Fuurcaan le Laitlang Loriantuan

“FUURCAAN LE LAITLANG LORIANTUAN”

Kumkhat sungah caantthen pathum kan nei,
Thlatang khawsik, thaal nisa le fuur ruahceen,
May thla ne le June thla thok in fuurcaan siar kan thok.
Bawmraang phurin Theidum Haidum kan hung khosuan tapthlang ah.

Lo nawn thlawh ee kan ti Vainim par tim an tuah caan,
Fikfa daartu Khengthawng phurin Lo lamah,
Ramriah rawl cu thaw ngai ci ee thlawhlai lo sung Vauhrial haang,
Tiva tlangih Haanghuh rim, hmui vurvo’n hnaarsung a fang.

Ritkil cu ee kan ti Hrikhau hawkin Thuangthi saar lakah,
Sepsel, Talhkuang aw khawk ruunral tiangin thang,
Vanimpum rawh, hlamhmai le zil note ei ruapro,
Thaw ngai ci ee kan Laitlang suak thlairawl cu!

Khawpawh in ee Vaitlawn Lampi sial ee an ti maw!
Zinmin a tam leivawr huat hai Calreng rim lakah,
Ramrak vahcaan kan fun cite Caangvat hrang,
Sakap pai’ hrang nehthar zawt ol neh tthin khal ol.

Ruahpi ceen ah Kawlhra pawngh ding kan phur kawlhra hri,
Tipuan sin in kan hon silh maw a cuih kawlhra pawng,
Hnahhring ei ding a tam tlimno lakah Ttilva khal tlai hai,
Ruahceen sunah Vainim kang kung cam kan man zo an rak ti.

Faangtan a cu Dawron phurin thlawhlai faang kan sik,
Nihoihpar(sun flower) thawi le thlaamsung faang ciil kan ceem,
Faangthar kanhmui Hlamhmai kio ei kum kan thar,
Vaangtthek holh khal tuarin Vainim kan hon ek.

Mirang nithla siarin October thla kan thlen cun,
Pipu pawlin sim hai thih kan luan ee an rak ti,
Lai kumthar puai(faang-er puai) kan hmang hlunghlai in,
Fuurcaan cem le Thlatang khawsik thok zawnah.

By- Mai Dai Dim

(Visited 42 times, 1 visits today)

Comments

comments

4 Comments

  1. Ka Nau ve..calreng thutla maw na vun cinken.
    Kala pawl in an ei ho khaw(heeee..
    Fangthar te le hlamhmai kio na vunsal cun
    Ka cil Ka dolh khutkhi..lai fangthar hmeh na va
    Ruat thiam ve..Ar sa si hmang maw na vunsal dg Ka ti nan.,
    Na thiam tuk Mai Dai Dim rakzuam na sa aw.

  2. May Myo Moon says:

    thiam na sa

  3. Mai Sokhlei Par says:

    Mai Dai Dim,

    Na bezai ka duh tuk.
    Lailam umtudan na pholang nasa.
    Khavek ngantu pahnih khat lawng an um hrih.
    Rak zuam tento aw maw.

  4. Mai Dai Dim says:

    Ka ca i siarsak tu rualle zate parah ka lungawi. Zuam vivo dingih
    thazaang i petu parah sim cawklo lungawinak ka nei. Zuam rero
    lai tu ka si.

    Mai Dai Dim

Comments

%d bloggers like this: