Hlasak Thiam – Salai Biak Hlei Sum

CT: Na hmin pum?

BHS: Biak Hlei Sum.

CT: Na suahnak?

BHS:  Chin ramkulh, Falam peng, Zongte khua ah ka suak.

CT: Nupi fanau na nei zo maw?

BHS: Ka hnatuan bawmtu dingah Pathian in nupi (kan khuapi nu Fam Cer Sung) thate in pe ih, fapa 2 le fanu 1 kan nei. Tuah Tahan E group ah ka nupi fanau thawn khua kan sa.

CT: Unau ziangzat nan si?

BHS: Suahpi unau 8 kan siih mipa 3 le nunau 5 kan si.

CT: Na nulepa an dam lai maw…khuitawkah an um, ziang an tuah?

BHS: Ka nu in 2009 May thla ah mual in liam san. ( ka nu, Pi Rem Zing, Rev. Van Lal Hngak ih farnu a si.). ka pa  ( Pu Hrang Ul Thang ) in in dampi laiih , Zongte khuaah kanau le dang thawn thingtlang lo hna tuan in a um lai.

CT: Cazirnak lamah phunziat tiang na kai?

BHS: Acts Bible College ah B.Th ka zir suak veta.

CT:  Hla fingzet na phuah?

BHS: Tuini tiangah Pathian in Hla fing 180 lenglo in pe zo, a tam thei bik le a tha thei bik in ngan sinsin ka tum.

CT: Album paziat na thun zo?

BHS: Single Album pahnih ka nei ih 2009 ah “Bawipa’n I thei” Isai. 45:5; le 2011 “Pathian hrangah thilharsa a um lo” Jer.32:27; (Tu zuar rero laimi),Group Album ah cun hmun tawk fang zetah ka tel.

CT: Ziangtik ihsin hla na phuah thok?

BHS: 1998 in Hla ka phuah thawk zo na’n midang ih sak pi tlak cu a um lem lo.Thungai thlakih Pathian ih in pek cu 2005 kum hrawng in a si.

CT:   ziangtik ihsin hla na sak thok?

BHS: 2001 hrawngin ka sak thawkih -2005 in Pathian thawn tharnak  ka co in ka thei, tuini tiang.

CT: Love song na phuahmi pawl in sim aw?

BHS: Love song hi singai! Salai Tuan Ling Thang ih sakmi “Boihte na zun” (ka awlawk na ti sawng Album sung ta) kha siih; A dang cu “Tawhcia par” “Zan thlapa”  “Buta Zung” tvk ..mal lai te si.

CT: Love song hi na pianthar hlan ih na phuahmi maw si?

BHS: Pianthar hnu ah si ko ……Rawng bawl hlan ta.

CT: Na hla ih na duhbik hleice deuh mi 3 in sim aw?

BHS: Ka duh hleice mi – Jesu’n in zahpi lo; Bawipa’n I thei; Pathian Hrangah Thilharsa a um lo.

CT:  Ziangtikah na piangthar, zo ih thusimnak in?

BHS: 1998 ah nun lungawinak ka co nan, 2003 tianglai cu cawkpolh in ka nung. Zoih thu simnak ti hi rel ding fumfe ka thei cuang lo.

CT: Na hla pawl hi a nungzet an ti…ziangtin na hmu ve?

BHS: Pathian malsawm, Phulo zangfahnak si ko. ( 1 Cor.15:10).

CT: Hla phuah na harsat maw?

BHS: Awlai zetih ngan can a um ih, Harsat zet can tla a um ko…Pathain thuthu si ko.

CT: Hla thawn Pathian ka thangthat ding tiah tiamkamnakvek na nei maw?

BHS: Ka nei,ka duhbik mi khal a si. Hi lei damsung lawng si lo in, Kumkhua Van hmun khalah ka thangthat ding.

CT: A hlan ah rittheihthil na rak tham maw?

BHS: Zu salah kum ziangmawtizat ka rak um dah ve.

CT: Hla na sah zikah ziangtluk thlacamnak na nei theu?

BHS: Ngaitu mipi in ziang hla an tul ding ti le, Amai duhmi ziang a si ti theidingin ka nun ka hlan hmaisa theu.

CT: Na hlasaknak ruangih piangthar na thei maw?

BHS: Hla ka saknak hmangih Pathian hnatuannak mak ka theihhin Pathian ka thangthat. Pathian in a thu hi thlaw a suahih mipi nunah lungawinak a thlenter theu a si.

CT: Awnmawi ih kan thansohnak dingah ziangmi pawl a thupi?

BHS: Awnmawi ih kan thansohnak dingah:

> Pathain tihzah thaim. Thuf.1:7
> Sawisel aw mei lo in fakselawk dan sawn thiam.
> Pawlkom tinin cawimawiawk dan thiam sinsin.
> Hnam cangkang pawltidan a tha mi zir thiam.
> Kan Lai hla cu ziangvek khal ka lei sak ding ti thinlung put neih.
> VCD/CD original rori lei sakawk ,Lehhnu ih copy sak men lo in.

CT:  Kan Lai awnmawi ah kan cangkang vivo na ti maw?

BHS: Kanlai Awnmawiah kan cangkang vi vo. Pathian malsawmnak hi kan parah a kil ih kipin a lang a si.

CT: Ziangruangah Icon zuamawknak ah hlasak thiamcia pawl an tel lo?

BHS: Falam Youth Icon lai kha Campaign le Crusade neih tam lai can deuh a si ih cunah a si men ding,tin ka ruat.

CT: Hlasakah aw rem deuh a tul ngaingai maw?

BHS: A tha thei dingbik ih zir le aw rem hi a tha, cuhnakin Hla cafang sal fiang thei dingih zir hi a tul ngaingai.

CT: Hla na sak tam vivo ih na aw a tha vivo in na thei maw?

BHS: Fim zirnak khalah zir tam sinsin le thiam lo mi kan neihtam zia a langih, Cuvekin si ko. Ka sak tam sinsin ih ka tlaksammi ka hmu tam sinsin.

CT: Pathian kawhnak na dawng maw?

BHS: Pathian kawhnak cotu hleice ka si.

CT: Kan Laimi ah gospel maw love song kan uar sawn in na hmu?

BHS: Kan laimi lakah Falam miphun in Pathain thangthatnak Hla kan uar hi ka lungawi in ka hna a ngam zet. A mah a thangthat tu cu an mualpho dah lo ding, Saam 37:25. In cawisangtu Pathain cu a pakhatnak ah si ringring hramseh.

CT: Love song na phuah thiam sawn in kan lo hmu?

BHS: Love song hi ka phuah tam lo ih ka ti fuh pang si men ding.

CT: Piangthar hnu ih love song phuah na ti lemlo maw si?

BHS: A si ko, ka ti lem lo. Caan tla a um lo e.

CT: Love song le Pathian hla sah tlang hi ziangtin na ruat?

BHS: Love song hi sual cu ka ti lo. Duhdawtnak hla tete (Rom 13:8), A mahlawngte “Kuru Kara” lutuk cu ka uar lem lo. Sak tlang ding cu tha ka ti lo.

CT: Na album thar na hlawkpi zet maw, na sale thei maw? A thula cipciar deuh in..?

BHS: Pathian zarah kan Laimi in “Duhsakawk daan “kan thiam sinsinih,tuihlan hnakin tampi ka hlawkpi ding tiah ruahnak ka nei. Ramsung, Ramleng ih um pawlin thlazacamnak le duhsaknak tongkam thawn thazang in pek ringring nak hin ka thazang tampi a tlung ter. Pathian thlawsuahnak nan parah a tharin thleng hram seh.

(Visited 306 times, 1 visits today)
%d bloggers like this: