Himte Ih Ret

October 17

Nipi Ni

Himte Ih Ret

Siar:

Rom 8:35-39

Ka duhdawtnak sungah um ringring uh.    – John 15:9

Kumkhat Sung Baibal:

–   Isaiah 50-52

–   1 Thess. 5

Super Market ah pawpawleng a senmi pakhat cu ka thinlung sungih suak vekin ka lei. A lenglam ah “Ka Lo Duh” timi cangan a um. Ka mawttaw sungih thilri pawl ka sanlai ah ka kut ih ttemmi hridai ka thlah ngah pangih cuih pawpawleng sente cu a zam suak. Ka hun zoh ih tlunvan ah a kaiso vingvo. A rei hlanah hmuh ban nawn lo ah a hlo cih ta.

A caancaan ah kan nunnak sungah kan duhdawt awknak hi a cem ih a hlo saal ttheumi thu cuih thilcangmi in i ruatter. Fa le pawl thusim ngai loin an tlan hlo, kan duhdawtmi nupi-pasal in in hnong, sungkhat unau pawl in in taansan.

Hih leitlun duhdawtnak cu fek lozet ttheu hmanseh Pathian ih in duhdawtnak cu kumkhua a hmun ringring. Jesuh in rintlak a simi Amai’ duhdawtnak sungih um ringring dingin in sawmmi hi kan rin thei a si (Johan 15:9). A hnenah nunnuam hnangamzet in him teih um ding in duhsak a si.

Paul in, “Amai’ duhdawtnak ihsin zianghman in in tthen suak thei lo ding ti hi fiang tein ka zum a si: thihnak in siseh, nunnak in siseh, vancung ih a ummi vanmi le uktu le huham neitu pawl in siseh, atu san siseh, hlanlai san siseh,..” in  tthen thei lo ding a ti (Rom 8:38). Khrih Jesuh cu Rundamtu ih kan pom ngah hnu cun Pathian ih duhdawtnak cu kumkhua kan taa a si.

Na nunnak ah duhdawtnak a hlo dah maw? Pathian ih duhdawtnak sungah um ringring aw. Amah ih kilvennak sungah thinlung hnangam te le himdam tein na um thei ringring ding.   – Jennifer Benson Schuldt

Khuitawk hmanah himnak a um lo,

Runtu duhdawtnak hlei in;

A saang van Arsi tlunah siseh,

Vate buu lak khal ah.  – Berg

Kan rundamnak cu a fekzet,

ziangahtile Pathian Ttongkam cu a dik a si.

(Visited 23 times, 1 visits today)

Comments

comments

Comments

%d bloggers like this: