Haiti Ramah Bill Clinton

North Korea in A Suah Sal
 
Theihcia zo vekin  nikum December, ni 25 ih North Korea Ralkap pawlin an kaih mi US Missionary, Robert Park kum 28 micu North Korea Cozah in thlakhat hrawng thawng a thlak hnu ah a suahsal.
 
Hi US Missionary, Robert Part kum 28 mihi Pathian kawhnak dawngin nikum December ni 25 ah khan  China ram ihsin Tumen tiva kanin North Korea ramsungah Pathian thuthangttha sim dingin a lutih, a luh veten North Korea ralkap pawlin an ram zohthup tumah puhin an rak kaih mi a si,
 
Asinan a thuhla an zinzoi hnuah thubuai tuahsak salo in mizan zingah an suahsal ih, an suah veten China ram khawpi Beijing Airport ah an kuat cihih,  Beijing Airport ihsin mizan ah US a pancih.
 
Haiti Ramah   Bill ClintonHAITI-UN/
 
Tihni sunah khan  US President, hlun  Bill Clinton cun Haiti ram linghnin tuarih mipi harsa tuarpawl bawmnak hna ttuan rero laitu pawlleh bawmnak pekdan ding thil ttul pawl zohfiang in Hiati ram khawpi Port-au-Prince a fehih, Bill Clinton cun Haiti ram mipi harsat nak tuartu pawlcu a hlan hnakin bawmnak pek vivo an si ding a ti.
 
Bill Clinton cun Haiti mipi harsat nak tuartu pawl bawmnak dingah hna ttuan ding a tamzetih, a sinan duhvekin hna ttuancak a theih lo ruangah Haiti mipi pawih hnenah ngaidam a dilih Haiti mipi pawlih beisei nak vekin  ram dangdang leh US cun Haiti mipi harsa bawmnak ding a tawlrel rero lai ih, Tuisi reilo te sungah mipi umnak ding Inn neilo ih khawlakih um men pawl hrangah umnak ding Inn puan zar ding leh eile in ding tirawl leh thil pawimawh dangkhal a thleng cih ding a si a ti.
 
Iran Foreign Minister, ih Thusim Ram Dangin Zum Lo
 
BBC in a sim nakah ram kilhim nak ding thuhla rel tlang khawm dingih ram dangdang aiawh tupawl tonkhawm awknak Germany ram Munich Khawpi ih fehve tu Iran  Foreign MInister, Manouchehr Mottaki cun Thuthangca latu pawl hnenih a sim nakah Iran Nuclear thiri thuhla ruangih ram dangdang leh Iran ram hmuh thiamawk lo nak cun daihlam a pan zikte a ti tiah BBC cun a sim.
 
Iran Foreign MInister, cun  Nuclear tuahnak thiri Uranium thuhla ah ram dang duhdan thlun dingin Iran Cozah cun thutluk nak a tuah zo thukhal a simih, Asinan Iran in Uranium ram dangih a kuatsuak dingmi cu ziangvak Uranium a si ti leh ziang tikah a kuatsuak ding ticu a sim duhlo.
 
Iran President, Mahmoud Ahmadinejad in Nuclear thilri thuhla ih UN leh ram dang duhdan thlun a tumthu a sim hnuah thudang a relsuak salih, curuangah tui Iran Foreign Minister, Mottaki ih thusim mikhal hi  EU ram pawlcun an zum tuklo tiah BBC cun a simbet.
 
Himi laiah China Foreign MInister, Yang Jiechi cun  Nuclear thuhla ih  ram dangdang in Iran an hro ringring cu ttha a tilo thu a rak simve ih, Iran Nuclear thiri thuhla ngaihtuah tu ram lian 6 pawlcun  Iran ram hnenah zawldawh zetin leh  ngaihtuah nak fimzet thawn Iran dawr sehla a duhthu a sim.
 
Sri Lanka in Russia  Ralthuam A Lei Ding.
 
RIA News Agency in a sim nakah Russia in Sri Lanka hnenah Ralthuam Dollar Million 300 man a zuarding tiah a sim. Sri Lanka Cozah hin a ramsungih Tapung LTTE pawl a do nakah khan kumkhat ih an ramin paisa an hmanmi 17% tluk a hmangcem tiah theih a siih, Cu ruangah sumpai dinhmun ah a tlasiat zetih tuihlan ih China leh Pakistan ihsi ralthuam a lei theumi khal tu ah cun titawp a si. Asinan tu ah a tharin Ralthuam sekkhawl a tumsal rero ih, tui Russia hnenih ralthuam a lei tummikhal a bak ih a leiding mi a si tiah  RIA News cun a tarlang.
 
Tu ah hin Sri Lanka President, Mahindra Rajapaksa cu Russia ah a tlawng laiih, Russia ram hotu pawl thawn ralthuam thuhla ih sumdawn tawnawk nak thutiam an tuah dingah zum a si.
(Visited 31 times, 1 visits today)

Comments

comments

Comments

%d bloggers like this: