Hakha Ih Thinglamtah Bal Lo Dingin Acozah In Thutluknak Tuah Sal

image

January 31, 2015

Chin ramkulh Hakha khua luhnak ih phun mi Thinglamtah bal dingih thupek mi cu Chin ramkulh cabinet cun siatbal sallo dingin January 30, 2015, cabinet thurelnak ah thutluknak an tuah fel zo tiah thu kan dong.

Cabinet thureltlunnak cun himi Thinglamtah thuthawn pehpar in thutluknak pathum; Khristian pawl hrangah eka thum pek ding, pahnihnak ah Hakha Christian Ministers Fellowship hminin hi hmun hi dilnak tuah haiseh Rev. J Biak Tin Sang ih pek mi hmun a silo, pathumnak ah Budhis pawl khal hi hmun kiang ah eka thum hmun pek ve ding ti pawl tla an si tiin Sumtuah Minister Ram Mang cun the Hakha Post hnenah a sim.

Thinglamtah hi a Sanlam pi 42, a kauhlam (aphei) pi 32, a thuklam pi 12, a sahlam pi 2 bial thawn a kiangkap pawl mirang leilung, cuaipia pawl phah ih dawl a dawl mi a si. March 1, 2014 ah rak tuah thok a siih July 23, 2014 ah an tuah ṭheh. January 13, 2015 ah hi thinglamtah a phuntu Pu J. Biak Tin Sang hnenah Chin ramkulh acozah in daan lovek ih sakmi a si ruangah January 31 hlanah nan siatbal thluh a ṭul a si tiah thu an rak pek mi a si. Myanmar rampi acozah hin kum 1987 ihsin Chin ramkulh ih Thinglamtah pawl siatbal an rak thok ih tu ni tiangah thinglamtah 13 lenglo an siatbal zo.

Thinglamtah siatbal ding duhlonak hi Hakha khawpi ah February 2, 3 sh neih an tum ih Thantlang khalah Feb 3, 2015 ah neih an tum ve. Yangoon khawpiih um Chin mino 300 lenglo pawl khalin January 29, 2015 ah Yangoon khawpi Sule pardum kiang Yangon City Hall ah phazawngdain vannak thawn duh phorhnak an rak nei.#

Comments

comments

Comments

%d bloggers like this: