Hello! Chinland (9)

      Hello! Chinland (9)

Mai Sokhlei Par

 Lailun ah:

@ LailunHakha ihsin zingpit ah motor thawn kan pok ih, Falam cu zinglam nazi pakua hrawngah kan thleng thei. Ka rualpi Khaw Tin Luai le Lal Din Pui in motor colhnak ah in rak hmuak ti ka hmu cu ka hna a ngam hlunhlo.

Thaithawh kan ei khawh in Falam minopawl in Lailun feh in ra sawm; an zaten paruk an si: Saya Benjamin, Khaw Tin Luai, Lal Din Pui, Lin Lin, Par Sui le Emmy. Kan zaten motor cycle thawn kan phuraw ih kan pok hai. Hivekih in duhsaktu an zate parah ka thinlung tak ten lungawi thu ka sim.

Hi Lailun hi Laimipawl suahkehnak hmun a si ti mi thuanthu a rak um ruangah a lar ngaingai; a thuanthu khal article tam nawn ngan in a um zo. Phunsang tlawngtapawl le pawlkom dangdang ihsin ra lengtu an um deuh ringring ih, Falam khawsung ihsin khal a hlat lemlo ruangah len a remcang zet. Lailun tlang hramah riah buk a um, rawl dawr a um; mahtei rawl suan duh asile bungbel khal san a theih thotho.

Lailun cu lung tumpi pi thawi remaw mi tlang a si ih, ka rualpa Lin Lin in duhsak zetin a sannakbik  tlang zim ah in kaipi. Kei cun hnuailam ka zoh cingcingih ka thla a ring, ka ttih. Curuangah ka kai nawn lo mai ding ka ti nan Lin Linih thapeknak zarah a zim cu ka hung thleng thei nerno. Hnuailam ka vun zoh cu.. aiha! Ka umnak a sang tukih ka lu vawhpi a rung tia luailo thluh. Kirlam tla cu ding khalin ka feh ngam nawn lo; tthia thlohthlo phahin bokvak in ka ttum!

Lailun ihsin kan tlunlam ah rangrual thawi khualtlawngpawl kan tong. Ka hei biak hai tikah Sim Dihai khua ihsin Falam ah fangfai phur (lei) dingih hung an si tin in sim. Rang zukpi ka duh nan ka tih thu ka sim tikah Lin Lin in, “Ziangtinhman a lo ti lamlam lo ding. A kiangah va ding awla si ko,” tin in tiih tih cingten rang cu ka va naih hrethro. Asinan cui rang cun in rak mitkem nasa si ding, a kiang ka va din ngah veten a ke in rak saih cih. Cucun kei cu ka tih tukih raak phahin ka leu ciamco. Camkhat sungah hlapi ka va thleng man! Lin Lin cun a camera keng in thizik in rak hnihsan. Cumi ka hmuh cun thinheng zetin Lin Lin cu ka hei met ruamro ta.

Falam-Rih zin:

Rih ZinPathian khawkhannak in Falam ka thlen ih a tipsun cu Falam Baptist Church Minopawl kha Tio ah Gospel Team feh ding an si. Cutin kei khal Pastor le hotu pawl duhsaknak thawn ka hei thlunve. Rih zin cu tuihlanih ka rak feh dah lo ruangah tui dinhmun thawn ka khaikhin thiam lo. Zin an tuah rero laifang a si ih, an tuah hrihlonak ah cun zin a siat ruangah vei hnih-thum lai ttum a tul lai.

Tlairawn kan thlen cun Nu Hniar ih rawl dawr ah kan cawl ih thaithawh kan ei. Rawl cu inn ihsi mahte run fun cio mi a si ih, kei cu ka thlen-inn Khaw Tin Luai in in funkep. Banhla hnah thawi fun mi rawl ei cu a thawtdan a phundang ngaingai. Midangpawl thawn kan rawlfun kan hlawmaw vialvo ih, a manhlatdan ka rel thiam lo.

Thaithawh kan ei khawh in kan poksal. Cule Satawm Baptist Church kan thlenah suncawi ei dingin kan cawl. Cutawkah inntek kawhhranin in rak soncia mi vainim tisop le cattani bawl kan ei hai. Vainim cu khap-kaw-bel thawi suan mi a si ruangah a thaw tuk lawmmam; hngilh theih nawn lo ding khopih thaw a si.

Falam-Rih zin tluanih khaw hminpawl ka hmuh, ka theih tinten ka thindi a riam thei tuk. Ziangahtile mi rel mi le cabu tivek lawng ihsi ka rak theih theu mi Laitlang khuapawl, ka mit roriih ka vun hmuh tikah thuanthu sungih vung tlawng tla ka bang lamlam. Zawlte khua kan thlen tikah, “Aw.. Zawlte khua cu hivek homaw,” ka ti. Tibual khua kan thlen len, “Aw.. Tibual an rak ti theu mi cu hihi homaw,” ka ti lala. Hi Laitlang khuapawl cu ka thinlung cun a rak tlangnelcia thluh mi an si ruangah a takih ka hmuh tik khalah ka thinlung cu a mikhual lo nasa.

Satawm ih kan colh sungah zin kapih kuhsi an cil lai ka hmu ih ka zuk ciamco. Hivekin simaw an rak cil tiah ka mang a bang. Hna lawngih ka rak theih mi, a takih ka hmuh tinten ka  lung a awi ciamco theu.

Zanlam 6:15 PM ah Tio (Zo Khaw Mawi) kan thleng.

Tio (Zo Khaw Mawi) ah:Tio upapawl thawn titi lai..

Tio cu innkhi 400 hrawng an um ih, inn cuzat lakah kawhhran 16 rori a um tiah sim ka si. Ka mang a bang! Kawhhran pakhat ah inn ziangzat an um thei pei ti mi ka vun ruat ih … ka khawruah a har ko. Cun, hitawk umpawl cu atlangpithuin lothlo, thil phurh hlawh, sum thleng, dawr tuah le vok phurh hi an sum hawlnak a si. An tlang tong (common language) cu Mizo le Kawl tong a si ih, Chinmi lawng siloin Kawl, Vai le Karen tvp khal an umve. Pacang pakhat in, “Tio cu Chinmi kimtei umnak khua a si. Saklam le Thlanglam Chinpawl kan kim theh,” tin in sim.  Cule, “Tio ah cun ziang hmuahhmuah a ngah thluh ___ Jesuh siar lo!” a ti bet! Ka hnih a suak thei lemlo.

Cun, khaw upa pakhat in, “Hi thu hi na cangannak ah rak telh hnik: kan khua ah mi bum hmangpawl ra nawn hlah hai seh. Pathian hnatuantu (Evangelist) ka si tiaw in lamzin fehnak man paisa in ra diltu hi an tam tuk thlang. Hrekkhat cun Kawhhran ah an dil (ahlu an khan), hrekkhat cun inn tin ah feh in an dil; Pathian hnatuantu ngaingai le an si fawn lo, hivek minung hi kan khop tuk thlang. Fehnak man an ngah le zu innak le nomcennak ah an hmang ti tla kan theisal theh ih kan tuar nawn lo,” tin in ti. Aw! cuvek thu tla a rak um mawsi!!

Tio ih Emmanuel Baptist Church ah kan zaten kan khawmaw. Minopawl cu choir an rak zircia ih kei tla sakve dingin in sawm. Kei cun hla ka thiam lo ruangah ka rak to men ko ding tin ka ti rero nan an duh lo; dingve rengreng aw in ti. Cutin choir sak can a hung thlen cun thungaithlakten ka hei dingve ih, hlafang parih solfa zoh phahin ka hun sakve tum… asinan ka kehlam ih dingtu in saprano a sak ih, ka vorhlam in alto a sak! Cucun zoi’ aw ka thlun ding ti tla ka thei thei nawn lo, ka aw  ka hlo theh; cunah cahnah parih hlafang cu awsuak loin ka siar rero mai.

Champhai ah:

Champhai khawsung (2)A thaisun Zarhteni cu kan team in Champhai kan leng. Khaw sungah sunvuten kan vak ih, an thil zuar mipawl tla kan zoh vivo. Tuluk thilri cu hilam (Mandalay le Pyin Oo Lwin) ah a man a olsawn ih, India thilri lawng te lei an tlak zet. Lamzin ih kan vah rero laiah rinlopin ‘Synod Bookroom’ ti mi signboard ka hmu cu ka thin a tur dukdi! Synod Publication Board suah mi cabu ziangmawzat lai a rak siar zotu ka si ruangah hi bookroom ka hmu cu ka lung a awi tuk lawmmam. Bookroom sungah cun kan vung lut, cabupawl pakhat hnu pakhat ka kau, ka zoh, ka bih. Nauhak hrang, mino hrang le pitling hrang siar ding tha cabu ticawklo le cabu phunzakimpawl cun kan Chin calai dinhmun in mangsuakter ih, kan calai dinhmun niam laizia in theifiangter. Nauhak siar tha cabu kan nei lo; mino hrang khal um cuang hlah… huii.. haaa..!!

Kei cu Mizo lakih rak thanglian ka si vekin, ka nauhak lai ihsin Mizo calai hi ka rak tlangnel zo. 1988 kum khi phun riat ka kai kum a si. Tlawngta buainak ruangah rampum huapin tlawng kan rak pit ih, cumi sung hmuahhmuah cu Tahan Theological College library ah cabu ka rak sang theu. Ka siar thiam mi Kawl cabu le Mizo cabu hmuahhmuah ka siar thluh hnu cun san bet ding ka nei nawn loih in hruaitu sayapai hnenah, “Falam cabu teh a um lo maw? Ka siar thiam si,” tin ka ti. Anih cun, “Himi lawng a um,” tin a tiih Rev. Dr. Lal Tin Hre ngan mi ‘Siangpahrang Khualbuk’ ti mi cabu in rak pe. Cumi ihsin thokin kan tong ih ngan mi cabu kan rak neih malzia ka run thei ngah. Kan Chin calai dinhmun thawi ka vun khaikhin tikah Mizo calai cun tampin in fehsan zo ih, dawimansal ding cun thil ol a si nawn lo ding tin ka ruat.

Champhai ihsi kan tlunlamah Tourist Cottages kan lut phah. A sung cu zuksuai phunphun le Laithuamthil pawl zoh theih in an ret ih ka zuk ciamco. Hitawk hmun ka thlen ngah zarah idea thar tete tla ka ngah phahih ka hlawkpi ngaingai. Kan Chinram ah hivek hmun hi umve sehla tiah saduh ka that fawn.

Thil kan zoh theh in kan zaten group zuk kan zuk. Cutheh cun bus sungah kan kaisal ih Tio lam kan pansal.

Peh vivo lai ding…

Comments

comments

Tags:

4 Comments

  1. Kei ka hrang ahcun Falam tonghi mawi le tha ka ti bik!

  2. Dear Mai Sokhlei Par

    Zuam sin sin awi.Na ca ngan ka siar ring ring.

  3. Falam Cangantu ah ka duh bik, Upar rak peh vivo aw maw!

  4. Ca nagan na thiam thei tuk….Mai sok na ca ngan ka hmuh tinten siar lo in ka um dah lo…lungawi..

Comments

%d bloggers like this: