Hello! Chinland (7)

Hello! Chinland (7)

Mai Sokhlei Par

 Ṭio in kan tlung:

Cangvat ṭih ruangah Ṭio ih cam bet ding cu ka ngam nawn lo. Curuangah kan zaten atlaiatlaiin kan tim kan tuah ih kan tlung. Kei cu U Bikin in phur. Ruah a sur tamdeuh ruangah lamzin cu a rak se bet nasa. Culailakah kan rualpi pakhat a datsi a cem ih U Bikin amai ta mallai a ṭhen. Asinan tohkham tawh kha phorh theih loin a tang lanta! Kan zaten kan vun merh mengmang nan tawh cu laksuah a thei nawn tariai lo! Tawh a um lo cun bike cu mawn ngaihnak a um fawn lo.. a nor ih nor mai a tul thlang. M-te cun, “Mai Sokhlei, Aidii hnenah ka dungah ra to aw. U Bik lawng run nor phah mai seh. Culocun na bang tuk ding,” tin in sawm. Asinan khua le a thim zo, hramlak le a si  bet fawnih cuvek lakih U Bik amahte lawng bike nor ih a ra tlung ding cu ka ruat thei hrimhrim lo. Lamzin le a hla tuk lai. Curuangah U Bik ka run nor bawm ding, in rak fehsan mai uh tin ka ti hai.

Cutin kei cu ka taiah cerek taikhap ka khap ih, cui taikhapah cun namte ka thiat bet. Cule U Bikih phurh mi meithal cu a rit tuk ruangah ka sawngih keimah in ka liangah ka bat. Cutin cerek, namte le zunphir pawl thlaihaw thliaithliaiin U Bik dung ka hun thlun hnohno. Khua cu a thim zo nan thlapi a hung suakih lamzin cu fiangten hmuh a theih; a tawkdeuh lai. Lamzin cu a reh reprepih cucik kharbawk aipawl lawng theih ding a um thlang. Lamso ah U Bikih bike cu ka hun nor bawm phahphah. Cutin kan pahnih cu bike nor phahin tlunzin cu kan hun pan ṭeihṭo.

Tlang Pi khawhnar kan thlen zikah Pu Bikih fapalepawlin in ra hmuak thawn kan tongaw. Cutin inn kan thleng cu rualpi dangpawl tla himdamten an rak thleng zoih kan hmuaw cu kan zaten kan thaw a suak, kan lungawi tukih kan au khemkhem. Hivekih khual hla kan tlawntlang tikah duhdawtnak tla a pung cuang maw tin ka ruat. Kan zaten khual tlawng khat kan si ti mi thinlungin in pumkhatter cuang a bang. A zan cu ihhmuh a thaw duh ngaingai.

A thaisun cu Zarhpini a si ruangah Tlang Pi Bapitist Church ah kan khawmaw. Kei tla short speech ka sim ve. Biakinn khat thepthepin mipi an ra khawm ih kan hlunghlai ngaingai. Hla –laam (action song) le Bible siarnak a phunphun neitu Sunday School nauhakpawl cu ka uar tuk hai ruangah muthai (sweet) leinak hrangah paisa mallai ka rak laksawng ta.

Than Tlang kan pan:

Khawm kan theh hnu, inntek tei in dar mi suncaw kan ei khawh cun kan zaten Than Tlang panih poksal mai ding kan si. U Bikih bike cu a tawh on a ngahsal zo nan a mit van a theih lo lala! Khawthim lakih feh ding kan si fawn, cule ruah a rak sur thlurthlo rero ruangah lamzin khal a se bet nasa ding ti theih cia a si. Bike mit eng um lo to ih zan khawthim lakih tlangpar lamzin hlapi hun zawh ngurngo ding cu tuk a sum ko.

Tawkfang kan feh cun khua a rung thim mupmo. U Bik cun detmei tlet phahin bike cu ralring zetin a mawng vivo. “Mai Sok, ṭih hlah maw,” tin in run thlamuan phahphah. Asinan ka ṭih thotho. Lamzin cu a cancan le a bek, cancan le lung khokrok hlir, cancan le tidai a rak li detdet. Lamzin ka zoh le ka thin a phang dutdo. Curuangah lamzin zoh duh nawn loin ka mit  ka sing. Cule ka aw neih hmuah suah in Pathian thangṭhatnak hla ka sak ciamco!

Mangbang vansai lai, thinhar lai le ṭihphannak ton can ih hla vun sak ruangro thei hi thil ol a si hrimhrim lo. Sihmansehla, keimai hmuhton mi ihsin, cuvek can ih hla ka vun sak ṭenṭo hrim asile a rei hlanah thinharnak le ṭihphannak hmuahhmuah cu ‘mit hnawm lak bangin’ a hlo in ka zangkhai vuarvi theu. Pathian thangṭhatnak hla in huham a neihzia ka theifiang tuk. Curuangah U Bik khal ka hmaisong tuk ko nan hlasak in ka au vivo thotho.

Ka hla thiam mi: Don Moen hla, Hill Song hla le praise & worship hla dangdang ka sak theh in hymnal pawl ka sak vivo. U Bik cun a hla thiam mi ka sak ngah le bass in rak thlun phahphah. Cutin kan pahnih cu zintluan hla sak phahin kan feh ih, U Bikin, “Hitin hla na sak thei ih ka lungawi tuk. Ṭihphannak hmuahhmuah tla a hlo thluh,” tin in ti.

Hmun khat kan thlen cun rualpipawl rak hngak dingin zin kapah kan cawl.  Rualpipawl an ra thlen tikah Pu El-in, “Mai Sok, zintluan na hlasak kan run ngai phahih a retheihthlak pam. A lo phurtu kha zo a si ti thei awla cu a hna theih ah hla na sak ngam hrimhrim lo ding nan..” tin in ti. Kei cun, “Ziahsaw? U Bik cu ziangah maw?” tin ka sut. Pu El cun, “Solfa zirhtu a si kha. Hlaphuah thiam khal a si thotho. Na aw laai pi thawn hla na sak mi kanmah hmanin ngai har kan ti ahcun anih sinsin cu ziang rel ding um!” tin a ti. An zaten an hnih a suak tuk. Asinan kei cun,

“Ngeee.. U Bikin na hlasak ngai a nuam tuk.. sak rero aw in ti si. Si lo maw U Bik?” tin ka rak ti. U Bik cun hni tuttin, “Si tuk e, keimah in ka fial ruangah si a sak. Amai ruangah kan lamfeh a nom phah theh lam si,” tin in rak run. Sinan zohmanin cumi cu an zum hmel lo!

Than Tlang ah:

Zan nazi pakua le khuai hrawngah tluang zetin Than Tlang kan thleng. Kan zaten Awipi (Salai Ṭial Awi Thang) tei inn ah kan ṭhumaw (Awipi hi bezai le nunthuleng ngan thiam zet a si ih, Muko mekazinih Assistant Editor khal a si).

Awipi tei sung cun azanazanin zanriah in suansak ih a lungawium tlukin kan hmaisong zet. Zan kan it cu Ṭio tlawnnak ih hmuhton mipawl kha Pu El le Nhgepi in Awipi an ruah ciamco. Kei cu Aidii thawn khan dangah kan ittlang, asinan an tong mipawl cu kan ihhmun ihsin kan rak ngaive khiokhio.

Pu El in, “Mai Sok cu ziang, lamzin tluan Pathian hla sak in a au phah vivo ih.. a aw a tha maw ti sehla, tha hlah. Hlasak teh a thiam maw ti sehla, thiam cuang hlah. Zintluan in a hlasak cu paih le paih loin kan run ngai phahih a retheihthlakzia cu.. huihaa..” tin Awipi a sim mi cu ka rak theive thluh. Ka thinhengdan cu!

A thaizing cu Dr. Tawk Lian Bawi tei nupa in kan zaten rawl ei in sawm. Awipi in Pu El le kei cu bike thawn rak feh hmaisa dingin in ti. Curuangah Pu El in in phur ih rawl einak ding hmun cu kan pan. Pu El cu Hakha le Than Tlang peng ah theitu a ngah tuk ruangah lamzin tluan mi a be phah vivo. Hitluk misunglawi cu tiah Pu El cu ka fak rero. Cuisin Lansung kan hei thlen zikzawngah motor PK pakhat in phirit phaw in Pu El kha a kut a run zap. A cu lala.. theitu teh cu a va ngah lawmmam ve ka ti. Sau hman feh thiam loin an rak be cingcing tin ka ruat phahphah. Pu El cu cumi pai kiangah a va ding. Anih, helmet kan khum lo ruangah in rak kai mi si cuh!

Than Tlang ih thil danglam ka ti mi pakhat cu, lakphak dawr ah plata/puri le hmakphek an hmeh mi hi mak ka ti zet. Ka hun ei ve hnik ih.. wow.. thaw lawlaw! Ka zongsang cih rori. Tuihlan hmuahhmuah ah plata/puri tivek cu kalape thawn hmeh a rak si tlangpi theu. Tu, hmakphek bawl thawn hmehdan ka thiam thlang ih ka hrangah cun Than Tlang hngilhlonak a si ko.

Peh vivo lai ding…

Comments

comments

One Comment

  1. E.Benjamin.min says:

    Mai Sok, hlasak kan zuamaw leh pei, ka caak tuk!

Comments

%d bloggers like this: