Hello! Chinland (8)

Hello! Chinland (8)

Mai Sokhlei Par

 Than Tlang ihsin Hakha ah:

Than Tlang ihsin Nhgepi thawn motor ih tlungtlang ding kan si. Asinan Than Tlang ka rat lamah ‘Timit’ simtu le hmuhtu ka rak nei loih ka hmu ngah lo. Cumi cu Nhgepi in a theih tikah, “Timit mawizia hmuh ngah lo cu a cang lo. Aidii thawn thlengaw uh. Na ai ah Aidii sawn kha motor to sehla, nang Pu El-ih bike rak thlun aw. Cule Timit na hmu ngah ding,” tin in tiih cutin Pu El thawn phuraw in Hakha kan pan.

Than Tlang kan lan tawkfangin ruahpi tak zetin a sur ih kan ciar thluh. Khua tla a sik ngaingai. Cuticing cun ‘Timit’ ih mawinak cu pakhat hman hmuh hrelh tum lo’n ka thinlung telin ka zoh ngah thotho. Hitluk hmun mawi Chinram ah a um cu ka uangaw tuk. Resort Centre ah hman theih sehla tiah saduh ka that phahphah. Zin kapah sokhlei an par celcel. Thing par a sannak ah senhri phunphun hmuh ding a um. Vate tintian awnmawi kan ngai phah. Tiva luang mawi diahdo tla kan hmu. Oh Chinland, leitlun ah na rak duai ce lo! A lo ceimawitu ding lawng na sam ee!!

Hakha ah:

Tlailamah Hakha tluangten kan hei thleng. Pu El-ih farnu ‘Ni Tawi’ tei inn ah kan  thlengih ṭha zetin in rak mikhual. Sihmui ka duh tuk ti an theih ruangah sihmui in phomsak; hmeh dang ka ngai nawn lo si ko! Ni Tawi tei innsangih ṭhatnak hi ka hngilh thei lo ding. An inn ah zan khat ka riah hnuah U Papui (Chief Editor, The Hakha Post Journal) tei inn ah ka ṭhawnaw.

Kan cangvaihnak zuk hmuahhmuah CD ih thun ka duh ruangah U Papui in Hakha pengih hlasak thiam larzet, Salai Thawng Bawi-ih dawr, ‘TnC Studio’ ah in hruai. Cunah Salai Thawng Bawi in ka zukpawl cu CD ah in thansak ih “Cangantu upatnak hrangah” tin in laksawng! Cule a VCD-pawl tla laksawng in pe ih ka lungawidan cu. Inn ka thlen hnuah a VCD cu ka zoh ciamco. Ka uar lawlaw ti cu pheh ding um lo si ko!

Hakha Sizung Chapel ah:

A sun cu Pu Chan Hrem, Cartoon Vapual le Dr. Tawk Lian Bawi pawl thawn U Papui in hmeltheihnak in tuahsak. Cuisin Pu Chan Hrem in kan zaten sizungpi ah in fehpi ih Health Concern Volunteer Group (HCVG) pawlih sak lai mi Chapel in zohpi. Hi Chapel hi sizungih mithi, phumtu nei lo siseh, ruak vuinak hmun remcanglopawl siseh, miphun le biaknak thleidannak umloin a ṭultu pohpoh ih hman theih dingih sak mi a si thu, Chairman ṭuantu Pu Chan Hrem cun in sim.

Hi tumtahnak hi tha ka ti tuk lawmmam. Hakha cu innkhan fiak tete luahtu tla tampi an um ih, thihhloh an ton tikah mipi tokhawmnak ding hmunhma a harsa zet ṭheu. Cupawl hrangah hi building hi ruak vuinak hmunah a lak roriih hmanter a si ding ruangah khawsungmipawl hrangah a hnangamthlak tuk ding tin ka ruat. Cun, khualkhua ihsin thihnak a ra tongtupawl hrang khalah thil ṭha tuk a si thotho. Hitawk hmunah khawmnak an tuah thei lawng siloin, vui-awknak hrangih thil ṭul mi, ruak phurhnak leng ihsin thokin, thil ziangkim umhmun ah a remcang thluh bet ding!

Hi Sizung Chapel hrangah hin ting 500 a ṭul ih, ramdang umpawl ih ṭanpinak zarah, tuah cun ting 200 lawng a sam thlang. Hakha khawsung um pitar pakhat tla cun, “Ka thih tikah kan inn ah mi tam an tlem lo ding sikhawh ti ka ruah tinten thih ding hi ka rak ṭih tuk ṭheu. Asinan tu cu hi Chapel a um thlang ding ruangah thih khal ka ngam thlang,” tin Pu Chan Hrem hnenah a rak sim dah.

CNF pawl thawn:

A zan cu Peace Talk hrangih ra thleng CNF pawl hnenah U Papui thawn kan va leng. Dr. Andrew Ngun Cung Lian thawn nazi khuai sung kan kawmaw. Ka thusuhnak hmuahhmuah in sansak lawng siloin ka calai zin zawhnak hrangah ruahnak thatha tla duhsaknak thawn in hlawm ih a parah ka lungawi ngaingai. Cuhnuah midang dang, Journalist-pawl siseh, khal ka va kawm vivo. CNF thuhla cipciar deuhin ka sut vivo hai. Hlaral ihsin an thuhla ka rak theihdan le anmai in simdan tampi a dangaw ih ka mangbang rori. An zaten biak an nuam ngaingai ih zanvar ten thurelpi ka duh nan a thaizing khualtlawng lai ding an si ruangah 11pm cun U Papui thawn kan tlunsan.

A thaizing cu zingpit ten Falam feh ding ka si thlangih ka hngakhlap zet. Falam teh ziang rak bang kei maw tiah ka ihthah hlan sung ka ruat rero.

Hakha ka um sungah Sabuti khopten ka ei. Bazar ka leng. Rung Zalat le hmun dangdang in lenpitu Kopte (Jacob Thang), Hakha khawsung hmun thupi deuhdeuh in fanpitu Nhgepi, in mikhualtu Ni Tawi tei sung, Biak Ku tei sung, U Papui & Ku Ku tei nupa, ka tulsam mi ziangkim in bawmtu M. Cung le Awipi, in kaihruaitu Pu El, bomnak ropi in rak petu Salai Thawng Bawi, cule Chinram in hruai thlengtu ka rual Thawng Thawng (Salai Ceu Bik Thawng)..  an zate parah ka lungawi thu ka ngamkhum a si.

Peh vivo lai ding…

(Visited 159 times, 1 visits today)

Comments

comments

Tags:

One Comment

  1. Dear Mai sokhlei Par

    Nan ca ngan mi siar ring ring tu ka si.ka lo uar tuk asi.

Comments

%d bloggers like this: