Hello! Chinland (3)

Hello! Chinland (3)

Mai Sokhlei Par

Zin ah lo-mi tlung kan tong:       

Tio pan ih kan feh rero laiah in phurtu U Bik (Pu Siang Cung Bik, CNP Secretary, Than Tlang) cu mi biak paihzet mi a si vekin, zin ih a ton mi a hmeltheihpawl cu a hei be phah vivo. Culaiah lo-mi tlung nupa thawn kan tongaw ih, U Bik cun a bike cawl in cutei nupa cu a be hai. Cuti an biakawk laiah cun kei cun cui nupa te cu fiang deuh in ka rak zoh rero. An nu cu kum 50 hrawng a si hmel, lo feh tifam cu hnipuan se nawn a hruh, a lu ah peikawng khat hnenhnenin thing a phur; zoh men hmanah a bangzet ih a thil phurh mi khal a ritzet ti a theih theih. A pasal ka vun zoh, aih, ka hmusual maw! A pasal cu zal te a pai ih, a kut in namtong sau tuk lo hi a hum. A taksa pum ih a thil phurh mi hmuahhmuah cu cuvial cu a si!

Nupa te cu ka zoh ka zoh ih ka thin laiah a vung na zukzi. Ka bag sungih camera ka vun phorh, power ka vun on. Asinan ka zuksal lo; ka zuk siang lo kan tisawn pei! Cutin camera cu ka bag sungah daiten ka khumsal. Cule kan fehsan.

Tawkfangah Nhgepi’n in run dawi man ih, “Pi Sok, mituih nupa kan ton mi kha thaten na rak zoh maw?” tin a bike mawng phahin in run auh. Kei cun, “Zoh tuk famteh. Mahte hman thin na in ka lungkuai tinak laiah.. ka rel paih lo,” tin ka ti. Nhgepi cun hni setset in, “Na ngaidan a si lo nasa ding ti ka thei cia ko. OK, Ṭio kan thlen tik le kha ruangah ziangah na thin cu a na ciammam timi thu kha kan rel peh lai ding. Nang Feminist tiah rel ding na ngah zet ding ka zum.. hehee..” tin in run ziau. Cucun kei cu ka thin a hung sa hluthli ih, “Ziangtikah maw ‘Feminist’ ka rak si dah? Na duhduh in puh hlah! Na hlanlai pupapawl ih atnak le diklonak relsuaktu si dingin ‘Feminist’ si kherkher a tul masi? Mipapawl cu an diklonak relsuak ngamtu minu pohpoh Feminist ah an puh thluh theu an ti mi hi a rak dik ding a bang.. hehee..” tin ka hei auhkirve. Nhgepi cun  ti sursi’h hni phahin, “Tuizan le kan peh ding. Tu cu lamzin zoh phah tul thawn a rem lo,” tin a tiih in fehsan.

“Tuizan cu nan titi ngai a nuam nasa ding a si hi.. hehee..” tin Pu Bik in hnihsuakzetin in rak ti. Cule a cawl ih zinkap ih thinghnah phun khat kha a va ttot; kei cun mangbangin, “U Bik, khami cu ziangah si na ttot rero?” tin ka sut. Anih cun, “Hihi ttittiam tin an ko; anthur vekin a thur. Ngasa thawn kan suang ding,” tin in sim. OK, ttittiam, ka hminsin zo!

 Ṭio ah:    

      

“Khikhi Ṭio cu a si khi!”

In phurtui in khihnak hmun cu thin phu dukdo phahin ka vun zoh. Tlang par ihsin ka vun hmuh mi Tio Va cu a mawi tuk lawmmam. Ti kapah inn (thlaam kan ti deuh ding simaw!) li-nga lai tla ka hun hmu thei. ‘Tio ka thleng tariai!” tiah zum harsa tizetin ka tiaw rero. Hitawk hmun ka ra thleng ding  ti hi ka rak ruat dah lo. Pathianih lam in hruaidan mawizia hi tiah ka thinlungten A hnenah lungawi thu ka hun sim cih.

Tio kapah buk te khawh ih riak tum kan si ruangah kan zaten tiva kapah hmun remcang hawl phahin kan feh vivo. Cutin hmun khatah kan tthumaw ih, mipapawl cu meipi sepnak ding thing ro hawl na, buk saknak ding rak tawlrel na, zanriah suannak ding rak timtiah na, an buai celcel. An lakih minu umsun Aidii le kei khal meisa muahnak ding thinghniar hawl in kan rak phartliove ciamco. Tawkfang cun kan meipi sep mi a hung alh hlio vutvo kan hmu cu Aidii thawn lungawi in kan tur kan zuang.

Tio tiva luang awn surso le hramlak ramsa phunkim thawmvang lakih zan kan vun riak thlang ding cu kei cu ka phur lawlaw si ko. Ka nauhak deuh laiah ka pu tei lo thlaam ah ka rak riak dah. Asinan hivek hramlak ngaingai cu ka vei khat thlen dahnak a si ih, ka hmuhtonnak thar cu ka hlimpi ngaingai. Hitawk hmun hi ‘Tio Khaw Nuam’ tiah kawh a si ih, innkhi paruk lawng a um. Ral khatlamah inn hnih lai a um ih, kan umnak ihsin hei hmuh a theih.

Kan meipi khal a alh a tha thlang ti zawngah tlunvanlam ihsin khawpi maktarain a rung ri durdo ciamco. Sinan ruahti cu a tla hrih lo. Pu El (Salai Joel Ling, Chief Editor, Muko Mekazin) lepawl cu Tio Va kapih thlaam lamah an va feh, cule upa pakhat thawn an ra kirsal. Cui upa cu U Sang Hlun a si ih, Tlang Lo khaw lal a si. Anih cun, “Ruah takzetin a sur thlang dingih, hivek lakah nan riak thei lo ding. Curuangah nan tim tuahaw uhla nan zaten ka thlaam ah ra riak uh. Culocun zanvar ruah in a lo toih dingih, nan na theh ding,” tin in ra ti.

Cucun kan zaten kan thilripawl kan seng ciamco lala. Tawkdeuh lai, U Sang Hlun tei inn cu tiva kap roriih um a si ih, tui kan umnak thawn a hlataw lemlo. Cutin kan zaten kan pok ih, U Sang Hlunih thlaam ah kan va tthumaw. Cui thlaam cu sawng hnih a si ih, a hnuai coka, a tlun ihnak a si. M.te, Aidii le midangpawl cu an hnipuan an thlengaw ih sur vorh dingin an suak. U Bik tei pafa cu coka ah meisa an muah ih, zanriah suang dingin an buai vutvo. Pu El, Nhgepi le kei cu inn tlun ah kan thilripawl kan remtha, inn kan thianfai ih zan ihnak remcang dingin kan rak tawlrelve.

Khua a thim cupco thlang. Tawkdeuh lai, khuaifar (candle) fun khat ka rak keng! Culosehla cu meisa van ding hman kan hmu lo ding. Ziangahtile hitawk hmunah cuvek zuarnak dawr a um lo.

Kiangkap cu sahzet in a thim mepmep zo. Van in nimthla a rung kau zukzo, khawpi a ri durdo, thli a hrang huho. A cancan le kan thlaam te cu a rung hninaw luihlo. Cule, ruahpi van awn in a rung sur thlurthlo! Ruah takzia cu a bung in a bung. Khawsikdan tla a mak! Tapthlang ah blanket sin in ka it, khatlam kapah Pu El le Nhgepi puan lukhuh in an rak kualve. Culaiah Nhgepi in hngilh loten,

“Pi Sok, lamzin ih kan ton mi nupa thu kha kan rel peh pei. Mipa sawn kut lawngih a um laiah nunau cu peikawng khat thing phur phahih lo-mi tlung na hmuh ruangah ziangah na lungkuai rero? Sunvuten mipa in nunau tuan thei lo mi hna khunghar zetzet a rak tuan thluh mi hmuah theihsak duh loih, nunau ih peikawng khat thing phurh mi hmuah thei hlehle cu.. nangmah hi na fair lo tuk rengreng si hi. Sim hnik aw, ziangah na lung cu a kuai?” tin ka sahuatnak tok in lo-theih-loih tong dingin in turhhnawh ciamco.

A cu laiah Pu El in, “Si ee, Mai Sok, khavek cu kan Lai daan a si koih, a nupi khalin thil fair loah a ruat cuang lo ding. Cule, a pasal in a duh lo cingih a fial hrim mi tla a si lo ding;_ amah ten a innsang hrang thahnemngaiah a phurh mi si ko ding. Cumi ah ziangsi thinnat ciamconak ding um lem? Culole khavek khal kha mipa in tuahsak thluh seh na ti duh deuh maw?” tin ka thinheng theinak dingah a rak bet velvo. Cucun ka kaa ka cip thei nawn lo; fur lihong bangin tongfangpawl cu khamtu nei lo’n ka awmsung ihsin an hung luangsuak huho thlang!

Peh vivo lai ding…

(Visited 302 times, 1 visits today)

Comments

comments

2 Comments

  1. siar a nuam ding a bang kan rak cuan hnik pei.

  2. Na ca ngan mi ka siar ring ring asi.

Comments

%d bloggers like this: