Football Club (Premier League) sunglam thu lawrkhawm

1. David Luiz: Benfica hnuai ah zam thazet ih lek ringringtu David Luiz cu Premier League le La Liga hotu pawlin can reipi an thlingtlak hnu ah hmalam can ahcun Manchester United, Chelsea, Manchester City, Real Madrid le Barcelona cun lei an tum ti a si. David Luiz hi Brazil ram tleirawl kum 23 lawng a si ih, sterling pound 25 million lai a man thei.

2. Wayne Rooney: European club tampi in Old Trafford (Man U) ihsin laksuah an tum rero lai ah Rooney cun Manchester United suahsan a duh lo thu a sim. Asinan Spanish Club neitu pawl cun Old Trafford hotu pawl hnenah Rooney zuar suak dingin an rak lem ve rero. Manchester United hotu lam pawl cun World Cup a theh hlan ahcun Rooney thuhla zianghman rel a ngah lo ding thu an rak sim zo. Rooney hi an zuar suak a si ahcun sterling pound 60 million a man thei ding ruangah amah lei tumtu hrang ahcun ruah awk ciamco a tul ding ti a si. England aiawhin World Cup ih lektu ding pawl hril suahnak ah Fabio Capello cun ‘Rooney , John Terry, Ledley King, Jamie Carragher pawl cu a ngan lut zo na’n Rio Ferdinand cu WC hrangah a fit lo ding tiah a ti. Capello cun England team hrangah mi 30 a hrilsuak dingih, June thla zarh khatnak ah mi (23) cu a hrilsuak sal ding.

3.Fernando Torres: Liverpool (Anfield) ihsin zuar thei a si mai ding. An boss Rafael Benitez cun a zohfiang duhtu le sumpai nei tam deuh a melh thok thlang. Manchester City cun a run beisei ih, thuhla nei tambiktu khal an si. Chelsea khalin rin lozet in a run longsak men thei tiah ruahnak a um. Sterling pound 50 million cu a mal lozet, Torres lei ngam cu a tam lo ding. Manchester City cun Torres leinak dingah sterling pound 40 million ihsin 20 million tiang thum theinak a hawl ding. Asinan Man City boss cun mankhungzet ih mi pakhat lei hnakin man olte’n mi 2 lei thei a duh sawn ding.

(A Par ah, Click)- Liverpool Club cu Tuluk milian kutah a thleng pei maw?

4. Gonzalo Higuain: Argentina tlangval, Real Madrid ih a um lai hmuahhmuah ah goal (20) rori thun theitu a sina’n a hmailam caan ah ‘can tha’ a co tuk lo ding a bang. Premier League lam ih lek dingin Chelsea cun a beiseizet ding tiah zumnak a um. Kum 22 lawng a si lai na’n sterling pound 30 million a man daih ding.

5. Raul : Tottenham boss Harry Redknapp cun Spain lam ih lek ringringtu Real Madrid ih Raul cu a hel vutvo thlang. Experience nei thazet a si ih, amah rori a lek thei lo khalah a lehpi pawl hrangah a thathnem thei a zum.

6. Sergio Aguero: Spanish club ihsin a thawn lohli a zum umzet. Argentina ih mino thathozet a si ih, Chelsea in a lakluh a zum umbik ding. Sergio hi Diego Maradona ih makpa (son-in-law) a si ih, Atletico Madrid ah a lek ringring. Aman hi a tlangpi thu in sterling pound 40 million hrawng a si thei ding.

7. Martin O’Neill: Aston Villa boss Martin O’Neill cu club neitu thawn rem awk lonak an nei ruangah hmailam season ahcun a suah ding a zum um ih, amah aiawhtu dingah Croatia couch Slavan Bilic cu tuanvo pek a si ding a bang.

8. Steven Gerrard: Liverpool captain Steven Gerrard cun a umnak Anfield cu a suahsan ngaingai thlang dingih hmailam ahcun Manchester City hrangah a lek thlang ding. Gerrard hi sterling pound 40 million in Man City cun a lei. Liverpool cun Ranger ih defender Danny Wilson cu sterling pound 2.5 million in a lei ve.

9. Javi Martinez: Spanish club ‘Atletic Bilbao’ ih midfielder Javi Martinez cu Chelsea le Real Madrid in an melh rero na’n sterling pound 15 million lai a man ruangah an ruat aw rero lai.

10. Shaun Wright Phillip: Manchester City ih Shaun Wright Phillip cu Arsenal cun sterling pound 5 million in an lei zo. Arsenal defender William Gallas cun hmailam kum (2) sung Arsenal ih lek bet ding cu a lahkhah an thanter lo ruangah a pom thei loih, hmun dangah thawn a tum ding.

11. New Castle boss Chris Hughton cu club neitu pawlin hmailam can hrangah sumpai zianghman an nei lo tiah an sim lawk. Premier League hrangih an timtuah vivo lai ah New Castle cun thuthang danglamzet an nei lo ding a bang.

Premier League Champion Chelsea:

Kan dung zarhpi zaan (May 09,2010) ah Chelsea in Wigan cu 8-0 ih an neh vete’n Premier League Trophy cu an ngah ih, an hrangah vei (4) champion laksawng an ngahnak a si ding. 2009-2010 season sungah Chelsea cun Manchester United cu tum (2) rori (Nov. 08, 2009 le April 03, 2010) an neh ih,  Arsenal khal Nov. 29,2009 ah goal (3) rori in an rak neh zo. March 27,2010 ah Chelsea cun Aston Villa cu 7-1 in an neh ih, May 02,2010 ah Liverpool cu 2-0 in a neh. 2008-09 season ah Chelsea hin sterling pound 44.4 million lai an rak sung (lose) a si kha!

Premier League ih Champion Trophy ngah zotu pawl:

1888-89 ihsin an rak thok zo mi a si ih, a hmaisabik kum ah Preston North End timi club cun champion trophy an rak co dah. Cumi hnu ah tuni tiangih prophy ngahtu pawl cu: {A}Trophy (1) lawng ngahtu: Portsmouth, Sheffield United, West Bromwich Albion, Ipswich Toawn, Nottingham Forest pawl an si. {B} Trophy (2) rak ngah dahtu pawl cu: Preston North End, Tottenham Hotspur, Derby County, Manchester City, Burley pawl an si. {C} Trophy (3) ngah dahtu pawl cu: Wolverhampton, Wanderers, Leeds United, Huddersfield Town, Blackburn Rovers pawl an si. {D} Trophy (4) lai rak ngah dahtu pawl cu: New Castle United, Sheffield Wednesday, Chelsea (tui’ kum telin) pawl an si. {E} Sunderland in Trophy (6) lai a ngah zo ih, {F} Aston Villa cun Trophy (7) lai a ngah dah zo. {G} Everton cun Trophy (9) lai a ngah zo ih, {H} Arsenal cun Trophy (13) lai a ngah zo. {I} Liverpool le Manchester United cun Trophy (18) veve an rak ngah zo.

Goal thuntu le thun zat

2009-10 Premier League ah Chelsea striker Didier Droba cun kan dung zarhpi zan ih Wigan thawn an lehnak ah ‘hat trick’ a tuah ngah ih, Golden Boot laksawng a ngah ban ding. Chelsea cun 2009-10 season sungah goal 103 an thun. Himi season sungih goal thun tambik pawl cu: (1) Didier Droba (Chelsea- goal 29), (2) Wayne Rooney (Man U- goal 26), (3) Darren Bent (Sunderland-goal 24), (4) Carlos Tevez (Man City-goal 23), (5) Frank Lampard (Chelsea- goal 22), (6) Jermain Defoe (Tottenham) le Fernando Torres (Liverpool) cun goal 18 veve, (7) Cesc Fabregas (Arsenal- goal 15), (8) Emmanuel Adebayor (Man City- goal 14), (9) Gabriel Agbonlahor (Aston Villa) le Louis Saha (Everton) in goal 13 veve, (10) Dimitar Berbatov (Man U) le Florent Malouda (Chelsea) in goal 12 veve, cun Nicolas Anelka (Chelsea) cun goal 11 a thun thei ve.

Comments

comments

Comments

%d bloggers like this: