Fred Lal Hlim Puia Happy Birthday: “Thlatang Zan Mang” Thawn

Salai V Bawi Lian

Kan Chin mipa hlasak thiam lakih awmawi le ngai nuam pawl lakih uarum zetmi, ṭhangthar nonawn fala pawl in a awmawinak ruangih an thihpi duh rero mi Fred Lal Hlim Puia @ Fred tiih theih lar, a suah cam ah “Thlatang Zan Mang” timi Ta HniangÙk ih ngan mi tein mipi hmaiah duhsaknak thawn lawmuarnak neih ding ka sa duh thah.

Myanmar rampum huap Einmet Son Ya ih a rak zuamlai ihsin a hlasak tinte in zohfeltu pawl ih an rak lawmuarnak bik pakhat cu a awsuak dam riahro te kha a si. Kawl hla lawngah cui a aw suah mawi danglam hi a si ko ding tiin karakruah mi cu ka ti sual ta rori ti cu Chin hla a sak mi pawl ngaiin ka fiang aw zet. Chin hla a sak mi lakih mipi pawl ih an uar hleice zet mi cu Sun Ceu hla ‘Dawthniang kan hngak ko’ timi Dika thawn an sah mi kha a si.

Tubai te ah “Ti Rori Cun” timi LBA Youth Conference ih a sak mi ruangah, Chin mi Pathian rongbawltu pawl le sakhuanak uarcuangtu pawl ih titi a ti tam zet. Asinan Fred cun hithu ah kamkhat te hman mipi lam ih soiselnak, lawmuarnak le fakselnak pawl ah a ṭongsuak riailo. Zohṭhimtlak hlasakthiam a nih bang mino kan rak nei hi Chin mi kan van ṭhatnak pakhat a si.

“Thlatang Zan Mang” a hlaphuahtu ih thiamnak le a hla ih mawinak tifamkimtertu Fred ih AW hi ngainin a va um thei lo ta rori ko.

Thlatang Zan Mang timi hla cu, Chin Hill Resettlement, Falam Phunsang Tlawngta Pawlkom, Kalay pawl ih tuah mi sungta a si. Album sung ahcun hla 11 nak a ne tabikah a um.

A hlaphuahtu pa ih hlafang mawizia hi! A mawi tuk fahran lawman ee! A hlacaang pawl ngan lo in ka vawn um thei lo. Hivek tluk ih zuun hla mawi kan rak nei theihi thinlung muril khalin a ruat banlo. Cui hlamawinak tifamkimtu Fred a rak um betbet hi! Zuunngai lungleng ih lunglen sicuang siloin, a hla le a saktu ih thiamnak ruang rori hmanah lungkuainak tham cu a tling ko.

Mirang hla pawl an ropit zetnak cu an hlafang pawl hi Awthluk cemrual (rhyme) mawizetzet ih an ṭialter thei mi hi a si. Kan Chin hla khalah kan nei ve ta! Hitin Ta Hniang Uk cun “Thlatang Zan Mang” timi hlafang pawl cu a ngan ih Fred cun fiang riahro le dam diahdoten a vun awi…

“Thlatang Zan Mang”

Phuah: Ta HniangÙk
Sak : Fred Lal Hlim Puia

Thinlung me remzo hnu a thar,
Thlatang ṭim zaan dai hnuai ah;
Pom ding nei lawn lileng tuar har
Nunnem nang na liam hnu ah;

Hngilh theih ni a um ding maw,
Ka ṭang ih na bei lai kha;
Na lungril sung dawtnak I hlan lo maw,
Tuar a har lungthin a na;

Duhthusamnak men maw ka co;
Kirzai ni um lo in an hlo;
Na bawtcat ṭheh zo maw,
Kan thuanthu ziang ruangah saw,
Thlatang zaan mang bang an hlo ding;
Kei ka siang hrim lo nang ṭhen ding;
Sihmansehla a tu an ziam ral zo
Zaan mang men bang in….

Caan le ni an her liam nan,
Mithlam ahcun a dang lo;
Duhnak biahthu tinkim kan hlan lai caan,
A tu ahcun khawiah an hlo;

Hngilh theih ni a um ding maw,
Ka ṭang ih na bei lai kha;
Na lungril sung dawtnak I hlan lo maw,
Tuar a har lungthin a na;

A sak thok a Aw a lak thokihsin lungthin tak tein a awi diahdo. A chorus caang.. ‘Thatang zaan mangbang an hlo ding’ ti a vun sal fangih a aw thluk mawiter dan le a caangkhatnak le hnihnak a vun thok dan ta hrimhrim men hman in a hla ih mawinak a va ti famkim em!

A caang tin ah mawinak tin le duhnunnak, lunghnonak AW a vun telh theithluh mai hman hi a mawi fahran rori a si ko. Hivek ih Chin hla mawi le lunghno aw zet ih a sak theih timi hman ruah har ding um tiang khawp in a sak mawi thei. Fred ih AW mawinak le mino pawl a hiipnak bik pakhat ih ka ruah mi; Uar a umnak le zohṭhimtlak a sinak pakhat cu rittheih thil ih a thianghlimnak hi a si. Kuak, Kuva, Zu le sivai pakhat te hman tham lo, harhdamnak ngai thupi zet mi tlangval a si.#

NB: A hla hi original online ih ret sian a si hrih lo ruangah Fred ih a rak tuah sung mi ka rek telh cih.. rak ngai phah ve aw..

Comments

comments

Comments

%d bloggers like this: