Hello! Chinland (6)

Hello! Chinland (6) 

Mai Sokhlei Par

 

Kan long a let!

Hla sak ih ka au tualto rero laiah ka mit ka vun meng cu.. Nhgepi in a thupten in rak zuk rero kha a rak si! “Hey, paparazi!” tin ka hei auh. Cuti kan biakawk laiah M-te tepawl khal an ra thleng ve. Cutin long parah an ra to ih tlung dingin kan pok.

Rei kan to man lo. Kan long cu feh kan tumnak hmunah feh duh loin in fenpi luailo thlang. Tidai cu a thuk ciamco lo nan tisuar a khoh tukih kan hlau neh lo a si ding ka zum. Mipapawl cun theitawp suah in an hlau rero, sinan kan long cu a fen thotho. Cule lungto tumpi a va su ih kan long cu a sawn luihli. Cucun long sungah tidai pawl an ra lut ciamco thlang! Kan long hlaunak fung khal tidai ah a tla ih sar tum in ka hei dawh. Sinan pacang pakhat in sar lo dingin in rak auh. Cutin long hlaunak fung cu ti in a fen hlo ta. Kan long cun ti khohnak lam a pan cuahco. Cumi a hmuh cun M-te cu a dawpthla. Cule mipa dangpawl khal an zuangthlave cih. “Dawp uh, dawp uh!” tin thlaphangin in auh ciamco. Asinan Nhgepi, Aidii le kei cu zianghman ttih hna thiam loin kan to eueu.

Taktakah cun tiva thuhla kan theih lo tuk ruangah a ttih hna kan rak thiam lo mi men a si. Hi tiva hi a thuk lo nan lung khokrok tumpi pi an um ih, tidai ih tlak pang cun long le a hnuaiih lungto karlakah minung kha a taangih, cangvai thei nawn loin an thi lanta theu tiah lehhnuah kan theisal.

Long sungah tidai an ra lut cupcoih kan long khal a pil zik cuahco! Aculailakah Paul lamlam ka vun mang. Titanic teh ziang ce! Mipapawl cu ti sungah ding in kan long cu an kut thawn an tul ciamco. M-te in a tha neih hmuah suah in long cu a kapih lungto ah a va sawh. Cucun long cu fen nawn loin lung karlakah a taang. Lungto thawn an sawhawk ruangah kan long cu a lei ih, long sung cu tidai thawn a khat cih. Culawngah kannih khal nuamnaiten long parin kan hun ttum hnuanghno ve.

Kan sidanpawl cu thlaam ih umpawlin in rak hmu theh nan annih khal thinphannak cang an rak thiamve lo. Long neitunu in hi tiva ah mi tampi an tlak that zo thu thlaphang zetih  a va sim tik lawngah lungphangin an ra tlan hai. Cutin an zaten long dirhsuakdan ding an ngaihtuah.

Long cu hrihrual thawn an tten. A hri khatlam cu tikap thingkung tumpi ah an va khit. Cumi ihsin an dir ciamcoih long cu an dirsuak theisal. Asinan a hlaunak a um nawn lo ruangah to a ngah nawn loih kan zaten kut kaiaw in tidai cu kan hei tan. Culaifangah ruahpi a rung sur ciamco betbet.

Cangvat!

Tiva kan tansuak cun ral khatlam (India ram a si thlang) ih thlaamte ah kan va beu. Cui thlaam cu lakphak le sang zuarnak hmun a si ih, remcangah meisa tla an rak tik alh hluahhloih kan va ai vialvial. Cule lakphak tla kan cah ih biscuit thawn kan hmeh hai.

Ruahti in in toih ciar theh ruangah khua a sik tuk. Ka khua hlum deuh seh tiah ka ke cu meisa naihdeuh ah ka vun tthawn. Cucun ka kebeu ah thil a dum mi te, bet ngerngi kha ka vun hmu dukdi. Ciarbek mawsi tiah ka vun zohfiang..

“Cangvat!”

Cuveten ka aw  neih hmuah suah in ka raak ciamco. Ka kiangih to M-te cu ka pombet cutci; ka thlah duh nawn lo. Cangvat cu ka zoh ngam lo ruangah ka hmai cu dunglamah ret in M-te cu ka pom fetfet. Cule ka ttap!

“Ziangsi? Ziangsi?” tin M-te cun thlaphangin in sut. Ka tongsuak thei nawn lo. Ka hmaiih to pakhat in ka ke ih cangvat bet cu a hmu ih, “Cangvat si kha,” ti phahin a la lohli. Kei cu tthia thlohthloin M-te ih baan pawk in ka ttap rero. Cuti ka um lai cu Nhgepi in in rak zuk huahho bet lai. Ka mitkemdan cu!

Can tawkfang hnuah kel ka hung awh theisal. Asinan ka tha hmuah a cem theh vekin ka theiaw. Cuti ka thatsal an hmuh cun ruah tla a han vivo thlang thawn kan zaten kan thlaam panin kan tlung. Kei khal ttap hnukhno phahin..

Thlaam kan thleng cu kan hmuhton mipawl an relkhawm celcel. A malbik mi pakhat tal cu kan thih an zum thu tiva thuhla theifiangtupawl in in rak sim. Culawngah a ttih hna kan thiam lai! Asinan kei cu an lakah ka tel thei lo; thlaam sungah ka lut ih ka hnipuanpawl ka thleng theh hnuah puan lukhuh in ka it. Ka lungphang a reh thei lo; ka lau ringring lai.

Rualpi lakah tlang thei loih ka um ruangah Pu El cu a thin nuam loin a hung kai ih, “Mai Sok, tap nawn hlah aw. Thihnak in nan luat zo si. Nan long a let ruangah ziangtluk na tih ding ti cu ka lo theihthiampi ko. Sinan tap nawn hlah aw, rualpipawl tla an thin a nuam lo zet sokhaw,” tin in ra lem.

“Long let tih ruangah ka tap lo. Cangvat ka tih ruangah si ka tah,” tin ka rak ti. Cucun Pu El cu a khawruahhar sinsin. “Ziang, cangvat tivek cu a lo keu khalle thihnak si lopi! Long let kha sokhaw na tih ding mi cu. Nan vanthat tuk ruangah nan thi thluh lo fang. Cumi hman tih loih ziang mi tuahmawh thei lo cangvat lamlam tihsawn cu..,” tin in kawk ciamco. Asinan kei cun ka duh cuang loih..

“Asikhalle long let hnakin cangvat ka tihsawn thotho,” tin tap puaipo phahin ka ti. Cucun Pu El cun ka cangvat tihzia a fiang rori. Cunah, “Asile Mai Sok, tuizan teh kan riak hrih kem? Tlun teh na duhsawn maw?” tin in sut. Kei cun, “Tu roriah ka tlung duh!” tin nauhak men bangin ka rak ti cih.

Tawk rori seh! Lailam nundan ka thei lo asile ngan lo’n ka um niakno men ding. Hivek cangvat rul lakah cun material hawl in ka vak kuatko dah nawn zik lo; tidai ih ka tlak thatlonak hman malte lawng a sam. Hivek tihnung le tuksumza lakah ziangha ka ra ti duahdo.. sum hlawhnak le si ta lo; a zoi’ tuanvo pek mi khal si hlei lo, hi lawmmamih ka retheihpit ciamco… Lairalpawl daan ten, Ruma-Rama!!

Peh vivo lai ding…

Comments

comments

Comments

%d bloggers like this: