Hillary Clinton Nemhnget

January 23,2009.
by – Khuang Lian Sum
 
Hillary Clinton Nemhnget
 
US rorel nak sang Senate cun  President hlun Bill Clinton ih nupi,  New York,
Senator, Hillary  Rodham Clinton cu  US Secretary of State ah an nem hngetzo. Senate vote laknak ahhin Hillary Clinton duhtu Vote 94 a tla ih duhlo lam ah Vote 2 a tla. President
 hril awknak ih Obama rakcuhtu Senator John McCain khalin Hillary Clinton duhnak lamah Vote a peve. Hillary Clinton hi US Secretary of State 67 nak asi dingih. Condoleezza Rice ih ai a awhding.
 
Hillary Clinton hi Sanate in a nemhngeh hnu ah rin umnak thutiam lakter asiih a pasal Bill Clinton in Bible thianghlim a kensak ih Bible parih a kut nam phahin thutiam nakhi a la asi.
Secretary of State ih lakluh asi ruangah  Senator asi nak ihsin  bannak cakhal a thehlut cih ih  Senate President Vice President Joe Biden leh New York  Governor David Paterson ih hnenah bannak hi a thehlut.
 
Obama In Kum Khat Sungah Camp Khar Tum
 
US President Obama cun a tiamkam awk cia vekin leitlun ram tinkim in an sawisel zetmi leh US ram hmel tibal tu. Guantanamo Bay Detention Camp, Thawng In cu kumkhat sungih khar thei dingih thupek a suah tumthu a sim. relzo vekin hi ThawngIn rapthlak zet US cozah in misual ropi ih a zummi pawl retkhawm nakih a hmanmi hi leitlun ram tinkim in an sawisel zetih. Thawngtla pawlhi an mahle ram ciar ih kuatsal theiding an si nawnlo ruangah US cun hi thawngtla pawl rakla ih rak mikhual dingin ramtampi hnen ah a dil rero zoih asinan Australia tlacun US dilnak hi vawihnih lai a rak el rero zo. Himi Thawng In sungah thawngtla hi minung 250 lai an umih 9/11 thubuai nei minung 5 lai an tel,
 
Obama cun Middle East ram pawlih rualrem nakleh daih nak a um thei nakding khal a ngai pawimawh bikmi lakih a telthu sim’n Egypt President, Hosni Mubarak,  Israel Prime Minister, Ehud Olmert, Jordan, Lal, King Abdullah II leh Palestinian President Mohmoud Abbas pawlkhal a be cihhai.
 
Barack Hussein Obama hi kum 1961 August 4 ah  Hawaii ah a suakih . A pacu Kenya rammi Midum asi ih. A nucu US mirang, Ann Dunham asi. Kum 2 asi laiah a nu le pa hi an tthen aw ih. Kum 6 asi ah a nu in pasal dang a neihsan ih. Malaysia lamah leh hmun dangdang ah rak umrero zomi asiih. Kuli hlawhphah ih Tlawngkai in nu le pa tello ih Pi le Pu hnen ihsin thanglian mi a si. 1983 kumah Colombia University ihsin BA a awngih 1992 kum ah khan Harvard Law School ih a zirpi nu midum, Michelle Robinson thawn an nei aw ih fanu pahnih Malia kum 10 leh Sasha kum 7 mi nei’n, Tu ah cun leitlun ih ram ropi America  President a rung si ban ta…
 
Bush In NuamTi
 
US President hlun George Walker Bush cu an khua Texas ah a mah ngainatu leh sungkhat rualpi ttha ziangmaw zatin an rak hmuakih. Bush cun kum 8 hnuih an umnak tile khua an In le lo ih a kirsal cu nuam atithu sim’n a mah rakhmuaktu pawlhnen ah lungawi thu a sim. Texas ah cun thinlung zangkhai zet leh thin hahdam zetih a kirsal thu simbetin. An mai In rori ih zinglam thlifim hip ih taksa harhdam nak tuahih  Thuthangca siar leh Coffee in a caakzet thu leh,     President Obama cu mithazet asi thuleh  President tluangtei a tuansuak thei nakdingih a duhsak thukhal a simbet. Bush tei sunghi Crawford kiangih an hmuanram Ranch, Acre 1,600 ih kau ah an umding.
(Visited 52 times, 1 visits today)

Comments

comments

Comments

%d bloggers like this: