Hamas Hotubik Gaza Tlawng

Exiled Hamas, Islamist hriamhrei keng mihel phuaih pakhat, ih hotubik Khaled Meshal cu mani Tlawngkai Ningani, 7.12.12, ah Gaza khawpi ah a leng. Hihi Gaza ah Hamas hruaitu pakhat in 2007 kum ihsin a hmaisabik a tlawngsalnak a si.

Hamas hruaitu Meshal hi a nauhak lai-ah West Bank ah  a um ih, cuihsin Jordan ah 1967 kum ah a  tlan. Cun 1975 lawngah West Bank ah a tlawngsal thei ih, Egypt ram Rafah ihsin a ra ih, Gaza a pal phah ah, West Bank leilung cu a hnam ta dah.

Meshal cun, “Hihi ka hrangah santhuanthu sungih ngankhum a tlakmi ni a si. Atu ahcun pathian in keimah hi Palestine ram hrangah martyr tuar ding dinhmun tiangah in ret. Palestine ram hrangah veili piannolh in rampi zalennak kan ngah ding bang sehla piannolh ka duh tiin pathian hnenah thla ka cam ṭheu. Tuni ah Gaza cu kan kut ah a um zo ih, pathian in ni khatkhat ah Ramallah, Jerusalem, Haifa, le Jaffa pawl khal hi in pe leh ding,” tiin Gaza ih amah hmuaktu mi burpi hmaiah thatho zetin a sim.

Meshal hi West Bank ihsin a tlan hnu ah Arab ram pakhat hnu pakhat ah a umkual ṭheu. An sungkua cu West Bank ihsin, Jordan ah, cun Kuwait ah an um. Cule 1991 ah Persian Gulf ralpi, Iraq pawlin Kuwait an lak ruangah, a tho tikah Jordan ah an kirsal. Cuticun Hamas Islamist helphuaiah ah a lut ih, 1999 kum ah amah le hruaitu hrekkhat cu daan pahbal pawl tiin an dawi ih, Qatar ah an tlan. Cun Qatar ah 2001 tiang a um ih, cu hnuah Damascus khawlipi, Syria ram ah thlahra sung a um. Cun atu ih Syria ramsung doawknak ruangah Qatar ram ah a tlan lala.

Tuni  Zarhteni, 8.12.12, ah Meshal cun Hamas dinhnu kum 25 kimnak ah kan dung thla ih Israel thawn doawknak ih an nehnak thu phuangin, Gaza ih um Palestine mipi hmaiah thusimnak a nei ding.

Comments

comments

Comments

%d bloggers like this: