Hakha Family In New Delhi Ah Bawhlung Sit Puai Tuah Tum

New Delhi, Kawlram raltlanpawl ih hman theumi kumkhat veikhat lehnak puaipi cu thaisun 15 November 2010 ihsin 20 November 2010 tiang “Hakha Family” pawlih hohanak in an hmang ding tiah New Delhi ih kan CT palai hnen ihsin thu kan dawng. Himi lehnak ah bawhlungsit le volleyball pawl a um ding. Bawhlung sittu ding team 16 lenglo an um thu khal kan dawng bet.

Volleyball group ziat an um ding ti lawngte an thei thei hrihlo tiah kan palai cun a sim. Bawhlungsit laksawng pakhatnak ding hrang ah India Rupees 5000 a si ding ih, apahnihnak hrangah Rupees 3000, a si ding. Cun, bawhlungsit thiambik mi pakhat thlansuah ding a siih a laksawng ding ah Rupees 500 a si ding tiah an sim bet.

Hakha Family pawlcun bualrawn kiangkap ih Lai rawl le Kawlram ih ngaizetmi rawl, ei ding a phunphun zuar ding an sian zo thu khal mipi theih ding ah an phuang. Lehnak zoh dingih ra suak aicun a kiangkap thilri zoh ding le rawl ei dingih a ruaktu mipi an tamsawn tiah kan CT palai hnen ah an rak sim bet.

“Himi puai sunglawi ra hmang ding ah UNHCR Chief of mission kan sawm” tiah Hakha Family ih tangkai zetih hnatuan rero Salai Tluang Za Nawl hnen ihsin thu kan dawng bet. Salai Tluang Za Nawl cun himi puai hrangah sumpai bawmtu kan neilo ih mate tanlaknak ih tuah kan si tiah a sim.

Buai Phang!

Dr. Tin Shew & Salai Thang Luai liamcia BCRC puai

Kum tinten mipi thawiaw an um theu ruangah tui kum khal buainak na menlo a suak sal lala ding an zum thu New Delhi ih mipi pawlcun an rel supso. Mipi pawlcun nikum khalah nasazetin mipi an sualaw zo ih tui kum khal kan mualphoni thotho ah a cang ding tiah buai phangtu pawlcun an thinharnak an sim. Asinan, CT palai le Salai Tluang Za Nawl an biakawknak ahcun Falam, Hakha le Tidim etc. pawlih sin palai pa(2) ciar kan thlang suak ih cumipawl in ziangkim an uk theh ding tiah an sim.

Ni kum ahkhan New Delhi hruaitu upapawl hmai ah thihnai suahaw in kan thawiaw ih tui kum UNHCR hotupawl hmai ih kan thawiawk sal lala ahcun kan Chin mipi mualphonak asah sinsin ding tiah a teltumlotupawl cun an sim. Asinan, Hakha Family lam ihsi thu kan dawn daan vek asile, nasazetin thlacamnak thawn le mipi buailo ding ah community tin kan cahaw zo ruangah buainak kan tawng asikhalle mah le community palai pawlin mawhphurhnak an la ding tiah an sim ve thung.

Hakha family hi Hakha mipi hmun dangdang ihsi tawngaw khawm an si. Tulaifang ah mi 300 lenglo kutsih khawm in hna an tuan khawm. Hakha family hotu pawl hi president ah Salai Van Hmun Lian asiih secretary ah Salai Van Hre Lian pawl tla hi an si. Hakha Family pawlcun himi puai sunglawi tak hin Chin mipi lungrualnak suah hramseh timi hi an saduhthah a si.

Kum tinten BCRC pawlih hohanak in winter game hi tuah theu asinan buainak a tamtuk ruangah an tuah sunzawm nawnlonak a si.

——————————————————————————————————————–

(Visited 40 times, 1 visits today)

Comments

comments

2 Comments

  1. Um Um Um….

    Duh hlah eee…………..

    An buai lala ding a si hi aw!

  2. Kan chin mi thawn biak aw thei ka duh ve..

Comments

%d bloggers like this: