Kum 3 Sung Ka Online Fala Hi!

Harsatnak le nuamnak nun zalam tluan ih tawnmi thu harsa rak sunsak hram….

Online Ih Kan Tawn Awk Daan

Nikhat cu ka umharphen ah rualpi ih zuk pawl in rak forward mi E-mail ID pawl ka zoh ih ka duhbikmi e-mail kha ka rak add. Cutin, ka Duat in i rak accept ih kan be aw ringring.

A online tinte’n ka rak online ve theu. Neta-neta ahcun online ih chat awk ding rori kan ruat.

Nikhat sung zik tla cawl lo in kan rak be aw. Cutin, E-mail lawng tawk loin a phone number tiang ka dil ih ka phone. In phone ve. Khua pakhat ih um bangin phone hmangin nitin zantin kan be aw.

Cuticun, Ka Duat cu ka online fala ah a cang. Asinan, online fala tiih kawh cu ka siang hrimhrim lo.

Nuam Tete In Kan Rak Duh Aw

Kum khat a rak liam. Ziangmawtik lai ah si maw, “ka lo duh” kan rak ti aw veve zo. Kan umnak cu rampi khat le rampi khat si khal sehla, khaw khat le veng pakhat ih um bangin E-mail le Phone pawl hmang in kan pehtlang aw thei ringring. (Email le phone rak tuahtu pawl nan parah kan lungawi). Nitin zantin kan tuah mi kan sim aw ringring. SMS khal kan kuat aw ih kan biakawk man lo caan ah voice sms tal kan tanaw ta ringring. Pawihai ih ka vah sukso can khalah “In thlun ve aw” tin lamtluan in phone thawn kan be aw ringring theu.

Kan Nei Aw Ding Kan Ti

Dam te ih tawnawk le neihawk kan tum. Kan tumnak khal a nini in a nai cuahco. Kan neihawk ih kan um daan ding tla kan rel tlang theu. Mipi hmai ah I kiss ngam pei maw tivek kan rel can ahcun kan hni ciamco theu. Ka Duat cun neihawknak ropi ngaingai tuah a duh; kei thung cun tuah luklak men pawi ka tilo…hivek thu kan rel can ahcun kan buai thei nasa. Kei cun, neihawk ih kan sensohmipawl kha kan nupa hrangah kan hmang sawn ding tivek ih thuruat pawl ka rak si. Ka Duat cun kutsih ih neih in duhlole cu in zahpi tiah in salhsuah theu. Kei in kan pahnih hrang thu tha ka ruah sawn ruangah tiah ka rak sanglet theu lala fawn.

Ka Cem Liam

Kum thum sung kan duhdawt aw ih ka caan le ka neih liam pawl ka thin diriamnak fangte’n tarlang sehla ka thin a dam deuh ding ka zum. Online ih fala/tlangval a neitu pawl cun a cemliam zat an thei ngaingai ding ka zum.

  • Ka caan                                               : 60%
  • Sumpai                                               : $/Rs le Ks
  • Ihthah khawp lo                                : 73%
  • Phone Card                                        : 65%
  • SMS kuatzat                                       : 25%
  • Email ih cakuat zat                            : 78%
  • Chating zat                                         : 95%
  • Kan thik Awk zat                             : 68%
  • Thinhar ih ka um zat                      : 85%
  • Kan tawhawk zat                               : 23%
  • Amah ruangih thil ka tuah ngah lo  : 36%
  • Zanvar biakawk ruangih damlo      : 65%
  • Ka lo duh tizat                                   : 78%
  • Phon sung ih kiss awk zat                : 95%
  • Na thinheng maw tiih suhawk zat   : 43%
  • In ngai maw ti’h suhawk zat             : 80%
  • In duh ngaingai maw tizat                : 78%
  • Rawl thaten na ei maw tizat             : 67%
  • Thuamhnaw hrukmi suhawk zat     : 59%
  • Ka duat a ngol zat                                : 36%
  • Phone off hlah tiawkzat                    : 58%
  • Ka mang ah ka lo hmu tizat              : 69%
  • Ka thinlung ah na um tizat               : 75%
  • Nangmah lawng ka lo duh tizat       : 50%
  • Midang biak hlah tiawkzat               : 49%

A Har….A Nuam

A ngol can ahcun phone a off. Email in cakuat ka ngan. A phunphun in ka leem. Ka thin a har. Ka thiik a kiangah ka thleng thei fawn lo. A har. Asinan, thinlung tawngawzet ih thunuam kan rel ih kan thinnlung a hmuhawk ngah taktak caan ahcun ihkhun pakhat ih it tlang tlukin kan nuam aw. Ka Duat hi ka kiangkap tham theih fala pawl hnakin a let tampi in ka duh ngaingai sawn. Cun, tulai tong cun a care tla ka care tuk sawn. Fala dang tla lenglo in inn ah a tulmi pawl ka tuah ih kan biakawk can ahcun nuamzet ih biak thei ka zuam theu. Ani tla in keimah lawng in duh ding ka zum ve ko. A har a nuam ziangkim kan simawk tikah kan duhdawtawknak pawl tla a tam ih theihthiamawknak tla kan nei vivo. A pekte ahcun kan zahawk zet ruangah thu thaten kan sim aw ngam lo. Tu ahcun kan biakawk daan thei uhla nan ngaingam ding ka zum lo.

Online Fala Neih A Har

Online fala, nan ti. Veikhat hman hmaitawn ih hmuaw dahlo ziangtin nupi dingah na nei ngam tum in ti. Online fala neih cu a har, bansan aw. Nan tawngaw thei taktak cuang lo ding. A taktak ah nan duhawk lo sal ahcun nan buai vaih ding so khaw tiah kiangkap rualpi unau thenkhat pawl hnen ihsin tha cem sinsinnak (tha peknak danglam) theih tikah thin cu a har theu ko. Unau sungkhat le rualpipawl ih simmi cu an mahlam thlirnak in a dikzet. Asinan, ziangvekin kan pehtlaihaw, ziangvekin nitin kan be aw ti lawngte an theih theh lo.

“Ka Duat hi ka kiangkap tham theih fala pawl hnakin a let tampi in ka duh ngaingai sawn”

Lai khawte khalah khawdang ih fala neih a harzet theu. Mah miphun lo fala neih khal a har sinsin. Ram hlapi ih fala, online lawng ih theiaw timi cu a har ngaingai mi thil a si. Zum um lozet thil khal a si. Asinan hihi thu tak a si. Tui ka Duat ka duh danzia hi ka kiangkap fala dang hnak in ka duh sawn tiah a tlun ah ka tar zo. Online ih fala neih cu thil dangdai tak a si. Feeling a thuk ih seherhawknak khal a naa cuang ngaingai. Thikawknak khal a na cuang ngaingai ih thinhar le seherh ih can hman can a tam ngaingai a si.

Tum Lo Ve Ve Tawng Aw

Ka Duat hi Parcel ih pasal neih rak tum lo fala hnah khat a si. Kei khal online fala tivek le parcel ih nupi neih duh lo remrem mipa ka si ve. Asinan, ruahlopin kan tawngaw ih parcel le online duhdawtnak thu pawl kan rel tikah sim ngaihnak theiloin kan um veve.  A taktak ih rak tawngaw ding kan sinan online hmang in kan rak tawngaw sawn tiah kan ti aw theu. Ka Duat khal cun i rak zum ve huahho mai. Cutin, online ih duhdawtaw fingfing khalah kan pahnihte ih duhdawtnak le tawnawk daan cu danglamce in kan thei ringring. Caan tampi ahcun ka Duat ih thuhla hi ka rualpipawl hnen khalah simsin ka hiar lo. Mi tamzet in in ngainep ding ti tla ka phang.

Ka online Fala Par Ah Hivekin Thu Ka Ruat Theu?

  • Hmaiton in ka hmu dah fawn lo….
  • Kan karlak ah theihawk lomi tampi kan nei lai ding…
  • A mizia taktak ka thei fawn lo…ka tuar thei taktak pei maw…
  • A taksa ahar dam in mi hawi a can maw….
  • Kumkhua I duhdawt theitu taktak a si thei pei maw…
  • Keimah in teh kumkhua in ka duhdawt thei pei maw…
  • Ka unau duhdawt theitu teh a si ve pei maw…

Ruahnak Dilnak

Kum thum sung ziangkim kan sharing aw, kan duhdawt aw. Asinan, kan duhdawtnak hi ka ruat ih a dik lo in ka thei. Curuangah hi duhdawtnak hi bansan ka tum a si. Ruahnak in pe hram uh……

(Visited 203 times, 1 visits today)

Comments

comments

21 Comments

  1. Thiam tuk aw. Ka duh rori. Siar manhla na sa. Na hmin run ngan tel aw la cu a famkim deuh ding nan.
    Cangan thiam tak na si.

  2. Na ca mi kasiar ngah cu ka lungawi nasa…..
    Thazang tla tam pi ka ngah..
    Tui ka um dan vek ciah2 rori si na ngan …
    Bansan hlah na tum mi thleng suak ding in zuam sin2 aw tin..
    Ruahnak ka lo pe duh….:)

  3. Bansan a tha ding.

  4. ‘hi duhdawtnak hi bansan ka tum asi’ na ti kha.. duhdawtnak dik tak bansan a ol ti..? na fiang aw maw le! pa lo tak pakhat cu na si ding ka zum…
    na hmaifai ten phiah ta aw la, thlacam aw la…

    Paingthar aw!

  5. Ziang asi khalle bansan ko aw.
    Online tivek fala cu a dik lo ding.

  6. Ca ngantu,,,,

    Zo na si ti cu
    Ka lo thei ko

    Bansan ko aw ka lo ti zo kha
    keimah in ka lo hawl sak ding

    Ka hawlsak na duh asilen
    Ka mail ah ca in rak kuat aw

  7. Si ngai, CAngantu tarlang a si lo ngai. Neta lamcun cangantu tal cu mipi in theih a tha in ka thei. Upat awknak tla a si. Cangantu tarlang lomi ca cu hmual a neih dingzat a nei lo in ka thei.. Cangantu.., na ca cu tha zet si.. LIke

  8. Ziah, buai ding tul ciamco a um si lo.
    Nan theih duh ngaingai le CT tuanvo neitupawl sut ko uhla.
    A hmin ngan lo khalin a pawi ciamco kem?

    A ngan thazet cucu a tawk ko lo maw?

    A ngantu cu Online tlangval a si pei cu.
    Buai ding um in ka thei lo.

  9. Cangantu hmin tarlang a si lo ahcun who post this topic
    By youthlife a si mai ding.

    Anngantu hmin an tarlang lo a sile a post tu kha a si.
    Milak ah ca kan ngan tikah kan canganmi in kan sinak in ti lang.
    Zir vivo ding kan si. Zo in a ngan ti na fiang zo maw?

  10. David TK Thang says:

    na simduhmi le a siartu na pek duhmi a tha ka ti zet.

    mang lam rawl ei vek a si ual,
    ka ruahdan ahcun:
    rawl ngai hi ei sehla, a thaw deuh ding a bang!
    si lo sawm?

    kan ei mai ke!

  11. Super like 7xxxxxxxx

  12. Online ih fala/tlangval duh awk hi cu100 ih 98% cu a fuh lo nasa, bansan thei se la atha ding

  13. online fala/tam pi cu fake love tla si men thei nan a si lo i a duh awk ngai2 mi tla an um i kei cu ban san duh hlah aw ka lo ti ding……
    na ca siar nuam na sa

  14. Kumthum sung online in duhdawtawk nak thu sim aw in nan rak biak aw! fala le tlangval vek rori in nan rak care aw zo, Midang nan tullo veve in nan thei aw. a tha tuk a sinan duhdawtnak dik sawn theih na duh sile a tawptiang thleng tum aw la bansan mai hlah

    Comment dangpawl ka siar i naruahnak a buai zet menthei sinan thaten ruatawla duhdawtnak ding cun ziangkim a huam tih theiphah in

  15. Online fala ti a si nan a backround thuhla na zingzoi thei ko si.
    Hmaitonih hmuhawk dah lo ruangah tih ciamco tulnak ka thei lem lo.
    Ahleicein kum 2+ rak thlulahnaaw zo nan si sinsinah tla cun pakhat le pakhat nan theiaw tuk ko ding ka zum.

    Hmaitonih theiaw cingin a remaw sal thei lo ka hmu tam em..!!

  16. kum 3 sung nan rak duh aw zo cun…nan duh awk nak 91% hrawng cu a hnget ding tin ka ruat….

  17. teneleventwoteneleven says:

    Kum thum sungah cun na thei tul mi cu na thei theh zo ding si. Cun a taksa ruangrai mi hawi le hawi zawng lo tih tla kum thum sung nan duh awk tak tak le cu a lo sim ttheh ding si. nan karlak ah thuthup nan nei lo.
    Cun na rak duh tak tak a si ah cun tu ih na tum vek men cu na ban san theilo ding ! khavek Long distance le si duh awk nak a ti fek vivo tu.
    na duh tak tak a si ah cun tu ih na tum vek in awlten ba give up men ding ka zumlo.

  18. stephen thawmlian says:

    Siar a nuam ngai,

    Na duh tak tak asi le thlah mei hlah a um nak khua le ram ah va pan in amah kha va tong tum tawp mei aw.cuih sin na zaan mang cu sun mang var ah acang suak ding.

  19. Kum 3 sung rori hmu aw lo hman rinum ten nan duh aw thei uar nan um lawlaw.. Duhdawtnak taktak si in ka hmu.. zuam na sa uh …ziang vek thu um hman ah lo then hlah hram seh..umnak in mi a thenthei lo thinlung a thupi sawn rinum ten rak um veve uh nan ton aw hlah sung te a cang thei lo ti a um lo so khaw nan thanau hlah uh midang ih ruatnak pek men mi hnak in nan thinlung aw ngai sawn uh ti duhsaknak thawn

  20. Lal Sin Thang says:

    Phuahcop duhdawtnak tivek cu a tha lo!
    Stop right now!

  21. Lal Sin Thang says:

    Na cemliam mi kha na nu le pa le unau bomnak ah hmang sawn aw!
    Pathian hnatuannak ah hmang sawn aw!

Comments

%d bloggers like this: