Helicopter Hmangin Thawngtla Tlansuak

February 23,2009.
Helicopter Hmangin Thawngtla Tlansuak
Mizansun  simlam nazi 3:30 hrawngah Greece ramih Koridollos thawng In ihsin Misual hminthang mirukhlo hmang Vassilis Paleokostas, leh a ruapi  Albania mi Alket Rizai cu  Helicopter hmangin an tlansuakih. Himi tei pahnih hi tuihlan kum 2006 khalah himi hmunih sin hivek cekci in Helicopter hmangin anrak tlansuakzo. An thawng tlaknak Korydallos  thawng In tlunah an ruapi pawlin Helicopter hi an ttum terih hridai an thlakih cumi cu an vawkso ih an zuanhlopi asi.
Hi mi an zuanzawngah Thawngtla kiltu Police pawlin anhmuih an kap ciamco nan Helicopter sungih sin nuanu pakhat in Machine Gun in Police pawlcu a kap ciamco veih an tlansuak thei asi. Himi tei pahnih ih tlansuak nak Helicopter hi hmunhla pi tlanglak lamzin pi parah hmuh sal asinan  an mahpawl cu an raktlanhlo thluhmanih. Himi kiangkap pawlhi Paleokostas ih rak umtheu nak leh a rak relh ttheu nak hmun a si.kum 2006 ih hiti vek thotho ih an rak tlansuak ttun ah cun police pawlcun Cozah Upa pawlin thawng In an rung zohzik asi dig tiah an rak ruatih ziangti hman in tinak cang khal an rak thiamlo.
Poleokostas hin tuihlan ah milian hminthang George Mylonas a rakru hlo zoih a tlensuaknak paisa tamzet an kuanhnuah suahsal a raksi. Himi an tlansuak theinak ding ih raktawlrel saktu a naupa Nikos cu kaih ih thawng thlaklai asiih. A ule pawl an tlansuak hnu tla ah cun fimkhur zetih an kilhim zum asi.Hi Thawngtla tlansuak Poleokostas, hin thawng In sungih a umlai ihsin Lawngthawi sumdawng milianzet rukhlo danding khal a tawlrelih A rualpi pawlin hi Miliamzet pahi an rukhlo hnuah  dollar Million 38 in an tlensuak aw ter a si.  An tlansuak nak hmaisa zohfiangtu pawlcun hi Korydallos thawng In tlunah hivek Helicopter tumthei lo dingih thirsur zar a ttul tiah an simnan tisuak nak a umcuanglo ih tuittum ah Helicopter thotho hmangin an tlansuaksal asi.
Cairo Khawpi Ah Bomb A Puak
Mizanzing ah Egypt ram Cairo khawpi ih Khan Al-khalili bazar ah Bomb a puakih minung pakhat a thi ih midang 25 in hriamhma an tuar. Himi Bomb puakthu thawi pehpar aw in minung pathum an kaihthu Cairo Police pawlcun an sim. Hi Bomb puakih mithi leh hriamhma tuartu pawlhi ramdang mi deuhhlir an siih mithi hi Franch mi Fala  kum 17 mi asiih hriamhma tuartu pawlkhal hi a tambik cu Franch mi an siih. Franch mi minung 17 in hriam hma an tuarih  German mi 4 leh Egypt mi pathum pawl an si.
Himi Franch  pawlhi fala leh tlangval hlir an siih Franch ram  Paris khawpi ihsi Cairo tlawng mipawl minung 54 sungih ta an si.  Hi Bomb puahnak hmunhi kum 1,500 hrawngih Upa Khan-Al Kalili bazar asiih himi hmunhi ramdangih si Cairo khawpi tlawngpawlcun an pal ringring mi asi. Hi Bomb puakih thi leh hraimhma tuartu pawlkhalhi  Cairo khawpiih ni ziang mawzat an camhnuih an tlunzikzawngih bazar thilri leiih vak mipawl an si. Franch President Nikolas sarkozy cun  Cairo khawpi Bamob puak ruangih  Franch fala a thileh midang tampi in hriamhma an tuar cu pawi a tithu simin a tuarpi thukhal a sim.
Sri Lanka ralkap leh LTTE
Sri Lanka Cozah ralkap pawl leh LTTE Tapung pawlcu tihni sunih sin nasazet in an kap aw ciamco salih. Sri Lanka Cozah ralkap pawlin an simnakah LTTE Tapung minung 73 an kahthat thu an sim.Cui tlunah mizansun ah LTTE pawlih hmunpi a tangsun Mulaitivu khal nasa zetin an kap bet vivo ih. LTTE pawlcu an dinhmun a se zet thlangih an Uk mi ramkhal a fiakzetzo tiah an simbet. Sri Lanka Cozah ralkap pawlhin Mullaitivu hi hmuntin kimih sin an kap rero ih LTTE pawlih ralthuam tuahnak hmunpi an laksak zo thukhal an sim.
Sri Lanka Cozah ralkap pawlleh LTTE pawlhi Zarhte sunih si khan Puthukudiyirippu leh Ampalavanpokanai kiangah an kai aw salih. Sri Lanka Cozah ralkap pawlcun an raldo nak cu an tthehzik te tiah an simih. LTTE Tapung pawlih ruang 11 an sarih LTTE Tapung nunau ruang sezetzo mileh a kenmi ralthuam pawlkhal an sar thu an sim. LTTE pawlih hmanmi Electric Genarator khal an sarbet thu an sim.
UNHCR Hotu John Solecki An Thah Leh Thah Lo Fianglo
Tuithla ni 2 ih Pakistan ram Quetta bialih  Bolochistian Liberation United Front (BLUF) pawlin an rukhlo mi  UNHCR hotu John Solicki, ih thuhla ah thuthang dangdang a umih . Thuthang hrekkhat in an simnak ah John Solicki, hi an thatzo tiah an tarlangih. Asinan UNHCR thu puangtu cun hithu hi a hnen a thlen hrihlo thu a sim. Pakistan TV channel hrekkhat cun  Mi  pakhat in Quetta Press Club bia in John Solicki hi an thahzo thu leh a reihlanih a ruak an hmuh thei ding thu a sim tiah a tarlang.
Police pawlcun himi Quetta Press Club betu hi an zingzawi cihih. Balochistan lamih si biakmi asi tiah an sim. John Solicki hi Quetta ih UNHCR hotu a siih tuithla ni 2 ah khan meithal ih tin in rukhlo asiih. A Motor mawngtu cu kahthat cih asi.(BLUF) Tapung pawlcun John Solicki hi an kutsungih a umlai thu an sim ih (BLUF) Tapung pawlcun Pakistan thawng In ih an mileh sa nunau minung 141 pawlcu suahter an duh thu an simih, cumi lo midang an mi leh an sa an thuhla an theih theilo mi 6,000 laikhal an umnak leh an thuhla simfiang dingah Pakistan Cozah cu an ngen cih asi, John Solicki ih nu kum 83 micun a fapa John Solicki ih suahthei nakding TV sungin a dilih  cumi hnu ah an thahzo thu an rellang salih .Asinan cumi hnuah  a ru hlotu pawlcun  John Solicki hi a damlai tiah an simsal.
Israel Cozah Tuah Thei Hrihlo
Tuithla Feb, 10 ih Israel ram Parliament hril awknak an neih hnuah  Cozah tuahtu ding thu fiang a um thei hrihlo ih. Mizansun ah khan  Likud Party hruaitu Benjamin Natanyahu leh Kadima Party, hruaitu Tzipi Livni cu nazi pahnih sung hmaitawnin an kawm aw ih Cozah tuahtlang danding an rel tlang.  Hi an biak awknak ah hin Tzipi Livni cun Cozah nak tuahtlang ding thu ih an biakawknakah  thurel fiangcat mi an neih thei hrihlo thu a simih biakawk leh a duhthu khal a sim.
Relzo vekin tuikum an hril awknak ah khan Tzipi Livni ih hruaimi Kadima party in Seat 28 anla ih  Benjamin Natanyahu ih hruaimi Likud Party in Seat 27 anla ve ih. Cozah nak tuahthei ding khawpih Seat lathei an um lo ruangah   Likud Party hruaitu Benjaimin Natanyahu hi thlawptu a neitam sawnih. Cu ruangah tui kandung tlawngkai ninga ah khan President Shimon Peres, in Cozah tuahding ah a sawmzo asi. Tu ih Foreign Minister ttuanlaitu Nunau ropizet Kadima Party hruaitu Tzipi Livni, hi Israel leh Palestinian karlakih rualremnak hawlduh mi asiih. Cu ruangah Party dangpawlhin an duhtuk lomi asiih Benjamin Natanyahu, hi Palestinian pawlleh Hamas pawlin Israel Prime Minister a si ding an duhlo zetmi asiih a mahhi tuihlan khalah Israel Prime Minister rakttuanzo mi kawlsen leh mi thinlung ruhzet asi.
Pakistan Ralbawi US Ah Tlawng
Pakistan ralbawi hotu bik General Ashfag Parvez Kayani, cu US ram hotu pawl tawngdingin Washington a thlengzo ih.America Cozah hotu pawl a tawngdingih Afghanistan leh Pakistan thuhla ah America Cozah thar Policy a relpi ding. General Kayani, hi kum 2007 ihsin  Pakistan ram ralkap hotu bik asiih tuitum hi US a tlawng vawi khat nak a si. General Kayani, hi US ah zarh khat a cam dingih. A cam sungah US ralkap hotu pawl leh  President Obama ih Cozah thar Upa pawl a kawm vivo dingih. Afhanistan leh Pakistan ih Taliban Tapung pawl dodan dingkhal a relpi dingih ruah asi. General Kayani hin US ralkap Joint Chief of Staff Chairman Admiral Mike Mullen, US Central Command Hotu General David Petraeus leh Defence Secretary Robert Gates pawlkhal a kawnding.
China Ram Lung Alh Thei Khur Puak Mi 74 Thi
Mizanzing ah China ramih Shanxi Province ih lung meihawl laihnak khur a puak cim ih minung 74 an thi ih midang 114 in hriamhma an pu. Hi hriamhma tuartu pawl lakah minung 5 cu besia zet an asiih an dinhmun a ngaituah umzet tiah Shanxi Hospital Doctor pawlcun an sim. Hi hriamhma tuartu pawlhi Carbon Monoxide an hiplut tuk ruangih buaimi an si tiah an simbet. President Hu Jintao, leh Prime Minister Wen Jiobao khalin  a buaipi tupawlhi theitawk suahdingin an ngenih. Leilung sungih sin lak hrelhmi umpang lodingin famkim ten hawlsuak dingah an ngenbet.  China ramah hin Lung meihawl khurhi a puakcim ttheuih nikum sung lawng hmanah himi vek ruangah minung 3,200 lenglo an thizo ih cumi ih hleiah himi vekih  Meihawl khursung puakih leilung sungih mithi tanglanta  Report lomi tamzet an um lai ih, Tuittum himi khur puakmi sungih sin kumtin ten  Steel Indusrty ih hmandingah lung meihawl Ton  Million 5 hrawng an laisuak ringring asi.
Amnesty In Israel Leh Hamas Pawl Ralthuam Pek Duhlo
Amnesty International cun Israel leh Hamas  Palestinian ralthuam kaipawl hnenah khuiram hmanin ralthuam zuarlut nawnlo sehla a duhthu a sim. Amnesty International cun Israel leh Hamas pawlcu ralthuam do awknak ih an hman ringring ruangah  leh Gaza buainak khalah Israel leh Hamas pawlcun Civil mipawl kutthlak nakih an hmandan fiangtei theihnak a um ruangah  UN Security Council khalin himi khamnak danhi hmangding in thusuahnak nei sehla a duhthu asimih Asinan Israel leh Hamas pawlcun Amnesty International ih duhdan cu UN hrangah pawmdingtlak thu asilo tiah an sawiselve.
Amnesty  cun Israel cu Sii thalo Phosphorus leh ralthuam thalo  US ihsi lalut ih Gaza do nakih hmangah a puhih. Hamas pawlkhal Umzia neilo ih Rocket hmangih Israel kap ringring ah a puh ih a sawiselve. Israel Cozah thupuangtu Mark Regev cun  danding lai vek cekci in an ralthuam hi an hmang asi ti. Ralthuam hriamman danglam ttihnung mi an hmanlo thu simbet in an raldonan khal zoh fiangsal ding asi thu asimve.
Motor Leh Tlangleng Ttaih Aw
Mizansun ah India ram Orissa ih Sombalpur ah tlangleng leh Motor an Ttaih awih minung 14 an thi. Hi  Mawtaw hi Mothar hruai asiih Monu khal a thi telve. Hi Mawtaw hi Mopa ih Inlam an panlai asiih. Hi vanduai nakhi mizan sun siimlam nazi 3:50 ih thilthleng asi.An Ttaih awkhnuah Mawtaw hi Tlangleng Engine ah a tangih tlangleng tlanlai asi fawnih tlangleng in Metre 200 hrawngih hla a hnuk ih Mawtaw cu a kangcih tiah Police pawlcun an sim. Hi mithi pawlhi minung 12 cu a hmunah an thicih ih minung 2 cu siizungah an thi asi.

Comments

comments

Comments are closed.

%d bloggers like this: