Hello! Chinland (10)

Mai Sokhlei Par

 Rihli ah:

Ka mit rori ih Rihli ra hmuh ding hi ka sunmang a rak si ringring. A takih ka vun hmuh cun zuk ihsi ka rak hmuh theu mi hnakin a mawi in a rak nuam sawn. A hmun ra thlen hrimhrim hin thin hmuah a daiter thluh thei.

Zarhpi zing, zingpit teah Rili ah ka feh. Ziangahtile Zarhpi ni tivekah cun lengtu an tam tuk ding ruangah thaten ka zuk ngah lo pang ding ti ka phang. Curuangah lengtu zohman an thlen hlanah ka feh ih, duhsahten ka zuk ciamco. Rihlipi cu pawl riahri ten a phahaw diahdiah; a kimvelah thingkung phunzakip a um; partiam kung tum zetzet hnuaiah tonak bench tete don a si ih, tili parah cun rampai rual khat ti an leuh, khatlam tlang hram ah serualpawl hrampi piat le nitlang ai phahin an tlang, zing nisuak no te in tili cu ti sersi ten a run tlet ih.. Rih mawizia cu kaa in siseh, cafang in siseh sim theih ding si’n ka ruat lo.

Partiam hnuaiah

Partiam hnui ah

Rihli cu tipithuanthum ihsin feet 2966 sannak hmunah a um ih, a kimvel cu peng hnih le hrek ih kau; atlangpithuin feet 50 tluk a thuk ih, a thukbiknak cu feet 60 a si, ti a si. Partiamkungpawl cu Rihli kimvelah khuanui siam in an kho ih, cui thingkung parah cun leitlunih hmuh harzet thingkeppar phunphun an kho hai. Cun, a mak zet mi pakhat cu, fur ruahpi a sur tam tuk ruangih tili pianhmang se thluh thei ding dinhmun thleng zikih a um tikah tili thlanglam tlang hnuaiih um, furlong thum sau lei kaw sungah tidaipawl cu an vung luanglut huho theu. Curuangah Rihli cu fur, thal, thlatang… ziangtik lai caan khalah a pianhmang vek tei a um ringring theinak dingah cungkhuanu in a kilveng ringring.

Rihli ah dawr pakhat lawng a um; a neitu cu U Kan Hla @ Pu Lal Khaw Chhan a si ih, contract la ih dawr ra tuah a si. Riahbuk (Bungalow) a um, rawl le in ding phunphun ngah a theih ih, tili helnak hrangah boat khal san theih a si.  Boat to ka duh tuk nan keimah lawng to ding cun thla a ttem deuh ruangah ka to tum lemlo. Tawkfang cun lengtupawl an ra thleng cupco; India ram ihsi ra leng an si tlangpi.

Rihli ra lengtupawl cu mino deuh lawnglawng an si. Picnic ih ra tla an um ih guitar an tum, hla an sak, game phunphun an lekaw ih an nuamaw ngaingai. Pingpong thawi, volley ball lek, tidai leuh le beer in phahih boat to.. umdan phunphun, tuah mi dangdang thawn Rihli cu a hlunghlai ngaingai.

Ziangtikah simaw cun hi Rihli cu leitlun minungpawlin an thei lai dingih cumi tikah cun Chinram khal hi ‘Rihli’ zarah ramtin minungpawl thawn an khat luihlo lai ding

Rihli le a kiangkap pawl angel phun ih ka zuk rero laiah India ihsi ra leng, tour group pakhat in in ra pan ih Rihli thuhlapawl in sut ciamco. Kei khalin ka thiam tawk le ka theih tawk ten ka rak simve hnuaihno. A poinak cu an Mirang tong ka thei thei loih, annih khalin ka Mirang tong an theithiam ve lo. Cutin kut le ke pawl thawn kan ttang ih kan beaw ciamco. Kan theh in boat to in sawm ih kan zaten boat thawn tili kan hel hai. Kan nelawk thluh zo ruangah kan au bengbengih kanmah tawk te cun kan nuamaw zet.

Nauhak rual khat an ra thleng. Pahnih thum lai cu tidai ah an ttum ih ti sung ihsin thinghnah phun khat hi an run dirsuak theu. Cumi ka hmuh tikah ka va pan ih thu ka sut hai. Annih cun an thil hawl mi cu ‘Rih Par’ tiih kawh a si thu, tili sungah an kho ih kung hnihkhat kha palang sungah tidai thawn than in ‘Rih Ngaihhri’ (Rih Ahmattaya) tin an zuar thu in sim. Lang khat ah Ks. 200 a si ih, kei tla ka rak leive. Rih ra lengtu pohpoh cun inn tlun dingah (mai hrangah le midang laksawng pek dingah) an lei tlangpi theu tin nauhak pakhatin in sim bet.

India tour group thawn boat to lai

India tour group thawn boat to lai.

Hi Rihli ahhin kum khat pakhat tal cu tidai tla that an um theu ih, cupawl cu khualkhua ihsi ra lengtu lawnglawng an si tiah upa pakhat cun in sim. Cule hitin in sim bet, “A hmun umpawl cun hi tili ih ziaza, a thukdan le a khohdan pawl kan theicia. Asinan khaw dang ihsi rapawl cun zianghman thei lopin ti an ra leuh, ralring lo zetin ti an lek ih curuangah an ra cangsual theunak a si.”

Mizoram ihsi Rih ra leng, ‘J-a’ ti mi palik bo hnih pakhatih in sim mi tla cun ka thinlung a khoih tuk. Anih hi border gate ah tuanvo a neih laifang a si ih, a sim mi cu, “Nan Kawlram palikpawl cu an zangfahum tuk. Bo hnih ciocio ah kannih lam cun thla khat ah Rs. 3000 kan ngah laiah, Kawlram palik cun Ks. 20,000 (Rs. 1250?) hrawng lawng an ngah. Ziangmaw nikhua (ni thupi) tivek len kan hnipuan le boot tvk in ra sang theu ih kan zangfah thei ngaingai. Amahlawngte, thil pakhat a um mi cu, kannih lam cu kan sinak thawi mil mi quality kan nei theh; nannih lam cu duhsakawknak le nawhthuh (bribe) ruangih sinak kai tivek nan tam tuk lala. Curuangah sinak bangaw ciocio khalah kan quality cu lei le van in a tanaw rori,” tin in sim. Ka khawruah a tamter nasa!

Tawkfang cun Rih tansan ih tlun a cu thlang ding. Curuangah Rih le a kiangkap cu khop ten le duhsah ten ka zoh, ka zuk rero. Tili kap thingkung hnuaiih tohkham sau parah to in khua ka hei cuan. Zilthli nem ten a hung hrang diahdo, kiangkap thingkungpawl keh le vorh ah an hninaw leihlo, vate hlasak awn a rung thang phahphah, tili sungah van mero cu pawl riahri ten an zaam.

Ka nunthuleng hrangah hmunlehmapawl cu ka zoh, ka hawl, ka thlir ih ka ruat phah vivo. Ka thinlung mitthlamah tourist-pawl ticelcelih an lenvah laipawl a lang nasa. Ziangtikah simaw cun hi Rihli cu leitlun minungpawlin an thei lai dingih cumi tikah cun Chinram khal hi ‘Rihli’ zarah ramtin minungpawl thawn an khat luihlo lai ding.

Rihlipi, kop nei loih mah lawng ra lennak dingah cun a pamhmaium tuk ka ti!!

Peh vivo lai ding..

Comments

comments

Tags:

One Comment

  1. Dear Mai Sok

    Na photo a mawi law law si.Zoh ……….. asi.

Comments

%d bloggers like this: