Mi Cuangce – Salai Sui Aye Thang

Salai Sui Aye Thang Ph.D (Molecular Biology)

CT: Hmin, unau nulepa, suahnak, tui umnak hmun le tuanmi.

Ayete          : Falam khua, Pu Lal Hrem Thang (late) le Pi Sui Nei Cuai tei’ fapa pali le fanu pakhat, unau nga lakah nautabik, Salai Sui Aye Thang ka si. Ka pa Darteti le ka nu Zathlir khawsuak an siih an fale kan unau zaten Falam ih suak kan si. Kan upabik  Pa Sui Lan Thang, Mizoram ah, asangtu Pa Ni Hlei Thang Tahan, Kalaymyo ah bulpak hnatuan nei in anmah le insang thawn an um. Alai Nu Biak Hnem Mawi hi Khumzing, Falam ah Hramthawk Tlawng awlzapi (sayama) tuan in a insang thawn an um ih nautabik sangtu Salai Lal Hup Thang hi Township Development Office, Falam ah Sub-Assistant Engineer a tuan. Cun nautabik kei hi Department of Biotechnology, Mandalay Technological University ah Research Officer ka tuan rero laifang a si.

CT: Tlawng kainak leh Zir suah mi.

Ayete          : Phunhrek ihsin phunriat tiang Bualrawn Tlawng, Phunkua Cambary Tlawng, Phunhra Victorious Boarding School (Saya Huat Er Boarder), Falam ihsin kum 2000 ah ka rak awng. Cun, B.S (Biotechnology), YTU ah kum 2004 ah ka ngah. M.S (Molecular Biology) hi YTU ah coursework ka kai-ih, MTU ah Thesis ka tuah, kum 2007 ah ka thehsuak thei. Acozahpi ih Special Training Course ih tlawngkai ka si ruangah tlawngpit cawlhcan nei loin ka kai sunzawm vingvo ih kum 2011, Meisen thla ah Pathian duhdawt zangfahnak ruangah Ph.D (Molecular Biology), MTU ihsin tluangten ka thehsuak thei.

CT: Kawlram ah khuitawk hmun nuam na ti bik?

Ayete          : Falam, Vankau veng

CT: Na zirnak lamtluan ih harsa na tibik mi pawl?

Ayete          : Pathian zangfah kilvennak ruangah reltlak harsatnak pipa ka nei lem lo.

CT: Na zirmi subject thu le na rak kai theidan in simfiang thei pei maw?

Ayete          : Biotechnology timi cu thilnung serthiamnak ti mai sehla, thilnung phunkim (Virus, Bacteria, Plant, Animal etc.,) hman ih thiltuahsuak (Products) hi a si bik. A huap kau zet. Kum 2001 ahkhan cozahpi in Special Training Course in ramdang bawmnak thawn, a rak phuan thawkih Matriculation Exam ih English le Maths kawm, mark 150 luan pawl apply theih a rak si. Kum 2002 tiang lawng tlawngta lakluh a rak si.

CT: Kan Kawlram education system na hmuh daan?

Ayete          : Zirhtu sayapawl in camibuai hrangah an zirh, tlawngtapawl in camibuai hrangah an zir. Exam-based System kan hmang rero lai.

CT: Ca zirhtu saya pawl na hmuh daan? Ziang mi hi remtha sehla tiah na duh?

Ayete          : Education, zirthiamnak kan timi hi Educare timi Latin tong ih ra asiih a sullam cu phawrhsuahsaknak ti a si. Asan cu tlawngtapawl in an zir mi an thiamtheinak dingah ca lawnglawng thanlut rero lo in, an thiltitheinak phawrhsuah ding a si sawn ti’n kan ti thei ding. Tlawngta pakhat ih duhhrilnak kan sunsak a tul. Zirhtu sayapawl in “ziangruangah, ziangtin?” ti felfai zetin kan simfiang thei asile tlawngtapawl in zirduhnak thinlung an nei dingih fimthiamnak timi hi zircawklo a sizia hmusuak in a man neihzia khal an theifiang vingvo thei ding. By-heart mai ding siloin a ruahdan le a hmandan thiam ding a thupi. Cun, tlawngkai fekfek lo khalin zir ding le thiam thei mi a tam tuk.
CT: Kawlram ih cazir ding subject a offer mi pawl na lungkim pi zet maw?

Ayete          : Kan ram ih a tul mi hnakin anmai duhmi an offer tamsawn in ka hmu.

CT: Subject bet duhmi na nei maw?

Ayete          : Environmental Science le Political Science an si bik ding.

CT: Ram sung ih zirsuak na sivekin direct ih na tuah thei dingmi thil pawl?

Ayete          : Tufangte ahcun, kan Department hrangah Culture Collection of Effective Microorganisms timi milai hrangih thathnemnak a nei mi hrikfa (Microorganisms) hawlsuak (Isolation)le hrilhfiah( Identification) in kan khawl rero. Cun, Biofertilizer Project kan  nei ih Thilnung Dawm tla kan suah rero. Mandalay kiangkap ah cun lei theih rero a si zo.

CT: Ram sung le ram leng education system a dang lamnak ziangtin na hmu?

Ayete          : Kan cozah a that lo rualrual in kan education system khal a tha thei hrih lo. Rel ding cu a tam zet men ding.

CT: Kawlram ih compulsory education hi phunhra tiang sisehla a tha na ti mai maw?

Ayete          : Tha tuk ding nan, Hramthawk Tlawng tiang hman a si thei hrih lo.

CT: Tu lai kan santi luan (Refugee) thlun in kan rualpi kan unau tam pi cu ram tha ram lian ah an pan vi vo lai ah nang Kawl ram sung ah um in Kawlram education ah Ph.D theh suak tiang ro ri in kai suak ding ih Motivation a lo pe tu bik hi ziang a si?

Ayete          : Hi thusutnak hi Kawl le miphun dangdang khalin in suh thei zetmi asiih, “Chinmi nan hmuhdahnak ah” ka ti theu hai.

CT: Midangpawl teh na zirmi ihsin Ph.D ngah ko zir ve dingin tha na pe duh maw?

Ayete          : Ka zirmi ti lawngin siloin, santhar leitlun fimthiamnak hmuahhmuah nasatakin kan zir cio ding le thiamtak le kanmai ta rori ih canter ding tiang zir vingvo, zir rero ding kan si, kan thih lai hlanlo.

CT: Molecular biology hi Kawlram education hrang ah ziang tluk in a thu pi ih kan Lairam ah teh ziang vek thil le ri kan neih le ziang vek in kan that hnem pi leh thei ding?

Ayete          : Kum zabi 21nak a rung thlen le veten, Information Technology le Biotechnology hi khawvel serthiamnak hmaithitu an rung si. Curuangah ramdang bawmnak dilin Kawlram cozah khalin Special Training Course awnsak in a zirh rero. Molecular Biology tizawng cun Improvement of Crop Cultivars, Conservation of Biodiversity, Medical Diagnosis, Forensic Science tvk. hrangah a thupi zet.  Asinan, atakih hmantheihnak a maldeuh lai. Hramthawk rero dinhmun a si. Chin ram rori ah Laboratory pakhat neih thei ding cu Maybe! asikonan ruahsannak tumpi ka nei ve.

CT: Miphun pakhat a thanso theinak ding hrangah fimthiamnak hi ziangtlukin a thupi? ziangruangah? Zirthiam mi hi practical in ziangtin apply kan tuah ding?

Ayete          : “Neihlo ai-in Theihlo a harsasawn” ti  asiih kan theih lawngah kan tulsam mi kan thei thei ding, kan neihmi khal a kilkhawi le a punzaiter kan thiam vivo ding. EFA- Education For All timi UNESCO Program pakhat cun hitin a rak phuangdah: Uganda ramih kumli sung Basic Education ruangah lothlotupawl ih GDP zatek pasarih (7%) a thanter;

Zimbabwe ramah Basic Education a kaitu nupinu pakhat ih fate cun a kailotu nui’ fate hnakin zatek 25 (25%) tluk an nungdam theisawn;

Bangladesh ah Lailak Tlawng a rak kaitu minupawl in tlawngkailopawl hnakin aletthum tam in ramthu relkhawmnak  ah an telban ve.

Zirthiam mi hi apply thei ding cun zingzawinak tampi’n tuah hmaisa  sehla, a tulbikdan le a thatbikdan in kan hmangsal thei leh ding.

CT: Kan Chin common language Falam Laizo tong hi ziangtin kan cakter sinsin ding?

Ayete          : Falam Laizo tong hi Chin Common Language ti cun pawmpitu kan nei cuca zik lo. Ziangruangah tile, Falam asilotu in an hman ka thei tuk lo. Kei cun, tuisun ih hruaitu upapawl an zaten lungrual zetin relkhawmnak nei tlang in cangandan (Grammar) tal hi fumfe zet in, in tuahsak thei sehla ti ka beisei zet. Cucu, mipi khalin lungrual zetin thlun hliarhlo thei sehla! Cule, IT san talah Chin unau zatei’ lungkimpi mi Common Language neih thei zuam sehla, ruahnak kan neihmi tete Chinmi zaten hlawmaw vialvo thei sehla!

CT: Chin Calai tualrawn ah ke na kar tum ve maw? Na tum ve a si le ziangvekin?

Ayete          : Chin Calai tualrawn ah ke kar thei ve ding ka cak nasa, Pathian hnen khalah hlanaw in ka zir rero.

CT: Miphun thansonak hrangah Art (Calai, Music le zuknung pawl) ih hnatuandan hi ziangtlukin a thupi tin na ruat?

Ayete          : “Calai cu hnam hnuk a si” ti’n hruaitu upapawl in an ti ka rak thei theu. Calai, awnmawi le zuknungpawl hi kan miphun ih thansonak tahfung le thlalang an si. Kawlram in mirang colony kuthnuai ihsin zalennak a hmuhsal theinak thuanthu kan zohsal asile Calai le Hla (Awnmawi) ih hmual a neihzia fiang tukin kan hmu thei ding. Kannih Chinmi hrang khalah Chin miphun zate huapin hivek calai neih si sehla a va duh um so! IT san ah tla cun hmual a neihdan amaksak tuk.

CT: Ziangruangah kan Falam khawpi a rop…ziam vivo? Ziangtin tan kan khawhsal thei ding?

Ayete          : Kan cozah a that lo ruangah a si bik ding. Cun, a thupi zetih ka hmuh mi cu “Milai umnak tlak ih kan ruah nawn lo ruangah”. Pathian ih in pekmi kan ram neihsun ti thei in, ram thu khelnak lam in siseh, leitlun fimthiamnak lam in siseh a kilkip in kan tuankhawm thei vivo asile Ram nei miphun kan si kumkhua ding.

CT: Life (Nunnak) ah ziang mi si thupibik na ti mi?

Ayete          : Nun man nei.

CT: Nunhlimnak hi ziang a si tin na ruat?

Ayete          : Pathian rinsan ih tumtah hlensuah le lungkimnak neih ringring.

CT: Mihlawhtling na ti mi teh zovek hi an si?

Ayete          : Hlawhtlinlonak (sunnak) tamzet hi hlawhtlinnak karbak ah canter thiamtu.

CT: Minung kan nun san hi ziang a si tin na zum?

Ayete          : Kan suakthlak ihsin ka thinhlan sungah thiltha tuah hi a si bik lo ding maw.

CT: Falam hi Christian lawnglawng kan si ih kan Christian dan hi ram dang Christianpawl thawn a bangaw maw? A bangaw lo a si le ziangtin a bangawlo?

Ayete          : Ka theiban lo riai.

CT: Kan Laimipawl ram dang an thleng celcel hi thansonak maw tumsuknak tin na ruat? Ziangruangah?

Ayete          : Thansonak tuk male! Kan ram ah hnatuan nei loin to sialsial men sehla mi kan va bang theidah lo ding. Leitlun fimthiamnak thatha tampi nan zir thei. Lehlam ah, kan ram hrangih kan tuansal lole miphun thangso, ram thangso lo kan si leh ding. Kan ram hrangah ti’n hmuntin ramtin ah tan nan lakkhawm rero asi lo sawm.

CT: Brain drain dinhmun ihsin brain gain a sisal theinak dingah ziangtin ti a theih ding?

Ayete          : Zirthiamsangpawl in anmai suahkehnak ram suahsan in hlawhman thadeuhnak hmun, ram dangih  hna an va tuan khi Brain drain ti asiih Brain gain sisal thei ding cun uktu cozah a that hmaisat a tulbik ding. Mai ram, mai miphun, mai nunphung duhdawtnak thinlung hi a thupi zet ding fawn ti’n ka ruat.

CT: Kan ram a thanso theinak dingah a thupibik mi karbak ti ih na ruah mi hi ziang a si? Ziangruangah?

Ayete          : Kan lungput. “If there is a will, there is a way” ti a sisi.

CT: Falam khua ihsin e-commerce tuah thei ding hi thil cang thei mi a si tin na hmu maw? Ziangruangah?

Ayete          : Cang thei tuk ee! Tuisun ih kan Art Thilri ( Calai, Anwmawi, Zuknung, Zuksuai) kan neih mi tal hi e-commerce thawn kan dawraw thei leh lo ding sawm?

CT: Chin ram hi industrial zone ah cangter bang sehla a thatnak le thatlonak hi ziangvek a si ding?

Ayete          : Keimah te hmuhnak men cun Bible Tlawng thatha kan nei zoih, leitlun fimthiamnak zir thei dingin Private College tivek tla din thei sawn sehla. Human Resource Industry si hmaisa sawn sehla.

CT: Chinram hi resort place ah cangter bang sehla teh a thatnak le thatlonak hi ziangvek a si ding?

Ayete          : “Lairam ah khual thar an tlung lai” ti’n Sayaci Thang Thai in Muko Mekazin sungah a ngan mi ka rak siardah. Victoria tlang, Rihli le Lailun tvk. pawl khi ceimawi le tuahthat dingin ruahnak kau zet nei in Chinmi zaten in sawmngiar rero.  Khawvel san relnak thawn kan tahkhin asile kan Chinram hi cicinthlaithlak san ah a tang lai. Pianphung Kiangkap-Boruak (Natural Environment) hi siatsuah a si tuk hrih lo kan ti thei ding. Environmental Friendly le Sustainable Development in a kilkip ah kan thansoh vingvo thei le Naturalist le Ecologist pawl ih sunsak tlak ram pakhat a si leh ding.

CT: Falammipawl in thlengaw hai sehla ti ih na duhsak mi lungput le ziaza hi ziang a si pei?

Ayete          : Mai thu thaw mai voih thaw timai loin, Pa Pathian thei in kan ram hrangah cangai khawrh vialvo sehla.

CT: Ram dang ih a um mi Laimipawl hnenah ziang mi na sim, na cah duh?

Ayete          : Thucah ti cu siloin, kan neihsun ram cu Chin ram a si, cui kan ram cu “The poorest and the most isolated states in Myanmar” ti’n WFP ih hminsin mi asiih, cui kan ram neihsunte cu uktu miphundangpawl in an duhduh in an namnuai, an nekrawk rero a si ti hi hngilhsiang lo sehla.

CT: Lairam in a tlaksam (ziangkim ah) ti ih na hmuh mipawl hi ziangvekpawl an si?

Ayete          : Human Development Index hi tahfung ah hmangin hun rel ve mai sehla, Chinram ahcun Pathian thu tilodang cu kan tlaksam mi hlirte an si hrih in ka hmu.

CT: Na thu in thil hmuahhmuah cang thluh thei bang sehla Lairam hrangah ziang mi hi ziangvekin na thleng danglam duh?

Ayete          : Ehei, Tuksum in! “Na thu in thil hmuahhmuah cang thluh thei sehla” ti rori! Hi thusuhnak thawn za ah za zalennak in pek ruangah ka lungawi. Cuticeng cun, Chin ram khi United States of Chin ah ka tuah kei, President tla na ra tuan mai lo kem?

CT: Ram dang ah ‘living together’ in an um mi hi ziangtin na ruat? Kan cin ve dingah na duhsak maw?

Ayete          : Kan Chin nunphung thawn a milaw lomi cu a hrialdan thiam sehla  kan nunphung thawn milaw in sanman sawn sehla teh?

CT: Na thuken (motto) ziang a si?

Ayete          : Pathian tihzah cu fimnak ih hramthawknak a si.

CT: Bible caang na duhbik mi?

Ayete          : Vancung ih na duhnak a kim bangin leitlun khalah kim ve seh.

CT: Sim bet duh mi na neih le..

Ayete          : Nei dang lo…ka lungawi ti lo bak cu!

CT: A lo contact duhtu hrangah?

salaiayehtanayete@gmail.com

facebook.com/salaiayehtan

%d bloggers like this: