Hakha Ah Chinramkulh Ih Ahmaisabik Bulpak TV Channel Suah Thok Ding

11054787_803193826401922_9149908934955306345_n

Lal Nun Uk

Chin ramkulh ih hmaisabik bulpak TV Channel in tualsung thuthang pawl June thla ihsin thok Hakha ah an suah thlang ding tiin thu kan dong.

“Hmai June thla ihsin thok Hakha khuapi ih thilcang mi tete pawl, harhdamnak le Hakha peng ih hmun langsarnak pawl zuk in tualsung thuthang kan suah ding. A thoknak ahcun nazi mal te lawng kan suah ding. Neta len Chin ṭong a phunphun in nazi hrek ciar in suah thei kan tum” tiah Hakha hram bun mi Ronal Vision Cable Service neitu Salai Samuel Tial Than Cung in CT media hnenah a sim.

Hi cable service hi khua nu khua pa le ramkulh cozah ih thapeknak in ramri ṭhansonak timi thulu thawn ramdingkhawm pehtlaihnak zung ah theihthiamnak thawn tualsung TV kan suah theinak a si tiah a sim bet.

“2014 September thla in 2015 kum thok tiang tualsung thuthang ka zuk ciami pawl kha zarh khat vei khat kan kuat. Cumi vedio kan kuatmi sung ah CNF hotu Salai Lian Hmung Sakhong interview mi tiang a tel. Sinan ramkulh cozah nih hivek thu cu than hram hlah uh, thu hla hi daan vek ih hminkhummi a si lo tikah ti’n zaangfah in dil hnu tualsung thuthang suah kan cawl” tiah Hakha hrambun Chinland Post Journal Chief Editor Salai Mang Hre Lian in a sim.

Ronal Vision TV channel zoh a duhtu cun hmaisabik cet bunnak hrang thawng hra pek a tul ih thla tin fee thawng nga pek a si.

“Cabel hri thawn lakmi a si ih san cu a man nawn lo pan teh. Nan kan dinhmun thawn khaikhin tikah olsam te’n Channel phunphun kan zoh thei tikah a tha ve ko” tiah tualsungmi pakhat in a ti.

Ronal Vision TV Channel hi 2013 December thla in Hakha khuapi sungah an rak suah thok ih tu laifang ah Channel 43 an suah rero.Channel 43 sungah ramsung ramleng thuthang pawl, nauhak zoh ding tha Cartoon zuknung le zuknung a phunphun, sport pawl khal a tel. Hi Channel hi India ram Air-tel company ih channel 21 an leimi a si ih cun ramsung channel a lak ih an suahmi pawl khal a tel theh.“Falam le Thantlang khal kan pek thei ko. (Thantlang khal anmah te’n tualsung TV Channel an suah rero zo.) Sinan nazi 24 meisa an ngah ve tik lawngah a cang thei ding” tiah Salai Samuel Tial Than Cung in a sim.

(Visited 372 times, 1 visits today)

Comments

comments

Comments

%d bloggers like this: