Hello, Mirang tong kan zir ding…..

Mirang tong kan zir ding ti hlanah thil dang a um.

Kan nu le pa in ca thiam a tul zia an rak thei hmaisa.

An rak sir aw tuk zo.

An fa le, in kai ter…in zir ter; duh le duhlo in, fimseh, thiamseh in ti.

Asinan, ABC kan zir lai ah miphun dang pawl cu, cathiam an rak si zo.

Phunhra kan ong tikah miphun dang pawl cu fimthiamnak ih pumcawm an ngam zo.

College tual rawn kan pal tikah miphun dang pawl cu an sungkua hrang hna an rak tuan zo.

Cathiam deuh pawl ih hna kan tuan thawk lai ah miphun dang pawl cu ram hrangah an ti thei zo.

Ram dang kan thleng, kan kawlram ih B.A., le cathiam pawl cu miphun dang lakah cun “what is your name” ti hman kan ngam nawnlo. Kan mai mawh tla a rak silo men thei. Kan ram zirnak a rak niam tuk ruangah a si.

Chinmi mi rang tong ih tong thei kan mal tuk lai. Kan zuam a tul tuk lai.

A ngan cu kan thiam tla kan rak ti aw men thei nan, mi lakih duh tawkih va tong fukvo ngam mi paziat kan um ding..? Ca thiam hmuahhmuah in mirang tong an thiamlo. Cathiam si, tongthiam si kan tul.

Mirang tong cu a thupi tuk. A zir thei hmuahhmuah cun kan zir a tul. Mirang siar thiam, ngan thiam lo cun khawi hman kan vak thei lo ding.

Mirang pawl kan ngaisan ruangah kan zir ding tinak a silo. Mirang tong an hman theh ruangah mi rang tong kan zir sawn ding a si.

Mirang tong hi khua nu in a rak malsawm ih tong fang khatah fimthiamnak tampi a um.

Ziangtin kan zir ding?

  1. Ka thiam ding a si tiih tumruh tak thinlung ken hmaisabik ding a si.
  2. Ningzak lo ih tong hluahhlo ding.
  3. Aw suak rori mirang ca newspaper le magazine cahlap pawl siar ding.
  4. Aw thluk khal, thei tawkih rem ding a si.
  5. Ti aw ter nawn ih tong thluk tuah caan a tam sawn ding.
  6. Words tampi by heart a tul.
  7. A sual khal le fiangte, ti fukfo ih siar ding.
  8. Ca siar tinten aw suak rori siar ding, ring pin.
  9. Mirang ca ziangvek pohpoh siar paih zet a tul.
  10. TV, Film le carton cabute pawl khal in zir a theih.
  11. A thiam pawl tong ngai a tul.
  12. Tong rero paih a tul.
  13. Mi rang tong thiam cia pawl biak tam a tul.
  14. Grammar diktak zir ding a si. Ca tlang malte men zir lo ding.
  15. Atcih rori atul.
  16. Mirang hla khal in tampi zir a theil, hla ah word olte an hmang.

A ngan kan zir ding

Tong le a ngan cu lei le van ngai cun a dang aw lo nan, an rak dang aw zet.

A cang thei a sile, Grammar vek rori ngan zir a tha. Cu lole, thiam lemlo ih ca ngan so vivo a theih. Curuangah tong kam hman daan dik tak zir ding a si. Kan um nak ram ih kip ih thuthang ca le Magazine ta khal in zir a theih. Cun, Grammer cabu rori khal a um ih cumi pawl ihsin kan zir thei. Mirang tong thiam duh taktak ahcun zir daan ding lam zin a tam zet. Mah te rori zir ih mai aanhai thiam an tampi zo. Mi ngan daan pawl tha te zoh ih ngan zir ding a si. Ziangtin tong kam mawi an hmang timi zoh fel ding.

 

Hello, mirang tong kan zir ding…….

 

(Visited 351 times, 2 visits today)

Comments

comments

Comments

%d bloggers like this: