Hillary Clinton India A Tlawng Ding

Hillary Clinton India A Tlawng Ding

US Secretary of State, Hillary Clinton cu India ramih ni 5 sung caam dingin  thaizan tlawngkai ni 5 zanah Mumbai khawpi a thlengding. Hillary Clinton India ram a tlawn ruangah India leh US ram pahnih cu rualpi that awknak leh peh tlaih awknak tha an neih sinsin zum a siih.Hillary Clinton hin Mumbai khawpi ih zanhnih a caam sungih a thlennak dingah, nikum November ni 26 ih misual pawlin an siim ih minung tampi an thahnak hmun Taj Hotel cu a hril.  Hillary Clinton in a thlennak dingih Taj Hotel a hril naksan hi, himi  hmunih misual pawlin minung tampi an thah ruangih India ram mipi leh Cozah an thin a nattuk nak a tuarpi nak asi ding tiah zum a si.

Hillary Clinton hin tui ttum India a tlawn nakah hin Pakistan cu a palphah loding tiah  State Deparment thupuangtu, Ian Kelly cun a simih, hi State Deparment thupuangtu Ian Kelly khalin  Clinton hi a thlun veding. Hillary Clinton hin thaizan ih Mumbai khawpi a thlen hnu, Tipzing zarte zingah misual pawlin Mumbai khawpi an siim ih mi tampi an thah mipawl hngilhlo nakih khawm awknak a hmanpi dingih,khami ttumih mi tamzet an thah nakhmun ih hnatuantu pawl khal a kawm cihding.

Himi hnu ah  TATA Group hotu leh  Taj Hotel neitu Ratan Tata ih tawlrel nakin sundawng milian pawl thawn an kawmaw ding, Cumi hnu simlam kamah  Xavier Collegea khawm awknak ah  Film Star Aamir Khan thawn an titi tlangdingih  a thaizing colhni zingah New Delhi a pan dingih  Prime Minister, Manmohan Singh, leh Foreign Minister leh Cozah mi pawimawh pawlthawn thu pawimawh an rel tlangsal ding.

Sumpai Dinhmunah China Tthang So

Europe leh ram dangdang pawlin sumpai dinhmun ih  tlaksiat nak an ton lai rero ah China cun an ram sumpai dinhmun cu  April thla ihsin June thla karlakah 7.9% in a tthangso tiah a simih thla 3 sungah 6.1% ih tthangso tlukih ttuat a si , Tui kumcem zawngah cun 8% hrawngih an ram sumpai dinhmun a thatso an beisei thu an sim.

Asi nan an ram sumpai dinhmun tthangso in zia umlam pan hman sehla  ei leh in  hawlnak lamah hna tampi tuanding an neih laithu an simih , Hiti vekih anram sunpai dinhmun a that naksan hi an ram Cozah in an ram sumpai dinhmun tlasia  kilhim nakdingih nikum November thlaih  dollar Billion 585 a hman ruangah a si tiah BBC cun a sim.

Himi laiah  National Bureau of Statistics thupuangtu, Li Xiao Chao cun  tui an sumpai thanso nakcu lungawi nak a tlak hrihlo ih  an ram mipi thawi tah thimin  hnatuan ding tampi  hmabak an neih laithu a simih tui an dinhmun cu dinhmun hngetkhoh a si hrihlo a ti. Himi laiah US ram sumpai dinhmunkhal 1.5% hrawngih thangso ve ih ruah a si.

Egypt Ram NAM Summit

Leitlun ran theihdan awknak umlo rampawl tonkhawm awknak NAM Summit nihnih sung tuah rero laimi cu tuisunah antheh thlangding. Hi NAM summit ah hin leitlun ram 118 an telih  himi ih an thurel mi pawimawh pawlcu  leitlun sumpai dinhmun tlasia leh  misual ruangih leitlun ram kilhim tlang danding pawl hi an relmi thu tampi lakih thupawimawh langsar pawl an si.

NAM Summit Chairman thar Egypt President, Hosni Mubarak cun  leitlun ram dangdangin ralthuam hriamman neihthat nakding lamih tlan an zuamawk rero cu tha a tilo thu a sim. NAM Summit hi UN General Assembly tilo ah cun leitlun ram hruaitu pawl an tawnkhawm awk tambik nak a si. Hi NAM Summit hi India Prime Minister,hmaisabik Jawahar Lal Nehru,  Egypt President,  Gamal Abdal-Naser leh Yugoslav President, Josip Tita pawlih rakdinmi a siih, Member ram pawlcu Africa ihsin ram 53,  Asia ihsin ram 38, Latin America ihsin, 26, leh Caribbeam leh Europe ihsin ram 1 veve pawl an si.

America IN Endeavour Kap Suak

America in Vansang boruak Lawng Endeavour cu  Vansangih kahsuak a tumnak Voi 6 a ttulh zo hnuah, NASA in hlawhtling zetin a kapsuak. Endeavour hi  Florida ih Kennedy Space Centre ihsi kahsuak an tumzo mi a siih, nikhua umdan  a thatlo ruangah leh a sungih khawl thilri tha famkim lo ruangah voi 6 an rak ttulzo mi a si.

Tui ttumah Endeavour hi Cape Canaveral ihsi kahsuak a siih, Hi Endeavour ah hin minung 7 anto ih International Space Centre ah ni 11 sung an hungcaam ding. Himi sungah Japanese Research Laboratory ih hnatuan ttulmi pawl an hung ttuan dingih, Hi  Endeavour ih hun phurhso mi minung 7 pawl thawn  National Space Center ah hin minung 13 an umding ih  hihi Space Center ih minung antambik ttum Record a si ding, Tui ttumih an hun phursomi mi thiam pakhat Tim Kopra cu  Space CEntre ah an hun tanta dingih Space Centre ih thla 3 rak umzo Japan mithiam Koichi Wakata cu leilungah  an run phur thla thungding.

(Visited 36 times, 1 visits today)

Comments

comments

Comments

%d bloggers like this: