Germany Ram Ah TlawngTa Nauhak 15 Kap That

March 11th,2009  

 Germany Ram Ah Tlawngta Nuahak 15 Kapthat

Mizan sunah Germany ram thlanglam Stuttgart kiang  Winnenden ih Albertville Secondry tlawng ta pawlcu. Tlawngta pakhat tlangval kum 17 mi’n Meithal thawi a kah ciamco ruangah minung 15 an thi ih midang ziangmaw zatin hriamhma an tuar. Palik hotu Erwin Hetger, in a sim nakah hi tlawngta kum 17 mihin an mairam nazi 10 hlante ah  raldo nak hnipuan dum a hruh ih tlawng Inn hi a panih tlawng Inn a thlenin tlawng Inn sungih tlawngta pawlcu a kap ciamco ih tlawngta hrekkhat pawlcu tlawng Inn sangkate ihsin an dawpsuak tiah a sim. Tlawng Inn sungah hin mithi leh hriamhma tuartu pawlih thisen cu a luangtamzet tiah asimbet.  Hi tlawng Inn ah hin tlawngta minung 1,000 hrawng an umih. Hi thilsual titu pahi Palik pawlin an dawi ruangah khawpi sung laili ah a tlanlut ih. lehhnu ah cun kahthat asi ih. Palik pawlih kahthat mimaw? a mahte a kapthat aw ticu an simlo. Hi mithi pawlhi tlawngta 9 leh Saya 3 leh an kiangkap ih rakum minung 3 an si. A hmunih vafeh Thuthangca latu pawlcun  himi hmunih buainak cu a rapthlak zetih  tlawngta nu le pa leh tlawngta pawlcu an ttap rero ih thisen luangleh kah awknak hnuhma cu rapthlak zet asi tiah an simih Palik pawlkhal an tamzetih  thil umdan khal fiangtei zohfel leh theihthei loding khawpin a buai asi tiah an sim.  

US Ram Alabama Ah Mi 9 Kap That  

America ram thlanglam Alabama ah Meithal keng mi pakhat in hmunli ah buainak a tuah ve ih Minung 9 a kahthat hnu ah a mahte a kapthat awve. Hi thilsual tuahtu hi a hmin leh a thuhla  dinhmun rel lang asilo ih.  Minung umnak Inn leh Petrol Station, Dawr, leh Mawtaw pawlcu a dangdang in a kapciamco asi. Minung umnak Inn a kahmi sungah nauhak 1 telin minung 5 a kapthatih. Hi minung 9 a kahthat mipawl sungah hin mi hrekkhat cu a mai sungkhat a Pu le pawltla an si. Thuthang pakhat cun hi misual pahin Samson kiangih  a Nu thawi an umnak Inn khal a nawkkangih hi Inn sungah hin an luhthei hrihlo ruangah Inn sung dinhmun thil umdan ziang tivek asi ti thei asi hrihlo ih Inn sungah hin a Nu a thi asi ah cun minung 10 a that tinak asi dingtiah a sim.   Associated Press in a simbet nakah hi misual pahin. Himi hnu khalah  Samson Supply Store leh Service Station a kapsal in minung 1 veve an thisal tiah a simbet. Palik bawi pakhat cun an khaw Deputy Sheriff ih Nupi leh a fate an si tiah asim.  Maple Baptist Church Pastor, Mike Shirah in a simnakah Hi misual pahin Car ih a tlanphah ah a Meithal cu a duhduh nak zawnah a hmetpuak vivo men asi tiah a hmuhthu asimve. Himi sualpa hin  a kiangih Geneva Palik bawi Frankie Lindsay, ih Car hi vawi 11 a kapih hi Palik bawipa hin Meithalih kahtlang theilo mi kawra rakhruh ruangah a thilo a si. Palik pawlthawi an kah awknak ah hin hi misual pahin Meithal vawi 30 lenglo a hmetpuak man asi.  

 India Cozah In Comando Ralkap Kuat   

India Cozah cun Pakistan ramih Indian Embassy leh a hnattuan tupawl kil dingin Comando ralkap 16 a kuat tiah (CISC) Director General N R Das cun a sim,  Hi Comando ralkap pawlhi raldo thiamzet Training tha zetzet nei an siih. An lakah hin Mi upa pawimawh cungcuang to nak mawtaw mawn thiam khal an tel. Pakistan ramih Indian Embassy hi Pakistan ralkap pawlcun an kil nan Pakistan ramhi rambuai  asi ruangah ralrin thilthu ih an kuatbet mi asi. Hi vek thotho in Nepal ramih Kathmandu khawpi khalh Indian Embassy hi  CISF Comando ralkap pawlin an kil thotho ih  Afghanistan ramih  Indian Embassy khal  ITBP Comando ralkap pawlin an kil thotho a si.

  Pakistan Ram Politics Din Hmun  

 Leitlun ram tamzet lakih Tapung pawl dangdang um khawmnak leh buainak Bomb puak leh that awknak Do awknak tamnak hmun Pakistan ramcu a Cozah sungkhal ah Politics buainak nasa zetin an tawng rero laiih. Pakistan ralbawi tumbik General Ashfaq Parvez Kayani cun tuisun ah  Prime Minister Yousuf Raza Gilani a tawngih an ram politics buainak leh an ram humhim nakding thu a relpi ih theih asi, Asinan an thurelmi zate in puansuah asilo. Himi laiah an ram President Asif Ali Zardari cu  Iran ram Tehran khawpi ih  Economic Cooperation  Organisation Summit hmangih a fehlai asiih.  Pakistan ramih tlungsal hrihlo dingin thurawn pek asi tiah thuthang a umih. Asinan hithu hi thufiang asi tinak ngaingai cu a neilo.  Pakistan ram buainak hi Cozah lam leh Opposition pawl nasa zetin an dodar aw ih  Politician hrekkhat pawlcun  Pakistan ramhi Ralkap in Cozah nak a lasal menthei ti ih zumtu tla an um…  

 Tikcu hi mannei zetin hmang hram aw

(Visited 36 times, 1 visits today)

Comments

comments

Comments

%d bloggers like this: