FPM (Falam Pawlkom Malaysia) cu 2005 ah fellowship hmun (2) kan um ruangah din saal a ttul ti ih din saalmi a si. Cuih hnu ah Falam Pawlpi Malaysia ti’n lungrual theinak dingah tiah a hmin thlengh lala a si fawn.

Hih Pawlkom hmuahhmuah ah LCF cun rualrem le kan miphun tthansonak ding hrangah a pehzom ih a ttanpi ringring. Asinan Laimi mi tam deuh in kanmah le dinhmun (stand) kan theihthiam awk lo ttheu ruangah hohatu hna kan ttuan tikah leitlun lam le Pathian hnattuan cu rawi tuk lo sehla, thleidang thiam sehla mai’ hrang, mi hmuhnak khal ah a mawi ih midang nun khal a neh thei ding tiah ka zumhnget rori.

Editor…LCF le Calai hnattuannak, ahleice in Hruaitu Thuthang na rak buaipi daan thuhla mal te’n in ruah thei pei maw?

Pathuam…A hmaisa in LCF ih Pastor kan neihmi hmuahhmuah ca ngan paih, calai misa zetzet an si ih ka lungawi. A thok ahcun kan Pastor Za Thelh Lo rori in tha in pe ih Sen Hngilh Piang in a rak ngan ih thil ttul dang hmuahhmuah ka rak tawlrel. Zanvar it lo ih kan um caan a tam phah ko ve. Neitalam ahcun keimah rori khal in a ngan thawn ka rak buaipi a ttul thlang. Hruaitu Thuthang cu a hram a hngettuk, harsatnak tamtuk a pahtlang zo.

Editor…Rihli Email group dinsuahtu lakah na tel ve, na hoha sikhawh a can suaknak sunmang le cangvaih daan, tuni dinhmun, le hmailam tumtah?

Pathuam… Group mail pakhat ih ca hmun tamtuk ah a luh tikah calut a tamtuk ih, a thu le hla a bang awk fawn. Group mail tin ih moderator tam sawn lungkimnak in Rihli hi hmunkhat te ih hman dingah tiah a thar in kan tuahnak a si. Hmunkhat te ih um hi kan zirh awk, hruai awk thiam vivo a thupizet. Tuni dinhmun ahcun mi tampi in group mail tampi ah an lut cio nain, an kuatnak lam ahcun Rihli hi a hmangtu an tam vingvo. tthansonak phunkhat cu a si. Hmailam ahcun santhar mino pawl in kan hman thiam ahcun hna tampi ttuannak le thuthan awknak ah a tthahnem vingvo ding tiah ka ruat.

Editor …Tulai group mail tor le seng ih a suah ciamco hi ziangti’n na hmu?

PathuamHimi cu tuah ttulmi a si, kawhhran, khawtlang, khawpi unau, le unauza khal ah tuah le hman a ttulnak a tampi. Asinan tumtahmi bang awk cu tampi tuah lo sehla a ttha. Falammi zate hrang ahcun pakhat lawng neih khal ah a tawk emem. Kan thiamnak hi zapi hrang tthathnemnak ah hman thiam ding a thupizet.

Editor…Chinland Today web site neitu lakah na tel ti kan thei. Ziangti’n nan rak suangtuah ti mal te’n in theihter siang pei maw?

Pathuam… Chinland Today (CT) hi kanmah unauza kut suak cu a si. A tawlreltubik cu ka tupa (Australia) le ka nau (Delhi, India ih um) an si. Hmin ngan lo cangantu le thuron upa in ttanpitu an um. Kan unauza le ka tule khal siseh, cangan lo ih um thei lo, calai duhtuk kan si tikah hmun dangdang ah um hmansehla ttuan tlang theinak lamzin hawl in vei tampi online in meeting kan neih hnu ah CT tuah a si. A thok ahcun Calai duhdawtnak ruangah asinan, tuni ahcun kan miphun tthansonak hrangah le Bawipa sunlawinak dingah ti rori kan thupitterbik.

Editor…LCF Malaysia hotu pakhat dinhmun in kan Falam mi pawl hrangih Refugee luh theinak dingah nan rak tawlrel theimi a um maw?

Pathuam…LCF hmin in kan tawlrel ka thei lo. LCF in Agape cu a dinpi ruangah, CRC ih hotu pawl khal in LCF mit-hmai an zoh tikah Agape hmin in mi ziangmaw tizat UNHCR ah an rak lut thei. Cumi cu LCF ih ttuannak vekin a langnak tla a um men thei. A ngaingai ih hnattuantu cu Chin Agape Refugee Committe pawl an rak si.

Editor… Malaysia na umlai ih na hnattuannak ah na diriamzetmi (pawl)?

Pathuam…Malaysia ih ka um sungah LCF ah ka ti theitawkte in ka thinlung, ka tikcu caan tampi thawn ka rak ttuan. Cumi cu ka lungawinakbik a si ih, ka dam sungah ziangtik hmanah ka sir awk lo dingmi le ka diriambikmi khal a si ding ka zum.

Editor… LCF thuanthu ah har na ti fualfomi le na lungawibik cuangnak?

Pathuam… Tuukhaltu nei lo ih kan um caan malte sung hi thinhar caan a si ding. Kan Biakinn tlem le tlem lo ih tokhamrem, hruaitu pawl tonak nei loin a lenglam sangka kiang ih kan to caan, Biakinn sungah zumtu pawl lungrual te’n Pathian kan biak khawm caan hi a ropi ka tibik. Tuni ih LCF hi leitlun Laimi hmunkhat te ih Pathian thangtthatnak ahcun a ropibik lakah a tel hrimhrim.

Editor… LCF in kan rak ti taa lo cu aw tiih sir awk thluahthlomi a um pang maw?

PathuamKan tlin tawkte’n kan tuah thei dingmi cu kan tuah/kan zuam in ka thei.

Editor… America ah ziangti’n, ziangtikah na rak thleng, atu na umnak khua?

Pathuam… May 20, 2008 ah USA kan thleng. Garden City, Kansas ah kan um. Kansas state hi USA ih a lainakbik state a si.

Editor… Atu USA na umnak ah miphun tthansonak hrang na telnak?

Pathuam… 2009-2010 kum ah Chin Pawlpi E.C sungah ka tel ve.

Editor…USA ih pumcawmnak hnattuan daan le Malaysia ih nuntu khuasak daan na ruatkop in na tahtthim dah maw?

Pathuam… Malaysia ih hnattuan hi a hartuk cu a si lo. Thlahlawh ngah lomi kan nei tamtukmi hi a har ka tibik. Keimah dinhmun in cu ka ngahmi hnakin ka ngah lomi a tam sawn ding. USA ahcun lakkha ngah lo tivek ka thei dah lo, cucu a danglamnakbik a si.

Editor…USA thleng zo kan Laimi pawl ih dinhmun na hmuh daan malte’n.

PathuamA rak um rei pawl cu an dinhmun a saangzet. Pathian thu ah kawhhran din in kan milesa in rak hmuak le in zohmi hi uar an umbik.

Editor… USA ram ah na faate pawl an tthanlen tikah ziangvek mizia in tthanglian hngaisehla ti na duhbik?

Pathuam… Laimi sinak kan ziaza mawi in tthanglianter ih, USA rammi sinak in thiam dingmi an thiam ka duh. Cule Bawipa Pathian ruangah Kawlram le leitlun hrangah eng/tleu an si ding hi ka sunmang a si fawn.

Editor… Leitlun huap Christian Mino cangvaihnak nei thei dingin na tumtahmi le ti theisunmi pawl? (CCYI)

Pathuam… Chin Christian Youth International (CCYI) hi October 3, 2010 ah dinh a si. Kan miphun in pawl thleidannak um lo, duhdawtnak thawn a ttangrualmi Chin Mino in ttultuk in ka thei. Thuthangttha phuan, Calai, hla le cinkentlak kan nunphung pawl hi duhdawtnak thawn phuan, remh, suah le kilkhawitu mino si dingah ruahsannak thawn dinh mi a si. Bawipai’ cahnak ruangah kan miphun le a mai sunlawinak hrangah thil tampi kan tuah suak tengteng ding.

Editor… Kan Falam mi pawl ih lungput daan tlangpi ah na rem lomi asilole si lo taa sehla aw na timi?

PathuamRem lo mi le seherh ngurngo mi ka nei lo. Pheh riai loin kan Falam mi cu kan ruahnak a pitling, Pathian thu ruangah si ding ka zum.. peng thleidannak, mi nautatnak thinlung, ruahnak siavatuk kan nei lo. Cumi cu khawvel/leitlun lam kaihhruai awknak lam ahcun a at-thlaknak caan a rak um hmang, mi ih an relmi, an nganmi ka thei tamzet. Bawipa sawn in kan thinlung tlaitluannak in siarsak hramseh. Tuhlan hnakin tuhnu a thupi sawn ih Falam hrangah Bawipa ih tumtah cia mi nehnak or sunlawinak cu amah sunparnak ding hrang a ra suak leh saal hrimhrim ding tiah ka zum.

Editor… Falam mi tthansonak dawnkhamtu tiih na ruahmi thu pawl in ruah hnik.

Pathuam… Ttuan tlang khawmnak ah duh hnakin kan ttang khawm thiam deuh hrih lo a bang.

Editor… Falam mi pawl hi Lairam ahcun hrinhnam terek hminbun kan rak uarzet. Malaysia thlen tikah “Lai” (Lai Christian Fellowship) timi kan uar ih US kan thlen tikah “Chin” (Chin Pawlpi) timi kan uar. Hmialam ah ziangmibik fehpi a si ding ti’n na ruat?

Pathuam… “Chin timi kan fehpi tikah kan ruahnak khal a pitling vingvo dingah ka zum. Asinan kan hnattuannak ahcun Falam hrangah ttuan hmaisak cu a ttulnaklai a tampi ding.

Editor… Kan Falam miphun a kilkip ih tthangso dingin ziang sunmang na nei?

Pathuam…Kan Chinmi zate hrangah lungrual a ttul caan a um vekin, kan Falam hrangih lungrual teih kan ttuan a ttul caan a tampi. Cun kan khua le kan hrinhnam hrangah tiih ttuan caan khal a um ding. A thupibik cu tui’ caan hi ziangmi ah lungrual tein ttuan caan a si ti zoh thiam ih ttuan khawm thei hi a thupituk. Kan Falam mi lakah mifim, mithiam an tamtuk ih mi neinung khal siar cawk lo an um hokhaw. Ttuan tlang khawm thei a ttul rualrual in cu pawl finkhawm thiam le huaihawttu/sawmtu tla a rak ttul lala.

Editor… Ramleeng um mi le ramsung um kan milesa pawl pehtlaih awknak ttha nei thei dingin ziangmi suangtuahnak na nei?

Pathuam… Tthentthek awk caan cu a cem vingvo zo tiah ka ruat. Atu cu finkhawm awk saal caan a si ti’n ka hmu fawn. Curuangah ram sungih kawhhran tin kom khawm awknak pawlkom um sehla, ramleng khal ah cuvek thotho in tuah sehla (tuah rerolai) cuteih pahnih ttangrual sehla ttuan tlang theimi tampi a um dingih, kan miphun hrangah tthathnemnak siar cawk lo tampi a suak ding.

Editor… Calai cungcang ah: “a b c d..” system le “a aw b ch..” system pahnih parih na hmuh daan le hmailam ah fehpi dingih ttha sawn na timi?

Pathuam… Keimah bulpak hrang ahcun a pahnih in ka hmang thei. A dik le dik lo ahcun an bang awk ciah tiah ka ruat fawn. Asinan a aw b ch.. cu Mizo ram ih hman dingih Mirang pawl ih rak tuahsakmi a si:  a b c d system hi Chinram (Lairam) ih kan rak neihmi, Mirang pawl ih in rak tuahsakmi a si. Phundang deuh in kan sim asile a b c d hi Chin miphun pawl (Burma ram sung um Chin) ih kan thiisen ih fehpimi a si. Hmailam hrangah fehpi thei sehla a ttha ding tiih ka ruahmi cu a b c d system a si. Asinan remh a ttulnak tampi a um tiah ka ruat. A tlamtlin lonak ah kan remh ngam/siang a ttul fawn ding. a aw b ch ih a tthatnak pawl khal kan laakluh thiam ahcun a tthatuk ding. A thupibik cu duhdawtnak thawn lungrual tlangmi hman a tthabik.

Editor… Atu ai in kan Calai dinhmun khaisan ding le Calai duhzettu pawl lungrual tei’ kan ttuan tlang thei daan ding na sunmang?

Pathuam… Kan Calai rinsan mi upa tam nawn ka suhmi ahcun kan Calai tthansonak ding hrangah a b c d hmang le a aw b ch hmang pawl rualrem te’n veikhat Yangon 2002 ih cabuai parih an tokhawm hnu ton awknak a um thei nawn lo ti a si. Curuangah tong aw in thunuam rel le hmailam hrang kan miphun hrangah an ruah ahcun kan Calai a tthanso cak ding daan hi ka sim siang/ngam lo. A  maktuk ding.

Asinan Mino tampi in kan ruahmi cu:

1).        Ziangruangah lungrual te’n an rel tlangmi an thlun lo?

2).        Ziangruangah thurel thlangnak an nei pehzom vingvo thei lo?

3).        Mino pawl in ziangti’n kan pehzom awkter ding?

Upa pawl lungrual te’n feh tlang thei lo an si ahcun mino pawl parah a tthum awk a si mai. Hmailam kan new generation hrangah tuni ih mino kan thupibik. Kan Calai tthansonak dingah thil pakhatkhat cu kan tuah tengteng ding.

Editor… Kan miphun thlaraulam le tisa daan ih tthansonak bawmtu dingah santhar hruaitu mino pawl in Calai ih bawmh theinak ziang planning nan nei?

Pathuam… CCYI (Chin Christian Youth International) in duhdawtnak thawn hmainor a tum. Calai thu khal ah tumtahmi tampi a nei. Calai ngan zuam awknak, Calai duhdawttu cawimawinak pek tlak pawl cawisaan le laksawng pek… tivek pawl in kan Calai in kan miphun tthangsoter le tisa thlarau hrangah thazaang thar laaknak ah tuah kan tum.

Editor… Laimi mifim cathiam zirsaang pawl lungrual tei’ miphun hrang hnattuan tlang theinak dingah ziangti’n na sawmngiar duh?

PathuamMI, USA ih um ka rualpa in kan Laimi mifim cathiam tampi an um nain, Laimi hrangah tthathnemnak an tuah lo tikah zohman in an thei lo. Leitlun an san a cem ih in thihsan pang khal le vaate thih ih thi ding an si ko ti’n in sim. Tuni ah kan mithiam zirsaang pawl in an thiamnak pakhat te tal kan miphun hrangah an hman ahcun a sunglawituk ding ka ti duh.

Editor… Kum zabu 21 ih IT tthansonak hmangfuh thiam in Khrih le Miphun hrangah ziangti’n hnattuannak kekar vingvo sehla ti’n na suangtuah?

Pathuam…2002 kum ah kan Laimi pawlkom awknak group mail hmangin Philipine ih Saya Sum in Pathian thu tawite a rak ngan ttheu ih cumi cu ka rak print ih Falam Buuk ih um unau pawl ka rak zem, a sunglawi ka tituk. Tuni ahcun group mail vek kan zoh khal le tthansonak hlir in a khat. CD, VCD thar, Pathian thu phunkim nganmi pawl a hmuh theih.

Hmailam ah ziangtluk in group mail kan hmang ttangkai ding ti cu ka thei lo, mi tampi cun ca an ngan paihtuk ding ka zum lo. Curuangah Kawhhran, Fellowship le Pawlkom zate in website kan nei dingih cumi ihsin thuhla nasa te’n kan hlawm awk thei vivo ding ka zum. Ramleng suak pawl in kan Lairam le Lairawn ih um kan milesa thawn pehtlaihnak nasa sin in kan neih a ttul.

Editor… Casiartu hmuntin ih kan milesa pawl hnenah sim le sawm na duhmi.

Pathuam… Leitlun kan dam sung tawite ah a pakhatnak Pathian hi kan rian dingih, a pahnihnak ah kan Miphun hrangah mi tthahnem si zuam uhsi!

Editor… LCF Malaysia sungtel mipi hnenah thazaang pek le forhfial na duhmi?

Pathuam…. LCF member pakhat dinhmun in LCF Biakinn ah khawm ringring thei saal ningla.. LCF kawhhran hrang le Pathian hrang rin-umzet in ka thinlung, ka neihsiah, ka caan ka pek tengteng ding. Bulpak cio thinlungah himi thinlung kan put ahcun LCF cu sim lo, kan miphun rori in Bawipa hmai ah a hmuimi raithawinak a si hrimhrim ding.

Bawipa Pathian hi sunloih camcin uhsila cule Anih in kan miphun in khaisang ding.

Editor… Na tikcu caan sunglawi in peknak parah le thusuhnak pawl kimcangzet ih in leh thluh ruangah kan lungawizet.

Pathuam… Ka lungawi. Pa Pathian in LCF unauza thluasuah lo pe seh.      LCF Malaysia a nunkhua sau hram seh!

(Visited 129 times, 1 visits today)
%d bloggers like this: