Hamas pawlin Israel cu Roket in an kap sal zo

 Surbung Tlang Thuthang
December 22, 2008
By- Pasum
 Hamas pawlin Israel cu Rocket-in an kap sal zo.  
 
  Relzo vekin Israel leh Hamas pawlcun kah awk colh Ceasefire thlaruk sung an raktuah micu kandung tlawngkai ninga ah khan an titawp ih Hamas pawlcun Israel thawi Ceasefire tuahbet an duhlo thukhal an puangbet.Hamas pawlcun tui kandung zarhte leh mizansun colhni ahkhan Israel ramsungih Sderot khuacu Rocket in an kapcih ih Israel khalin ralkap vanzam thawn an kaplet salve ih Hamas pawlmi pakhat a thi thiah Israel ralkap pawlcun an sim. Hamas pawlin Israel thawi Ceasefire an titawp hnu nihnih sungah Rocket 30 leh Mortar bomb ziangmawzat in Israel cu an kapzo. Israel ram humhim naklamih an hotu Shin Bet cun  thlaruk sung Ceasefire an tuahsungah Hamas pawlcun Rocket thatha an raknei man ruangah tuah cun Israel ram thlanglam ih khawpi pawl an kap banzo ati.Himi ruangah Israel cun Hamas pawlih cangvaih nak doletsal dingah timtuah awknak famkim a neizo tiah asimbet.
 
Israel Prime Minister Ehud Olmert leh Defence Minister Ehud Barak khalin Hamas pawl dodingah  nasa zetih timtuah awknak neidingin Cabinet Minister pawl khal an simcih. UN Secretary General Ban Ki-Moon khalin  Israel leh Hamas pawl ando aw asi ah cun mipi vangtlang in an tuartuk dingih cuihleiah an pahnih karlakih rualremnak tuahnak dingah harsat nak nasa zet a thlen ding ati. Culai ah kumthar ih Israel ram hrilawk dingah Prime Minister si tum veve ih Compaign rero tu Foreign Minister ttuanlai Tzipi Livni leh a khingtu Likud party hotu Benyamin Netanyahu cun Prime Minister ih hriltlin an siah cun Gaza bialih um hmunkhuar ralthuamkeng Hamas pawlcu cangthei lodingih tuah antumthu an sim veve. Tuihlan ihsin Prime Minister Ehud Olmert khalin Hamas in Israel akap asi ah cun Israel khalin nasa zetin a kap let veding tiah arak sim ringringzo.
 
US Ralkap Vanzam Missile in Pakistan ramsung a kapsal lala
Afghanistan ramsungih um US ralkap pawlcun vanzam Pilot umlo mahte zuang theipawl Drone vanzam Missile in Pakistan ramsungih South Waziristan ih in pakhat an kah ruangah a sungih um minung 7 cu an thithluh tiah Pakistan cozah thupuangtu cun asim. Hi mithi pawlhi zo ansi ti theih fiang an si hrihlo.  Tuikum sungah US vanzam Pilot umlo Drone in Missile in pakistan ramsungih Traibal pawl umnak hmunhi ttum 20 lenglo a kapzo ih minung 700 lenglo anthizo. Pakistan mipi pawlcun cozah hnenah ramsung humhim nak khohkhah zetih tuahding in an nawr rero.  US khalin Drone vanzam hmangih Missile ih Taleban leh Al-Qaeda pawl  a kah ttheu thuhi a phalo. Pakistan Prime Minister Yousuf Raza Gilani cun  US vanzam in Missile in an ram sung a kap ringring hicu a duhlo thu puangin a sanlet nakding a ngaihtuah rero laithu asimve.  Relzo vekin Taleban leh Al-Qaeda pawlhi Afghanistan ramsungih NATO ralkap pawlin an umnak hmunle ram an lak thluhthlang rero tikah Pakistan ramsungah an tlanlutin umhmun an khuar ciamco ih  US vanzam Pilot umlo pawlin Missile in a kap dawi vivo ttheuih tuikum sungah vawi 20 lenglo a kapih minung 700 lenglo an thizo..
 
IRaq Parliament in thuhluk nak tuahthei hrihlo
 
Iraq parliament cun Iraq ramsungih um US ralkap silo ramdang ralkap 6,000 hrawng umlai pawlcu kumthar July thla cem tiang an umthei dingleh umthei loding cu a reihlan ah a puanfel zum asi.. Himi thuhi tihni sun zarte ah khan anrel khawmnan thutluknak felfai an neithei hrihlo  UN leh Iraq cozah in thurel tlangnak anrak neihmiah US ralkap silo ramdang ralkap pawlcu Iraq ramih an umthei dingcan cu tui thla 31 ah hin cemding asi. Asinan Iraq cozah cun kumthar July thlacem tiang thlaruk an umbet thei nakdingah theih tawp suahin an tawlrel rero.Hi ramdang ralkap 6,000 pawlhi Iraq ih thlaruk umbet theinakding resolution hi Parliament in vawikhat nakah Pass lo hman sehla himi thu ah vote ladingin Parliament khawmawk hi zamrangih kawhsal zum asi. US cun a hranpa te’n Iraq thawn lungkim tlangnak  antuahih US ralkap pawlcu 2011 tiang Iraq ah umdingin Bush leh Iraq PM Maliki cun kandung karah lungkimnak an tuahtlang felzo.Tu ah hin  Iraq ah US ralkap 130,000 lenglo an umlaiih  UK cun Iraq ah ralkap 4,100 a retih ralkap 400 cu hnakum July thla ah kawhkir sal a tumthu a puangzo. Australia, Eatonia, Romania, leh Elsalvador pawlcun tuah ralkap malte fingfing anret laiih South korea leh Japan cun kandung zarh ah khan an ralkap an kokir salzo..
 
Leilung tlunih mi thilti thei 50 hrilsuak mi pawl
 
US New york ihsi leitlun thuthangca larbik pawl NewsWeek cun leitlunih mi thilti thei 50 a hrilsuakih cumi pawllakah US President thar Obama cu a hmin cungnung bikih lang asi.A sangtu ah China President Hu Jin Tao  asiihn a 3 nakah Franch President Nikolas Sarkozy 4 nakah British Prime Minister Gordon Brown asiih 5 nakah  German Chancellor Angela Markel, 6 nakah  Russia Prime Minister Vladimir Putin asi. himi list ih telve maktak cu Osama Bin Laden asiih  North Korea ram Dictotor Kim Jong ll khal a langve. himi list ih hmindang langpawl cu Dalai Lama, US president hlun Bill Clinton, leh a nupi Hillary, Iran mi Ayatollah Ali Khemenei, Saudi Arabia lal Abdullah-bin- Abdul Aziz-al saud,  America ralkap hotu General David Petraeus, Iraq  Prime Minister Nouri al- maliki, US House Speaker Nancy Pelosi, New york Mayor Michael Bloombery, Pope Benedict, XVI, Media milian Ruper Murdoch, leh Show host Oprah Winrfrey, pawl an telih  India miah  Congress President Sonia Gandhi leh  Bollywood Superstar Shah Rukh Khan ih hminkhal a langve. Leitlun thilti thei lakah Sonia Gandhi hi 17 nak asiih   Shah Rukh Khan hi 41 nak a si, Pakistan ralkap hotu lu an ram Nuclear ralthuam kilkhawitu Ashfaq Parvez kayani cu hi list ah 20 nak asi..
(Visited 39 times, 1 visits today)

Comments

comments

Comments

%d bloggers like this: