Hello! Chinland (4)

Hello! Chinland (4)

 Mai Sokhlei Par

Kan Debate:

Pu El le Nhgepi ih ṭong ka theih thluh cun ka tho ih ka to. Cule, “Nupinu paikawng khat ih thing a phurh kha a pasal ih fial ruang a si lo hmanah, innsang hrang ruat ih amah te phurh mi a va si khalle, ziangah a pasal in a zoh men thei? Khami kha si ka mangbang mi cu! Ziangvek thinlung thawn si kut lawngih a ra tlun ngam? Khavek kha maw kan Lai identity? Khavek kha maw kan lungput ding cu? Leitlun hmaiah nan pholang ngam kem?” tin thinhengzet in ka ti.

Nhgepi cun, “Sunvu ten a pasal in ziang a ṭuan ti na thei maw? An hnaṭuan rengreng a bangaw lo, nunau tuan thei lo mi hna hmuahhmuah mipa sokhaw ṭuan thehtu? Lo vah, lo ur le cahmangkhawh tivekah a nupi a phut dah maw? A fial dah maw? Sunvu an hnaṭuanzat ruat sehla mipasawn in a thazang a hmang tamsawn sokhaw. Thaten ruat aw,” tin a ṭang.

Kei cun, “Thazang hmannak lam cu rel duh hlah. Pathian in milai a rak sersiam laiah mipa le nunau bangaw lo dingin a rak sersiam hrimhrim. Bible zoh awla,  Pathian in nunaupawl ral do a rak fial dah sawm? Kan thazang rengreng a bangaw lo. Tuisun ih nupa te kha, an thazang neihzat sungih an hmanzat veve zatek in ruat bang sehla an bangawk ceng lo hmanah, nunau khan a thazang a cem tamsawn tengteng ding. Ziangah? Zing khawvang hlan ihsin nunau cu a tho ih rawl a suan laiah, a pasal cu a rak hngawk thlukthlo rero lai hokhaw. Lomi tlun hnu cun mipa cu a man hiahhiah, sinan nunau cun innsang hnaṭuan a peh vivo lai hrih. Zan ih cut tiang a kut awl loin hna a ṭuan. Culaiah mipa cu ziang a tuah? Zaute ah tisa in in rualpi a kawm men! Ziang na sim duh hrih?” tin ka ti.

Asinan Nhgepi cun, “Nunau na ṭan rengreng. Tu san cu Gender bangran san a si zo; sinan nannih Lainupawl cu mipa hnenih hnoh cukco le mipaih duat nan beisei rero lai thotho. Khami nu khal kha a fair lo tin a ruat asile thing cu a phur lo thei ko ual. A phur duh ruangah a phur mi asile ziangsi na sim duh? Phur duh le phur thei, phur duh lo le phur lo thei; amah a right a hmang mi asile teh?” tin in ti.

Kei cun, “Khami nu in, an innsang hrangah a pasal thawn tuanvo bangrepin an nei ti thei cingih amah lawng thing a phurhnak san kha si ka ningnatertu cu! Kut lawngih nunau lo-mi tlung cu mize tivekin tuihlanah convinced an rak si ruangih khavek cang mi a si kha. Nunau kut lawngih tlun cu a thiang lo tin a zum; sinan a pasal kut lawngih a tlun kha cu mipa right ah a pom cuh; _ziangahtile hlanlai ihsin khatin an rak feh ruangah. A pasal khalin khati ding hrimhrim ih a ruah ruangah phuhrunawknak le ningzahnak zianghman a neih lo kha,” tin ka sawn.

Atawpatawpah Nhgepi in, “Nunau cu duat le ngaihsak nan duh rengreng. Ziangziang right le equality pawl nan aukio rero nan, nan cumi thinlung cu ziangtikhmanah nan rehter thei dah cuang lo ding.. mipa rinsan duhnak tivek kha,” tin a ti.

“Si tuk e. Cumi cu kan bangawklonak ciah cu a si cuh. Nunau, ziangtluk sinak sang le thazang khohkhah a si hmanah duat le ngaihsak cu a duh ringring thotho ding. Curuangah si, mipa fim cun nunau kha nunau zetin an zoh (treat); an duat, an dimdoih, an ngaihsak ih ahleicein mi lakah upatnak thawn an be theu. Khavekih nunau zohdan thiam mipa cun nunau-ih thinlung cu a zaten a co ngah si ko. Mipa teh? Nunau ih rinsannak le upatnak nan co ngah lo cun nung cingih thi tlukin nan tuar; nun man nei nawn lo tlukah nan ruataw. Nunau cun mipa ih rinsan le upat ciamco kha kan hai lemlo nan, mipa hrangah cun nan nunnak a si! Curuangah si ding, Paul in, mipa in a nupi duhdawt dingin le nunau in a pasal upat dingih a rak fial! A thupi mi cu kan bangawklonak kha cohlangaw ton sehla, kan ṭulsam mi kha phuhrusakawk tum veve ding a si ko. Cumi kan tipitlin theinak dingah cun mipa in nunau hnenin ziang ngah a duh ih, nunau in mipa hnenin ziang a hlam ti mi kha theihsakawk ding hi a thupi tuk,” tin ka ti.

Kan ṭong a rak ngai khiaukhiautu Pu El cun capoh in, “Mai Sok, zan caan ah mipa in heh-chet tiah thazang hmuahhmuah suah ih kan cangvaih laiah, nunau cu nan rak it ziarzi menih nan hlawk tuk ko khah,” tin in run ti.

Kei cun, “Aih..aih, Pu El, Chinram ih nupinu hmuahhmuah in thudik sim ngam ngat hai sehla cu an nupa nun ah orgasm ka ngah ringring a titu hi 1% hman an um lo ding ka ti ngam! Mipa in orgasm ngah lo can nan nei dah sawm! A umzia cu, mipa in nan nompi ringring mi kha nunau cun an tep banve lo lawlaw tinak a si,” tin ka rak el thotho.

Cuti kan ṭong rero laiah nga kaitupawl an ra tlun thawmvang kan thei ih, kan pathum in inn hnuaiah kan vung tum. Nga tamzet an run kai ih lungawi in kan lawm rero hai. U Bik in zanriah hmeh dingah a tawlrel rero laiah, nga tumbik kha in hrilsak ih tappi meisa ah in emsak. Tawkfang cun ngasa cu a hmin tariai. Ka vun ei cuh.. aih! Ṭ io nga an rak ti ṭheu mi kha ka vun mangsuak ruahro. A thawtdan cu a reldan tla ka thiam lo. Manhla tizetin Ṭio ngasa em hmin sa vohvo cu ei phahin Pu El le Nhgepi lepawl tla seherh takin ka hei hlawmve hai.

(Visited 253 times, 1 visits today)

Comments

comments

One Comment

  1. Dear Mai Sokhlei par pathian thlawsuah hmui fu dong ding in na hrang thlaza ka lo camsak ring ring asi.

Comments

%d bloggers like this: