Himnak Hmun

May 8

Zarhte Ni

Himnak Hmun

Siar:

Ruth 2:1-12

“Hiti ih na tuah ruang ahhin Bawipa in lo rul hramseh. A thla hnuai ih humhimnak na hawlmi Bawipa, Israel ih Pathian in a laksawng cu famkimzet in lo pe hram seh,” tiah a ti.    -Ruth 2:12

Kumkhat Sung Baibal:

–   2Siangpahrang 4-6

–   Luka 24:36-53

Taluk ram, Nanjing ih ttihnungza raaldonak a ra thlenlai ah nunau tampi khal zaangfahnak um loin hmuhsuam le thah an tuar. Cutluk ttihnungza thilcang rero laifangah Minnie Vautrin timi nu cu raaltthazet in Taluk nunau pawl tuahmawh an tuarnak ihsin humhualnak hna a ttuan. Amah cu Nanjing ih Ginling College ah cazirhtu missionary a si. Taluk pawl, missionary pawl, minaa raitu siibawi pawl, sumtuahtu pawl thawn kutkai aw in an ttuan tlang ih Ginling College cu nunau thawng tampi ih relhnak le humhimnak hmun ah an canter.

Ruth le a pasal ih nu Naomi khal humhimnak an ttulzia thu Bible ah kan hmu. Nuhmei an si vekin an pumcawmnak ah mi ih Lorawl faang aatnak ih an hlahmi faangvui an khawm a ttul. Anmai’ Judah daan vekin Ruth cun an sungkhat unau pawl sung ihsin amah tlen theitu ding a hawl. Faate hringin an hrinhnam thuanthu pehzom theinak dingah a thi ciami a pasal ih sungkhat unau naihbik sung ihsin amah kha nupi ih a tthittu ding a hawl.

Boaz cu Ruth ih pasal a thi zomi ih phunpi sungkhat unau a si. Ruth in a ninu Noami zohkhen dingin a thaap awknak le Bawipa Pathian sungih humhimnak a hawlmi (Ruth 2:12) in Boaz ih thinlung a khoih ngah. Cuti’n a nupi si dingah Ruth cu an daan vekin a tlen ih a ninu Noami thawn tthazet in a cawm hngai.

Pathian cu kan beunak a si (Saam 46:1) ih kannih tla Pathian in midang pawl himnak hmun pakhatkhat tuahsak theitu dingah hman in duh.   – Dennis Fisher

Ruat ttha aw:

Ziang ti zawn in midang ih ttulnak na bawm thei?

Mibur hrangih hnattuannak pawl,

Asilole kawhhran pakhat ih ttulmi,

Bawm thei ding daan hawl awla ttuan bawm aw.

Duhdawtnak a langtertu pawl cu duhdawtu taktak an si.

Shakespeare

(Visited 41 times, 1 visits today)

Comments

comments

Comments

%d bloggers like this: