Hello! Chinland

HELLO! CHINLAND

 

Mai Sokhlei Par

Chinram ka rak thlen dahnak cu Falam lawng a si ih, 1999 ah a si. Zarh khat sung ka rak um dah nan hmun tampi ka rak vak lo. Cutiasiruangah Falam khaw thu siseh, Chinram thuhla siseh, theih mi ka rak nei mumal lo. Nunthuleng ka ngannak ah Chinram setting thawn ngan ka rak duh thei zet nan, ka theihfiang lo mi thuhla a si tikah ka ngan ngam dah lo. Asinan ni khatkhatah cun ka ngan leh tengteng ding tiah saduh ka rak that ringring.

Ruahbanlopin, Thawng Thawng (Salai Ceu Bik Thawng) in Chinram tlawng dingih in sawm tikah ka lung a awi tuk! Cutin April 19, 2012 ah Mandalay ihsin Hakha ah Thawng Thawng thawn kan rak thleng. Chinram khawpi Hakha ka vei khat thlennak a si! Hakha cu ka rak ruahnak hnakin tampin a rak thangso in a rak ropi tuk. Inn tha tampi hmuh ding a um. Mipi tlanlendan khal an cangkang zet. Nhgepi le Jacob Thang pawlin khua in fanpi ciamcoih an parah ka lungawi ngaingai.

Hakha ah ni thum sung ka caam hnuah rinlopin Than Tlang ah Media Workshop kai dingin Awipi (Salai Tial Awi Thang) in in rak phone. Cutin a thaizing  ah Nhgepi thawn Hakha ihsin kan pok. Bus cu a tet nasaih ke thlaknak ding khal a um lo; tohkham hnuai hmuahhmuah cu thilri an remkhat thluh. Fehnak zin khal a um lo ruangah thilri parah pal hluahhlo men a si. Ka suitcase khal zin phahnak ah a cang! Ziangawtitha, tingaihnak dang a um cuang lo. Lamzin ah theihmu hmin an rak zuar ih manhla ti zetin ka ei ciamco. Ka duh nasa!

Tlailamah Than Tlang cu tluangten kan hung thleng. Khawsung zintluanah inn thatha le dawr pi zetzet ka hmu cu ka mangbang nawn, ka rak beisei ban lo mi a si.  Ka rak thlen dahlonak khua ka va thleng ngah cu Bawipa Pathian ka thangthat tuk!

Than Tlang, TABC ah kan thleng hai ih, ka rak theih dah lo mi siseh, an hmin ka thei nan a mipum ih ka theih lo mi siseh, cangantupawl thawn tla kan hmeltheihawk phah ih hlawk ka tiaw zet. Matupi ihsin Salai Okla Bik, Pu Joel Ling (Chief Editor, Muko Mekazin), Salai Tial Awi Thang tvp tla kan nelaw theh ih a nuam ngaingai. Nhgepi in Vankau Arsi Mekazin thuhla a present ih, kei in Assistant Editor ka tuannak Chinland Today Media Group thuhla ka present.

Cun, Than Tlang mipawl in an suan zet mi ‘New Eden’ duum ah khawconnak (sightseeing) nei phahin, a hmunah calai thuhla hlawmawknak tla kan nei cih. Kei tla ‘Nunthuleng Ngandan’ ti mi thulu thawn hlawmawknak  ka rak neive. Cun Muko Mekezin ihsin Salai Tial Awi Thangin ‘Biazai’ thuhla hlawmnak a nei. Kan zaten kan kaa a thaw zetih a ngaitupawl khal an lung a lut nasa. Ahleicein Pu BH Van Or (The Hakha Post) ih ‘Bia le Hla’ ti mi thulu thawn in zirh mi tla cu kan hlawkpi lawng siloin, kan nuamaw ngaingai. A zirh laiah,

Kan chan ai tong nang le kei

Tlang I khuaithlum le maw ram angripar bel

Nang le kei kan khiak tti lo” ti mi ih sim duh mi ziang a si tiah in sut hai. Zohman in kan sim dik thei lo! Cunah amah thothoin simfiangnak in tuahsak:

“Nang le kei kan len lai caan (kan san) a tongaw ko nan, duhdawtnak (khuaithlum) le sex (angripar) kan hmangtlang thei lo, tinak a si” tin in vun sim cu kan zaten kan lungkim tukih kan hni phungpho. Bezai ih thukzia simfiangnak hrangah zohthimnak tha tuk a si.

Workshop kan tuah sungah JMBC le TABC ah ‘Talk’ tla kan nei ih Than Tlang mipipawlih hmel tla kan hmu ih kan diriam ngaingai. Workshop kan theh zan, zanlam ah Pu El (Joel Ling), Kopte (Jacob Thang) le Nhgepi pawl thawn Than Tlang khua kan hal ih zuk tla kan zukaw hai.

A thaizing cu Pu El, Nhgepi, Aidii (Anna Biak Tha Mawi), M-te (M. Cung) le Pu Bik (Siang Cung Bik) pawl thawn Tio (Tio Khaw Nuam) lam feh ding kan si. Zanlam zanriah kan ei laiah Pu El in Pu BH Van Or kha Tio ih in thlun ve dingin a sawm. Pu BH in, “Ziangsi kan va tuah ding?” tin a suh tikah Pu El in ka liang kha beng derhdo phahin, “Angripar kan va khiak ding” tin a ti! Cucun an zaten keimah zoh in an hni theh. Culaiah Nhgepi in, “A kiak theh zo si” tin a rak ti bet sapbai cu an hnih an cawl thei nawn lo.

Peh vivo lai ding….

(Visited 63 times, 1 visits today)

Comments

comments

2 Comments

  1. ‘Than Tlang’ silo in ‘Thantlang’ a si lo ding maw?

    Joe

  2. dinthuama cherput. says:

    Hakha,Falam,Thantlang,leh chinland a hawngfang thei in ka lungawipi nasa.joe cuana hi mandalay ih ka nau cuana s/o z.kapa a si maw aw.chinram leh hmun dang a fangthei ih ka lungawipi nasa.

Comments

%d bloggers like this: