Hillary Clinton West Bank Ah Thlengzo

March 4th, 2009.

Hillary Clinton West Bank Ah Thlengzo

US  Secretary Of State Hillary Clinton cu Palestinian Authority hotu pawl tawngding in  West Bank a thlengzo ih. Mizansun ah khan Jerusalem khawpi ah Israel ram hotu pawl a tawngzo. Hillary Clinton hin Palestinian Authority President Mahmoud Abbas a tawn hlanah
Prime Minister, Salam Fayyada a tawng hmaisading. Palestinian hruaitu pahnih hin Hillary Clinton hnenah hin  Israel in Gaza fehnak lamzinpi a phihsak ringring mi awng sal dingin leh
Israel in hmunram kau sinsin luahtumih Inn  a sak tum vivo micu titawp dingih Israel nawr dingah Clinton hi an rakdil zum asi.
Hillary Clinton hin mizansun ih Israel hotu pawl a kawm nakah America Cozah cun Palestinian ram hrantei umter cu tha a tithu sim in Israel hrang khalah a thilttha sawn a si ding ticu US Cozah ngaidan asi tiah Israel ram hotu pawl hnen ah asimzo. Hillary Clinton hin Palestinian Authority hotu pawlhnen khalah America cun Palestinian cu State dangtei tuah cu a duh bikmi  asi tiah asim dingah zum asi. Gaza hi Hamas pawlih Uk mi asiih. Palestinian Authority Hotu Mahmoud ih hruaimi Fatah, pawl thawcun an hua aw zet ih  Fatah, Pawlhi West Bank ih um an si, Hamas pawlcun Hillary Clinton ih khualtlawn leh thusim mi pawlcu zianghman ah an neih lemlo.

British PM  White House Ah Thusim Ding

British Prime Minister Gordon Brown cu US President Barack Obama leh mi pawimawh dang tawngding in Washington a thlengzo ih. US rorel nak Inn White House ih Congress Inn hnih Menber pawl hmaiah thusimnak a neiding. Gordon Brown hi US White House ih British PM thurel tu 5 nak asi ding, Tui hlanah Winston Churchill, Clement Attlee, Margaret Thatcher, leh Tony Blair pawlin an raksimzo. Gordon Brown hin US President Obama hi a kawmcih ih Obama cun UK leh US rualpi that awknak leh laicin awknak cu a hnget vivo dingtiah a sim.

India In Missile Kap Suak

India cun a mai tuahmi BrahMos Cruise Missile cu March 4th, 10:30 AM ah  Rajasthan nelrawn  Pokhran ihsin a kapsuakih. Hi Missile tharhin Km 290 ih hla a kapban asi. Defence Research and development Organisation (DRDO) cun hi Missile hin a tumtah nak hmun a kap ngah asi tiah an sim. Hi Missile hi Russia mithiam pawl thawi an tuahtlang mi asiih.Hi  BrahMos Cruise Missile hin minit hnih leh a hrek sungah a tumtah nak hmun cu thazetin a kap ngah asi.
Hi Missile an kah sin nakah hin Deputy Army Chief, Lt General
M S Dadwal leh mi pawimawh dangdang an tel. Tui kum January 20 ah khan himi vek Missile hi anrak kapsuak zonan a tummi hmun a kap ngah theilo ih tu ah cun an tuah thatsal ruangah a tummi thaten a kap ngahthei sal asi. BrahMos timi hmin hi India ramih tiva tumpi  Brahmaputra hmin leh Russia khawpi Moscow hmin la tlangin an tuah mi asi. Hi Missile hi a puak awn hnakin a Cerek a zuangcakih hnakum ah cun India ralkap pawlhin 240 neih man an tum asi.

Sri Lanka Cricket Team Kaptu Ah Pakistan In- India Puh

Mizansun ih Pakistan ram Lahore khawpi ih  Sri Lanka Cricket Team pawl zoti theihlo misual in an kahnak thu ah. Pakistan Interior Ministry hotupa Rehman Malik cun  Hi buainak tuahtu misual pawlcu  Pakistan ram inn hnen pawlin Pakistan ram timualpho leh buaiter an duh ruangah ram Inn hnen pawlih thil tawlrel thupmi asi lo ding tiah zohman in kanti theilo asi a timi cu. India Cozah cun India ram ti hminsiat tumah Pakistan cu a puh.
Home Minister P, Chidambaram, cun  Pakistan cu a mairam sungih Tapung misual pawl vulh khawmih thilsual titu ih a hman ttheu ruangah a mai thilti sualmi khuhmawi nakdingah  thuphan thu zumtlaklo phuahcawpih India ram timualpho a tumnak thu asi ati.
Home Minister cun Pakistan cu nikhat hnu nikhat a mai thilti diklo rah a sengrero ih  Thuphan thu phenah relh tum rero khal sehla  a relh nakding thuphan thu in a daih cawk nawnlo asi a ti.
Pathian cu Kancah nak a si.
(Visited 49 times, 1 visits today)

Comments

comments

Comments

%d bloggers like this: