Hlawhtlinnak

Thuhmaihruai:

Hlawtlinnak timi cu thil kan tuah, kan tuannak ih a rahsuakmi thil duh-umzet a si. Phun dangdang in kan thlir asile: Ralkap pakhat in a  raal  pawl a va neh hi a hrang ahcun hlawhtlinnak a si vekin Tlawngta pakhat hrang khalah a zirmi ca a thiam ih camipuai ong in a thiammi pawl thate’n a hmansuah theih hi hlawhtlinnak a si. Curuangah hlawhtlinnak kan ngah theinak dingah tuan ding tampi kan nei:

Caan Hmangtha:

Mirang thufim in: “Tikcu hi paisa a si” a ti. Khrihthian, Milem bia, Mi farah, Milian ti um loin kan ngahmi zingkim hi Pathian ih thluasuah a si. Mi thenkhat cun an caantha cu felfaite’n anmai’ hrang le midang hrangah sunglawizet in an hmang. Paul khal cun a caantha hi felfaite’n hmang dingah in forh a si (Efe 5:15-16).

Hnatuan taimaknak:

In sersiamtu kan Pathian hi hnatuan ringring Pathian, mi taima Pathian a si. Bawi Jesuh kan zoh asile a hnatuan a thok hlanah a Pa ih hnatuan siseh, an innsang hrangah hna tampi a tuan.Curuangah kan Bawipa Jesuh in “Ka hnen ihsin zir uh” in ti(Mtt11;30). Napolean tla cun hnatuantu pawl hi a upatzet. Lamzin ih a hmuh khal len an hnatuan ti buai lo dingin a hel theu. President Reagan khal President a tuan lai zung a tum hnu ah a nupi thawn hmuan ah hna an tuan ringring. Ziangvek hnatuan khal hi tihzah upatnak thawn taimak suah in kan tuan a tul.

Casiar:

Tulai ih kan rampi acozah khal in a buaipimi cu: Ca tampi siar ding, hmuntin ah Library neih thei ding hi a fehpimi a si. Kan Bawipa Jesuh khal cu Sinagogue le temple tivek ah ca a siar ti kan hmu thei. Minung ih kan tonmi pawl cu can tawite sung lawng an si. Mifim pawl in “Cabu pawl cu mifim mithian pawl ih thluak retnak robawm a si” an ti. Pathian ih in pekmi Bibal siseh, leilung mifim pawl ih thluak retnak robawm cabu tampi kan siar hi a thupizet. Mahatma Ghandi cun, “Cabu hi ka rual thabik a si” a ti. Japan ram a thanso- tertu khal hi casiarnak a si.

Tumtahnak:

Tumtahnak tha hnget neih hi hlawtlinnak ih hrampi pakhat a si. Leitlun lam ih hminthang tumruh (tumruh = tumtahnak hngetkhoh nei) pawl malte kan zoh hnik pei: Christophar Columbus hi Italy mi a si. A san lai ahcun Engine nei Long  a um lo na’n a tumtahmi cu leilungtlun heel-suak ding hi a si. Harsatnak a phunphun pahsuak in a feh vivo ih  saruh hnak ih ruh sawn tumtahnak neitu Columbus cun Jamaica,Trinidad le south America pawl a va hmu suakmi hi tuni tiang ih hmin saalmi a si. Abaraham Lyncoln khal hi mi tumruhzet a si. A  khualtlawnnak ih a hmuh Sal pawl ih ruang Bawipa hnenah hiti’n thla a cam. “Maw ka Pathian, hi tluk in hrem a tuarmi minung pawl hrangah hnatuannak theihtawk in ka tuan ding” ti’n Pathian hnenah a au. Nepolean cun “Kan hlawhsamnak cu kan tumruh tawk lo ruangah a si” a ti. Tumtahnak cu kan nun in khaisangtu a si.

Rin-umnak le Thianhlimnak:

Kan Bible sungah rin-umnak le thianhlimnak ruangah hlawhtlinnak ngahtu tampi an um.Josep ih nunnak kan zoh asile  mi rin-umzet le mi thianghlimzet a si.Amah le a Pathian hnenah siseh, a bawipai’ mi rinu m  le thianghlimnak neitu a si vekin hlawhtlinnak a ngahnak khal a si.Daniel le a rualpi pawl khal Pathian hnenah rinumzet le thianghlimzet in an um r uanhah  an u mnak Babylon ramsung tiangin an biakmi an Pathiancu biak a si.Kawhhran santhianthu ih kan hmuh ringring mi  Augustine cu Pathian hna rin-um le thianhlim zet ih a tuannak ruangah tuihni tiang a hmin a thannak a si. Kan biak kan Pathian hmai ah siseh rualpi hnatuanpi pawl hnenah siseh rinumzet le nunthianghlim-nak thawn kan um ding a thupi a si.

Pathian tihzahnak:

Kan Bible in lei leh van le a sungih ummi thil cu Pathian sersiammi a si ti’n fiangzet in  in sim.Kannih cu sersiammi kan siih in neitu le sersiamtu cu kan nunnak ah tihzah upatnak thawn kan leitlun nunnak hman ding hi a poimawh zet.Kan Bible in Bawipa cu a Pathian ih a neitu miphun cu mi thluasuah phun an si a ti. America acozah cun sersiamtu Pathian an tihzah ih an ziangkim an rinsan tik cu an law(daan)ah siseh,an peisa khal ah kan hmu thei. Kan ram kan miphun in hlawhtlinnak kan ngah theihnak hi Pathian tihzahnak lawng in a si.

Thunetnak:

Atlun ih thupi sirhsanmi kan thluak ih thuruah daan, Caan hmanthat, Hnatuan taimak-nak, Casiar, Rin-umnak, Thianhlimnak le Pathian tihzahnak thu pawl hi san hmaisa a liamzomi caan ihsin tulai san tiang khal ih ram le miphun hrangih duhdawtnak thawn an cah awmi an si.Kan miphun, kan ram a thanso sinsin theihnak dingah a tlun ih thuhla pawl hi thinlung sungah ret in a tak in zuam tlang uh si.

By Aa Ram (Hmun tha)Hram: Vankau Arsi (Vol.10, No.1, Dec.2007)

(Visited 63 times, 1 visits today)

Comments

comments

Comments

%d bloggers like this: