General Than Shwe ih cangvaihnak a si pei maw?

General Than Shwe ih cangvaihnak a si pei maw?

Kan dung zarh ih kan ngan zo bangin April 26, 2010 ah Kawlram uktu Bawi pawl cun an sinak an bansan ih, political party ah cangvaih an tumnak thuthang ruangah General Than Shwe ih cangvaihnak men a si thei pei mawi tiah mi tampi cun hlaral ihsin an thlir.

April 26, 2010 ah Prime minister Thein Sein, Home minister Maung Oo, Foreign minister Nyan Win, Deputy Home minister Phone Swe, Hotel & Tourism minister Soe Naing, Electrical Power minister {1 &2} Zaw Min & Khin Maung Myint, Communication minister Thein Zaw, Econimic & Commerce minister Tin Naing Thein, Energy ministerThan Htay, Social Welfare minister Maung Maung Shwe, Finance & Revenue minister Hla Tun le a dangdang (an zate’n 27) pawlih bannak ca an pekmi cu acozah cun a pom zo ih, prime minister Thein Sein cun Union Solidarity and Development Association (USDA party) cu a hoha ding.

2008 ih ‘Daan’ an tuahmi bangin mipi rorelnak (People’s parliament: Lower house), National parliament (Upper House) le States and Regions parliament (State Assembly) ih dinhmun (seat) 25% cu raalkap acozah thuneitu pawl cun mipi hnaihnok ban loin an hrangah an ret zo. Cun, mipi lam ihsin pumkhatnak le tanrualnak pawl dodal dingin anmah raalkap sung ihsin party dangdang vek an run ding suak thei ih, cu pawl cun mipi tampi an run hip saal ding. Cun, khatlam ah raalkap pawl cun dinhmun thazet ihsin anmah le anmah an run bawm aw dingih, a cemnak ahcun ahlan ih acozah hnakin a se sinsin thei ding tiah thuthang ngantu le leitlun huapih ‘politics’ dinhmun thlingthlatu pawl cun an zum.

Raalkap bawi pawl cu an hnipuan sungah zianghman tih ding an nei lo cingin, party dang ihsin thuneihnak le uknak co an tum cu General Than Shwe in mipi a bumnak le raalkap acozah kilhimnak ding a si thei ih, party dangdang pawl cu miphun (Chin, Shan, Kachin tivek..) an si ruangah pumkhatnak ding le nehnak ding lamzin a malter thei. Asinan, hmunkip ihsin raalkap acozah in anmai’ ham cia seat 25% lawng coter thei a si ahcun Kawlram cun democracy rim a thei ban ve thlang ding. – Associated Press

Kawlram ah innsang 180,000 in tidai an sam

Cyclone Nargris tuartu pawl cun kum (2) sung bomnak le zohkilnak a phunphun an ngah hnu ah tidai thianghlim an daih awk lo lai tiah Yangon khawpi ih UN zung hnatuantu pawl cun an sim. Irrawaddy Delta sungih Labutta, Bogalay le Mawlamyine in innsang tampi cun tidai thianghlim daih awknak nasazet an tuar ih, March ihsin May thla zarh khatnak tiangah mi 350,000 hrawngin tidai sam ruangih harsatnak an tong. US$ 6.48 millions thawn bomnak a phunphun tuahsak an si zo na’n US$ 16.16 hrawng an tul lai tiah UN thuneitu pawl cun an sim.

2009 ihsin 2011 sungah US$ 691 millions bomnak pek an si ding ti a sinan tuni tiangah US$ 180 million lawng an ngah hrih. UN thuneitu pawl cun innsang 180,000 in tidai an samzet ih, mi 100,000 cun umnak inn tha an nei hrih lo tiah an ti. Cyclone Nargris cun nazi pakhat ah 160 kilometers ih cakin May 02 & 03 ah Kawlram Irrawaddy Delta cu nasazet in a nuai ih, mi 140,000 hrawng an thi ih, 2,400,000 hrawng cun an umnak an tlansan. – Mizzima

(Visited 57 times, 1 visits today)

Comments

comments

Comments

%d bloggers like this: