Hillary Clinton Le SFRC

January 14, 2009.
Hillary Clinton Leh SFRC
US President hlun,  Bill Clinton ih nupi Hillary Clinton cu Barack Obama ih Cozah tharah  hna thupi pawimawh zet. Secretary of State dingih lakluh a si ruangah dan diktak vekin  Senate Foreign Relations Committee (SFRC) pawl hmaiah a langaw terih. Hi pawlin Foreign Policy tamzet an sut. Hillary Clinton hi kumli sung  US foreign policy dinhmun leh ruang ampi ziang tinkim tawlrel tubik a si dingih. US Secretary of State hi  Foreign Minister vek ciahkhi an si.
US rampi cawimawi thiamtu leh khaisang theitu,  US leh ramdang pehtlaih awknak ttha rualrem nak suakter theitu,  Ramdang hotu Upa ih ttihzah tlakmi leh ramdang hruaitu Upa theihthiam rualpi ttha neithei mi a ttul ruangah mifim leh rinsan mi miropi an hril ttheunak asi.Hillary Clinton hin Condoleezza Rice  ih ai a awh ding.
Hillary Clinton thusut tu Senator member 21 Senate Foreign Relations Committee  hi kum 2004 President hril awk ttumih George Bush neh lotu, Democratic Party  President Candidate John Kerry  in a hoha.  Senate Foreign Relation Committee  Chairman ttuan laitu hi  Vice President thar, Joe Biden a si ih.  John Kerry hin a thlengding . Joe Biden hi Senate ah a zawnzawn in vawi 7 hriltlin a siih.  Obama khalhi Senate Foreign Relations Committee ah member thotho a si ih President ih hriltlin asi hnu ah a bansan.
US Senate Foreign Relations Committee pawlhin Hillary Clinton hi  US Secretary of State hna ttuan dingah an pawmleh pawmlo ding kanhmai tlawngkai ni nga ah khin vote lak asi dingih  Senator John Kerry cun  harsat nak umlo ih pawm hnget thei a zumthu a  sim.
Hillary Clinton cun US Cozah tharah cun buainak a ummi ah ralkap cah nak leh biakrem awknak cu a rualran tei hman thiam a ttulthu a sim. US ram leh Cuba ram kum 50 sung peh tlaih awknak thalo khal remthatsal a tumthu sim’n  America lawngin buainak leh harsat nak hi a tireh theilo ih Cu vek thotho in leitlun ramdang khalin America tello in buainak an remter thei lomi tamzet a umve a ti. leilung tlunih America pawimawh nak humhim dingah ralkap cahnak lawng hman a theihlo vekin  ttongkam lawngih relfel theilo mi tamzet a umve a ti.
Israel leh Hamas
Israel leh Hamas pawl do awknak cu ni 19 a kim thlangih himi sungah Palestinian Minung 1,000 lenglo an thiih minung 4,500 lenglo in hriamhma an pu tiah Gaza sizung hna ttuan pawlcun an sim. Israel leh Hamas pawl do awknak ruangah Palestinian minung 90,000 lenglo cu himnak hawlin an tlansuakzo. Israel Special force pawlcu Gaza khawpi sung thukzet an lutzo ih.  Hamas ralkap pawlthawn an pawncilh aw rerozo tiah thudawn asi. Israel raldo nak vanzam cun Gaza khawpi hi Bomb a thlak rero laiih.  UN hnuaiih nauhak lam ngaihventu  UN  Committee On The Rights Of The Child an timi pawlcun  Israel cu nauhak leh nunau thah mai hrehlo ah a puh.  UN danbu sungih ummi dan pakhatah Do awknak ah hin nauhak umnak cu dimdawih ding timi a umih cumi dancu Israel khalin a lungkim ih a hmin a ngan mi asi.
Palestinian  sii zung Duty pawlcun mizan sun lawng hmanah minung 40 lenglo an thibet tiah an simih, Himi hmanah Israel pawlin nasa zetih an kah nak hmundang boruak an thei ban hrihlo lai tiah an sim. Himi cingin Hamas pawlkhalin Israel ram thlanglam cu Rocket in an kap rero ve ih. Israel ralkap pawlin an simnak ah mizan sun lawng hman ah Hamas pawlin Rocket 25 in Israel hi an kap tiah an sim . Israel khalin mizanzing ihsin vanzam in Gaza hi bomb vawi 50 lenglo an thlakve.
Himi laiah rualremnak tuahtum in ramdang hotu pawlcu an buai rero.  UN Secretary General Ban Ki-Moon cun West Asia a panzo. Egypt President Hosni Mibarak khalin mizan sunah Saudi Arabia lutin, King Abdullah thu a relpi, Hamas pawlin Ceasefire tuah an duhthei nak dingah Egypt cun saudi Arabia tanpi nak an beisei ih zum a si.   Hamas thu puangtu, Sami Abu Zuhri cun hi do awknak a reh thei nak dingah  Israel in an ralthuam an ret thluh hmaisak a ttulih Israel ralkap pawlcu an hnuhkir sal awk thluh a ttul ati,  Cun Gaza pannak lamzin pikhal an awn sal a ttul tiah a sim.
Cumi laiah Israel Foreign Ministry cun, Hamas pawlcu thu relpi tlak leh thutiamkan nak neihpi tlak an silo an tive. Israel Defenca Minister Ehud Barak cun Hamas pawlin Israel Rocket hmangih an kah ringring mileh Ramdang ihsi ralthuam an lakluh mi an bansan lo ah cun ceasefire tuah theih asilo tiah a sim.
Pakistan leh India
Pakistan Prime Minister, Yousuf Raza Gilani cun Mumbai buainak thuhla ih India in Pakistan hnenih thil umdan a simmi cu thil felfai simfiang nak silo in. Thuhla theihter awknak menmen a si a ti. himi thuhi an ram National Assembly ah a simih. Prime Minister hmaisa Nawaz Sharif cun India in theihter nakthu Pakistan a kuatmihi  rak ngaipawimawh ih rakruat ttha dingin a rak tiamzo ih.Thilsual titu misual pawlcu dan diktak vekih hrem dingin a rak tiamzo.
Asinan PM Yousuf Raza Gilani cun India hnenih si an thudawn mihi thu ngaithlak ih ruahpi dingmi thupawimawh ziang hman Pakistan in India hnen ihsin a dawnglo a ti.  Himi laiah British Foreign Secretary, David Miliband cun  India External Affairs Minister,  Pranab Mukherjee thawi thuthang latu pawl an kawmnak ah  David Miliband cun Mumbai siimtu  misual Lashkar-e- Toiba pawlcu Pakistan ram sungih um hmunkhuar an si ruangah Pakistan Cozah in a hawlsuakin a kai tengteng ding asi ticu British Cozah ngaihdan asi a ti.  Lashkar-e-Taiba pawlcu Pakistan in an hrampi ihsin cimit ko tuah dingah British cun Pakistan cu a ngen asi a ti. External Afairs Minister Panab Mukherjee cun Mumbai siimtu misual pawlcu kaiih hrem dingah leitlun ramtin kimin Pakistan nawr dingin a sawm.
CIA Pawl Hnen Ah  US President Bush Thin Heng
Mazan sunih CNN ih Larry King in President Bush a kawmnak ah Bush cun Iraq a do sannak bikcu CIA pawlin Iraq in Minung tamzet thih theinak ralthuam ttihnung a nei ti ih thudiklo an sim ruangah an thin a heng tiah a sim.  Larry King cun himi ruangah CIA pawl ih hnenah nathin a hengmaw? tiah a sutih Bush cun a lung  awilo thu a sim.
Iraq in minung tamzet thihthei nak ralthuam ttihnung a nei tiah CIA pawlin Bush an simih asinan . himi ralthuam ttihnung hi tutinag khuitawk hmun hman ah hmuhding a umlo ruangah CIA pawlin Bush hi thudiklo an sim ticu a fiang tiah an sim.
Khuang Lian Sum.

Comments

comments

Comments

%d bloggers like this: