Awnmawi – Pu Tha Nei Khar

Profile:

Hmin               : Tha Nei Khar
Suah ni            : January 2, 1959
Nu le pa           : Upa Khuang Pum ( L ) le Pi Khaw Lian Tial
U le nau           : Unau 6 ah pathumnak
Suahnak khua : Cong Thu, Falam
Hnatuan          : Sumdawng khualtlawng
Innsungsang    : Fapa 2 le Fanu 3
Umnak   khua  : Mandalay

CT       :  A hmaisabikah ‘C2M2’ ti mi hi a sullam in sim thei pei maw?
TNK    : C2M2 ih sullam cu Chin Christian Music Ministry tinak a si.

CT       : C2M2 hohatupawl tla theih kan duh.

TNK    : 1) Tha Nei Khar
2) Sui Than Ce

3)Tha Nei Thang

4) Van Nei Cem

5) Za Kap Cuang pawl kan si.

CT       : Ziangtikah C2M2 nan rak din thok? Ziangruangah, ziang hrangah nan rak din?

TNK    : Din tulih kan ruahnak cu: Laimi lakah Pathian in hla phuah thiam tampi in pe; cui an hla thathapawl cu saktu um lo cun mipi hnen thleng loin cabu sungah a riaral thei. Cuvek thothoin aw tha a nei mi le hlasak a thiam mi pawl khal suah saktu um lo cun  an thiamnak kha a lang thei lo ding. Curuangah Laimi cu kan nun a har cio si  tankhawm a tul ti ruahnak a sibik. Kan tumtah mi cu:

1)      Lai ir-awm suak Pathian thangthatnak hlapawl phawksuah ih fingkhawi

2)      Zaithiam aw thapawl hmangih CD/VCD/DVD/Tape pawl hmangih Laimi umnak hmunkipih thehdarh

3)      Laimi zaithiam sersuah vivo. Cumipawl hmuitin in 2006 kumah lungrual ten kan ding a si.

CT       : Tui ni tiangih C2M2 in nan tuahsuak zo mipawl tla theih kan duh.
TNK    : Tui ni tiangih kan suah zomi pawl cu:

–           2006 kumah (Vol. 1) Album, Van Thlarau Thianghlim (Saktu: Mai Far Men Par.

–           2007-8 ah (Vol. 2) Album, Thuthangtha Meifar  (Saktu: Mai Si Eng Je Em Mawi, Mai Siang Tlen Par, Mai Khuah Pek Awi, Mai Lal Biak Vul (Ete), Mai Van Siang Men, Mai Malsawm Par, Mai Lal Tan Pui pawl an si.

–          2008-9 ah (Vol. 3) Album, Van Ro Sunglawi (Sak: Evan Biak Hlei Sum, Henry Lal Hmangaih, Mai Khuang Tin Man, Mai Lal Thang Zual, Mai Tial Rem Cin, Mai Lal Din Par (Nu Mam), Mai Par Cin Mawi.

CT       : Music le Calai tivek suah hi market thawn teh a milaw pam maw? Nan sung maw nan miat?
TNK    : A tangka sumfai cu miat cu rel lo kan sungsawn! Asinan thu le hla karhzai le zaithiam tampi cawimawi le khaisan an si hi kan miat mi ah kan ruat; kan miat ko.

CT       : C2M2 in ziangvekin fund nan ngah (or) nan hawl?
TNK    : Fund hi a hran in kan hawl lo. Kan din laiah mi pakhat in ting nga (500,000/-) cio kan thawh ih cumi cun tuini tiang kan feh hnianghno ko. Bawm duhtu cu nei nungna cun kan tul thlang khawp mai.

CT       : C2M2 in nan suah ding mi VCD le Cabu tivek hi ziang mi zoh in nan rak hril theu?
TNK    : Hla kan zohdan cu a sungthu ah bulpak simaw, pawl simaw, sawiselnak/donak si lo le Kristian thurin thawn khal a kalh loih kan theih mi pawl kan zohbik.

CT       : C2M2 in VCD le Cabu a suah ding tikah Pathian hla le Pathian thu lawng suah ding tivek a um cuangmaw?

TNK    : C2M2 hmin cun Pathian Thangthatnak hla lawng kan suah hrih ding. Hmailam thu cu thuhran si sehla. Himi C2M2 hmalaknak bakah United Chin Publication Board (UCPB) din a si. Himi ih kan tumtah mi cu cabu a tam theibikih suah a si. Curuangah cabu cu (UCPB) in kan suah ding.

CT       : C2M2 in hmailam hrangih tumtahnak nan neih mi teh ziang a si?
TNK    : Kan saduhthah cu a tamzet nan tampi tuan theinak cu kan nei lo. 2011 sungah Pathian in rem a ti le Christmas hla suah thei kan tum.

CT       : C2M2 a din theinak dingih nan rak ton mi harsatnakpawl teh in hlawm thei pei maw?

TNK    : Kan miphun le Pathian hrangah a tul a si ding, rualpi ka hawn sawmkhawmih tumtah mipawl kan hawn sim tikah lungrual ten le phur takin sumzin ding laksal um lo dingin kan hawn thawhkhawm mai.

CT       : C2M2 in a tumtah mi hi a hlawhtling in na hmu maw? Nan pehzom vivo thei teh na zum maw?
TNK    : Hlawhtling e! C2M2 in Pathian Thangthatnak hla zaithiam mi 15 hmangin hla fing 42 kan Laimipi hnenah kan thehdarh zo. Culawng siloin kan zaithiampawl mipi theih le hmuh ih kan hawn cawisang ngah khal hi kan hlawhtlinnak a si tin kan pawm.  Kan Laimi mineinungdeuh le mitirhsiang pawl hmangin tuah thei vivo cu kan beisei ko.

CT       : Tu, nangmai bulpak thu lo sut lala sehla, hla tampi phuahtu na si ti lawng kan thei ih fing ziat na rak phuah zo?
TNK    : Ka lungawi.  Hla hi tam ka phuah thei ve lo; Pathian Thangthatnak hla ka phuah zo mi hi fing 50 hrawng cu a si thlang ding.

CT       : Na hlaphuah mipawl hi Pathian hla maw tam love song? Cule zopawl in an rak sak?
TNK    : Ka hlaphuah mipawl cu Pathian Thangthatnak hla hlir an si. Lovesong cu ka phuah thiam ve lo, a pawi ka ti zet. Ka hla in saksaktupawl cu: Mai Far Men Par in fing (15),  Nu Tha Hlei Vang in (1), Mai Si Eng Je Em Mawi in (1), Mai Siang Tlen Par in (1), Mai Lal Biak Vul in  (1), Mai Lal Din Par in (1), Mai Khuang Tin Man in (1), Sayamah Ngun Zung Tlem in (2), Mai Ngun Tin Del in (4), C2M2 Group in (2), Mai Kei Than Par in (1). A zaten fing 30 lai cu a si ve mai.

CT       : Tu ah teh hla na phuah lai maw?
TNK    : A tlakdan ih zirin ka phuah phahphah ko.

CT       : Ziangvek can ah khin hla na phuah theu (or) ziang na tonnak in hla phuah dingin a lo fial theu?
TNK    : Ziangvek can ti si cuang loin ka thinlungih a um can a si deuhbik. Harsatnak, beidawnnak, zatlaknak pawl in khua in ruatter ih cu cun hla a suahter tlangpi deuhbik.

CT       : Music hi milai hrangah ziangtlukin, ziangvekin a thupi tin na hmu?
TNK   : Kan thinbang lai le kan beidawn laiih thurawn tha in petu a si ih tlunah zohman um lo laiih kan pawl thei mi cu awnmawi a si.

CT       : Pathian hla na phuah ding can ah ziangvekin timlamawknak na rak nei theu?
TNK    : Thinlung takin thlacamnak ka hmang theu.

CT       : A nung mi Pathian hla phuahsuak a si theinak dingah ziang a tul, a thupi tin na zum?
TNK    : Pathian thu siar tam le thu ngai tam a tul in ka ruat.

CT       : Na uarbik mi Lai hlaphuahtu pathum in in sim aw.
TNK    : Ka thei cuang lo. Ka uar thluh; ka bang lo mi hlir an si.

CT       : Na uarbik mi Lai hlasakthiam pawl teh?
TNK    : An thiam ka ti thluhih zir ding cu an nei cioin ka hmu.

CT       : Na hlaphuah mi lakih na duhbik mi hlapawl teh ziang an si pei?
TNK    : Keimai hla ah cun Leitlun misual pawl duhtu Bawipa ti hla asi.

CT       : Christian pakhat hrangah lovesong hla sak, ngai le phuah hi ‘sual’ a si tin na ruat maw?
TNK    : A tawinak cun ti lo. A san cu kei in tul lo ka ti hmanah tul titu an um ding; a mamawhtui hrangah a tha ko.
CT       : Minung pakhat hrangah a thupibik ti ih na ruah mipawl teh ziang an si pei?
TNK    : Diknak, rinumnak, taimaknak, beidawng mai loih beiseinak thar neih a si tin ka ruat.

CT       : Kan Chin dinhmun ah music le calai buaipinak in pumcawm a theih lo ti hi kan thei cio sikhawh, cumi lakah hivek hrangih pum rak peawtupawl hi ziangtin na hmu?
TNK    : Famkim lonak khawvel ih kan cen fam si.

CT       : Music le calai ih thupitzia na simfiangdan?
TNK    : Music hi kan dam lo can ih in ra vehtu rualpi tha aanka nem. Calai cu lamzin dik ih in hruaitu meifar vek a si.
CT       : Na duhbik mi Bible cang teh?

TNK    : Mi in na parah tuah haiseh ti nan duh vekin mi dang parah tuah ve uh (Mt 7:12).

CT       : Christian pakhat dinhmun in ‘harsatnak’ hi ziangtin na hmu?
TNK    : Nundan ding le ralrin ding in zirhtu saya an si.

CT       : C2M2 aiawh in na sim duh mi…
TNK    : C2M2 hmin ih sim ka duh mi cu:

1)       C2M2 kilkhawi ih hruitu pawl hi thu le hla lamah mithiamlo kan si. Music lam phei cu a thiam cu rel lo, a theih khal kan theithiam ban lo lawlaw. Asinan kan thu le hla a karhzai ih kan minorual hlasak thiampawl cawisan duhnak lungput pakhatte lawng a neitupawl kan si.

2)      Thasin thiamsin mawisin a si theinak dingah thiamsawn le theisawn pawl in thurawn thatha in hlawm cio dingah C2M2 in kan lo sawm.

3)      C2M2 hmalaknakah sum le pai tampi le nihlawh tampi pe ih suah a si hi in theihsakih kan tualrawn rori tiang hman a rawn thlen paih an um tin in rak leisak cio dingin kan lo ngenngawl duh fawn.

4)      Original tape, VCD, DVD hmuh ding a um ahcun copy cu rak lei lo ngam ding khalin kan lo ngen. Cutivekin copy ih a rak zuartu khalin mi in sumpai tam tak le nihlawh tam tak heu ih an tuah mi a si ti in theihthiampi khal kan lo phut.

5)      Kan album in rak leisaktu nan zate parah kan lungawi.

CT       : Nangmah bulpak in tla sim duh mi na neih le..
TNK    : Miphun le ram kan vei tikah tongkam menih kan phun kan hnam, kan aw kan an, kan khua kan ram, ka ca kan lai a thanso a tul ti men loin, kan ruahnak, kan can, kan thazang, kan neih thilri, kan sum le pai khal a tuldan vekih kan pek ngam a tul. Tongka men cun a ttan lawng a ttan theiih a thansohnak dingah hnatuan a theih lo. Curuangah kan kiangkap miphun dangpawlih cangvaihdan zoh ih kan dawi a tul thlang lo maw! Cawl loin kan dawi dingih kan man mai ding. Kan man hnuah kan lan leh fang ding. Dawi paih loih kan bei a don mai cun an dungah kumkhua in tanta pang ding ti phan a um nasa.  Ttan la tlang uhsi!!

CT       : Bulpak in sim duh mi…

TNK    : Hitivekin C2M2 hnatuannak tla thei ih in rak sunsaktu CT Team parah lungawithu ka sim duh. Kan miphun in hivek website lennak ding kan rak nei ve thlang hi sunglawi le manhla ka ti tuk. CT Team tla tanla in zuam sinsin uh tiah tha ka pe phah duh fawn. Nan parah tampi ka lungawi a si.

CT       : Ziangtin kan lo pehtlaih thei ding?

TNK   : Email c2m2khar@gmail.com ; Phon: 0095- 092450478 / 091027977.  No.4, Room 2, 2nd flr.,  22 & 86 Coner, Mandalay.

(Visited 235 times, 1 visits today)
%d bloggers like this: