France in Mali Ram Bomb Thlak Bet A Tum

73363_477936948918702_1884479205_n

Pu Khuang Lian Sum

Theicia zo vekin kandungzarh tlawngkai ni 1 zanih Mali ram  khawpi pakhat Diabaly cu Al-Qaeda Tapung leh a thurualpi Tapung dang pawl ttangkawpin an lak ruangah himi khawpi lakir salih runsuak sal dingih France  Cozah  ralkap cun raldo nak Vanzam hmangih Mali ram  Diabaly khuacu zanvarih bomb a thlak ciamco ih, zanvar  bomb puak leh meithal puak rehlo in an kapaw.

Himi ruangah West Africa ram pawlih ralkap bawi pawlcu  Bamako ah tongkhawm aw in  Mali ramah ralkap 3.300 kuatlut dingin an relkhawm. United Arab Emirates in tlawnglai France President, Francois Hollandes khalin France ralkap pawlin Mali ramih an hnattuan micu thil pawimawhzet a siih, khawmual ralkap leh Vanzam ralkap khal kuatlut be vivo an si dingtiah a sim.

Kandung zarh tlawngkai ni 5 ihsin France Cozah cun Mali ramah ralkap a kuat lutih , Islamic Tapung ttangrual pawl  Africa ram saklam ih Al-Qaeda pawl leh AQIM leh Mali ram Tapung pawl MUJWA pawlin Mali ram  Cozah hlawnthlakih lak an tum ruangah himi runsuak dingih France cun a ralkap a kuatlut nak a si.

Ram dangdang Senagal, Burkina, Faso, Niger, Nigeria leh Guinea ram pawl khalin France Cozah hi bepop ringring in  Mali ram runsuak nak dingah  ralkap kuatlut ve an huamthu an simih, US Cozah khalin France Cozah bepop  in a ttul ah cun  bawmdingih ralkap kuatlutve a ello thu a simve. UN cun Mali ramhi minung 2.00.000 lenglo in an suahsan zoih, tuizarh sungih an do awknakah minung 30.000 lenglo in an suahsan salzo tiah a tarlang.

Israel Ralkap Pawlin West Bank ih Palestinian Pawl In Dawi Suak

Israel ralkap pawlcun West Bank ih  Palestinian pawlin umsung nak puan In an zarsungmi pawlcu siahbal sakin an mahkhal an dawisuakcih ih, himi puan In Palestinian pawlin an zar nak hmunhi Israel Cozah in Juda pawlin umnak dingih In sak a tumnak hmun a siih, hihi Palestinian pawlin an duhlo zia langter nakih  puan In zarih an um cilh nak a si.

Kandung zarh colhni sun khalah Israel ralkap pawlin  Jerusalem saklam E-1 an timi hmunih sin Palestinian minung 50 hrawng a rakdawisuak zoih,  hihi Israel Cozah in Juda pawlih umnak ding In 3,000 sakbet a tumnak hmun a si ruangah hiti vekih Palestinian pawlin puan In zarih an um khawm a si ah cun  midang khal a hipkhawm vivo dingih buainak sosang a suak thei tiih Israel Supreme Court in siahbal sak dingih thupek a suah hnuah siahbalsak an si.

Himi hmun pawlhi Palestinian pawlcun an ramah an sal ringring ih kum 1967 ih an do awkihsin Israel cun a mairamah lalutin an mairam cei in an cei ringringih, himi Jerusalem saklam ih E-1 an timi ramhi Sq Km 12 hrawngih kau a siih, Palestinian  pawlin an khawpi dingih tuah an tummi East Jerusalem khawpi lutnak kiangte ihum  asi ruangah hmun pawimawhzet a si. tuah hin West Bank leh East Jerusalem ah  Israel Juda minung 5,00,000 hrawng an umih Palestinian pawlhi himi hmunah minung  Million 2.5 hrawng an umve.

Algeria Ram Tapung Pawlih Miruk Mi Runsuak Thei Hrih Lo

Algeria ram  Islamic Tapung pawlin ram dangdang minung an rukhlo mi pawlcu runsuah tumin Algeria Cozah ralkap pawlcun an kulhih raldo nak Vanzam hmangin an hual rero nan  Tapung pawlin an miruk mi pawl an ret khawmnak Amenas Gas tuahnak hmunih an do awknak cun thil danglam a suahter thei hrih cuanglo. Himi hmunhi Libya ramri hmun kelkawm fiamhrial zetih um  asiih, Algeria Foreign Ministry Office cun Tapung pawlin an miruk mi pawlhi himi hmun ah an umpi laiih runsuah tumih ralkap thlah vivo an si tiah an tarlang.Tapung pawlcun an miruk mi pawlhi ram dangdang mi minung 41 an si tiah an tarlang. Algeria Cozah ralkap pawlcun himi pawl runsuak tumih tihni zan ihsin  Vanzam thawn an kapih  Tapung 4 leh an miruk mi minung ziangmawzat an  kapthatcih.pang.

APS NewsAgency in a tarlang nakah hi an kah awknak nakah Britain mi minung 2 leh Phillipines ram minung 2 an thi tiah a tarlangih. tuizarh tlawngkai ni 3 ah khan Britain mi 1 leh Algeria ram minung 1 veve cu Tapung pawlin an Bus tomi  Ambush an tuah nakah an rak thizo. Tapunglamih thusuah nak an tuah miah  mizan zingih Algeria  Cozah ralkap pawlin Vanzam hmangih an kah nakah  an miruk mi minung 14 leh Tapung 15 an kapthat tiah an tarlangih, Tapung pawlcun an miruk mi pawlhi hmunkhat  ah retkhawmlo in hmun dangdangih an ret khawmthu an simih, Japan ram mi minung 10 lenglo an telthu khal an simtel.

Kyodo NewsAgency in a tarlang nakah Japan ram minung 3 cu an tlansuak zo ih minung 14 an hlolai tiah an tarlangih, himi thuah Japan Chief Cabinet Secretary,  Youhihide Suga cun  Algeria Cozah in himi pawl runsuak nak dingih ralkap cahnak a hman maicu pawi a tithu a simih, Tokyo ih Algeria Ambassdor khal himi thu relpi dingih a ko hngehnge. himi laiah Norway Prime Minister, cun himi pawl runsuak nak dingah Algeria Cozah cun ralkap cahnak hmanmai locu tidingdang a neilo tiah  asimih, Tapung pawlin rukmi ah Norway ram minung 8 an telve thukhal a simtel.

Tapung pawlcun mihi pawl an ruk naksancu Mali ram buainak ih France ralkap pawl an rolhawk ruangah phuba laknakih an tuahmi a si thu an simih, Algeria  Interoir Minister, Daho Ould Kabila cun  Tapung pawlcun an miruk mi pawl thawn Algeria ram suahsan duhkhal hai sehla Algeria Cozah in rem a tilo ih Algeria Cozah cun Tapung pawl thawi biakawk nak neih khal a tumlo tiah a sim.Tapung pawlhi Algeria ram mi thotho Al-Qaeda pawl pakhat hruaitu Mokhtar Belmokhtar ih hruai mi an siih, nikum kumcem zawng hrawngah an hotu dangthawn an remawlo ih, cumi ihsin  pawl dang Al-Qaeda in The Islamic Maghreb(AQIM) timi pawlthar  dinmi an si.

Boeing 787 Dreamliner Vanzam A Ttha Tawk Lo

Japan ram khualtlawngphur Vanzam Company tum zet 2 cun  Boeing 787 Dreamliner Vanzam an leitharmi pawlcu a ttha tawklo ih an theih ruangah zuangsuak ter ngamlo in an cawlhter hrih.hi vanzam Boeing 787 Dreamliner hi a battery an thawklo ruangah buainak leh harsatnak  tumpi cu an tonglo nan zuangsuak terlo in dinter a siih, All Nippon  Airways khalin himi Vanzam a neihmi 17 pawlcu an buaibai deuh ruangah zuangsuak terlo in a cawlter zoih , cumi hnuah Japan Airlines khalin himi Vanzam 7 a neihmi pawlhi a cawl terve a si.

Boeing kutsuak Vanzam  Dreamliner suakthar hi a cangkangin a nuamzet nan tui naite hrawng ihsin a ceet lamah thil fello hmuhding a um phahphah ruangah a mualpho nasa ih, Oil a put ti leh a mawngtu Pilot umnak sangkate thlalang a khing ti leh a brake a tha tawklo ti leh electric fello ruangah meisa khu a suak tipawl a siih, Japan ramsung lawng hmanah ni 10 sungah voi 6 lai buainakm tete a tongih an buainak ton mi tete cu an bangawlo nan  kandung zarh khalah  Boeing 787 Dreamliner hi US ah hmanhmawh zetih ttumter a sizo.

Hi Boeing 787 Dreamliner Vanzam hin  Lithium Ion battery a hman ruangah a thatawklo deuhih rel a siih, Asinan Airbus A-300 khalin himi battery thotho hi a hmangih  Vanzam thar  Airbus A-350 khalin himi battery thotho cu a hmangding.

Comments

comments

Comments

%d bloggers like this: