Hello! Chinland(2)

HELLO! CHINLAND (2)

Mai Sokhlei Par

 

Than Tlang khua kan fang:          

Media Workshop program kan theh ni, a tlailam cu Pu El (Salai Joel Ling, Chief Editor, Muko Mekazin), Jacob Thang (Chin Zone Coordinator, Gaia Sustainable Management Institute) le Nhgepi pawl thawn Than Tlang khua fang dingin bike thawn kan pok. Ahmaisabikah ‘Nomang Garden for Youth Development Centre’ ah kan leng. Hmuan kaupi sungih um a si ih, a mawizia le pangpar tamzia cu pangpar hmuan thleng vek kan si ko. Hitawk hmunah ngaktah nauhak ziangmawzat an um ih, tual ih rak lek rero hrekkhat cu ka va kawm hai. An duhnung in an felzet.

Mai Sokhlei Par

Cuisin an khua cu bike thawn kan hel ciamco. Hmun ikipah Pu El cu betu le cibai rak buktu a tong vivoih ka mangbang. Hakhapawl ih cangantu an sunsakzia le an upatzia hi ka mit rorin ka va hmu. Pu El tla cu Editor pakhat a si lawng siloin nunthuleng le caphun dangdang ngantu a si tikah theitu a ngah zet. Vok rak thah tawk, rawl ei rak sawm tawk, khawmnak rak neihpi tawk.. an sunloih thei ngaingai. USA um Hakhapawl khalin kan dung baiteah khan tlawn an sawm ih USA ah thla ziat lai simaw a va tlawng dah zo.

A zan cu TABC (Than Tlang Association of Baptist Churches) minopawl hnenah ‘Talk’ kan neihpi hai. Kei tla ‘Nunthuleng le a hmual’ ti mi thulu thawn thusimnak ka neive. Kan theh tikah disscusion kan nei ih, Than Tlang minopawl ih thusuh ding theih tamzia ka hmuh tikah ka mang a bang lala! Zanvar in can pe thei sehla cu zanvar daih thusuh ding an nei ko ding ka zum! Thusuh ding thei cuca lo, thurelpit ding khal nei mumal lo kan mino hrekkhat ka mitthlam ah an ra lang cupco a si ko!!

A thaizing cu Than Tlang ah cozah hnatuan ih um, Falammi cangantu, Salai Zinghmuh (Falam) ih sawmnak in kan zaten lakphak kan inkhawm. Salai Zinghmuh (Falam) hi a bezaipawl cu mekazin tivekah ka rak siar theu nan, a mipum cun himi ttum hi ka vei khat tonnak a si. Cangantu upatnak hrangah tin Nhgepi thawn cafung thazet laksawng in pe veve ih kan lungawi tuk. A zan cu Awipi (Salai Tial Awi Thang) tei inn ah kan riak hai.

Tio lam pan in:       

Khua a hung van cun M. Te (Salai M. Cung)  in Aidii (Anna Biak Tha Mawi: anih hi zuksuai thiam (Artist) le bezai ngan thiamzet a si ih, Hakha mipipawl in an rinsanzet mi a si), Pu El in kei, Nhgepi in thilri phurin motorcycle thawn Tio lam panin kan pok. Lamzin cu a tha lemlo nan se tuk tla a si lo. Ruah mallai a rak sur ruangah a cancan le ciarbek a um phahphah. Sopum khua kan thlen zikah Pu El in, “Sopum khua an rak tinak san cu tuihlan Japan ral laiah khan soserpawl an rak pumkhawmawknak hmun a si ruangah ‘Sopum khua’ tin an kawh lantanak a si,” tin in sim. Sopumih ‘Taungzalat’ rawl dawr ah kan cawl ih suncaw kan ei.

Sopum khua ihsin kan poksal ih ‘Van Zang’ khua kan thleng. Pu El in, “Van Zang an rak tinak san cu, tuihlanah mipa thil vek lung tumpi an rak hmu. A tum tuk ruangah milai ta cu a si thei zik lo; vanmi ta a si ding an tiih curuangah ‘Van Zang’ tin an rak sak,” tin in sim. Kei cun hi khaw hmin sal hi harsa ka ti zet.

Lamzin tluan in Pu El thawn calai thuhla kan ruahaw phah vivo. Media Workshop laiah khan Pu El in Muko Mekazin thuhla a rak present mi ah mekazin ihsin sumlut in amai lakkha siseh, apartment san man siseh a daih thluh lawng siloin, Muko Mekazin in sumpai ting 60-70 lai bank ah ret mi a nei ti thu kha a rak sim tel. Cumi thu kha theihfiang ka duh thu ka sim tikah anih cun, “Ramleng umpawl in an khua le kawhhran tivek hrangah mi pakhat in mekazin bu 50, bu 100 tivekin an rak hlu. A man tla in kuat cia ih kannih khalin an hlunak hmunah felfaiten thlenter thei kan zuamve. Ramsung lawng si sehla cun hivek kan si thei ka zum lo. Ramleng umpawl tan an la tukih curuangah si,” tin in simfiang. Cule mekazin ih cangantupawl hnenah cahram man sumpai khal an pe theu tin in sim bet.

Kan mekazin dinhmun ka vun ruat! Regular ih suak thei cu Vankau Arsi (thla li vei khat suah) le Senhri (thla ruk vei khat suah) Mekazinpawl an si ih, khuilam Editor inn sansak le lakkha pek thei lamlam; a sumhram ngahsal ding le a can khel ih suah thei ding hman hi thil harsa tuk a si lai! Cangantu ngan man sumpai pek thei ding tla cu ……!!

Ramleng umpawl in ramsung umpawl hrangah cabu/mekazin/journal hi run leihve hai sehla ziangtluk a sunglawi ding! Cabu cu rettha hrih sehla, mekazin bu khat ah atlangpithuin Ks. 1000/- a si ih, journal bu khat ah Ks. 700/- a si. Mi malte lawngin cabu an lei thei tikah casiar khal kan mal; kan pung thei lo. Cutikah theihnak kan tlasam lawng siloin kan moral khal san lam a pan thei lo phah. Ramleng umpawl in mi pakhat ah bu 5 ihsin bu 10, 20, 50 tvk in run hlu theive hai sehla cu mi tampin ca an siar phah ding. Ahleicein sumpai neih hmanah cabu lei ding a umlonak khawteberek lam tiangin calai a thlen phah dingih kan miphun khal tampi kan hmasawn phah ding tin ka ruat.

Van Zang ihsin kan feh vivoih ‘Far Rawn’ khua kan thleng; ‘Lily Tea House’ ah kan cawl ih lakphak le hmuk pawl kan cah. Far Rawn ahhin company din a si cing men thei tiah Far Rawn khawmi ‘Thomas’ in in sim. Cun Far Rawn ihsin  peng 3 hrawng a hlatnak ah ‘Miruak Khaannak’ lungpang a um ih, hmun hla ihsin mi tampin an rak hliakhlai theu tiah in sim bet. Cui lungpangih miruakpawlih kut le ke ruh pawl cu a sau ngaingai ih, misang zetzet an si ding tiah zum a um. Cui miruakpawl cu ziangvek miphun an si dingih tu ah teh khuilamah an um ding ti cu theih a hiarum zet.

Far Rawn ihsi cun U Bik (Pu Siang Cung Bik) in Pu El a bang tuk pang ding tiah amah in in phur thlang. Zintluan in U Bik thawn thu phunphun kan titi phah vivo. Kan feh vivoih ‘Tlang Pi’ khua kan hung thleng. Caw Haw vengih um, U Bikih nulepai inn, Saya Sui Awi tei inn ah kan thumaw ih suncaw thaw zet in son mi kan eikhawm. Tlang Pi cu innkhi 250 lenglo umnak khua a si ih, ramdang thleng khal tampi an an um. Ramdang umpawl in an khua hrangah thil tha phunphun an run tuahsak zo: Tlawng-inn, Nursery Home le Hydro Electirc pawl an run tawlrelsak ih khawsen in an thathnempi ngaingai.

Tlang Pi khawsuah ah ‘Se-Lung’ ti mi lung danglam zet khal a um. Cui lung cu sia vek rorin pianhmang a nei ih mak ti zetin ka zukaw ciamco ta.

Tlang Pi ihsin ram a ngam mi pacang pahnih-thum le U Bikih fapa Joel in in thlun betih a hnangamthlak nasa. Ram ih kan tul ding mi thilripawl: fangfai ihsin thokin meithal, sur, zanpuan tvk., kim thepthepin an keng hai ih kan phur sinsin. Tawkfang kan feh hnuah Tlang Lo ah mopuai zawh ih ra tlung, Far Rawn khawmi, Van Zang tlangtluan mino pawlkom ih hruaitu, Thomas le Kawi Do kan tong ih ra telve dingin kan sawm. Annih khalin in ra thlun ve cih. Cutin kan group cu mi 10 lenglo kan si thlang.

5:40 pm ah tluangten Tio kan va thleng!

Peh vivo lai ding…

(Visited 334 times, 1 visits today)

Comments

comments

One Comment

  1. Ka lungawi tuk asi.Na Cangan mi ka siar ring ring asi.kan lam Ramleng umpawl tan ka lak nasa ……

Comments

%d bloggers like this: